GÁLATAS 4 - Mam of Todos Santos -- Guatemala Unicode

1Cxeꞌl nkbaꞌna jun techel ti cytena tej mitknaꞌx cytzakpeta tiꞌ tcawbil ley. Tisen jun maan mlay cawen tuj jun jaaꞌ, jaxse juꞌx mlay cawen tcwal taaw jaaꞌ ka neeꞌxkꞌa, amale cꞌoqueletkꞌa te taaw jaaꞌ oj tockꞌa maꞌ xjaltl.

2Jun neeꞌ tjakꞌ cycawbil cꞌojlalte taꞌ, bix tkabkꞌa tjakꞌ cycawbil cꞌojlal tekꞌa taꞌ ojxe tpon jkꞌij ctkbaꞌ tmankꞌa tuꞌn tcawenkꞌa tuj jaaꞌ.

3Jaxse juꞌx ke, tisen neeꞌ yaaꞌn tzakpiꞌn koꞌ nejl, cuma etoꞌ tjakꞌ jcycawbil nim ley bix xnakꞌtzbil at twitz txꞌotxꞌ.

4Pero tej tpon jtumel otk tkba Dios tuꞌn tul Tcwal twitz txꞌotxꞌ, e tzaj tsmaꞌnxin Tcwalxin. Itzꞌj Tcwalxin tiꞌ jun xuuj tuꞌn tocxin te jun xjal, bix itzꞌjxin tjakꞌ tcawbil ley.

5Itzꞌjxin tjakꞌ tcawbil ley tuꞌn kclet tjakꞌ tcawbil ley tuꞌnxin, tuꞌntzen kiikꞌente cykilca koclen te tcwal Dios.

6Juꞌ tzunj, tcwal Dioskey, bix o tzaj tsmaꞌn Dios Espíritu Santo cyuyey, jaj Espíritu e cyaj tkbaꞌn Tcwalxin tuꞌn ttzaj tsmaꞌn cyey, tuꞌn tajben te jun tstiwa tuj cyanema tcwal Dioskey. Tuꞌnj Espíritu Santo n-el cyniꞌya tiꞌj ka Dios Cymana, bix juꞌ tzunj tzin cykbaꞌna “Kman Dios.”

7Juꞌtzen tten yaaꞌntl preskey tjakꞌ tcawbil ley, sino tcwal Dioskey. Bix tuꞌnj tcwal Dioskey, ccyiikꞌela jcykaba e cyaj tkbaꞌn Dios cyey tuꞌn Cristo.

Tej t-xiꞌ tcubsaꞌn Pablo twitz cye ocslal tuꞌn miꞌn chi aj meltzꞌaj tuj jxnakꞌtzbil te ootxa jaj mintiiꞌ tipemal

8Pero amale tcwalet Dioskey jaꞌlewe, nejl min cytzkiꞌna Dios, bix ajbenkey cyej dios yaaꞌn jax.

9Pero jaꞌlewe cytzkiꞌntla Dios, bix ka ja Dios ma takꞌ tuꞌn texin ejeeꞌy. Juꞌ tzunj, ¿titzen tten tuꞌn t-xiꞌ cybiꞌna juntl maj jxnakꞌtzbil te ootxa mintiiꞌ tipemal tuꞌn cycleta bix mlay tuꞌn tkꞌon t-xtalbil Dios cyey? ¿Cyajpey tuꞌn cyoca te pres tjakꞌ tcawbil juntl maj?

10Ma tzakꞌ cwel cynimana kej kꞌij xjan cye judío, bix kej xjaw xjan, bix kej ninkꞌij xjan, bix kej jnabkꞌi tuꞌn miꞌn tzꞌakꞌanan cytxꞌotxꞌa, nuk tuꞌn cynimana cyley judío.

11Nbaj ncꞌuꞌja cyiꞌja, cuma ka ma cyaj cycyeꞌyena colbil cyey tuꞌn Cristo, nuktzen wajxa o chin akꞌanana cyxola.

12Key ocslal, cxeꞌl ncubsaꞌna nwitza cyey tuꞌn cyxiꞌ lpey tiꞌj e bint wuꞌna. E cyaj ncyeꞌyena tuꞌn toc ke ncꞌuꞌja tiꞌ ley, bix in oca tisen jun yaaꞌn judío tisen cyey.

Cꞌoquel cycꞌuꞌja tiꞌj jbaꞌn e binchankey wiꞌja tej ntena cyxola nejl.

13Cꞌulel tuj cycꞌuꞌja nuket miꞌn e tzaj jun yabel wiꞌja, minttle in tena cyxola tuꞌn t-xiꞌ nkꞌumena tpocbal Cristo cyey.

14Bix amale atet nyabela, pero min el cyiiqꞌuena inayena bix min el cylojoꞌna inayena, sino e cykꞌolbey inayena. Tej npona cyxola, tsanjel Dios kena tuj cywitza, bix smaꞌn kena tuꞌn Cristo Jesús tuj cywitza.

15Pero jaꞌlewe, ¿ti ma baj? Mintl chi tzalaja wiꞌja tisen tuj tneel. Nejl, nuket baꞌn e bint cyuꞌna wiꞌja, otle jatz cyiiꞌna tbakꞌ cywitza tuꞌn ttzaj cykꞌoꞌna weya, tuꞌn ncyaja baꞌn, nimtzen oc wakꞌa cyey. Cytzkiꞌna jax wuꞌna.

16Tzinen taꞌ jun tyolel Dios kena tuj cywitza nejl. Juꞌ tzunj, ¿tumelpa tuꞌn t-xiꞌ cykbaꞌna ma chin oca te aj kꞌoj cyiꞌja nuk tuꞌnj e nkbaya jbaꞌn tpocbal Cristo cyey?

17Yal kej tzpetsal cyxola, nim n-oc cyipenxin tiꞌj tuꞌn cyelxin baꞌn tuj cywitza. Pero min tzin cybinchaꞌnxin juꞌwa tuꞌn t-xiꞌ cykꞌoꞌnxin jun baꞌn te cyey, sino nuk tuꞌn tel cypaꞌn cyiiba wiꞌja, tuꞌntzen cyoc lpey nuk cyiꞌjxin.

18Baꞌnte tuꞌn toc cyipenxin tiꞌj tuꞌn cyelxin baꞌn tuj cywitza, pero yaaꞌn baꞌnj tuꞌn toc cyipenxin tiꞌj nuk tuꞌn t-xiꞌ cynaabla tuj il. Weya, oj nchin yolena cyuyey, nuk oꞌcx tuꞌn tkꞌoj jun baꞌn te cyey wuꞌna. Oc wipena tiꞌj tuꞌn cycyaja tuj baꞌn tej ntena cyxola, bix tuyaj jax wajbila lu, nchin tzꞌibena te cyey jaꞌlewe.

19Key ncwala min tzꞌel cyniꞌya tiꞌj, tisen niyꞌx tchyonel tuꞌn jun xuuj ojxe ttzaj tal, juꞌxsen niyꞌx qꞌuixcꞌaj wuꞌna cyuꞌna. Pero niyꞌx qꞌuixcꞌaj wuꞌna tcab maj tuꞌn cyitzꞌja. Pero qꞌuiyex qꞌuixcꞌaj wuꞌna ojxe toc cynaabla mas tisen te Cristo.

20Waja chin tena cyxola jaꞌlewe tuꞌn nyolena cyuyey, tuꞌn tcub cychꞌixpuꞌna cynaabla, tuꞌntzen mintiiꞌtl il tiꞌj tuꞌn cyoc wilena. Min tzꞌel nniꞌya tiꞌj ti tten tcyaj cycyeꞌyena nxnakꞌtzbila.

Jun techel tiꞌj Sara tuya Agar

21Key xjal cyaja tuꞌn cytena tjakꞌ tcawbil tley Moisés, cxeꞌl nkanena cyey, ¿tuꞌn tikentzen min tzꞌoc cybiꞌna j-e cub ttzꞌiꞌben Moisés?

22Cꞌoquel cycꞌuꞌja tiꞌj jun yol tzꞌiꞌben tuj tley Moisés. Ul itzꞌj caꞌba tcwal Abraham. Jun tcwalxin e tzaj tiꞌj tkꞌopaj t-xuꞌlxin, Agar, jun xuuj tocx tjakꞌ tcawbil juntl xjal, bix juntl tcwalxin e tzaj tiꞌj t-xuꞌlxin, Sara, bix yaaꞌntzen kꞌopaj texuj.

23Yal talj xuuj kꞌopaj, itzꞌjkꞌa tisex nbaj cyxol xjal, cuma cwalx ttxukꞌa. Pero jtal xuuj yaaꞌn kꞌopaj, itzꞌjkꞌa nuk oꞌcx tuꞌnj tipemal Dios otk cyaj tkbaꞌn Dios te ttxukꞌa ya tijtlxuj.

24Ja tzunkej caꞌba xuuj lu cyuya cyal tzin cyechlaꞌn kej caꞌba trat lu. Ja trat e bint twiꞌj witz Sinaí, nbint tuꞌn nuk tuꞌn cyten xjal tjakꞌ jcyiw cawbil. Bix ja xuuj Agar tzin techlaꞌn ja trat lu, cuma tocxtxin tjakꞌ tpatróntxin.

25Cꞌoquel cycꞌuꞌja tiꞌj oc cykꞌoꞌn kej xjal Arabe tbi jwitz Sinaí te Agar, te yecꞌbil junx taꞌ Agar cyuyaj naꞌl ley te jaꞌlewe. Tzin techlaꞌntxin Jerusalén, cuma tisenx jatxin yaaꞌn tzakpiꞌn tuꞌnj e tentxin tjakꞌ tcawbil juntl xjal, jax juꞌx yaaꞌn tzakpiꞌn kej naꞌl ley te Jerusalén tuꞌnj eteꞌ tjakꞌ tcawbil tley Moisés.

26Pero kej xjal aj Jerusalén te tuj cyaꞌj koꞌ, tzakpiꞌn etoꞌ. Tcwal jun tnom te tuj cyaꞌj koꞌ, bix tzin techlaꞌn Sara ja tnom lu.

27Tuꞌn tyeecꞌan at juntl wik Jerusalén, tzin tkbaꞌn tyol Dios cyjulu: “Tz̈i Dios te Jerusalén, ‘Jay xuuj mlay tzꞌalena jaꞌlewe, tzalaja. Jay xuuj min ttzkiꞌna ti tten tuꞌn tiyꞌx tchyonel tuꞌna, s̈-ina tuꞌn ttzalajebla. Jay xuuj tjunala jaꞌlewe, mas chi ul tala twitzj xuuj at tchmil,’ tz̈i Dios te Jerusalén,” tz̈i tyol Dios. Bix te ja Jerusalén lu koꞌ jaꞌlewe.

28Key ocslal, tisenx ul itzꞌj Isaac nuk tuꞌnj e cyaj tkꞌoꞌn Dios tyol te Abraham, jax juꞌx cyey o chi oca tcwal Dios nuk tuꞌnj t-xtalbil e cyaj tkꞌoꞌnxin cyey.

29Bix jkꞌoj e baj nejl, jax nbaj jaꞌlewe. Nejl, jtcwal Abraham ul itzꞌj nuk tuꞌn tipen tocslabl e kꞌoj tiꞌj tcwalxin ul itzꞌj tuꞌn tipemal Dios. Jax juꞌx jaꞌlewe, kej xjal n-oc ke cycꞌuꞌj tiꞌj cyex cybinchben tuꞌn cyclet nchi kꞌoj cyiꞌj xjal n-oc ke cycꞌuꞌj tiꞌ Dios tuꞌn cyclet.

30Pero mlay chi caman. Cꞌoquel cycꞌuꞌja tiꞌj ti toc tuꞌn tyol Dios. “Xomax jxuuj akꞌanal lu tuyax tal, cuma yaaꞌn tumel tuꞌn tkꞌoj jun kab tal jxuuj kꞌopaj. Nuk oꞌcx tal jxuuj yaaꞌn kꞌopaj at toclen tuꞌn tiikꞌente tkab,” tz̈i tyol Dios.

31Juꞌ tzunj, key ocslal, ejooꞌ ocslal yaaꞌn tisen tal jun xuuj kꞌopaj, sino tisen tal jxuuj yaaꞌn kꞌopaj.