2 CORINTIOS 6 - Mam of Todos Santos -- Guatemala Unicode

1Nchin akꞌanana tuya Dios te kꞌumlte t-xtalbil. Juꞌ tzunj cxeꞌl ncubsaꞌn nwitza cyey tuꞌn miꞌn tzꞌel cyxooꞌna jnxiꞌ nkꞌumena.

2Cꞌoquel cycyeꞌyena ti toc tuꞌn tyol Dios. Tz̈i Dios te jun xjal cyjulu: “Tej tpon tumel tuꞌn t-xiꞌ nkꞌoꞌna xtalbil tey, e nbiꞌya tyola bix e tzaj wonena. Bix tej tpon tumel tuꞌn tcleta wuꞌna, bix e xiꞌ wonena,” tz̈i Dios. Ja tzunj yol lu nyeecꞌan at jun kꞌij tuꞌn kiikꞌente jun t-xtalbil Dios, bix nxiꞌ nkꞌumena cyey jatzen kꞌij lu.

3Tuj taakꞌen Dios n-oc ncꞌuꞌja tiꞌj tuꞌn miꞌn bint kaꞌ wuꞌna, tuꞌntzen min-al jun xjal baꞌn tjaw yolen wiꞌja, tuꞌn miꞌn tzꞌel t-xooꞌn jnxiꞌ nkꞌumena.

4N-oc wipena tiꞌj tuꞌn t-xiꞌ nyeecꞌana jaxxix jun t-akꞌanal Dios kena. Juꞌ tzunj, tuj taakꞌen Dios niyꞌx qꞌuixcꞌaj wuꞌna tuya pasensya. At maj nimxsen qꞌuixcꞌaj bix bisbajil n-oc weya.

5At maj nxiꞌ tzꞌuꞌn wiꞌja cyuꞌn xjal, bix at maj nchin ocxa tuj tzeeꞌ nuk tiꞌj tyol Dios. At maj cyakbajnin eteꞌ xjal wiꞌja hasta nchi jaw kꞌojl weya. At maj sicninxsen kena tuj taakꞌen Dios cuma cyiwxsen nchin akꞌanana. Bix at maj n-ex juun akꞌbil wuꞌna mintiiꞌ nwatla n-oc, bix at maj ncub npaꞌna weyaj.

6Bix jax juꞌx tuꞌn jun baꞌn nnaabla ncub nyeecꞌana jun t-akꞌanal Dios jaxxix kena. Jiquen jun nnaabla nxiꞌ wiiꞌna, bix n-el nniꞌya tiꞌj alcye jaxxix bix nxiꞌ nnimana. Niyꞌx wuꞌna oj toc cyyajlaꞌn xjal inayena, bix nchin binchana jun baꞌn cye cabtl. Nchix lpewa tiꞌ Espíritu Santo, bix at tkꞌakꞌbil ncꞌuꞌja jaxxix tiꞌ cabtl.

7Tuꞌnj tkꞌumj jun jaxxix tyol Dios, bix tuꞌnj tchicꞌajax tipemal Dios oj t-xiꞌ nkꞌumena tyol, nxiꞌ nyeecꞌana jun jaxxix t-akꞌanal Dios kena. Tisen ke soldado nchi kꞌojl tuya macbil te biybil tuj cymankꞌab taꞌ, bix cyneẍ kꞌilte juntl macbil te makbilte tuꞌn miꞌn chi akꞌ, juꞌxsen nchin kꞌojla weya tuya kaꞌ tuꞌnj baꞌn nbint wuꞌna bix tuꞌnj ncolbil wiiba twitz il.

8Oj t-xiꞌ nkꞌumena tyol Dios, at xjal tzin cybiꞌn inayena, pero at juuntl n-el cyiiqꞌuen inayena. At juun nchi yolen baꞌn wiꞌja, pero at juuntl nchi yolen kaꞌ wiꞌja. Amale tujet tumel nchin yolena, at juun tzin cykbaꞌn ẍtakꞌ kena.

9Amale atet juun xjal tzin cykbaꞌn yaaꞌn jun jaxxix t-xel Cristo kena, pero at nim xjal n-el cyniyꞌ tiꞌj jaxxix t-xel Cristo kena. At xjal cyaj tuꞌn ncub byeta, pero lux kena iꞌtza. Nim o chin iꞌya tuj castiwa, pero minaꞌn cycaman tuꞌn ncuba.

10Tuj cywitz juun xjal, nchin bisena, pero nchin tzalaja. Bix amale tzint cykbaꞌn juun xjal mebe xjal kena, pero nim xtalbil te tyol Dios nxiꞌ nkꞌoꞌna cye nim xjal. Bix amale minttiiꞌ at wuyena, pero at cykilca kꞌinemal at wuyena tuꞌnj mojbabl wiiba tuya Cristo.

11Key ocslal tuj Corinto, ma txiꞌ nkbaꞌna cyey cykilca niyꞌ tuj ncꞌuꞌja, cuma nim n-oc cyakꞌa weya.

12Jminaꞌn tbint jaj tkꞌakꞌbil cycꞌuꞌja wiꞌja, yaaꞌn jweya te cyey.

13N-oc cyakꞌa weya tisen jun mambaj n-oc cyakꞌ tcwal te. Juꞌ tzunj cꞌoquel wakꞌa cyey tisentzen n-oc cyakꞌ cyman cwal cye.

Tja Dios koꞌ, jaj jun Dios iꞌtz

14Key hermano, miꞌn tzꞌoc cylichꞌon cyiiba junx maj cyuya kej xjal yaaꞌn ocslal. Kej xjal jiquen nbint cyuꞌn yaaꞌn junx taꞌ cynaabl cyuyaj xjal nuk kaꞌ nbint cyuꞌn, tisen spiꞌyen yaaꞌn junx taꞌ tuya klolj.

15¿Ti tten at tmojbabl tiib Cristo tuya taaw il? ¿Bix ti tten at tmojbabl tiib jun ocslal tiꞌ Cristo tuya jun xjal min tzꞌocslan tiꞌ Cristo?

16¿Bix ti tten ka ma tzꞌocx jun sant tuj tja Dios? Kej nchi niman Dios mlay tuꞌn at cymojbabl cyiib cyuyaj kej nchi niman sant, cuma najl Dios kxol ejooꞌ ocslal, jxin Dios iꞌtz. Jatxe ootxa e tzaj tkbaꞌn Dios cyej e xiꞌ lpe tiꞌjxin: “Chin najala cyxola bix chin betela cyxola. Chin oquela te Cydiosa, bix chi oquela te nxjala.

17Juꞌ tzunj qꞌuelel cypaꞌn cyiiba cyiꞌ kej xjal yaaꞌn nxjala, tuꞌntzen miꞌn chi binchana j-il nbint cyuꞌn, bix tuꞌntzen cyajbena oꞌcx te weya. Ka cbinel cyuꞌna juꞌwa, chi xeꞌl wocslaꞌna te nxjala.

18Juꞌtzen chin oquela te Cymana jaxxix, bix ejeeꞌy chi oquela te ncwala,” tz̈i Dios, Cawel tibaj cykilca, cye aj Israel jatxe ootxa.