1 TIMOTEO 6 - Mam of Todos Santos -- Guatemala Unicode

1Kej ocslal nchi akꞌanancx tjakꞌ tcawbil cypatrón, baꞌnxix toc cybiꞌn tyol tpatrón. Miꞌn chi oc te cyꞌaj. Cycuyaxix cyaakꞌen, tuꞌntzen miꞌn txiꞌ naꞌn tbi Dios bix tuꞌntzen miꞌn txiꞌ naꞌn kxnakꞌatz cyuꞌn xjal.

2Bix ka at jun ocslal nakꞌanaꞌncx tuya jun tpatrón ocslal, cꞌoquelx tbiꞌn xina tisen jun cawel. Masx cꞌoquel tilel tuꞌna tuyaxin twitz tuya junxin yaaꞌn ocslal, cuma alj nkꞌinte tkbel jtaakꞌena jax ocslal, bix n-oc takꞌ te Dios. Bix xnakꞌtzanx bix kbanx xsunja lu cye xjal.

Baꞌn tuꞌn t-xiꞌ kniman Dios bix tuꞌn ktzalaj tiꞌj ntzaj tkꞌoꞌn ke

3Attzen xjal nyeecꞌan juntl wik xnakꞌatz. Axse tbiꞌnc cyxnakꞌatz, pero yaaꞌn junx tten cyyol tuyaj xnakꞌatz nxiꞌ kꞌinte ke te niml Dios, bix yaaꞌn baꞌn tten cyyol tuya tyol Kaaw Jesús.

4Nuk n-oc cykꞌon cyiib jxjala te nintzaj, bix min tzꞌel cyniyꞌ tiꞌj tixix ttenj jax yol. Nuk nchi jyon jaaꞌ qꞌueletza jun kꞌoj. Tiꞌj tzunja n-etza itzꞌj xchiꞌlen cꞌuꞌj, kꞌoj, cyakwusaj xjal, icꞌbil twitz xjal,

5bix kꞌoj min pon baj twiꞌ. Alj ma cub xnakꞌtzante cyej nicꞌbil xnakꞌatz, junxse maj otk tzpet ya min tzꞌeltl cyniyꞌ tiꞌj alcyej jax, bix n-eꞌlatzen tuj cywitz nuk te cambl pwak ocslabl tiꞌ Dios. Cyimeltzen cyiiba cyiꞌj xjala.

6Jaxte juꞌ tewa. Te kocslabl tiꞌ Dios tbeyel xtalbilte, pero laꞌ alj ntzalaj tuyaj chꞌin ncnet tuꞌn,

7cuma mintiiꞌte kꞌiꞌn kuꞌn ktzaj twitz ja txꞌotxꞌa, bix mintiiꞌte baꞌn taj kiiꞌn.

8Nuk ka at chꞌin baꞌn t-xiꞌ kwaaꞌn bix tuꞌn toc chꞌin kiꞌj, ya baꞌntze tkete kcꞌuꞌj.

9Yal tzunkej cyaj chi oc kꞌinan, mintzen cycol cyiib twitzj tkaꞌyel ncub jlet cywitz. Tuꞌntzen nuk tikꞌch cyaj nchi cwaꞌ tzꞌak tuj cꞌoꞌbil, ja cꞌoꞌbilj tbanel n-el tuj cycꞌuꞌj, bix ncheꞌx tuj il.

10Tej nuk pwak n-oc takꞌ, jatzen tloqꞌuel nim wik tkaꞌyel. At juun xjal nuk tuꞌn cykꞌaꞌbentz tiꞌ pwak o tzpet cyanem tiꞌ Dios, bix tzin cynojsaꞌn cychunkꞌlal tuya nim bisbajil.

Ti tten tuꞌn t-xiꞌ kiiꞌn kchunkꞌlal jiquen bix tuꞌn toc ke kcꞌuꞌj tiꞌ Dios

11Perotzen tey, Timoteo, najben te Dios, cteltzen ok tiꞌj kꞌaꞌbj pwak. Tetzen t-xel ja lu, jyonxsen te ja baꞌn, bix kꞌinx tchunkꞌlala tujxix jiquen, bix keꞌc tcꞌuꞌja tiꞌ Dios, bix cꞌoquel takꞌ cykil xjal tey, bix nimxsen tcꞌuꞌja, bix maansx tzꞌoquey.

12Tzꞌocxix tilel tuꞌna tiꞌ tyol Dios bix kꞌojl tiꞌj tkaꞌyel. Oj tbint tuꞌna juꞌwa, juꞌtzen cpomela caney tiꞌj tchunkꞌlala te junx maj. Tiꞌj tzunj tchunkꞌlala te junx maj o tzaaꞌ ttxcoꞌn Dios jay, bix cywitz nim tstiwa o tzaaꞌ tkbaꞌna ka o tzꞌocslaꞌna tiꞌ Jesús.

13Twitz Dios, nkꞌonte tchunkꞌlal tikꞌch jilel at twitz txꞌotxꞌ, bix twitz Jesús, Scyꞌoꞌn tuꞌn Dios, jxin mintiiꞌ ttz̈i tiꞌj tej ttzakꞌbeꞌn te cawel Poncio Pilato alcyexin bix ti taakꞌenxin, cxeꞌltzen nkbaꞌn tey

14ctbiꞌcꞌa tzuna cykilj nxiꞌ nkbaꞌn tey. Miꞌn cub tzpeta, bix cbinelxix tuꞌna tuꞌn miꞌn chi el t-xooꞌna xjal tiꞌja, ojxe tul jlet Kaaw Jesús juntl maj.

15Tzultzen jlet Jesús juntl maj, pero ojxe tpon tumel tuj twitz Dios. Nuk jacꞌate Kman Dios jawnex twitz tikꞌch jilel, bix cyꞌiwlaꞌn. Jaxin Cawel cyibaj cawel, bix Taaw cykil twitz txꞌotxꞌ.

16Nuk jacꞌaxin mlay cyim. Najlxin tuj tken luz tzinxse ntxaken mas twitz tken kꞌij. Min-alxse juntl baꞌn tocpan canan tiꞌjxin. Min-al jun xjal o tzꞌoc cyeꞌyente texin, bix min-alx baꞌn toc cyeꞌyente texin. Jawnexxit tzunxin, bix nimxit tipemalxin te junx maj. Juꞌxit tzuna.

17Kej ocslal nim cykꞌinemal twitz ja txꞌotxꞌa, kbanx cye tuꞌn miꞌn tzꞌoc cykꞌon cyiib te nintzaj, bix tuꞌn miꞌn tzꞌoc ke cycꞌuꞌj tiꞌ cykꞌinemal, cuma tej kꞌinemal mintiiꞌxix baꞌn toc ke cꞌuꞌjbaj tiꞌj. Nuk jacꞌate Dios baꞌn toc ke kcꞌuꞌj tiꞌj. Jaxin ntzaj kꞌonte tikꞌch ke te kniyꞌbebl.

18Kbanxse cye xjal kꞌinan tuꞌn yaaꞌn jkꞌinemal cꞌoquel takꞌ cye, sino tuꞌn toc takꞌ cye tuꞌn tbint tikꞌch tbanel cyuꞌn, bix tuꞌn tcub cypaꞌn cykꞌinemal cyuya mebe.

19Ojtzen tbint juꞌwa cyuꞌn, nbajtzen cynincꞌun cyiib tuj chunkꞌlal tzul, cuma tej chunkꞌlal tzul, jatzente chunkꞌlalj jaxxix, bix te junx maj.

Tej t-xiꞌ tcyiwsaꞌn Pablo tnaabl Timoteo tiꞌj alcye tuꞌn tbinchante

20Oꞌcx xsunj, Timoteo. Cꞌojlam tzunj jax yol ma tzꞌoc kꞌoꞌn tuj tkꞌaba. Cꞌojlam tiiba tuj cyyol jxjal n-oc cyniqꞌuen tise ka cytzkiꞌn tiiꞌn Dios, pero mintiiꞌ ttxolan cyyol, bix mintiiꞌ toclen tuyaj jax yol.

21Miꞌn chi oc tbiꞌna, cuma at xjal o tzꞌoc lpe tiꞌj tise ka jax, biꞌx o chi cub tzpet, bix o cub tzpet cycꞌuꞌj tiꞌ Dios.

Tzajxit t-xtalbil Dios cyibaja. Oꞌcxsen nyolja.