1 JUAN 3 - Mam of Todos Santos -- Guatemala Unicode

Ma ko oc te tcwal Dios

1Nimxsen ma tzaj tyeecꞌan Kman Dios tkꞌakꞌbil tcꞌuꞌj kiꞌj, cuma ma takꞌ te ke tuꞌn koc te tcwal Dios. Tuꞌn tzunj tcwal Dios koꞌ, min tzꞌel cyniyꞌ xjal te twitz txꞌotxꞌ kiꞌj. Ka min tzꞌel cyniyꞌ xjal tiꞌj Kman Dios, jax juꞌx min tzꞌel cyniyꞌ kiꞌj, ejooꞌj tcwalxin.

2Key ocslal n-oc cyakꞌa weya, amale mat ko oc te tcwal Dios jaꞌlewe, pero minaꞌx tchicꞌajax ti ko oquela. Pero n-el kniyꞌ tiꞌj oj tul jlet Tcwal Dios juntl maj, bix oj klonte tiiꞌn tcyeꞌncxin, ko oqueltzen sakxix tisex texin.

3Bix alcyej xjal nayon tiꞌj Cristo, ncyajtzen tcyeꞌyen il, tuꞌn toc sakxix tisen te Cristo sak.

4Alcyej xjal nbinchan il, nkꞌojl tiꞌj tley Dios, cuma tuꞌnj nbinchan il, junx taꞌ tuyaj n-el tiiqꞌuen ley.

5Baꞌn cyuꞌna ul Cristo twitz txꞌotxꞌ tuꞌn tel tiiꞌn kil, bix baꞌn cyuꞌna mintiiꞌ il e cub tbinchaꞌn.

6Juꞌ tzunj, alcyej xjal mojl taꞌ tuya Cristo, min nbinchan il. Kej xjal binchal il, min cytzkiꞌn jaxin.

7Key wuya n-oc cyakꞌa weya, miꞌn chi oc lpey cyiꞌ kej xjal ẍtakꞌ. Alcyej xjal nbint baꞌn tuꞌn, tzin tyeecꞌantzen ka jiquenxix taꞌ, bix ntyeecꞌan ka lepch tiꞌj Cristo, cuma jiquenxix te Cristo.

8Alcyej xjal nbinchan il, tzin tyeecꞌantzen ka lepch tiꞌj taaw il, cuma ja te taaw il binchal il jatxix tej tjaw tkꞌoj tuya Dios. Pero ul Tcwal Dios twitz txꞌotxꞌ tuꞌn tcub xitj cykilca taakꞌen taaw il.

9Ka ma tzꞌoc jun xjal te tcwal Dios, ncyaj tcyeꞌyen il, cuma nxiꞌ tiiꞌn tnaabl Dios. Il tiꞌj cyjel tcyeꞌyen il, cuma tcwal Dioste.

10Tzinen taꞌ alcyej xjal tcwal Dios bix alcyej xjal n-oc lpe tiꞌj taaw il, cuma kej xjal min nbint baꞌn cyuꞌn bix min n-oc cyakꞌ ocslal cye, yaaꞌn tcwal Dioske.

11Jatxe tej tpon tpocbal colbil cyxola, o cybiy il tiꞌj tuꞌn tten tkꞌakꞌbil cycꞌuꞌja cyxola.

12Miꞌn ko oc tisenj xin Caín. Lepchxin tiꞌj taaw il, bix e cub tbyoꞌnxin titzꞌenxin. ¿Tikentzen e cub tbyoꞌnxin? Cuma kaꞌ tbinchbenxin. Yal tzunj te titzꞌenxin, baꞌn texin tbinchben titzꞌen, bix juꞌ tzunj e tzaj chiꞌl tcꞌuꞌjxin tiꞌj titzꞌenxin.

13Key ocslal, miꞌn chi jaw kleeꞌy ka ma tzꞌel cyiiqꞌuen kej xjal yaaꞌn ocslal ejooꞌ.

14Pero kxol, at tkꞌakꞌbil kcꞌuꞌj, bixsen tzin tyeecꞌan jlu ma ko etz tuj jun be nxiꞌ kꞌinte ke tuj cyamecy, bix ma ko ocx tuj jun be nxiꞌ tiiꞌn ejooꞌ tuj kchunkꞌlal. Alcyej xjal min n-oc cyakꞌ ocslal te, nbettzen tuj jun be nxiꞌ tiiꞌn tuj cyamecy.

15Alcyej ocslal n-el tiiqꞌuen juntl ocslal, byol xjaltze, bix n-el kniyꞌ tiꞌj min-al jun byol xjal at tchunkꞌlal te junx maj.

16N-eltzen kniyꞌ tiꞌj ti tten tuꞌn toc cyakꞌ ocslal ke, cuma e cyaj tkꞌoꞌn Cristo jun yecꞌbil te ke, jaj tej tcyimxin te kxel. Jax juꞌx ke, baꞌn tuꞌn t-xiꞌ kkꞌon kiib tuꞌn kcyim tuꞌnj tkꞌakꞌbil kcꞌuꞌj tiꞌ juntl ocslal ka at-xix il tiꞌj.

17Ka at jun ocslal mintiiꞌ titzꞌjel, bix ka ma til juntl ocslal at te titzꞌjel, pero min ma txiꞌ tonen ocslal mebe, ¿ti toc cyuꞌna? ¿Atpa tkꞌakꞌbil tcꞌuꞌj tisej te Dios? Mintiiꞌ.

18Key wuya n-oc cyakꞌa weya, yaaꞌn nuk oꞌcx cxeꞌl kkbaꞌn n-oc cyakꞌ xjal ke, sino cxeꞌl kyeecꞌan ka jaxxix kyol tiꞌj tkꞌakꞌbil kcꞌuꞌj tuya kbinchben.

19Tuꞌnj toc cyakꞌ ocslal ke tuya cykil kcꞌuꞌj, qꞌueleltzen kniyꞌ tiꞌj ka ma ko oc lpe tiꞌ yol jaxxix, bix qꞌuelel kniyꞌ tiꞌj ka jiquen etoꞌ twitz Dios.

20Amale atet maj nxiꞌ tkbaꞌn kanem yaaꞌn baꞌn jnbint kuꞌn, pero mas nim t-xtalbil Dios twitzj kil, bix baꞌn tuꞌn Dios cykilca il nbint kuꞌn.

21Key ocslal n-oc cyakꞌa weya, ka baꞌn kuꞌn mintiiꞌ il nbint kuꞌn, baꞌntzen tuꞌn t-xiꞌ kcubsaꞌn kwitz te Dios tuya cykil kcꞌuꞌj.

22Bix alcyej nxiꞌ kkanen texin, ctzaal tkꞌoꞌnxin te ke, ka ma tzꞌoc kbiꞌn jtzin tkbaꞌnxin bix nbinttzen tajbilxin kuꞌn.

23Bix jtaj Dios tuꞌn tbint kuꞌn, cyjulu: Tuꞌn t-xiꞌ kocslaꞌn ka Tcwal Dios jxin Jesucristo, bix tuꞌn tten tkꞌakꞌbil kcꞌuꞌj kxol, tisen ma kbaj tuꞌnxin te ke.

24Alcyej xjal ma tzꞌoc tbiꞌn jma txiꞌ tkbaꞌn Dios, attzen tmojbabl tiib tuya Dios, bix at Dios tuya. Bix tuꞌntzen Espíritu Santo ma tzaj tkꞌoꞌnxin te ke, ma tzꞌel kniyꞌ tiꞌj at kmojbabl kiib tuya Dios.