1 CORINTIOS 1 - Mam of Todos Santos -- Guatemala Unicode

Tej t-xiꞌ tkꞌoꞌn apóstol Pablo jun kꞌolbebl cye ocslal tuj tnom Corinto

1Inayena, Pablo, nxiꞌ ntzꞌiꞌbena j-uꞌj lu te cyey ocslal tuj tnom Corinto. Dios o scyꞌonte weya tuꞌn wajbena te t-xel Jesucristo. Tuyax Hermano Sóstenes at wuyena, bix tuyax nxiꞌ kꞌonte jun kꞌolbebl te cyey.

2Ejeeꞌ tzuna t-xjal Dios. At cymojbabl cyiiba tuya Cristo Jesús, bix juꞌ tzunj ejeeꞌy t-xjal Dios, tuꞌn cyajbena te. J-uꞌj lu cꞌajbel te cyey, bix yaaꞌn nuk te cyey, sino tuyax te cykil kej xjal nxiꞌ cynaꞌn tbi Kaaw Jesucristo, cuma jaxin Taaw cykilca ocslal.

3Waja nuket ma cycꞌaman jun cyꞌiwlabl cyey tuꞌn Kman Dios bix tuꞌn Kaaw Jesucristo, bix nuket eteꞌy tuj ttz̈yal.

Jun akꞌbil chjonte tiꞌj t-xtalbil Dios

4Key hermano, nxiꞌ nkꞌoꞌnxwe chjonte te Dios cyiꞌja. Nchin tzalajwe cuma Dios e tzaj kꞌonte nim t-xtalbil cyibaja tuꞌn Cristo Jesús tej cyocslana.

5Tuꞌnxin at cyipemala tuꞌn tbint cykil cyuꞌna. At cyipemala tuꞌn cykbantey tuj tzinenxix jn-el cyniꞌya tiꞌj, bix tuꞌn tel cyniꞌya tiꞌj ti tten jaxxix yol.

6Jaj lu ncyiwsante at tipemal tpocbal Cristo o cyaj nkꞌoꞌna cyxola.

7O tzaj tkꞌoꞌn Dios cyipemala tuꞌn tbint cykil cyuꞌna, bix juꞌ tzunj yaaꞌn at-x cyaja tiꞌj tuꞌn tbint alcyexja cyuꞌna. Cykilcaj kꞌiꞌn cyuꞌna te tajbel te Dios joocꞌtzen nchi ayona tiꞌ Kaaw Jesucristo texe oj tulxin juntl maj.

8Jaxin ncyiwsante cyey tuꞌn cyweꞌxixa tuj cyocslabla, tuꞌntzen sakxixkey oj tul Kaaw Jesucristo te cyeyꞌlte cyey ka baꞌn xbint cyuꞌna bix ka min.

9Dios o txconte cyey tuꞌn cykꞌonte cyiiba tuya Tcwalxin, ja Kaaw Jesucristo. Bix te Dios njapan bajxixte tiꞌ tyol te ke. Juꞌ tzunj jaxxix at kmojbabl kiib tuya Kaaw.

Jun pabl cyiib kej ocslal tuj tnom Corinto

10Key hermano, amale nxiꞌt nkꞌoꞌna chjonte te Dios cyiꞌja, pero il tiꞌj tuꞌn cyxiꞌ ncawena. Ja Kaaw Jesucristo nkbante tuꞌn t-xiꞌ nkꞌumena cyey chi cwel tena tuya junx cynaabla, tuꞌntzen miꞌn baj cypaꞌn cyiiba tuꞌn cykꞌoja, tuꞌntzen cytena tuj ttz̈yal.

11Key hermano, nxiꞌ nkbaꞌna juꞌwa cuma o nbiꞌya cyuꞌn ke te tja Cloé tiꞌj cykꞌoja.

12Ejeeꞌtzen nchi kꞌumente we at cab cyey nkꞌumente: “Te Pablo koꞌya”; bix cabtl nkꞌumente: “Te Apolos koꞌya”; bix cabtl nkꞌumente: “Te Pedro koꞌya”; bix cabtl nkꞌumente: “Te Cristo koꞌya.”

13Jeyꞌ, ¿titzen nbaj cyey? ¿Chꞌimapatzen elnina Cristo cyxola? ¿Inayenpa tzuna Pablo e jaw kꞌoꞌn twitz cruz cyiꞌja tuꞌn cycleta? ¿Bix wuyapa tzuna cykꞌon cyiiba tej cybautizarja? ¿Titzen tten n-oc lpe juun cyey wiꞌja?

14Ka juꞌ n-eꞌla tuj cywitza nchin jyona xjal tuꞌn cyoc lpe wiꞌja tej cybautizarja wuꞌna, chjonte Dios min-al jun cyey o bautizarj wuꞌna, nuk ja Crispo bix Gayo.

15Bix juꞌ tzunj min-al jun cyey baꞌn tkꞌumente ka tiꞌ nbiꞌya e bautizarja.

16¡Aa! ma tzul juntl tuj ncꞌuꞌja. Tuyax Estéfanas cyuyax ke te tja e bautizarjke wuꞌna. Bix oꞌcx kej lu n-ul tuj ncꞌuꞌj.

17Pero qꞌuelel cyniꞌya tiꞌj jweya waakꞌen o tzaj tkꞌoꞌn Cristo we, yaaꞌn te kꞌiljaw aꞌ cywiꞌ xjal, sino te kbalte tpocbal jcolbil cye xjal tiꞌ cyil tuꞌn tcyimlen Cristo twitz cruz. Ka ma chin yolena tuya jawnex yol, chi ulel lpe ke xjal wiꞌja. Juꞌ tzunj chin yolela tuya chebe yol, tuꞌntzen cyxiꞌ lpe ke xjal tiꞌ Cristo, tuꞌntzen miꞌn tzꞌel tipemal tcyimlen Cristo twitz cruz.

Ja Cristo tipemal Dios bix tnaabl Dios

18Key hermano, jyol tiꞌj tcyimlen Cristo twitz cruz, tzcaj yol tuj cywitz kej xjal ncheꞌx tuj be te xitbil. Pero jatzen ke, ejooꞌ o ko clet, ja yol tiꞌ tcyimlen Kaaw twitz cruz at nimcꞌa tipemal Dios tiꞌj, cuma najben tuꞌn tcub cyiꞌj xjal tuꞌn cycoꞌpj tuj cyil.

19Tzin tkbaꞌn tuj tyol Dios mas najben tilbil Dios tibaj cykilca. Tz̈i cyjulu: “Kej mas n-el cyniyꞌ tiꞌj tuj cywitz, bix kej baꞌn tbint cykilca cyuꞌn tuj cywitz, mlay tzꞌajben cynaabl. Cwel ntzpetsaꞌna cynaabl,” tz̈i Dios.

20Key hermano, cxeꞌl nkanena cyey ¿nintzajpa tuj twitz Dios cynaabl kej xjal te twitz txꞌotxꞌ nchi yolenx tuya jawnex yol? ¡Min! ¿Bix nintzajpa tuj twitz Dios cynaabl kej xjal xnakꞌtzal cyley judío bix mas jawnex cynaabl tuj cywitz? ¡Min! ¿Bix nintzajpa tuj twitz Dios cynaabl kej xjal ncub cyiꞌj xjal cyuꞌn tuya jawnex cyyol? ¡Min! Tuj twitz Dios tzpetpajnin cynaabl.

21Cykilcaj baꞌn cyuꞌn xjal te twitz txꞌotxꞌ, amale cyecat bix jawnex, pero yaaꞌnja baꞌn tuꞌn t-xiꞌ tiiꞌn jun xjal tuj be te colbil tuꞌn tpon tuya Dios. Pero te Dios, mas baꞌn tuꞌnxin. Ttzkiꞌnxin yaaꞌn tuꞌnj jawnex baꞌn cyuꞌn xjal te twitz txꞌotxꞌ cnetele tbexin cyuꞌn xjal, sino cnetelte tuꞌn jun yol ajnintz pero tzinen. Tej colbil ke ja tej tuꞌn toc ke kcꞌuꞌj tiꞌ Dios, yaaꞌn tuꞌn mas baꞌn kuꞌn. Pero ke xjal te twitz txꞌotxꞌ, ajnintz ja yol lu tuj cywitz.

22Kej xjal judío, tuꞌn cyocslante ka jaxxix, cyajxix tuꞌn toc cycyeꞌyen jun nintzaj techel te cycyeꞌybil ka jaxxix. Yal tzunkej xjal yaaꞌn judío, nuk tuꞌn jun yol jawnex ncwaꞌ cyiꞌj. Ka ajnintz jun yol tuj cywitz, min cyocsla.

23Juꞌ tzunj, kaꞌ tuj cywitz xjal judío oj nxiꞌ kkꞌumen e cyim Cristo twitz cruz te clol xjal, cuma min cyocsla xjal tuꞌn tcawen Cristo cyibaj. N-eꞌla tuj cywitz nuk e cub cyim Cristo twitz cruz tisen jun kaꞌ xjal. Bix juꞌx cyej xjal yaaꞌn judío, min cub cyiꞌj tuꞌnj yol lu, cuma tuj cywitz nuk ajnintz bix tzcaj yol.

24Yaltzen te cyej xjal e cybi tej ttxquet tuꞌn Dios, judíoleke, yaaꞌnle judíoke, Dios o jkonte cywitz tuꞌntzen tel cyniyꞌ tiꞌj tuꞌn tcyimlen Cristo o tyeecꞌa Dios tipemal bix alcyej baꞌn tuꞌnxin.

25Ja tzunj yol tiꞌj tcyimlen Cristo, mas jawnex tnaabl twitzj cye xjal cynaabl. Bix jtzin cykbaꞌn kej xjal mintiiꞌ tipemal Dios, pero mas tipemal tibaj cye xjal cyipemal te twitz txꞌotxꞌ.

26Key hermano, ejeeꞌy jun techel te ja lu. Cybisenx tiꞌj ti xjalelkey tej ttxconte Dios ejeeꞌy. Tej cyocslana, yaaꞌn ejeeꞌy nintzaj xjal, sino nuk yalxj xjalkey. Cywitzj xjal te twitz txꞌotxꞌ yaaꞌn nim cybaja baꞌn cyuꞌna, bix yaaꞌn nim tawil xjal at cyxola.

27Te cye xjal te twitz txꞌotxꞌ ejeeꞌ cyey min tzꞌel cyniyꞌ tiꞌj. Pero ejeeꞌxix cyey e tsicyꞌ Dios tuꞌn cyoca te t-xjal. Juꞌtzen e tzaj tkꞌoꞌn Dios cychꞌixew kej xjal mas baꞌn cyuꞌn tuj cywitz. Bix o tscyꞌo Dios ejeeꞌy mintiiꞌ cyilbil tiꞌj tuꞌntzen ttzaj cychꞌixew kej at nim cyilbil tiꞌj tuj cywitz.

28E jaw tscyꞌoꞌn Dios kej xjal tal mebe bix kej xjal icꞌbil bix kej mintiiꞌ baꞌn cyajbeꞌna tuj cywitzj nintzaj xjal, tuꞌntzen laꞌ alcye jun kꞌij ctzaal cychꞌixew kej mas baꞌn cyuꞌn tuj cywitz.

29O bint jlu tuꞌn Dios tuꞌntzen min-al jun xjal baꞌn tjaw tniman tiib twitz Dios.

30Cyey, mintiiꞌ tuꞌn tjaw cyniman cyiiba, cuma cykilca cynaabla bix t-xtalbil Dios cyibaja bix cychunkꞌlala ma tzaj kꞌoꞌn tuꞌn Dios nuk tuꞌnj o cymojba cyiiba tuya Cristo Jesús. Dios o tzaj kꞌonte Cristo ke, bix nuk tuꞌn Cristo n-el kniyꞌ tiꞌj, bix nuk tuꞌnxin jiquen koꞌ twitz Dios, bix nuk tuꞌnxin sak koꞌ, bix nuk tuꞌnxin o ko colpet tuj tkꞌab il.

31Juꞌ tzunj ko nimanxit Kaaw, tisen toc tuj tyol Dios: “Alj taj tuꞌn tjaw tnimsan tiib, mas baꞌn jaj te Kaaw cjawel tnimsaꞌn,” tz̈i tyol Dios.