2 CORINTIOS 4 - Mam of Todos Santos -- Guatemala Unicode

1Juꞌ tzunj, key hermano, tuꞌn t-xtalbil Dios wibaja, o wiikꞌa waakꞌena te kꞌumlte tpocbal j-acꞌaj ttrat Dios, bix juꞌ tzunj miꞌn chin xyutꞌena tuj waakꞌena.

2Min tzaj nchꞌixewa oj nchin kꞌumena tiꞌj acꞌaj trat, cuma min cub nsbuꞌna ke xjal, bix min nchin kꞌumena tyol Dios tuꞌn tel wiiꞌna cypwak xjal, tisen nbint cyuꞌn kej xjal nchi yolen nuk ten cyuꞌn. Twitz Dios bix twitz cykilca xjal nxiꞌ nkꞌumena nuk alcyej jaxxix, tuꞌntzen tchicꞌajax jiquenxix kena.

3Yal kej xjal min tzꞌel cyniyꞌ tiꞌj nxiꞌ nkꞌumena, ejeeꞌ tzunja ncheꞌx tuj kꞌakꞌ. At jun potzbil tcub tibaj cynaabl.

4Jaj taaw il ncawen twitz txꞌotxꞌ jaꞌlewe ncub tmos̈en cynaabl kej xjal yaaꞌn ocslal, tuꞌntzen miꞌn tzꞌel cyniyꞌ tiꞌj tpocbal jxin Cristo jawnex, jxin nyeecꞌan ke tiiꞌn Dios, cuma jaxin juniyꞌ tuya Dios.

5Yaaꞌn wiꞌja jnxiꞌ nkꞌumena, sino tiꞌj Kaaw Cristo Jesús. Ntiina tzalu nuk tuꞌn wajbeꞌna cyey tuꞌn wajbeꞌna te Jesús.

6Tuj tneel, tej nuk klolj taꞌ twitz txꞌotxꞌ, e xiꞌ tkbaꞌn Dios, “Tuꞌnxit ttxakan spiꞌyen,” tz̈i Dios. Tisen e cub naj klolj tej tul txakpaj spiꞌyen jatxe ootxa, juꞌxsen qꞌuelelj klolj twitz knaabl jaꞌlewe oj ttzaj tonen Dios ejooꞌ tuꞌn tel kniyꞌ tiꞌj. Bix oj tel kniyꞌ tiꞌj jawnexte Cristo, otktzen tzꞌel kniyꞌ tiꞌj jaxse jawnex Kman Dios, cuma ja Cristo yecꞌbil te ke ti tten Dios. Tuꞌn tzunja nchin kꞌumen weya tiꞌ Cristo.

Il tiꞌj tuꞌn toc ke kcꞌuꞌj tiꞌ Dios

7Yal weya, juꞌ kena nuk tisen jun wicyꞌil ajnintz bix yaaꞌn cyiw bix ncub pax. Pero tuj wicyꞌil at kꞌinemal, bix juꞌxsen weya kꞌiꞌn jun nintzaj wuꞌna. Jaj tpocbalj Cristo. Jwipemal tuꞌn tbint taakꞌen Dios yaaꞌn weya, sino te Dios, tuꞌntzen tchicꞌajax yaaꞌn inayena at wipemala tuꞌn tbint taakꞌen Dios, sino ja te Dios at nimxsen tipemal tuꞌn tbint taakꞌen wuꞌna.

8Jaxte at nim wik qꞌuixcꞌaj n-oc weya, pero Dios n-onen wiꞌja tuꞌn miꞌn xcye wibaja. Bix juꞌx min tzꞌel nniꞌya tiꞌj tiken nuk tikꞌch nbaj wiꞌja, pero min nbaj ncꞌuꞌja tuj waakꞌena.

9Bix juꞌx nim nchi oc lpe xjal wiꞌja te yasl te weya, pero Dios min o cyaj tcyeꞌyen inayena. Bix juꞌx ma chin iyꞌ tzꞌaka cyuꞌn kꞌojlel wiꞌja, pero lux kena iꞌtza.

10Jaca kꞌij niyꞌx qꞌuixcꞌaj tuꞌn nxumlala tuj taakꞌen Jesús, tuꞌntzen toc cycyeꞌyen xjal yaaꞌn jawnex kena, tuꞌntzen yaaꞌn jweya nbi cjawel cyniman, sino tuꞌntzen cyjyon cychunkꞌlal tzin tkꞌoꞌn Jesús.

11Loꞌj tzunj iꞌtzx kena, jaca kꞌij at xjal cyaj tuꞌn ncub byeta tuꞌnj taakꞌen Jesús. Niyꞌx wuꞌna juꞌwa tuꞌntzen tcnet cyuꞌn xjal jcychunkꞌlal tzin tkꞌoꞌn Jesús.

12Tuꞌnj o tziyꞌx qꞌuixcꞌaj wuꞌna juꞌwa tuj waakꞌena, o cnet cyuꞌna cychunkꞌlala te junx maj.

13Pero n-octzen ke ncꞌuꞌja tiꞌ Dios. Inayena tisenj xjal e tkba cyjulu tuj tyol Dios jatxe ootxa: “‘E xiꞌ wocslaꞌna, bix juꞌ tzunj e xiꞌ nkꞌumena jaj tpocbal j-e wocslaya,’ tz̈i jun xjal,” tz̈i tyol Dios. Jax juꞌx weya o txiꞌ wocslaꞌna. Juꞌ tzunj jax nxiꞌ nkꞌumena jaj e wocslaya.

14Ntzkiꞌna Dios cjawel itzꞌjsante ke ocslal tuj cyamecy, cuma ntzkiꞌna o jatz titzꞌjsaꞌn Dios ja Kaaw Jesús tuj cyamecy. Cjawel tiiꞌn Dios inayena cyuyey tuꞌn kpon jaaꞌ taꞌxin.

15Juꞌ tzunj cykilca qꞌuixcꞌaj n-oc wiꞌja tzin npaꞌna. Bix tzin npaꞌna te cyey, tuꞌntzen at t-xtalbil Dios cyibaja. Ka at nim xjal ccyiikꞌel t-xtalbil Dios, jax nim xjal cxeꞌl kꞌonte chjonte te Dios, tuꞌntzen tjaw nimset tbi Dios mas.

16O tzꞌel nniꞌya tiꞌj ko jawel itzꞌj tuj cyamecy. Juꞌ tzunj min chin xyutꞌena tuj waakꞌena. Amale bajnent baj tipen nxumlala tuꞌnj cykilca n-oc wiꞌja, pero jax jaca kꞌij ncywix ncꞌuꞌja.

17Tej niyꞌx tuꞌn nxumlala jaꞌlewe yaaꞌn nimxix te ja twitzj ncotza cncamela laꞌ alcye jun kꞌij tuꞌnj qꞌuixcꞌaj niyꞌx wuꞌna tuj taakꞌen Cristo. Jqꞌuixcꞌaj niyꞌx tuꞌn nxumlala jaꞌlewe pjel tilel, pero tbaneyil j-acꞌaj nchunkꞌlal mintiiꞌ tbajlel.

18Juꞌ tzunj min tzꞌoc nkꞌon wiiba tiꞌj chicꞌaj, cuma pjel laꞌ alcye jun kꞌij, sino juꞌ n-oc nkꞌon wiiba tiꞌj minaꞌx tchicꞌajax, cuma ctemel te junx maj.