1 PEDRO 4 - Mam of Todos Santos -- Guatemala Unicode

Tuꞌn kajben tuya jun koclen o tzaj tkꞌoꞌn Dios

1Cuma iyꞌx qꞌuixcꞌaj tuꞌn Cristo tuya t-xumlal bix e cyim tuꞌn tchjet kil, juꞌ tzunj il tiꞌj tuꞌn tten jun cynaabla tisen te Cristo. Cuma tuꞌnj cymojbabl cyiiba tiꞌj tcyimlen Cristo, mintiiꞌtl cyaja tiꞌ il.

2Ma cyaj cykꞌoꞌna il tuꞌn cyxiꞌ lpey tiꞌj tajbil Dios cykilca kꞌij twitz txꞌotxꞌ, yaaꞌn tiꞌj cykilca taj cyxumlala.

3Nejl, nim kaꞌ e bint cyuꞌna, tisenj nbint cyuꞌn kej xjal min cytzkiꞌn Dios. Min e cytzuy cyiiba twitzj kaꞌ tajbil cyxumlala, sino oc cybiꞌna tikꞌch taj cynaabla aj il. Nuk jaj pajbaj lepchkey tiꞌj. E bolayinkey, bix nim s̈itz̈ꞌbil yaaꞌn tumel eteꞌy. Bix juntl kaꞌ e bint cyuꞌna. Oc naꞌnkey cywitz sant.

4Bix cuma ma cyaj cycyeꞌyena cykilca ja lu, bix miꞌntl nchi binchana kaꞌ cyuya kej cyuyey te nejl, nchi jawtzen kleeꞌ cyiꞌja, bix nchi xmucchan cyiꞌja.

5Pero tzul jun kꞌij cykꞌaꞌ xjal cycwent twitz Cristo, jaj xjal binne tten tuꞌn tul kꞌolecte stis te cykilca xjal, kej xjal iꞌtzx oj tul, bix kej xjal otk chi cyim.

6Yal tzunkej ttanem Dios o chi cyim, miꞌn baj cycꞌuꞌja cyiꞌj, cuma e kꞌumj yol te colbil cye, tuꞌntzen tten cychunkꞌlal te junx maj, tisenj te Dios, amale ilet tiꞌj e cyimke tisen niyꞌtl xjal.

7Ntzaj lkꞌe jkꞌij tuꞌn tbaj cykilca. Juꞌ tzunj, tenx cynaabla bix cwelxix cytzyun cyiiba, tuꞌntzen tbint cyuꞌna tuꞌn cynaꞌna Dios.

8Mas il tiꞌj, cꞌoquel cyakꞌ cyuyey cyey tuya cykil cycꞌuꞌja, cuma ka at tkꞌakꞌbil cycꞌuꞌja cyiꞌ cabtl, yaaꞌn cyiw tuꞌn tnajset cyil cyuꞌna.

9Cykꞌonxa posada cyxola, bix yaaꞌn tuya nbaj cycꞌuꞌja.

10Bix chi ajbenxa cye ocslal tuya laꞌ alcyej cyaakꞌena ma takꞌ Dios cyey, tuꞌn cyajbena te Dios, cuma o tzaj tkꞌoꞌn te jaca juun cyey tuya jun akꞌuntl baꞌn tbint cyuꞌna.

11Ka ma tzaj tkꞌoꞌn Dios cyey tuꞌn t-xiꞌ cykꞌumena tyol cywitz ocslal, chi kꞌumenxita jaxxix tyol Dios. Bix ka ma takꞌ Dios cyey tuꞌn cyajbena cye cabtl, chi ajbena tuya cykil cyipena ma takꞌ Dios cyey, tuꞌntzen tjaw nimsaꞌn Dios tuj cykilca nchi binchana tuꞌn Jesucristo. Jawxit nimset tbi Dios, bix cawenxit te junx maj. Juꞌ ttena.

Qꞌuiyel qꞌuixcꞌaj kuꞌn cuma ocslal koꞌ

12Key ocslal n-oc cyakꞌa weya, miꞌn chi jaw kleeꞌy oj n-oc pena cyiw cyiꞌja tisen jun kꞌakꞌ. Cꞌoquel qꞌuixcꞌaj cyiꞌja tuꞌn tel niyꞌbaj cyiꞌja, bix yaaꞌn jun wikxitl jlu.

13Oj nbaj jlu, chi tzalaja, cuma at cyoclena tuꞌn tiyꞌx qꞌuixcꞌaj cyuꞌna tisen e bint tuꞌn Cristo. Ka ma tziyꞌx qꞌuixcꞌaj tuꞌn tlaj cyocslabla tiꞌj Cristo, nim chi tzalajela oj tyeecꞌan tiib Cristo tuꞌn ttzyet tcawbil jawnex.

14Ka ma chi yasen xjal cyiꞌja cuma ocslalkey tiꞌj Cristo, chi tzalaja, cuma tcub jawnex Espíritu Santo cyibaja, smaꞌn tuꞌn Dios te yecꞌbil ttanem Dioskey. Xmucchaꞌn Espíritu Santo cyuꞌn xjal, pero cyey, njaw cynimsaꞌna tbi.

15Ka at jun cyey niyꞌx qꞌuixcꞌaj tuꞌn, cutz̈it ka yaaꞌn tuꞌn tlaj nbyon, bix ka tuꞌn tlaj n-alkꞌan, bix ka tuꞌn tlaj nbinchan yaaꞌn baꞌn, bix ka tuꞌn tlaj nuk n-ex tkꞌij ttzi cyja xjal.

16Pero ka ma tziyꞌx qꞌuixcꞌaj cyuꞌna cuma ocslalkey, miꞌn tzaj cychꞌixewa. Oꞌcx tuꞌn t-xiꞌ cykꞌoꞌna chjonte te Dios tiꞌj ocslalkey tiꞌ Cristo.

17Key ocslal, ma pon tumel tuꞌn ttzaj tkꞌoꞌn Dios castiwa cyibaj xjal. Katzen ma takꞌ Dios tuꞌn toc pena kiꞌj, ejooꞌ tcwal Dios, ¿ti pjel cyej xjal min ma chi niman jyol tiꞌj colbil cye ma tzaj tkꞌoꞌn Dios?

18Tzin tkbaꞌn tyol Dios te ootxa cyjulu: “Ka ma tzaj tkꞌoꞌn Dios tuꞌn toc pena tiꞌj jun xjal jiquen twitz Dios, yaj tzunj xjal yaaꞌn jiquen bix aj il, ¿ti pjel te?” tz̈i tyol Dios.

19Juꞌ tzunj, oj tiyꞌ qꞌuixcꞌaj cywitza cuma taj Dios, miꞌn cyaj cycyeꞌyena tuꞌn cyokxenena cyiiba tiꞌj, bix tuꞌn cybinchana baꞌn, cuma jaxin binchalte cykilca, bix baꞌn tuꞌn toc ke cycꞌuꞌja tiꞌjxin.