APOCALIPSIS 19 - Mam of Todos Santos -- Guatemala Unicode

Oj tjaw nimset tbi Dios

1Tbajlenxitltzen lu, e xiꞌ nbiꞌna tkꞌajkꞌajel cyyol nimxsen cyajlal xjal tuj cyaꞌj. Cyiwxix e xiꞌ cykbaꞌn:

—¡Jawnexxit Kman Dios! Nuk tuꞌn Dios ma ko clet. Nimsxen tipemal. Nimjxit tbi,

2cuma jiquenxix bix tuj tumel jcastiwa ma txiꞌ tkꞌoꞌn. Ma txiꞌ tkꞌoꞌn tcastiwa jawnex aj paj e xiꞌ tiiꞌn kej xjal twitz txꞌotxꞌ tuj il tuꞌnj tbinchben kaꞌ. Bix ma tzaj tkꞌoꞌn Dios t-xel te xuuj tuꞌnj cycyamecy t-akꞌanal―tz̈i ke xjal tuj cyaꞌj.

3Bix e xiꞌ cykbaꞌntl:

—¡Jawnexxit Dios! cuma te junx maj njaw tsibel jkꞌakꞌ ncub tpaten tnom―tz̈ike.

4Jax juꞌx kej winakcyaja tij cyuyax cyaja jwik iꞌtz e cub mutzkꞌaj twitz Dios kꞌukl tuj jawnex tkꞌukbil tuꞌn tjaw cynimsaꞌn jaxin. E xiꞌ cykbaꞌn:

—Juꞌxit ttena. Jawnexxit Dios―tz̈ike.

5Bix e tzaj tkbaꞌn jun nka tcub tkꞌukbil Dios:

—Cykilca key t-akꞌanal Dios cyuyax key at cynimbil Dios cyuyax key chꞌin bix key nintzaj, cynimsanx Kdios―tz̈i jun tcub nka ttxlaj Dios.

6Bix e xiꞌ nbiꞌna cyyol jun nimxsen cyajlal aj tuj cyaꞌj, tisen tkꞌajkꞌajel jun nimaꞌ oj n-etz wajtzꞌaj twitz xak bix ka oj ntininin cyiw kꞌancyok. E xiꞌ cykbaꞌn:

—¡Jawnexxit Dios! cuma at tuꞌn tcawen Kman Dios tuya cykil tipemal.

7Ko tzalajxix bix ko tenx aleyre bix ko nimsal ja Dios, cuma ma pon tumel tuꞌn tten Jtal Carnel, ja Jesús, cyuya t-xjal. Ma bint cyten t-xjal, tisen oj nbint tten jun xuuj tuꞌn tmaje tuya tchmil.

8Ma tzaj kꞌoꞌn amleꞌn cye t-xjal tuꞌn toc cyxbalen sak bix ntxakakan, te techel ka jiquenxix―tz̈i kej eteꞌ tuj cyaꞌj.

Mejoblenel te Tal Carnel

9Bix e tzaj tkbaꞌn ángel weya:

—Tzꞌiꞌbeqꞌuey cyjulu: “At t-xtalbil Dios cyibaj kej xjal txcoꞌnke tuꞌn cywaaꞌn tuj mejoblenel tej Tal Carnel,”―tz̈i ángel.

Bix e tzaj tkbaꞌntl weya:

—Kej yol lu jaxxix tyol Dioske―tz̈i weya.

10Bix in cub majeya t-xeeꞌ tken ángel tuꞌn nnimsana jaxin. Pero e tzaj tkbaꞌn weya:

—Miꞌn tbinchaya jlu, cuma nuk jun t-akꞌanal Dios kena tisen jay bix tisen ke niyꞌtl ocslal nxiꞌ cykꞌumen yol tiꞌj Jesús. Jyol tiꞌj Jesús junx taꞌ tuyaj yol e cykꞌume tyolel Dios―tz̈i ángel.

Jun xjal tjax tibaj tz̈ej sak

11Tbajlenxitltzen jlu, e wila tej tjket twitz cyaꞌj. Bix e wila jun tz̈ej sak, bix tjax tibaj tz̈ej jxjal jaxxix bix njapan tyol tuꞌn. Tuj tumelxix ncawen, bix jiquenxix tkꞌoj cyiꞌj aj kꞌoj tiꞌj.

12Ke tbakꞌ twitz tisen tken kꞌakꞌ, bix tjax nim corona tuj twiꞌ. Bix tzꞌiꞌben jun biybaj tiꞌj. Min-al jun xjal n-el tniyꞌ tiꞌj biybaj, nuk oꞌcx jaxin.

13Bix toc jun t-xbalen otk cuꞌx meꞌt tuj tz̈iyꞌ, bix Tyol Dios tbi.

14Bix ncheꞌx lpe nimxsen cyajlal kej eteꞌ tuj cyaꞌj tiꞌj, tisen soldado. Toc cyxbalen sak, mintiiꞌ tzꞌil cyiꞌj, bix eteꞌwex cyibaj tz̈ej sak.

15Bix n-etz jun machet binne tten tuj ttzixin, tuꞌntzen tajben texin tuꞌn t-xiꞌ tkꞌoꞌnxin castiwa cye tnom. Ccawelxin cyibaj tuya nim tipemalxin, tisenj jun cylel ncylen cyiꞌ carnel tuya jun bardón cyiw. Cwel tkꞌoꞌnxin tcastiwa binne tuꞌn Dios at cykilca tipemal, tisen oj nbaj waꞌbet uva tuj ttemlel uva.

16Bix tzꞌiꞌben tiꞌj tcux-xin bix tiꞌj t-xbalenxin, jatzen tbi jlu: Rey tibaj cykilca rey bix Cawel tibaj cykilca cawel.

17Bix e wila jun tsanjel Dios tuj cyaꞌj waꞌlcꞌa twitz kꞌij. Bix tuya jun cyiw tyol e xiꞌ tkbaꞌn te cykilca chꞌit nchi purpaj twitz cyaꞌj:

—Cytzaja tzalu, bix cychmon cyiiba tuꞌn cytena tuj jun nin waaꞌn cxeꞌl tkꞌoꞌn Dios.

18Cxeꞌl cychyoꞌna cychuꞌl cawel bix capitán bix jawnex xjal bix tz̈ej bix kej xjal otk chi jax cyibaj bix cykilca xjal, akꞌanal-le, yaaꞌnle akꞌanal, chꞌinle, jawnexle―tz̈i ángel cye chꞌit.

19Yajcꞌatltzen, bix e wila jjiljil ul jlet cyuyax ke cawel twitz txꞌotxꞌ cyuyax cysoldado. Otk baj cychmon cyiib tuꞌn cykꞌoj tiꞌj xjal tjax tibaj tz̈ej bix cyiꞌj ke nim xjal tuya.

20Bix e tzyetjil jil tuyax tyolel ẍtakꞌ otk yeecꞌan tipemal twitzjil tuꞌntzen tsbun cye xjal, ejeeꞌj otk cyiikꞌ techeljil tuj cyxumlal bix otk chi nimsan tsantjil. Cycaꞌbel jlu e cuꞌx xeꞌtke iꞌtzke tuj tnijabel kꞌakꞌ te azufre.

21Jatzen ke mastl xjal eteꞌ tuyajil jil, e cub byet tuꞌn machet n-etz tuj ttzi jxjal tjax tibaj tz̈ej, bix cykilca chꞌit twitz cyaꞌj e nojke tuꞌn cychuꞌl kej cyimne.