2 PEDRO 2 - Mam of Todos Santos -- Guatemala Unicode

Kej nchi xnakꞌtzan ẍtakꞌ yol kxol

1Pero cyxol xjal te ootxa, yaaꞌn nuk oꞌcx e cypocba tyolel Dios jaxxix. Jax juꞌx e ten kej xjal e xiꞌ cykbaꞌn ka tyolel Dioske, pero yaaꞌn jax cyuꞌn. Bix jax juꞌx jaꞌlewe, at xnakꞌtzal ẍtakꞌ cyxola. Chebe chebe tzin chi xnakꞌtzan tuya cynaabl ẍbiꞌlke pero ẍtakꞌke bix te xitelke. Tzin cykbaꞌn ka mintiiꞌ cꞌajbela jchojbil tuꞌn Kaaw tuꞌn kclet tiꞌ kil. Juꞌ tzunj, tzin cyjyoꞌn tuꞌn tcub castiwa cyibaj, bix chꞌinnchꞌe oj tcub.

2Nim xjal cyxola chi oquel lpe tiꞌj cyyecꞌbil, tuꞌn tbint nuk jaj tajbil cyxumlal cyuꞌn, bixsen chi yolel xjal yaaꞌn baꞌn tiꞌj kocslabl jaxxix.

3Kej xnakꞌtzal ẍtakꞌ cyaj tuꞌn tel cyiiꞌn cypwaka, bix juꞌ tzunj, tzin cyyajlaꞌnkey tuya cyyol ẍtakꞌ.

Pero jatxe ootxa e cub tnincꞌuꞌn Dios tuꞌn tcub tkꞌoꞌn cycastiwa, bix chꞌix tpon tumel tuꞌn cyxiꞌ tuj il.

4Jaxxix cwel tkꞌoꞌnxin cycastiwa, cuma jaxxix e xiꞌ tkꞌoꞌnxin cycastiwa kej tsanjelxin tuj cyaꞌj tej cybinchante il. E cuꞌtz t-xooꞌnxin ejeeꞌ maa tuj jun lugar klolj Tártaro tbi, te cꞌuꞌlcye joocꞌtzen nchi ayon jkꞌij tuꞌn cyocx tuj kꞌakꞌ te junx maj.

5Jax juꞌx e tzaj tkꞌoꞌn Dios cycastiwa kej xjal e ten jatxe ootxa. Tej tcub tmaksiꞌnxin entera twitz txꞌotxꞌ tuya aꞌ, e cub baj cykilca xjal aj il. Oꞌcx tej xin tyolel Dios jiquen, Noé, tuya wuuktl ke te tjaxin, e clet tuꞌn Dios.

6Jax juꞌx e tzaj tkꞌoꞌn Dios cycastiwa kej aj Sodoma bix kej aj Gomorra. E cuꞌtz kꞌakꞌ cyibaj, biꞌx e cub tzaꞌjex kej caꞌba tnom lu, tuꞌn cyajben te jun yecꞌbil te cyej xjal cycyꞌi Dios te mas yaj.

7Pero e clet jxin Lot tuꞌn Dios twitz kꞌakꞌ. Jiquenxix te Lot, bix e tzaj nim tbisxin tuꞌn tlaj cybinchben xinak kaꞌxsen tej cyoc ipan cyiꞌj xinakxtl.

8Najl Lot cyxol xjal lu, bix cykil kꞌij, tej toc tcyeꞌyenxin cybinchben kaꞌ bix tej tbintexin, ocxsen nim bis tuj tanemxin, cuma baꞌn xjalxin bix jiquenxsen tnaablxin.

9Katzen o bint tuꞌn Dios tuꞌn e cub tkꞌoꞌn cycastiwa aj il te nejl, bix ka o tcoꞌpan ttanem tuj cykꞌab binchal il, jaxsen juꞌx cbinel tuꞌnxin jaꞌlewe tuꞌn miꞌn chi cub tzꞌaka tuj j-il cyaj xnakꞌtzal ẍtakꞌ tuꞌn tbint cyuꞌna, bix at tipemalxin tuꞌn tcub ttzyuꞌnxin ejeeꞌ ojxe tpon tumel tuꞌn cyxiꞌ tuj kꞌakꞌ te junx maj.

10Bix mas ctzaal tkꞌoj Dios cyiꞌ kej xjal ncheꞌx lpe nuk tiꞌj tajbil cyxumlal bix kej xjal n-el cyiiqꞌuen ley. Kej xnakꞌtzal lu, mintiiꞌ ttz̈i cyiꞌj, bix iyꞌnen tibaj cynaabl. Mintiiꞌ chꞌin ttz̈i cyiꞌj tuꞌn cyxmucchan cyiꞌj ke jawnex cawel.

11Pero ke tsanjel Dios tuj cyaꞌj, amale atet mas cyipemal bix mas cyoclen cywitz xnakꞌtzal, pero min chi yolen kaꞌ cyiꞌj xnakꞌtzal ẍtakꞌ twitz Dios.

12Pero kej xnakꞌtzal ẍtakꞌ lu, tisen jilke nchi itzꞌj nuk tuꞌn cytzyet bix tuꞌn cycyim. Min chi ximan tiꞌj, sino nuk ncheꞌx lpe tiꞌj alcye tzin tkbaꞌn cyxumlal. Nchi yolen xnakꞌtzal kaꞌ tiꞌj jmin tzꞌel cyniyꞌ tiꞌj, pero tisen nchi cub byet ke jil cyuꞌn xjal, juꞌxsen chi xeꞌl xnakꞌtzal tuj castiwa tuꞌn Dios.

13Tuj cywitz, chi camal tuꞌnj cybinchben, pero cxeꞌl tzꞌak cycotz nchi ayon tiꞌj. Yaaꞌn nuk te koniyan, sino jax juꞌx te kꞌij ncheꞌx lpe tiꞌj nuk tikꞌch taj cyxumlal. Ejeeꞌ tzunja tisen jun tzꞌil tiꞌ xbalen sakxix, cuma oj nchi chmet cyuyey te iyꞌsalte santa cena, nuk oꞌcx cyaj tiꞌj tuꞌn cynoj.

14Oj n-oc cycyeꞌyen ke xuuj, nuk nchi kꞌaꞌbec tuꞌn tbint pajlel cyuꞌn. Min tzꞌel cygana tuꞌn cybinchan il cyuya xuuj. Ncub cyiꞌ kej ocslal yaaꞌn cyiw tuj cyocslabl cyuꞌn tuꞌn cybinchante jyaaꞌn baꞌn cyuya. Ma nakꞌet cyanem nuk tuꞌn toc cykꞌaꞌben nuk tikꞌch cye cyuyey. Cwel tkꞌoꞌn castiwa Dios cyibaj.

15Ma cyaj cycyeꞌyen jbe jiquen, bix ma chi tzpet. Ma chi oc lpe tiꞌj tyecꞌbil jxin tyolel Dios Balaam, tcwal Beor. Tuꞌn tcambilxin pwak, e tajbe Balaam tuꞌn tcyaj tsbuꞌn ttanem Dios.

16Pero cuma e tajbe Balaam tuꞌn tbinchan il, at jun oc ilente jaxin. Oc ilet-xin tuꞌn tburxin mixbe yolen. E yolenjil tisen jun xjal, tuꞌn miꞌn tzꞌoc taawjil te jun yuwin xjal.

17Kej xnakꞌtzal ẍtakꞌ lu tisen jun twiꞌ aꞌ mintiiꞌ aꞌ tzin tkꞌoꞌn bix tisen jun muj kꞌiꞌn tuꞌn cykꞌiꞌk pero mintiiꞌ jbal tzin tkꞌoꞌn, cuma mintiiꞌ cynaabl n-etz oj nchi yolen. At jun jawnex klolj nayon cyiꞌj.

18Nchi yolen tuya jawnex cyyol pero mintiiꞌ cynaabl tiꞌj, tuꞌntzen tcub cyiꞌ ocslal cyuꞌn tuꞌn cyxiꞌ lpe tiꞌj nuk tikꞌch kaꞌ taj cyxumlal. Bix mas n-oc cyipen tiꞌj tuꞌn tcub cyiꞌ kej ocslal cyuꞌn, ejeeꞌx o chi etz ok cyxol kej tzpetsal xjal pero yaaꞌn cyiwke tuj cyocslabl.

19Tzin cykbaꞌn mintiiꞌ il tiꞌj tuꞌn cyten xjal tjakꞌ tley Dios, cuma at tzakpibl tuꞌn tbint nuk tikꞌch taj kxumlal. Pero tuꞌnj lu n-el cyiiqꞌuen tcawbil Dios. Eteꞌcxsen tjakꞌ tcawbil cyxumlal, cuma ka cykꞌon cyiib tuya alcye taj cyxumlal, jatzen cyaawa.

20Nejl, el tzakpetke tiꞌj kaꞌ at twitz txꞌotxꞌ tuꞌnj cytzkiꞌn Clol ke, Kaaw Jesucristo, pero jaꞌlewe ma chi cub tzꞌak juntl maj tuꞌnj il bix ma chi ocx tjakꞌ tcawbil. Juꞌ tzunj, masxsen tuj il eteꞌ twitz nejl.

21Masxsetle baꞌn te cye nuket min e xiꞌ cyiiꞌn be jiquen twitzj tuꞌn tcyaj cycyeꞌyen xjan tley Dios tiꞌj colbil e tzaj kꞌoꞌn te cye.

22Jma bint cyuꞌn tisenj nbyan tiꞌ jun yol nkbaj cyxol xjal. Tzin tkbaꞌn cyjulu: “Ke txyan nchi aj meltzꞌaj loꞌlte cyxaꞌb.” Bix at juntl yol tzin tkbaꞌn cyjulu: “Ke boch oj nbaj txjet cyiꞌj, ncheꞌx juntl maj tuj xookꞌl,” tz̈i yol. Juꞌtzen e baj cyej xin xnakꞌtzal ẍtakꞌ aj meltzꞌajkexin tjakꞌ tcawbil taj cyxumlal.