1Yaltzen jaꞌlewe, key hermano, cxeꞌl nkꞌumena jun tumel tuꞌn ti tten tuꞌn t-xiꞌ kiiꞌn jun kchunkꞌlal tuj tumel. Cyiiꞌnx tuꞌn toc takꞌ cyermaney ocslal cyey.
2Cxeꞌlxix kcꞌuꞌj tiꞌ jun xjal oj tpon kja. Miꞌn tzꞌetz klomoꞌn kja cywitz. Tuꞌn nxiꞌ kkꞌoꞌn posada te juntl, kape jacꞌa kiikꞌ jun nim xtalbil. Juꞌ e baj nejl. At juun xjal e xiꞌ kꞌonte cyposada te cab xjal min cytzkiꞌn xjal cywitz, bix yaj eltl cyniyꞌ tiꞌj ángelke.
3Cꞌulel tuj kcꞌuꞌj cyiꞌj kej ocslal eteꞌcx tuj tzeeꞌ nuk tiꞌ tyol Dios. Ko xeꞌl cyeyꞌlcye, tuꞌntzen tel kniyꞌ tiꞌj alcye qꞌuixcꞌaj eteꞌ. Bix cꞌulel tuj kcꞌuꞌj tuꞌn at lastim cyiꞌj kej nchi baj yaset, cuma chꞌinnchꞌe pjel kiꞌj juꞌwa.
4Cykilca koꞌ cꞌoquel kcꞌuꞌj tiꞌj knajleꞌn. Baꞌn tuj twitz Dios oj najben t-xuꞌl xinak te te twetbil ka ti taj xinak tuya t-xuꞌl, bix juꞌx te xuuj tuya tchmil. Katzen nko jyon juntl pajbaj, ja tzunja yaaꞌn baꞌn tuj twitz Dios. Ckꞌol Dios castiwa ka chꞌimacꞌa xuuj tzyuꞌn tuꞌn jun xjal yaaꞌn najlel, bix juꞌx kej najlel ka nchi jyon juntl cypaj.
5Miꞌn ko cub ten nuk kkꞌinemal kaj. Miꞌn tziyꞌ tuj kcꞌuꞌj tisenj te kuya at, sino ko temel tuj tumel tuya alcye chꞌin at kuya, nimle, chꞌinle. Miꞌn tzꞌoc ke kcꞌuꞌj tiꞌ pwak, cuma ja Dios cꞌojlal ke. Tz̈i Dios: “Te junx maj mlay chi cyaj nkꞌoꞌna bix mlay chi el wiqꞌuena.”
6Juꞌ tzunj baꞌn t-xiꞌ kkꞌumen tuya cykil kcꞌuꞌj jyol lu tuj tyol Dios: “Ja Kman Kaaw onl te ke. Juꞌ tzunj mintiiꞌ ttz̈i kiꞌj alcye cꞌoquel cybinchaꞌn xjal kiꞌj.”
7Cꞌulel tuj kcꞌuꞌj tiꞌj kej tneel xjal ul kꞌinte tyol Dios tiꞌj Jesús te ke. Cwel kbisen tiꞌ iꞌtzenke tuya cyocslabl tiꞌ Jesús, bix kiiꞌxse tisenj cye.
8Bix cwel kbisen tisenj cye. E cykba cyjulu: “Tuj tneel bix jaꞌlewe bix te yaj Jesús jax. Mlay tchꞌixbe tnaabl,” tz̈i ke t-akꞌanal Dios nejl.
9Juꞌ tzunj miꞌn ko oc ten ebilte niyꞌtl j-acꞌaj xnakꞌtzbil tzul kxol, tisen tzunj xnakꞌtzbil kꞌiꞌn cyuꞌnj xjal nchi xnakꞌtzan ke tuꞌn at kipemal tuꞌn Dios il tiꞌj tuꞌn t-xiꞌ kiiꞌn ttxolanj te nejl tiꞌj ti cxeꞌl kwaaꞌn. Pero tej ttxolanj lu mintiiꞌ o tzꞌajbeꞌna cyej xjal nxiꞌ cyiiꞌn. Ckiikꞌelte kipemal tuꞌn Dios, yaaꞌn tuꞌn t-xiꞌ kiiꞌn jun ley te waabj, sino tuꞌn t-xtalbil Jesús.
10Kej nxiꞌx cycꞌuꞌj tiꞌ alimaj te chojbil cyil mintiiꞌ cyoclen tuꞌn cyiikꞌente t-xtalbil Jesús, tisenj mintiiꞌ cyoclen tuꞌn cyiikꞌente tchuꞌl alimaj nxiꞌ oyet te chojbil cyil, cuma ja tzunj chojbil cyil jatzen jun techel tiꞌ Jesús, bix ja tzunj tchuꞌl chojbil cyil jatzen jun techel t-xtalbil ncyiikꞌente te Jesús. Pero te ke at koclen, cuma nxiꞌ kcꞌuꞌj tiꞌ Jesús te chojbil kil.
11Ktzkiꞌntl tuj religión te ootxa o cyaj kkꞌoꞌn ke pala nxiꞌ cyoyen ttz̈qꞌuel alimaj te Dios twiꞌ altar bix nxiꞌ cychyoꞌn cychuꞌl alimaj. Pero jun maj jaca jnabkꞌi n-ocx jnintzaj pala tuj Masxsen Xjan Lugar te tz̈itlte ttz̈qꞌuel alimaj te chojbil il. Ja tzunj alimaj nxiꞌ oyet te kꞌolte jttz̈qꞌuel bix ncub patet tiꞌjxe tnom jaaꞌ najle ke xjal. Bix mintiiꞌ tuꞌn t-xiꞌ cychyoꞌn pala t-xumlal ja alimaj lu. Min najben te kꞌol tipemal cychunkꞌlal xjal. Ja tzunj lu jun techel.
12Tisenj ncub patet ke alimaj tiꞌjxe tnom te techel, juꞌxse e cub byet Jesús tiꞌjxe Jerusalén, tuꞌntzen toc ttz̈qꞌuelxin te txꞌajbil cykil kil.
13Juꞌ tzunj miꞌn cub kbisen tiꞌj min tzꞌajbentl, sino juꞌ ko xeꞌl lpe tiꞌ Jesús. Pero cyiw chꞌin. Jatzen Jesús iyꞌxe jun chꞌixew tuꞌnxin ex xeꞌt tiꞌjxe tnom, bix juꞌxse ke, ka etoꞌc tuya Jesús, il tiꞌj tuꞌn tiyꞌx chꞌixew kuꞌn. Il tiꞌj qꞌuiyax xmucchaj yol kuꞌn ka ma tzꞌel kxooꞌn kreligión te ootxa tuꞌntzen kxiꞌ lpe tiꞌ Jesús.
14Tisen tiꞌjxe tnom etoꞌ jaꞌlewe. Pero te ke, mintiiꞌ jun tnom twitz txꞌotxꞌ te junx maj. Alcyej tzin kyoꞌn ja tej tnom te junx maj.
15Juꞌ tzunj, cuma tuꞌn Jesús at koclen tuꞌn kpon tuya Dios, cxeꞌl kkꞌoꞌn chjonte te Dios bix cjawel kniman tbi bix ko bitzen te Dios. Oj tbint jlu kuꞌn, jatzen jun oybil nxiꞌ kkꞌoꞌn te Dios.
16Bix miꞌn tzꞌel tuj kcꞌuꞌj tuꞌn kbinchante jun baꞌn bix tuꞌn tbaj konen kiib. Juꞌx jlu jun oybil baꞌn t-xiꞌ kkꞌoꞌn te Dios, bix baꞌn tuj twitzxin.
17Cybinx kej nchi cawen cyibaja tuj taakꞌen Dios. Jax cykꞌaꞌ jun cycwent te Dios, cuma ejeeꞌtzen kꞌil cwent cyiꞌja ti xbaj cyey tuya cynaabla cywitz. Juꞌ tzunj, chi elelxixa baꞌn, tuꞌntzen jun cyaakꞌen te cawel cyibaja ttz̈yalxix, yaaꞌntzen bisbajil, bix tuꞌntzen baꞌn t-xiꞌ cykꞌoꞌn jun baꞌn cycwent cyiꞌja. Ka ejeeꞌy nuk jun tqꞌueyel cyexin, lastim key.
18Chi naꞌnxa Dios wiꞌja. Tuj nwitza baꞌn nnaabla cuma mintiiꞌ jun nkaꞌyel n-oc takꞌ weya, bix waja tuꞌn nnajaꞌna jiquenxix.
19Chi naꞌna Dios wiꞌja tuꞌntzen npon najtla cyuyey.
Jun mancꞌbil kꞌolbebl cye ke akꞌanal tuj tyol Dios bix te cykilcatl ocslal20Key hermano, Dios o tzꞌoc tuj jun nintzaj bix acꞌaj trat nincꞌuꞌn tuꞌn tcyamecy Jesús, bix o jaw titzꞌjsaꞌnxin Kaaw Jesús tuj cyamecy, bix o tzꞌoc tkꞌoꞌnxin Jesús te nintzaj cylel ke. Ja jun Dios tzin tkꞌoꞌn nim tbanel.
21Nuket chi cub tena tuj jun baꞌn cynaabla, tuꞌn tbint cykil tajbil Dios cyuꞌna. Bix nuket cyaja tuꞌn takꞌanan Dios tuj cyanema tuꞌn cycyaj tzꞌaklxix cynaabla. Tuꞌn Jesús nakꞌanan Dios tuj cyanema. ¡Nimjxit tbi Jesús te junx maj! Nuket juꞌwa.
22Bueno, key hermano, cxeꞌl ncubsaꞌn nwitz cyey tuꞌn cyocslantey ja yol lu te nimsabl cycꞌuꞌja. Ja uꞌj lu cyiw chꞌin tyol jilj, pero il tiꞌj.
23At jun tpocbal Hermano Timoteo. O tzꞌetz tuj tzeeꞌ. Katzen ma pon naj wuyena, jatzele cxeꞌl kꞌinte weya oj npona cyuyey.
24Nxiꞌ nkꞌoꞌna jun kꞌolbebl cyeke entera ke akꞌanal tuj tyol Dios, bix cykilcatl ocslal. Bix ke ocslal te Italia at jun kꞌolbebl cyuꞌn te cyey.
25Diosxit cyꞌiwlante cykilcakey. Oꞌcx nyolja.
Who We AreWhat We EelieveWhat We Do
2025 by iamachristian.org,Inc All rights reserved.