2 TIMOTEO 4 - Mam of Todos Santos -- Guatemala Unicode

Tej t-xiꞌ tcyiwsaꞌn Pablo tnaabl Timoteo tiꞌj alcye tuꞌn tbint tuꞌn

1Timoteo, twitz Dios bix twitz Jesús cxeꞌlxix wokxenan tey tuꞌn t-xiꞌ tkbaꞌna tyol Dios cye xjal, cuma laꞌ alcye jun kꞌij tzul meltzꞌaj Jesús, Scyꞌoꞌn tuꞌn Dios, te cawel tibaj cyil jxjal iꞌtzx bixsen te cawel tibaj cyil cykilj xjal chi jawetz itzꞌj, bix ccawelxin tibaj twitz txꞌotxꞌ.

2Juꞌ tzunj, ka cyaj xjal cybi bix ka min, pero tey binne ttena te kbalx tyol Dios, cuma Dios cꞌoquel cyeꞌyente tey tiiꞌna tuj tyolxin. Kꞌoꞌnc tipena tiꞌj tuꞌn tcub tcꞌuꞌj xjal ka kaꞌ ncub tbinche, bix cxeꞌl tkbaꞌna tuꞌn tcyaj il cyuꞌn, bix cxeꞌl tkbaꞌna cye ti cwel bint cyuꞌn, bix nimx tcꞌuꞌja oj t-xiꞌ tkbaꞌna.

3Cpomel jun kꞌij mlay tziyꞌxtl jbaꞌn xnakꞌtzaꞌna cyuꞌn xjal. Cxeꞌl cyjyoꞌntl cyxnakꞌtzal te xnakꞌtzaleccye tiꞌj alcyej cye cyaj tzꞌoc cybiꞌn, cuma mintzentiiꞌ cꞌoquel tbinchen cye xjal tuj cywitz.

4Nuk cꞌaaltz cykꞌoꞌntl tzalcyiꞌj twitzj jax tyol Dios, bix cxeꞌl cybiꞌn tikꞌch nicꞌbil yolel.

5Perotzen tey, cꞌuꞌm alcyej tbey, qꞌuiyax tchyonel tuꞌna, nuk xnakꞌtzanx cyxol xjal ti tten tpocbalj coꞌpbil tuꞌn Jesús, bix cuyamxix alcyej taakꞌena.

6Yal weya, ma pon tumel tuꞌn nbyeta nuk tiꞌjcꞌa Jesús. Ya ma tzul canan tumel ncyamecya.

7Yaltzen te wajbelela te Jesús, bajx cyjaꞌ ncyeꞌyen wexin, ox tzꞌoc nbiꞌn wexin tuj tyolxin, bix ox chin weꞌwe twitz tyolxin.

8Juꞌ tzunj, te tzunj kꞌij oj takꞌ jxin Kaaw cyeyꞌlx tumel, cwiikꞌelwe jun nin ncotz texin, cuma jaxin cyeyꞌlx tumel tujxix tumel cyibaj xjal. Bix yaaꞌn nuk wecꞌawe ctzaala tkꞌoꞌn texin, sino tuyaxe te cykilj xjal n-oc takꞌ cye tuꞌn tul meltzꞌajxin juntl maj.

E tkba Pablo te Timoteo alcye tuꞌn tbint tuꞌn

9Nuksama, Timoteo, tzꞌoc tilel tuꞌna tuꞌn tul naja cyeyꞌl we,

10cuma ma chin cyaj cyeꞌyena tuꞌnj xin Demas tuꞌn tikꞌch jilelj te twitz txꞌotxꞌa, bix ma txiꞌxin tuj tnom te Tesalónica. Yal tej xin Crescente, o txiꞌxin tuj ttxꞌotxꞌ Galacia. Yal tej xin Tito, juꞌ ma txiꞌtlxin tuj ttxꞌotxꞌ Dalmacia.

11Cyxoltzen wuyena tzalu, nukxix jacꞌatl Lucas at wuyena.

Kꞌintztzen Marcos tuyey oj ttzaja, cuma at cꞌajbela we.

12Yal jxin Tíquico, min-al tzalu, cuma o txiꞌ nchkꞌoꞌnxin tuyey tuj tnom Efeso.

13Oj ttzaja, naꞌmcꞌa tuꞌn ttzaj tiiꞌna ja ncapa e cyaj nkꞌoꞌna tja Carpo tuj tnom te Troas, cyuyaxj libro, bix ejeeꞌxixj tzꞌuꞌn tzꞌiꞌben cywitz, ejeeꞌxix xsunja mas il cyiꞌj.

14Yal te Alejandro, jxin txnol xcbil, nimxse tkaꞌyel ma tzꞌoc tbinchexin wiꞌj. Diostzele cꞌoquel kꞌonte t-xel texin tisenx tikꞌch ma tzꞌoc tbinchexin wiꞌj.

15Juꞌx tey, cꞌojlam tiiba twitzxin, cuma mayꞌxse tzꞌoc meltzꞌajxin kꞌojlel tiꞌ kxnakꞌatz.

16Tej npona tneel maj te stisel twitz cawel, min-al juntl oc clonte we. Cykilca ke ocslal wuya e cyaj cyeꞌyente we. Pero cutz̈it ka min s-oc tkꞌoꞌn Dios te tajlal cyil.

17Pero te Kman Dios e ten wexin wuya, bix e tzaj tkꞌoꞌn wexin wipemal, tuꞌntzen tbint nkbanteya tpocbal tyol Dios te coꞌpbil, tuꞌntzen toc cybiꞌntl nim xjal te jun wikxitl tnom tocx tuj stisbil, tuꞌntzen toc cybiꞌn jxjal yaaꞌn judío mintiiꞌ tumel Dios cyuya. Juꞌtzen in cleta tuj tkꞌab cawel, tisencꞌa in cleta tuj ttzi jun balen, tuꞌn Dios.

18Yal jaꞌlewe Dios qꞌuelel kꞌinte naj we tuj tkaꞌyel te junx maj, bix chin aal tiiꞌnxin tuj cyaꞌj jaaꞌ ncawenaxin. ¡Nimaxit tbi Dios te junx maj! ¡Juꞌ ttzuna!

Jun kꞌolbebl tuꞌn Pablo te mancꞌbil yol

19Kꞌonxa jun kꞌolbebl tej xuj Prisca bix te tchmilxuj Aquila bixse cye te tja Onesíforo.

20Yal tej xin Erasto, ma cyajxin tuj tnom te Corinto, bixse Trófimo ma cyajxin tuj tnom te Mileto, cuma yaabxin.

21Bix tzꞌoc tilel tuꞌna tuꞌn tul canana te mintknaꞌx tul tyem te nim cykꞌiꞌk tibaj mar. Ma txiꞌ jun kꞌolbebl tey cyuꞌnj xjal lu: Eubulo, Pudente, Lino, bixse Claudia, bix cabtl ocslal.

22Tenxittzen Kaaw Jesús tuyey, bix nukxittzen tzaj tkꞌoꞌn Kman Dios t-xtalbil tibaj cykilcakey ocslal. Oꞌcx xsunj.