FILIPENSES 3 - Mam of Todos Santos -- Guatemala Unicode

Ti tten tuꞌn koc tzꞌaklxix

1Mancꞌbiltzen, key hermano tuj Filipos, waja txiꞌ nkꞌoꞌna juntl cyiwsabl cycꞌuꞌja. Chi tzalaj tzuna tuꞌnj baꞌn cytena twitz Kman Dios tuꞌn Kaaw. Juꞌ o txiꞌ nkꞌoꞌna cyey nejl, pero jacꞌa il tiꞌj cxeꞌl nkbaꞌna cyey juntl maj. Pero mintiiꞌ nbaj tuꞌn t-xiꞌ nkꞌoꞌna tumel cyey juntl maj, cuma te cye cyey tajbelel.

2Chi elel lkꞌey cyiꞌ kej xjal tzin cykbaꞌn tuꞌn cyela baꞌn twitz Dios, il tiꞌj tuꞌn cynimantey jley te ootxa tuꞌn tel cpet twiꞌ tzꞌalbil xinak. Kej nchi kꞌumente juꞌwa, ejeeꞌtzen aj kꞌoj tiꞌ Dios. ¡Ti ttenj juꞌwa cꞌoquel cykesena cychuꞌla tuꞌn cyoca te t-xjal Dios!

3Ko oquel te t-xjal Dios, yaaꞌn tuꞌn toc keset kchuꞌl, sino tuꞌn kniman Dios tuj kanem. Il tiꞌj tuꞌn toc ke kcꞌuꞌj tiꞌ Cristo Jesús, yaaꞌn cyiꞌj kbinchbil tiꞌjxe kanem tisen tzin cykbaꞌn.

4Ka il tiꞌj nim cbinel kuꞌn tuꞌn koc te t-xjal Dios, inayena nim o bint wuꞌna twitz cykilcatl.

5Te twajxakan kꞌij witzꞌjlena e cpet nchuꞌla juꞌwa te techel inayena t-xjal Dios, tisen tkbaꞌn tley Moisés. Aj Israel kena, bix tiyꞌjil Benjamín kena, jaj mas nintzaj tiyꞌjil cyxol mastl cyiyꞌjil Israel, bix nyola hebreo, jaj cyyol ke te Israel, bix mero te judío kena, yaaꞌn paꞌn tten wiyꞌjil, bix cyxol kej xjal nimalxix tuj tley Moisés, inayena jun mas nimalxix cywitz, cuma in tena cyxolj cloj te fariseo lepchke xjal tiꞌj tley Moisés.

6Cyiwxsen in eꞌleya tuj tley Moisés bix juꞌ tzunj in oc lpeya cyiꞌ ocslal te yajlalcye bix te byolcye, cuma min e cybi tley Moisés. Bix weya tuj tley Moisés, cykilxsen in nimeya. Minxsentiiꞌ e cyaj wuꞌna tiꞌjxe.

7Cykil xsunj lu o bint wuꞌna, pero min ajben weya tuꞌn woca te t-xjal Dios. Amale kej nimal tuj tley Moisés nxiꞌ cykbaꞌn cykilj lu e bint wuꞌna ootxa at cyajbelel, pero jaꞌlewe n-el nniꞌya tiꞌj mintiiꞌ tipemal twitzj te Cristo.

8Bix yaaꞌn oꞌcx kej lu, pero tuyax cykilcatl o bint wuꞌna bix cykilcatl at wuyena ya mintzentiiꞌtl tcꞌojlalel n-oc nkꞌoꞌna twitzj tcꞌojlalel n-oc nkꞌoꞌna te Waaw Cristo Jesús bix tuꞌn toc nkꞌon wiiba tuyaxin.

9Jaja mas nintzaj twitz cykilcatl tuj nwitz, jaj tuꞌn n-oc nkꞌon wiiba tuya Cristo. Mlay ncamiya tuꞌn wela baꞌn twitz Dios tuꞌn n-oc nnimena tley Moisés. Ja te at tajbelj, jaj tuꞌn toc ke ncꞌuꞌja tiꞌ Cristo. Ja tzunja waja.

10Waja tzꞌel nniꞌya tiꞌ Cristo jaxxix, bix tuꞌn t-xiꞌ wiiꞌna jun nchunkꞌlala tzꞌaklxix tuꞌnj tipemal Dios ajben tuꞌn tjaw tiiꞌn ja Jesús tuj cyamecy, bix waja tuꞌn tiyꞌx qꞌuixcꞌaj wuꞌna hasta ojxe ka ma chin cyima tiꞌj nuk tuꞌn nxiꞌ lpeya tiꞌjxin mas twitzj tuꞌn nxiꞌ lpeya tiꞌj alcye waja.

11Ka ma txiꞌ wiiꞌna nchunkꞌlala juꞌwa, laꞌ alcye jun kꞌij chin jawetz tiiꞌn Dios tuj cyamecy.

12Pero min txiꞌ nkꞌumena ya ma chin pona tzꞌaklxix. At-x tuꞌn ntzketa. Pero n-oc wipiya tuꞌn ttzket nnaabla, cuma jaj tuꞌn ntzketa e tajbe Cristo Jesús tej tcoꞌpante inayena tuꞌn woca te t-xjalxin.

13Key hermano, jaxte minaꞌx ntzketa, pero ya min txiꞌ nbisentla tiꞌj niyꞌj e baj weya nejl, sino ya juꞌ nxiꞌtl ncwenta tiꞌj nejl nwitza.

14Cꞌoquel wipena tiꞌj tuꞌn tcyaj nnaabla mas tzꞌaklxix, tuꞌntzen ncamana ncotza te Dios. Tzin ttxcoꞌn Dios ejooꞌ tuya jun nintzaj txocbil tuꞌn kpon tzꞌaklxix, bix nuk tuꞌn Cristo Jesús baꞌn tbint kuꞌn tuꞌn kpon tzꞌaklxix.

15Pero at juun cyxola ncub cybisena tiꞌj ya ma chi oca tzꞌaklxix. Pero nuket baꞌn tuꞌn tcub cybisena minaꞌx cytzketa. Pero katzen cycyꞌiy tiꞌj nxiꞌ nkbaꞌna, jax Dios cwel kꞌonte tumel cyey minaꞌx cytzketa.

16Pero amale mint tzꞌel cyniꞌya tiꞌj entera ti taj Dios, pero cynimamj o bint cyuꞌna.

17Key hermano, cykilcakey cyiiꞌnx ti tten wuꞌna bix cycnomela ti tten cyuꞌn kej kꞌiꞌn cyuꞌn tisej weya.

18Pero cykꞌoꞌnc cycwenta cyiꞌj kej nchi kbante jtcyimlen Cristo twitz cruz mintiiꞌ il tiꞌj. Ejeeꞌtzen kꞌojlelj tiꞌ Cristo. Chꞌima maj o txiꞌ nkꞌumena cyey tuꞌn miꞌn tzꞌoc cybiꞌna cyyol, bix juntl maj jaꞌlewe. Nchin ookꞌ cyiꞌj,

19cuma chi xeꞌl tuj castiwa. Ejeeꞌtzen xjalja ncheꞌx lpe nuk tiꞌj ti taj cyxumlal, yaaꞌn tiꞌj ti taj Dios. Tuꞌnj nbint cyuꞌn mintiiꞌ cychꞌixew, sino nuk nbaj cyniman cyiib tiꞌj. N-oc cykꞌoꞌn tajbel oꞌcx jaj at te twitz txꞌotxꞌ.

20Pero te ke ejooꞌ ocslal at mastl twitzja at twitz txꞌotxꞌ, cuma at ktanem tuj cyaꞌj. Bix jatztzen ctzaala jxin Coꞌplte ke, ja Kaaw Jesucristo, jnko ayon tiꞌj.

21Bix oj tulxin, tuya tzunj jax tipemalxin najben texin tuꞌn tcawenxin tibaj cykilca tikꞌch at, cwel tchꞌixbeꞌn xinj kxumlal tuya niyꞌ ajnintz kchuꞌl at jaꞌlewe, tuꞌntzen koc te jun xumlalbaj tbanelxix tisexj texin.