GÁLATAS 3 - Mam of Todos Santos -- Guatemala Unicode

O kiikꞌ Espíritu Santo tuꞌnj kocslabl tiꞌj e bint tuꞌn Cristo twitz cruz

1Key ocslal tuj Galacia, mintiiꞌ cynaabla. ¿Tikentzen ma cheꞌx lpey tiꞌ jun yol sbul? Nejl, tzinenxix e xiꞌ nkꞌumena cyey tiken e cyim Jesucristo twitz cruz.

2Cxeꞌl nkanena cyey, ¿e cyiikꞌpey Espíritu Santo tuꞌnj cynimbila tiꞌ tley Moisés, bix ka tuꞌnj cyocslabla tiꞌ Cristo tej cybintey ti e bint tuꞌnxin twitz cruz?

3¿Mimpatiiꞌ cynaabla? Tej cyocslana tuj tneel, ockey jiquen tuꞌnj e bint tuꞌn Espíritu Santo. ¿Tikentzen n-oc cyipena tiꞌj jaꞌlewe tuꞌn cyoca jiquen twitzxin tuꞌnj cyexa cybinchbena?

4Bix juntl. Nim qꞌuixcꞌaj iyꞌx cyuꞌna tej cyocslana tiꞌ Cristo. ¿Nukpa cyajxa iyꞌx ja qꞌuixcꞌaj lu cyuꞌna? Cutz̈it ka min.

5Cxeꞌl nkanena cyey juntl maj, oj ntzaj tkꞌoꞌn Dios Espíritu Santo cye xjal, bix nxiꞌ tyeecꞌanxin jawnex tipemalxin cyxol xjal, ¿tzimpa tkꞌoꞌnxin juꞌwa cuma n-oc cybiꞌn xjal tley Moisés? Min. Tzin tkꞌoꞌnxin nuk oꞌcx tuꞌnj ma txiꞌ cyocslaꞌna jbaꞌn pocbal ti tten tuꞌn koc jiquen twitzxin.

O tzꞌoc ke tcꞌuꞌj Abraham nuk tiꞌj tyol Dios

6Cꞌoquel cycꞌuꞌja tiꞌj ti toc tuꞌn tyol Dios tiꞌ Abraham. Tz̈i cyjulu: “Oc ke tcꞌuꞌj Abraham tiꞌ Dios. Juꞌ tzunj e tzaj kꞌoꞌn te Abraham tuꞌn toc jiquen twitz Dios,” tz̈i tyol Dios.

7Juꞌ tzunj, il tiꞌj qꞌuelel cyniꞌya tiꞌj nuk oꞌcx kej xjal n-oc ke cycꞌuꞌj tiꞌ Dios, ejeeꞌ tzunja t-xjal Dios tisen Abraham.

8Bix cꞌoquel cycꞌuꞌja tiꞌj jatxe tuj tneel e cub tnincꞌuꞌn Dios tuꞌn cyoc kej xjal yaaꞌn judío jiquen twitzxin ka ma chi ocslan tiꞌjxin. Juꞌ tzunj, e xiꞌ tkbaꞌn Dios te Abraham: “Tuꞌna chi oquela cykilca wik xjal wunak twitz txꞌotxꞌ,” tz̈i Dios te Abraham, tz̈i tyol Dios.

9Juꞌ tzunj, il tiꞌj qꞌuelel cyniꞌya tiꞌj ntkꞌoꞌn Dios t-xtalbil cyej xjal n-oc ke cycꞌuꞌj tiꞌjxin, tisen e takꞌxin te Abraham tej toc ke tcꞌuꞌj Abraham tiꞌjxin.

10Bix il tiꞌj qꞌuelel cyniꞌya tiꞌj kej xjal n-oc cyipen tiꞌj tuꞌn cycaman tiꞌj t-xtalbil Dios tuꞌnj nchi niman ley, cwel cycastiwa tuꞌn Dios, cuma mlay bint cykilca ley cyuꞌn. Tzin tkbaꞌn tyol Dios cyjulu: “Cwel tkꞌoj Dios tibaj cykil kej xjal min chi binchan cykil yol tzꞌiꞌben tuj ley,” tz̈i tyol Dios.

11Tzinen taꞌ min-al jun xjal cꞌoquel jiquen twitz Dios tuꞌnj nniman ley, cuma tzin tkbaꞌn tyol Dios cyjulu: “Jiquen taꞌ jun xjal twitz Dios nuk oꞌcx tuꞌnj n-oc ke tcꞌuꞌj tiꞌ Dios,” tz̈i tyol Dios.

12Pero te ley, ka ma tzꞌoc ke kcꞌuꞌj tiꞌ ley tuꞌn koc jiquen twitz Dios, mlaytltzen tzꞌoc ke kcꞌuꞌj tiꞌ Dios. Tzin tkbaꞌn tyol Dios cyjulu: “Jxjal taj tuꞌn tcnet tchunkꞌlal tuꞌnj ley, ilxsen tiꞌj cbinchal entera ley,” tz̈i tyol Dios.

13Key ocslal, tuꞌnj min e kbincha jtzin tkbaꞌn ley, juꞌ tzunj at tcublel kcastiwa kibaj. Pero tuꞌn ktzakpet tiꞌj kcastiwa, e xiꞌ tchjoꞌn Cristo chojbil kil. E xiꞌ tiken texin kcastiwa tej tcyaj sbuꞌnxin twitz cruz. Sbuꞌn taꞌxin, cuma tzin tkbaꞌn tyol Dios cyjulu: “Jawnexsen tchꞌixew jun xjal njaw cꞌlet tkꞌab jun tzeeꞌ oj n-oc tuj castiwa,” tz̈i tyol Dios.

14El ttzakpiꞌn Cristo ejooꞌ tuj tcwent ley tuꞌn tpon baj twiꞌ jtyol Dios e cyaj tkꞌoꞌn te Abraham, jaj tuꞌn ttzaj tkꞌoꞌn Dios t-xtalbil te cykil wik xjal tuꞌnj tiyꞌjil Abraham. El ttzakpiꞌn Cristo ejooꞌ tuꞌn kiikꞌente Espíritu Santo tuꞌnj kocslabl tiꞌ Cristo, J-espíritu Santo e cyaj tkꞌoꞌn Dios tyol ke tuꞌn kiikꞌente.

15Key hermano, cxeꞌl nkbaꞌna jun techel cyey ti nbaj cyxol xjal. N-el kniyꞌ tiꞌj mlay bint tuꞌn tcub xitj jun trat cyxol xjal. Amale binnet trat nuk cyuꞌn xjal, pero oj tcywix tuj juzgado, mlay bint tuꞌn tel xeꞌt bix mlay bint tuꞌn tchꞌixpet tuꞌn juntl xjal.

16Juꞌtzen tten tuyaj yol e cyaj tkꞌoꞌn Dios te Abraham bix te t-xeꞌchel. Bix tej tcyaj tkꞌoꞌn Dios tyol te Abraham bix te t-xeꞌchel, cꞌoquel cycꞌuꞌja tiꞌj min tzin tkbaꞌn tyol Dios “cye t-xeꞌchel.” Nuk oꞌcx tzin tkbaꞌn “te t-xeꞌchel.” Tzin tkbaꞌn juꞌwa cuma nyolen tiꞌj jt-xeꞌchel Abraham, ja Cristo.

17Cxeꞌl ntxꞌolbaꞌna jtechel cyey. Tisen mlay bint tuꞌn tcub xitj jun trat cyxol xjal, jax mlay cub t-xiten Dios jyol e cyaj tkꞌoꞌn te Abraham, jyol e cywix tuya cyiwsabl yol. Jley e cyaj tkꞌoꞌnxin te Moisés cyaja syent tuya winaklaaj jnabkꞌi mas yaj, mlay tzꞌel tiiꞌn tipemal jyol e cyaj tkꞌoꞌnxin te Abraham.

18Juꞌ tzunj, nuket e kiikꞌ t-xtalbil Dios nuk tuꞌnj knimbil tiꞌ ley, mintetzele e kiikꞌ t-xtalbilxin tuꞌnj yol e cyaj tkꞌoꞌnxin. Pero tzin tyeecꞌan Abraham yaaꞌn juꞌwa. E tzaj tkꞌoꞌn Dios xtalbil te Abraham nuk oꞌcx tuꞌnj otk cyaj tkꞌoꞌnxin tyolxin.

Tej tyole Pablo tiꞌj ti tajbelel tley Moisés

19Pero ka juꞌwa, ¿titzen tajbel tley Moisés? E tzaj tkꞌoꞌn Dios ley te Moisés mas yaj tuꞌn tel kniyꞌ tiꞌ kil. Pero tej ttzaj cykꞌoꞌn tsanjel Dios tuj cyaꞌj ley te ke tuj tkꞌab Moisés, yaaꞌn tuꞌn tten ley te junx maj. E tajbe Dios tuꞌn tcawen ley kibaj, pero nuk oꞌcx mitkx n-uꞌla jt-xeꞌchel Abraham e cyaj tkꞌoꞌnxin tyolxin tuꞌn tul.

20Bix cꞌoquel cycꞌuꞌja tiꞌj il tiꞌj ajben jun tyolel Dios tuꞌn t-xiꞌ tkꞌoꞌn ley cye xjal. Pero tej ttzaj tkbaꞌn Dios tyol te Abraham, jax Dios e yolen tuyaxin. Ja lu tzin tyeecꞌan mas baꞌn t-xtalbil Dios e cyaj tkꞌoꞌn te Abraham twitzj ley e xiꞌ tkꞌoꞌnxin te Moisés.

21Katzen ma ko oc jiquen twitz Dios nuk oꞌcx tuꞌn t-xtalbil Dios, bix yaaꞌn tuꞌn ley, ¿qꞌuelelpatzen kniyꞌ tiꞌj nkꞌojl ley e tzaj tkꞌoꞌn Dios te Moisés tiꞌj jyol e cyaj tkꞌoꞌn Dios te Abraham? ¡Min! Min kꞌojl, sino at juntl taakꞌen. Nuket at kipemal tuꞌn ley tuꞌn knimante, ajbentzenle ley tuꞌn koc jiquen twitz Dios. Pero min.

22O cyaj tkꞌoꞌn Dios ley nuk oꞌcx tuꞌn tel kniyꞌ tiꞌj o ten cykil xjal tuj tkꞌab il tisen ke pres, tuꞌntzen nuk tuꞌnj cyocslabl tiꞌ Jesucristo ctzaal tkꞌoꞌn Dios t-xtalbil te cyej xjal n-oc ke cycꞌuꞌj tiꞌ Jesucristo.

23Tej mitknaꞌx tpon tumel tuꞌn tyeecꞌante Dios ti tten tuꞌn ktzakpet tuꞌnj kocslabl tiꞌ Jesucristo, tisencꞌa tuj tzeeꞌ etoꞌcxe, bix ajben ley tisen jun cꞌojlal cars, tuꞌntzen kajbente jbaꞌn tpocbal tuꞌn ktzakpet tuꞌn Cristo tej tul ja pocbablte lu mas yaj.

24Juꞌ tzunj, il tiꞌj qꞌuelel kniyꞌ tiꞌj ajben ley nuk tuꞌn t-xiꞌ tiiꞌn ejooꞌ tuya Cristo, tuꞌntzen koc jiquen twitz Dios tuꞌnj kocslabl tiꞌ Cristo.

25Pero jaꞌlewe, cuma o ko ocslan tiꞌ Cristo, juꞌ tzunj mintiiꞌtl il tiꞌj tuꞌn tajben ley tuꞌn t-xiꞌ tiiꞌn ejooꞌ tuya Cristo.

26Key ocslal, tcwal Dioskey tuꞌnj cyocslabla tiꞌ Cristo Jesús.

27Junx eteꞌy tuya Cristo, ejeeꞌxa at cymojbabl cyiiba tuyaxin, cuma o tzꞌoc cykꞌon cyiiba tuyaxin.

28Tuj twitz Dios, min-al jun wik xjal cyxola mas jawnex twitz juntl wik. Judío lokey, yaaꞌnle judíokey, ajnintz lokey, nmak lokey, xinak lokey, xuuj lokey, junx taꞌ cykilcakey twitz Dios, cuma junx eteꞌy tuya Cristo Jesús.

29Bix tuꞌnj junx eteꞌy tuya Cristo, bix t-xeꞌchel Abraham ja Cristo, juꞌ tzunj tcwal Abrahamkey, bix at cyoclena tuꞌn cyiikꞌa jcykaba e cyaj tkbaꞌn Dios te Abraham.