LOS HECHOS 4 - Mam of Todos Santos -- Guatemala Unicode

Tej tpon kꞌiꞌn Pedro tuya Juan cywitz aj cawel

1Pedro tuya Juan nchi yolenxxin cyuya xjal, tej cyul kej pala cye xjal judío cyẍklun cyiibxin tuyaj xin cycawel ke cꞌojlal tuj nintzaj tja Dios, bix xsun kej xin tej cloj saduceo, ejeeꞌxsen xinj min el jax tuj cywitz ka nchi jatz itzꞌjtl cyimne juntl maj.

2Otkxsen chi tzaj kꞌojlxin cuma nchi xnakꞌtzan Pedro tuya Juan cye xjal, bix tuj cywitzxin otk tzꞌel cyipemalxin bix cuma nchi xnakꞌtzantzen Juan tuya Pedro ka cykil xjal cjawetz itzꞌj tisenx otk tyeecꞌan Jesús.

3Bixsen e cytzuyxin Pedro tuya Juan, bix ocx kꞌoꞌnkexin tuj tzeeꞌ texe juntl kꞌij, cuma ya kaletl bix mintiiꞌtl tyem tuꞌn t-xiꞌ niqꞌuet tiꞌ cyilxin, bixsen e cyaj t-xke stis texa juntl kꞌij.

4Pero amale juꞌte, nimxsen xjal cyxolj otk tzꞌoc ebinte tyol Pedro jax eꞌla tuj cywitz. Nukxix xinakcꞌa atle jweꞌ mil ocslal.

5Tetzen juntl kꞌij bix oc cychmon cyiibxin tuj Jerusalén ke cycawel xjal te judío, bix ke nintzaj tij, bix kej xin nmak txꞌolbal ley,

6tuyaj xin Anás, nintzaj tneel pala, tuyaxe cabtl te tjaxin, jaantzen Caifás, juntlxin Juan, bixsen Alejandro.

7Bixsen e cykanenxin tuꞌn cypon Pedro tuya Juan cywitzxin tuyaxe jxin cox otk tzul tnaabl, bix e xiꞌ cykanenxin cye Pedro:

—¿Titzen tten toc cykꞌanena ja xjal lu? ¿Altzen o tzaj kꞌonte cyipemala? ¿Altzen cyey o tzꞌoc kꞌonte cyajwalel tuꞌn toc cykꞌaꞌnena jxjal lu?―tz̈itzen ke pala.

8Pero te Pedro nimxsen tipemalxin tuꞌn Espíritu Santo, bix aj ttzakꞌbeꞌnxin:

—Key nin cawel bix xsun kej nintzaj xjal te Israel,

9kane nchi kanena keya tiꞌj baꞌn ma tzꞌoc kbinchaꞌna tiꞌj coxa, tuꞌntzen cybintey ti tten tul tnaablxin,

10chin ttzakpiꞌ tzuna tuꞌn t-xiꞌ ntxꞌolbaꞌn cyey bix te cykil xjal te Israel, tej xin xjal lu o kꞌanj texin tuꞌn tipemal Jesús te Nazaret, jxin Scyꞌoꞌn tuꞌn Dios, jaxj xin cyey e cybiy twitz cruz, bix jaxj xin e jatz titzꞌjsaꞌn Dios tuj cyamecy. Tuꞌntzen tajwalel bix tipemal jxin Jesús lu jxin xjala waꞌlcꞌa kuyena cywitza ya baꞌntlxin.

11Tiꞌj tzunj xin Jesús lu nyolena tyol Dios nbyaꞌn tuꞌn cyjulu: “Ja tzunj xak ex cyxooꞌn xjal binchal jaaꞌ, ja tzunja ma tzul meltzꞌaj tuꞌn toc te mas nintzaj xak te t-xeeꞌ jaaꞌ.” Ejeeꞌy tisen binchal jaaꞌ, bix ja xak mas nintzaj, jatzen Jesús.

12Tuj cykil twitz txꞌotxꞌ, min-al juntl tisen Jesús baꞌn kcoꞌpj tuꞌn. Junx biybaj tjakꞌ cyaꞌj twitz cykil twitz txꞌotxꞌ o tzꞌoc tkꞌoꞌn Dios tajwalel te coꞌpl xjal, ja Jesús―tz̈i Pedro cye nintzaj xjal.

13Tejtzen toc cybiꞌn nin cawel cyiw cycꞌuꞌj Pedro tuya Juan nchi yolen, e jawxsen kleeꞌ ke xjal, cuma oc cycyeꞌyen xjal ejeeꞌxin nuk tisen yalx xjalkexin. Min otk chi xaꞌcx tuj scwela bixsen el cyniyꞌ ke cawel tiꞌj Pedro bix Juan ka ejeeꞌxin otk chi bet tuya Jesús, bix juꞌ tzunj nim baꞌn cyuꞌnxin.

14Bix cuma waꞌlcꞌa tzunj xin otk tzul tnaabl, juꞌ tzunj mix e bina cyyolenxin kaꞌ yol cyiꞌj.

15Entonces bix ex chkꞌetkexin tuj juntl cwart, bixsen e cyaj ke nin cawel te yolel cyjunalxxin.

16Tz̈i tzunkexin cyjulu cyxolxxin:

—¿Titzen kbincha cyuyaj xjal lu? Cykilxsen xjal te Jerusalén itzkilte ka ma tzul tnaabl xjal cox cyuꞌn. Mlay kewen.

17Pero jax mitetpe tuꞌn kcuyante tuꞌn t-xiꞌ itz̈en cyxnakꞌatz cyxol xjal. Entonces tuꞌntzen tbaj twiꞌ, chi oqueltzen ksiyꞌpuꞌn tuꞌntzen te jaꞌlewe bix ma txiꞌ bet tyem ya miꞌn chi yolentl tiꞌ Jesús te juntl xjal―tz̈itzen ke cawel.

18Bixsen etz cytxcoꞌnxin Pedro tuya Juan juntl maj, bix e xiꞌ cykbaꞌnxin:

—Matzen txiꞌ kkbaꞌna cyey ya mintzentiiꞌtl tuꞌn cyyolena bix tuꞌn cyxnakꞌtzana xjal tiꞌj Jesús―tz̈i tzunkexin.

19Pero bix aj ttzakꞌbeꞌn Pedro tuya Juan:

—¿Titzen cyey nxiꞌ cybisen tiꞌj? Altzen cye mas jiquen twitz Dios, ¿japaj tuꞌn toc kbiꞌna ejeeꞌy, bix ma jaj tuꞌn toc kbiꞌna Dios?

20Yaltzen keya, mlay cyaj kkꞌoꞌna tiꞌjxe ti jilel o tzꞌoc kbiꞌna bix o tzꞌoc kcyeꞌyena, cuma juꞌ toc tuꞌn Kman Dios―tz̈i Pedro tuya Juan.

21Pero bix oc meltzꞌaj ke cawel te siyꞌpulec cyexin juntl maj tuꞌnx miꞌn chi cub tenxin tz̈itpulte tpocbal Jesús. Yajcꞌatltzen bixsen e tzakpetkexin. Min e cub kexin tuj castiwa tuꞌn mintiiꞌ il baj, cuma cykilxsen xjal nchi kꞌon chjonte te Dios tiꞌj tikꞌch otk baj.

22Jxin xjal otk tzul tnaabl kꞌiꞌnxin mas te cyaꞌwnak jnabkꞌi tej tiyꞌ bet-xin tneel maj.

Tej t-xiꞌ cykane ocslal tuj naꞌj Dios tuꞌn ttzaj kꞌoꞌn nim cyipemalxin tuꞌn cykbaꞌnxin tyol Dios

23Tzinxix nchi tzakpet-xin, bix e xiꞌ Juan tuya Pedro jaaꞌ taꞌ jcabtlxin t-xel Jesús, bixsen e baj cykbaꞌnxin tikꞌch toc cyuꞌn tajwil naꞌl Dios bix ke tij xjal cyexin.

24Tejtzen tbaj cybiꞌnxin, bixsen el cyniyꞌxin tiꞌj ka tuꞌn cyakꞌxin xnakꞌtzal cye xjal tjakꞌ tcꞌojlabatz ke cawel, bixsen akꞌkexin te naꞌl Dios cyjulu:

—Taat, jay Kaawa, ja tey e cub binchante cyaꞌj, bix twitz txꞌotxꞌ, bix mar, bix tikꞌch at.

25Jay e kbante tuꞌn Espíritu Santo tuꞌn tyol kxeꞌchela David tyolela: “¿Tikentzen n-oca cykꞌon cyiib te nintzaj cykil tnom twitz txꞌotxꞌ? ¿Tikentzen nuk tikꞌch nbaj cyniqꞌuen xjal tiꞌ Dios? Mintiiꞌ qꞌuelela.

26Ke nmak cawel twitz txꞌotxꞌ bixsen ke cawel cyuj tnom matzen tzakꞌ oquel cychmon cyiib tuꞌn cyoc kꞌojlxin tiꞌ Dios bixsen tiꞌj xin Scyꞌoꞌn tuꞌn Dios te cawel twitz txꞌotxꞌ,” tz̈i tzuna te tyolela David.

27Bix jax juꞌtzen nbaj. Tuj tnom lu, ja tzunj xin cawel Herodes bix xsunj xin cawel Poncio Pilato matzen tzꞌoc cymojban cyiibxin cyuya kej xjal judío bix xsun kej xjal yaaꞌn judío tuꞌn cyoc kꞌojlxin tiꞌj xin sant Tcwala, jxin e tsicyꞌa te cawel.

28Cykil o baj cybinchaꞌn, ja tzunja e tkbay ti jilel tuꞌn tbaj.

29Bix juꞌx nbaja. Kman Dios, cyeꞌnctza ti nbaj kiꞌja. Nko baj siyꞌpuꞌna tuꞌn nko tz̈itpuna tyola. Keectzen tcꞌuꞌja kiꞌja tuꞌntzen miꞌn tzaj ttz̈i kiꞌja oj t-xiꞌ kyolena tyola.

30Nuksama, tuꞌntzen tipemala tzula cynaabl yaab tuꞌn toc cybiꞌn xjal tyola. Kꞌontza mas tipena keya tuꞌn tcub kbinchaꞌna mas techlala cywitz xjal, tuꞌn tipemal Tcwala Jesús—juꞌtzen tten cynaꞌn t-xel Jesús te Dios.

31Tejtzen cybaj naꞌnxin Dios, bixsen e tzaj yucch jaaꞌ jaaꞌj cychmona cyiibxin. Bix oc nim cyipemalxin tuꞌn Espíritu Santo tuꞌntzen kꞌuklxix cycꞌuꞌjxin oj t-xiꞌ cykbaꞌnxin tyol Dios.

Kej ocslal cykilxsenke cychmon cyiib tuya cykil cyanem

32Yaltzen cye ocslal, cykilxsenke cychmon cyiib tuya cykil cyanem. Min-alxsen jun e kbante ka nuk cye tikꞌch cye, sino e baj cypaꞌncye xjal tuya juntl wik laꞌ ti tcyajlalel eteꞌ.

33Yaltzen ke t-xel Jesús, tuyaxsen nim cyipemalxin t-xiꞌ cykbaꞌnxin ti tten tjatz itzꞌj Jesús tuj cyamecy. Bix enterax ke ocslal e ten tjakꞌ t-xtalbil Dios bix tuj ttz̈yal.

34Minxsen-al jun ocslal e ten tuj tcyajlal, cuma alcyej at cytxꞌotxꞌ bix ma at juntl cyja, bix e xiꞌ cyqꞌueyen, bix e tzaj cyiiꞌn twiꞌ.

35Cye t-xel Jesús, tuꞌn tcub cypaꞌnxin cywitz mebe laꞌ tiꞌ tcyajlalel eteꞌ.

36Tisen tzunj junxin xjal José tbi, jaxsen xinj n-oc tbi cyuꞌn t-xel Jesús te Bernabé, jatzen elpeninaj “nimsal cyanem xjal.” Jatz elnina itzꞌjxin cyxol xjal levita. Jatzen itzꞌjaxin tuj jun lugar Chipre tbi. Jatztzen najlaxin Jerusalén.

37Ja tzunj xin José e xiꞌ qꞌueyente jun ttxꞌotxꞌxin, bix e xiꞌ tkꞌoꞌnxin twiꞌ cye t-xel Jesús tuꞌn tajben cyexin.