APOCALIPSIS 10 - Mam of Todos Santos -- Guatemala Unicode

Juntl jawnex tsanjel Dios tocx jun chꞌin uꞌj tuj tkꞌab

1Bix e wila juntl jawnex tsanjel Dios tuj cyaꞌj. Nimxsen tipemal, bix e cuꞌtz tuj cyaꞌj tuj muj. Bix tjax arc tuj twiꞌ, bix ntxakakan twitz tisen tken kꞌij. Jatzen ke tken tisen tken kꞌakꞌ.

2Tuj tkꞌab at jun chꞌin uꞌj. Jkoꞌn uꞌj. Bix e cub tkꞌoꞌn tken te tmankꞌab tibaj mar, bix tken te tneẍ e cub tkꞌoꞌn tibaj twitz txꞌotxꞌ.

3Bix cyiwxsen e jaw ts̈iꞌn, tisen oj njaw ts̈iꞌn jun león. Tej tjaw ts̈iꞌn, e kꞌajt kej wuuk kꞌancyok.

4Tej cybaj kꞌajt kej wuuk kꞌancyok, at tuꞌn tcub ntzꞌiꞌbena j-otk txiꞌ cykbaꞌn wuuk kꞌancyok. Pero e xiꞌ nbiꞌna jun tkꞌajkꞌajel tuj cyaꞌj e tzaj tkbaꞌn weya:

—Eꞌwencja jma cykba wuuk kꞌancyok. Miꞌn cub ttzꞌiꞌbena―tz̈i jun weya.

5Bix j-ángel e wila waꞌlcꞌa tibaj mar bix tibaj twitz txꞌotxꞌ, e jaw tkꞌoꞌn tmankꞌab twitz cyaꞌj,

6bix e cywix tyol tuꞌnj tjurament tiꞌ Dios iꞌtz te junx maj, Jdios e binchante twitz cyaꞌj bix twitz txꞌotxꞌ bix mar tuyax cykilcaj at cyuj. Bix e tkꞌume ángel:

—Mlay tuꞌn tweꞌtl jkꞌij tuꞌn tjapan baj jma cub tnincꞌuꞌn Dios.

7Oj toc t-xuxen twuukan ángel xux, at tuꞌn tchicꞌajax jma cub tnincꞌuꞌn Dios jatxe tuj tneel, tisen e tkꞌume cye tyolel―tz̈i jawnex tsanjel Dios tuj cyaꞌj.

8Bix juntl maj e xiꞌ nbiꞌna tkꞌajkꞌajel tuj cyaꞌj. E tzaj tkbaꞌn weya:

—Cu txiꞌy, bix qꞌueletz tiiꞌna j-uꞌj tjkoꞌn taꞌ tuj tkꞌab j-ángel waꞌlcꞌa tibaj mar bix tibaj twitz txꞌotxꞌ―tz̈itzen weya.

9Juꞌ tzunj, in pon lkꞌeya tiꞌj ángel, bix e xiꞌ nkanena te tuꞌn ttzaj tkꞌoꞌn jneeꞌ chꞌin uꞌj weya. Bix e tzaj tkbaꞌn ángel weya:

—Kꞌiiꞌnxa, bix waaꞌnxa. Cꞌa cꞌoquel tuj tcꞌuꞌja, pero jatzen tuj ttziy, tisen taꞌl xiiꞌ―tz̈i ángel.

10Bix e tzaj wiiꞌna jneeꞌ chꞌin uꞌj tuj tkꞌab ángel, bix e xiꞌ nwaaꞌna. Bix tz̈iꞌ eꞌla uꞌja tuj ntziya tisen taꞌl xiiꞌ. Pero tej tcuꞌx tuj ncꞌuꞌja, e jawxsen qꞌueybe tuj ncꞌuꞌja.

11Bix e tzaj tkbaꞌn weya:

—At mastl tuꞌn t-xiꞌ tkꞌumena cye nim wik xjal bix tnom bix yol bix cawel―tz̈i ángel weya.