ROMANOS 1 - Mam of Todos Santos -- Guatemala Unicode

Kꞌolbebl tuꞌn Pablo cye ocslal tuj Roma

1Key ocslal tuj Roma.

Inayena Pablo. Jun t-akꞌanal Jesucristo kena. Scyꞌoꞌn kena tuꞌn Cristo te kbalte jbaꞌn tyol Dios.

2Jtyol Dios tzin nkbaꞌna tiꞌj colbil ke jaxj e cyaj tkꞌoꞌn Dios cye kbalte tyol Dios nejl. Tzꞌiꞌben cyuꞌn tuj tyol Dios jawnex.

3Jbaꞌn tyol Dios lu nyolen tiꞌj Tcwal Dios. Oc Tcwal Dios te xjal, bix tej titzꞌjxin, ocxin te tiyꞌjil David. Jatzen xjalja Kaaw Jesucristo.

4Pero amale oquet-xin te xjal, pero Tcwal Dios texin. Jatztzen e chicꞌajaxen tuya nim tipemal tej tjatz itzꞌjxin tuj cyamecy juntl maj.

5Ja tzunxin e tzaj kꞌonte waakꞌena te weya tuꞌn woca te t-xelxin. Nchin kꞌumena tyol Dios tuj cykilca tnom tuꞌntzen t-xiꞌ cyniman xjal Dios tuꞌnj n-oc ke cycꞌuꞌj tiꞌ Cristo.

6Bix cyxoltzen cykilca tnom cyuyax xsuna ejeeꞌy te Roma. Cyuyaxa o chi oca te t-xjal Jesucristo.

7Tetzen cyey, ejeeꞌy ocslal te tnom Roma, nxaꞌ ntzꞌiꞌbena ja wuꞌja lu. N-oc cyakꞌa te Dios. Tuꞌnxit t-xtalbil Kman Dios bix Kaaw Jesucristo tzaaj cyibaja, bix tzajxit cykꞌoꞌnxin te cyey tuꞌn cytena tuj ttz̈yal.

Tej tkbante Pablo tuꞌn tpon kꞌolbelte cye ocslal eteꞌ tuj Roma

8Tneelxix, cxeꞌl nkbaꞌna cyey nchin kꞌona chjonte te Dios nuk tuꞌn Jesucristo cyiꞌja cykilcakey. Tuj cykilca twitz txꞌotxꞌ ma tzꞌabij cyiw eteꞌy tuj cyocslabla.

9Tuya cykil ncꞌuꞌja nchin ajbena te Dios tuꞌnj nchin kꞌumena jbaꞌn tpocbal Tcwalxin. Bix ttzkiꞌn Dios min chin weꞌya nkaniya onbil cyey te Dios.

10Jaca kꞌij nchin kanena texin tuꞌn ttzaj tkꞌoꞌnxin amleꞌn weya tuꞌn npona cyxola. Kape chꞌix tpon tumel tuꞌn tkꞌontexin amleꞌn wiꞌja tuꞌn npona cyuyey.

11Wajxsen chin pon cyuyey, tuꞌntzen tcyaj nkbaꞌna cyey ti ma tkba Dios weya, tuꞌntzen cycywixa mas tuj cyocslabla.

12Pero yaaꞌn nuk ejeeꞌy chi cywixela mas tuj cyocslabla, sino jax juꞌx weya ctzaal cynimsaꞌna ncꞌuꞌja oj npona cyxola. Oj toc ncyeꞌyena ka cyiw eteꞌy tuj cyocslabla tiꞌ Cristo, jatzen cyiwsabl ncꞌuꞌja, tisenxj oj toc cycyeꞌyena inayena cyiw ntiiniya tuj wocslabla, jax juꞌx cyey ccywixel cycꞌuꞌja.

13Key hermano, waja cybiy chꞌima maj e cub wuꞌna tuꞌn npona cyxola maa tuj Roma. Pero hasta jaꞌlewe mix nchin poniya. E wajbeꞌya tuꞌn npona tuꞌn nkꞌumena tyol Dios cyey, tuꞌntzen tajben cyey, tisen o bint wuꞌna cyxol niyꞌtl ocslal yaaꞌn judío.

14O tzaj tkbaꞌn Dios weya tuꞌn t-xiꞌ nkbaꞌna te cykilca xjal j-o tzaj tkbaꞌn weya. Il tiꞌj cxeꞌl nkbaꞌna cyej xjal griego bix cyej xjal yaaꞌn griego, bix cyej xjal nmak xjal, bix cyej xjal ajnintzxse.

15Juꞌ tzunj nim nganiya tuꞌn t-xiꞌ nkbaꞌna baꞌn tpocbal Cristo te cyey aj Roma, tisen o bint wuꞌna cye niyꞌtl xjal.

Jun tipemal tpocbal Cristo

16Weya mintiiꞌ nchꞌixewa tuꞌn t-xiꞌ nkbaꞌna tpocbal Cristo, cuma tzin tyeecꞌan jaja tipemal Dios. Te cyekej tzin cyocslaꞌn, ejeeꞌtzen chi cletel. Seyle judíoke oc cybiꞌn jtpocbal ja yol lu nejl, bix seyle yaaꞌn aj judíoke, pero ja yol lu at tajbel tuꞌn cyclet.

17Najben tpocbal Cristo, cuma tzin tkbaꞌn ti tten tuꞌn cyoc xjal jiquen twitz Dios. Oꞌcx oj toc ke tcꞌuꞌj jun xjal tiꞌ Cristo, jiquentzen taꞌ twitz Dios. Tzin tkbaꞌn tyol Dios cyjulu: “Jiquen taꞌ jun xjal twitz Dios nuk oꞌcx tuꞌnj n-oc ke tcꞌuꞌj tiꞌ Dios,” tz̈i tyol Dios.

Cykil koꞌ at tuꞌn tcub kcastiwa

18Yaltzen cyej xjal min tzꞌoc cybiꞌn bix nuk jaj kaꞌ nbint cyuꞌn, n-el kniyꞌ tiꞌj ctzaal castiwa tuꞌn Dios tuj cyaꞌj cyibaj. Tuꞌnj kaꞌ nbint cyuꞌn, ya mintl ncheꞌx lpe tiꞌ Dios jaxxix.

19Yaaꞌn tuꞌnj min tzꞌel cyniyꞌ tiꞌj, cuma o txiꞌ tyeecꞌan Dios cye ti tten.

20Telniyꞌ ti tten Dios, cuma jatxe tej tbaj tbinchaꞌnxin twitz txꞌotxꞌ jatzen tyeecꞌantexin nimxsen tipemalxin. Amale yaaꞌnt chicꞌajxin, n-el cyniyꞌ xjal tiꞌj at-xin. Oj n-oc cycyeꞌyen cykilca o bint tuꞌnxin, n-eltzen cyniyꞌ tiꞌj at Dios, bix at tipemalxin te junx maj. Juꞌ tzunj mlay chi akꞌtl xjal oj ttzaj tkꞌoꞌnxin cycastiwa tuꞌnj el cyiiqꞌuen jaxin.

21Amale ot tzꞌel cyniyꞌ tiꞌj at Dios, pero min o jaw cynimsaꞌn tbixin. Min o txiꞌ cykꞌoꞌn chjonte texin, sino o cyocsla juntl xnakꞌtzbil yaaꞌn jaxxix tiꞌj ti tten tbinlen twitz txꞌotxꞌ. Tuꞌnj o cheꞌx lpeke tiꞌj yol te tzpetsalcye, biꞌx o cyaj ttzpetke tuꞌn.

22O chi kban ka n-el cyniyꞌ tiꞌj, pero min o tzꞌel cyniyꞌ tiꞌj.

23Min o jaw cynimsaꞌn tbi Jdios mintiiꞌ tbajlel, sino nuk oꞌcx cye xjal o jaw cynimsaꞌn cyechel xjal bix cyechel chꞌit bix cyechel lbaj bix cyechel mastl alimaj. O jaw cynimsaꞌn ke xjal kej lu, pero cyimneke.

24O cyaj cycolen Dios. Nuk kaꞌ o cyajbe tuꞌn tbint cyuꞌn. Juꞌ tzunj o chi cyaj tcyeꞌyen Dios tuꞌnx cyxiꞌ lpe tiꞌj kaꞌ cyajbil. Bix tuj chꞌixbajilxse o chi pone baj tuꞌnj kaꞌ o bint cyuꞌn tuya cyxumlal.

25Min o cheꞌx lpeke tiꞌ tyol Dios jaxxix, sino o cheꞌx lpeke nuk tiꞌj ẍtakꞌbil yol. Min o jaw cynimsaꞌn xjal tbi jxin Dios binchal cykilca, sino nuk oꞌcx cye xjal o jaw cynimsaꞌn kej tbinchbil Dios. Pero ja Dios tuꞌn tnimj te junx maj. Juꞌxit tzuna.

26Cuma nuk ejeeꞌj tbinchbil Dios o jaw cynimsaꞌn, juꞌ tzunj o chi cyaj tcyeꞌyen Dios tuꞌn cyxiꞌ lpe tiꞌj cyajbil te chꞌixbajil. Tisen tzunkej xuuj, yaaꞌntl nuk cye xinak o chi ajbeꞌnake tisenx tten achbil, sino bix o chi jaw meltzꞌaj xuuj cyuya xuuj.

27Jax juꞌx ke xinak, o cyaj cykꞌoꞌn cyachbil cyuya xuuj, tuꞌntzen cyjaw meltzꞌaj xinak cyuya xinak tuya nim cyachbil cyiꞌj. Nimxsen chꞌixbajil oj cyjaw maje xinak cyuya xinak. Cuma o cyaj cykꞌoꞌn Dios, ccyiikꞌeltzen cycastiwa.

28Kej o tzꞌel cyiiqꞌuen Dios, tuj cywitz yaaꞌn il tiꞌj tuꞌn tel cyniyꞌ tiꞌ Dios. Juꞌ tzunj o chi cyaj tcyeꞌyen Dios tuꞌn t-xiꞌ cyiiꞌn cyex cyajbil yaaꞌn baꞌn, tuꞌntzen tbint cyuꞌn cykilca yaaꞌn tuj tumel.

29Nuk oꞌcx jyaaꞌn baꞌn tuj twitz Dios nbint cyuꞌn. Nuk lepchke tiꞌ cykil kaꞌ. Nuk n-el cycꞌuꞌj tiꞌj cye juntl. Nuk nchi yasen cyiꞌ xjal. Nuk nchiꞌl cycꞌuꞌj cyiꞌ cabtl. Byol xjalke. Aj kꞌojke. Sbul xjalke. Iicꞌbel xjalke. Nuk nchi yolen kaꞌ tiꞌ cabtl.

30Nuk nchi kꞌumen cypaltel xjal cye cabtl. Iicꞌbel Dioske. Nchi jaw cyakbil cyxol xjal. Mintiiꞌ onbil cyaj. Nuk nbaj cyniman cyiib. Nuk nchi ximan tiꞌ jun kaꞌ tuꞌn tbint cyuꞌn. Min cybi tcawbil cyman.

31Min tzꞌel cyniyꞌ tiꞌj baꞌn tuya kaꞌ. Min nbint cyuꞌn alcyej nxiꞌ cykꞌumen. Min tzꞌoc cyakꞌ ke te cyja cye. Ka at jun kꞌoj, cycyꞌi tuꞌn tbaj tilel. Mintiiꞌ tkꞌakꞌbil cycꞌuꞌj cyiꞌ cabtl.

32Tzin tkbaꞌn tyol Dios cykil kej xjal nchi binchan kej kaꞌ lu, ccyiikꞌeltzen cycastiwa, jaj tuꞌn cycyim. Amale n-elet cyniyꞌ tiꞌj chi cymel tuꞌnj kaꞌ nbint cyuꞌn, pero min chi weꞌ tuꞌn tbint mas il cyuꞌn. Bix yaaꞌn oꞌcx nbint il cyuꞌn, sino nchi jaw tzalaj oj nbint il cyuꞌn cabtl.