LOS HECHOS 12 - Mam of Todos Santos -- Guatemala Unicode

Tej tcub byet Jacobo; yaꞌtzete Pedro ocx kꞌoꞌn tuj tzeeꞌ

1Te tzun kej kꞌij lu jatzen Herodes cawel cyibaj xjal judío. Ja tzunj xin Herodes, titzen tajaxin tuꞌn toc onet-xin cyuꞌn niyꞌtl cawel judío. Juꞌ tzunj akꞌxin yajlalecte cab xjal ocslal.

2Bix e ttzuyxin jxin Jacobo, ttzicy Juan, bix el txꞌomet twiꞌxin tuya espada.

3Tejtzen toc tcyeꞌyen Herodes axsen eꞌla tuj cywitz judío, bix e ttzuyxin jxin t-xel Jesús Pedro, bix ocxxin tuj tzeeꞌ. Jatzen tocx xinj tuj tzeeꞌ tej ninkꞌij tej t-xiꞌ cywaaꞌn xjal judío jun wik pan jawnex mintiiꞌ tkꞌanel ocx tuj tuꞌn tjaw tz̈ꞌiy.

4Tujtzen tzeeꞌ e cꞌojleta Pedro tuꞌn waklaaj soldado. Te cyaja paꞌ elninakexin tuj tkiꞌyen e cwaꞌ tenkexin. Jatzen ttxolaj otk bint tuꞌn Herodesj, tuꞌn tetz Pedro tuj tzeeꞌ tbajlenxitl jninkꞌij, tuꞌntzen tbyet-xin.

5Juꞌtzen tten tocxlen Pedro tuj tzeeꞌ. Maatkxsen tocxxin tuj tzeeꞌ, nchi naꞌntzen ocslal Dios tuꞌn cykil cycꞌuꞌjxin tiꞌ Pedro.

Tej ttzokpaj Pedro tuj tzeeꞌ

6Ex cabtl kꞌij. Ya otktzen pon jmancꞌbil koniyan tuꞌn tetz tiiꞌn Herodes jaxin tuꞌn tocx keset tkulxin. Nwutantzen Pedro t-xol caꞌba soldado, cyẍpon cyiib tuya Pedro tuya cadena. Peꞌnxitltzen tcwaꞌ caꞌbatl soldado te cꞌojlal.

7Tujxsen tej tul jlet jun tsanjel Dios tuj cyaꞌj tuj tzeeꞌ, bixsen e noj tunwen tuya tken luz. Bix ocx tcꞌasen sanjel ja Pedro tiꞌ t-xuucꞌxin tuꞌn ttzaj cyꞌisjxin, bix e xiꞌ tkbaꞌn:

—Weꞌwey, Pedro. Nix tuꞌna―tz̈i sanjel. Bix el tzꞌak kej cadena ẍipbel tkꞌabxin.

8Bix e xiꞌ tkbaꞌn sanjel te Pedro:

—Ẍpoꞌnc tcyꞌitza, bix kꞌoꞌnc t-xaaba―tz̈i sanjel.

Bix e tcuya Pedro, bix e xiꞌ tkbaꞌn Pedro mayꞌtzen.

Bix e xiꞌ tkbaꞌn sanjel:

—Jaꞌle tzuna kꞌoꞌnctzen tcapey. Lpetztzen wiꞌj―tz̈itzen sanjel.

9Entonces bix etz Pedro tuj tzeeꞌ, bix oc lpexxin tiꞌj sanjel. Pero min el tniyꞌ Pedro tiꞌj ka jaxj txolen tbint tuꞌn Pedro. Eꞌla tuj twitzxin nuk twitziyꞌxin.

10Tbajlenxitl tzunj juꞌwa, ejeeꞌ tzunj xin soldado cꞌojlal jaaꞌj tocxe Pedro tuj tzeeꞌ, bix e ponkexin tiꞌj tlemel jaaꞌ junx maj xcbil toc te tuj be. Pero bix ocx jakpaj tjunalx, bix etzkexin, bix e xiꞌ betkexin junx tuj jun be. Entonces bix e cyaj tkꞌoꞌn sanjel ja Pedro tjunalx.

11Te tzunj juꞌwa, tel tniyꞌ Pedro tiꞌj ka jaxj, yaaꞌn nuk witziyꞌ, bix e xiꞌ tbisenxin tiꞌj:

—Ma tzꞌel nniyꞌ tiꞌj jale Dios s-aj smante jun tsanjel wiꞌj tuꞌn ntzokpaj tuj tkꞌab Herodes bix tuj tikꞌch jilelj tzin cyyoꞌn xjal judío tuꞌn toc cycyeꞌyen―tz̈i Pedro.

12Tejtzen tel tniyꞌ Pedro tiꞌj ti nbaj, bix e xiꞌxin tja junxuj xuuj María tbixuj. Ja tzunj xuj María ttxu junxin xjal Juan tbi, juntl tbixin Marcos. Tjatzen María nimxsen xjal ocslal cychmon cyiib te naꞌl Dios tiꞌ Pedro.

13Tejtzen tponxin tja María, bix oc tcoꞌnxin tlemel jaaꞌ te twitz peꞌn, bix eꞌlal juntxin kꞌopaj Rode tbitxin te cyeyꞌlte al.

14Pero tej tocx yolen Pedro, bix el tniyꞌ Rode tiꞌj tuj twiꞌxin, pero tuꞌn tzunj tjaw tzalajebltxin bix el tuj tcꞌuꞌjtxin tuꞌn tocx tjkoꞌntxin tlemel jaaꞌ, bix ocx ajkelentxin te kbalte cye cabtl xjal ka otk pon Pedro ttziꞌyen.

15Pero bix aj cytzakꞌbeꞌn jcabtl xjal te Rode:

—Male jaw tuj twiꞌy―tz̈i tzunkexin.

Pero bix e xiꞌ tkbaꞌn Rode ka jax, pero yalx tej cabtl xjal min el jax tuj cywitz, bix juꞌ toc cyuꞌn cyjulu:

—Yaaꞌnle Pedro. Ka yaaꞌn ja tsanjel Dios cꞌojlalte Pedro. Matzele tzul tisencꞌax Pedro―tz̈itzen ke xjal.

16Joocꞌtzen, tocxte Pedro tcol ttziꞌyen. Cwaxsen tocx jket ttziꞌyen. Tejtzen toc cycyeꞌyen jax Pedro, e jawxsen tzalajkexin, bix nimxsen e jaw kleeꞌ ke xjal.

17Pero bix e xiꞌ tkꞌoꞌn Pedro jun techlal tuꞌn miꞌn chi kꞌajt xjal, bix e xiꞌ tkbaꞌnxin ti tten tetz tiiꞌn tsanjel Dios jaxin tuj tzeeꞌ, bix e xiꞌ tkbaꞌnxin:

—Tiyla tzunj ma txiꞌ nkbaꞌn cyey, cykbanxsen te Jacobo, titzꞌen Jesús, bix cye niyꞌtl ocslal―tz̈i Pedro, bix iyꞌxin tuj juntl lugar.

18Tejtzen kskix, bixsen ul juntl cloj soldado te cꞌojlalte Pedro. Nimxsen jun tzpetpajlenel e baj cyxol soldado, cuma mintiiꞌ tumel cyuya ti e baj te Pedro.

19Tejtzen tbintte rey Herodes, bix ex tchkꞌoꞌnxin xjal te jyolte Pedro. Tejtzen minx e cneta Pedro, bixsen e tzaj ttxcoꞌnxin kej soldado e cub ten te cꞌojlal Pedro. Tbajlen tkanenxitl tzunxin cab yol cye, bix e xiꞌ tsmaꞌnxin ejeeꞌ tuj biybil. Tbajlen tzunj juꞌwa, bix etz Herodes tuj ttxꞌotxꞌ Judea, bix e xiꞌxin najal tuj tnom Cesarea tuj mlaj txꞌotxꞌ.

Tej tcyim Herodes

20Otkxsen tzaj kꞌojl Herodes cyiꞌj xjal najl tuj tnom te Tiro bixsen Sidón nchi cyaj tibajxe tnom te Cesarea. Juꞌ tzunj, ya min e tcuyatlxin tuꞌn t-xiꞌ cykꞌoꞌn t-xjalxin triwa tuj Tiro bixsen tuj Sidón, amale nimet xjal najbente triwa. Entonces bix e xiꞌ tsmaꞌn Tiro bix Sidón cab xjal te tyolel tuj tnom te Cesarea, tuꞌntzen cycaman xjal t-xtalbil Herodes juntl maj. Cwa cycamanxin t-xtalbil Blasto, junxin nintzaj t-akꞌanal cawel Herodes. Te tzunj xin oca cykanen xjal tuꞌn tcub tuj ttz̈yal, cuma nchi ajben xjal waabj.

21Bixsen e ttxoc Herodes ke cyyolel xjal te Tiro bix Sidón. Te tzunj kꞌij tuꞌn cypon xjal, bix oc nintzaj t-xbalen Herodes, bixsen e cub kexin tuj tkꞌaꞌjxin te cawbil, bix e yolenxin cywitz xjal.

22Tejtzen tpon baj tyolxin, bix akꞌke xjal s̈-il:

—Jaxxixsen te ja tyol Dios. Yaaꞌn nuk jun xjal―tz̈i cys̈itz̈ꞌbil xjal.

23Pero bix e tzaj tcꞌuꞌj Herodes cyibaj xjal tuꞌn toclen cykbaꞌn xjal texin ka Diosxin. Min e xiꞌ tkꞌoꞌnxin chjonte te Dios. Juꞌ tzunj, tujx naj tpon jun tsanjel Dios kꞌolec jun tij tyabelxin. Lwewa e jaw jletkil ẍukꞌ chyol texin, bix e cyimxin.

24Otkxsen baj ttzyuꞌnxin ke ocslal, bix otkxsen chi baj tsiyꞌpuꞌnxin. Pero te Dios tyol, xiꞌnax e xiꞌ tz̈ꞌiy, bix nimx xjal oc te ocslal.

25Yaltzen te Bernabé bix Saulo, e bint-x cyexin cyaakꞌen cyuꞌn tej t-xiꞌ cyiiꞌnxin cyonbil ocslal te Antioquía cye ocslal tuj Jerusalén, bix aj meltzꞌajkexin tuj Jerusalén tuꞌn cyponxin Antioquía juntl maj. E xiꞌ cyiiꞌnxin Juan cyuyaxin, juntl tbixin Marcos.