SAN MARCOS 12 - Mam of Todos Santos -- Guatemala Unicode

Jun techel cyiꞌj akꞌanal yaaꞌn baꞌn(Mt. 21:33-46; Lc. 20:9-19)

1Bix akꞌx Jesús kbalte cye txꞌolbal ley bix cye nintzaj xjal bix cyuya tawil naꞌl Dios, bix e cub tkꞌoꞌnxin jun techel ka tuꞌn tbyet-xin. Tz̈i tzunxin cyjulu:

—At junxin xjal e cuꞌx awante cab tken uva. Bix oc tkꞌoꞌnxin penwen tiꞌj. Bix e jaw tbinchaꞌnxin jun ttemlel uva tuꞌn tel vino tiꞌj, bix e jaw tbinchaꞌnxin jun jaaꞌ nim tweꞌ te cꞌojlablte tawalxin bix te cꞌojlabl ttemlel twitz uva. Bix e cub bint tyolxin cyuya cab xjal tuꞌn tcub cyminaꞌn ttxꞌotxꞌxin tuꞌntzen oj tjaw awal twitz, niyꞌjantzen te taaw txꞌotxꞌ bix niyꞌjantzen cye akꞌanal. Bix exxin tuj tbexin.

2Tetzen tumel tuꞌn t-xilj uva, bix e xiꞌ tsmaꞌnxin jun tsanjelxin te paꞌlbel tej texin.

3Pero tejtzen tpon sanjel, bix oc cypjuꞌn manal txꞌotxꞌ jaxin, bix aj ljet-xin mintiiꞌ uva otk tiikꞌxin.

4Tejtzen tpon meltzꞌajxin tuya taaw txꞌotxꞌ mintiiꞌ uva kꞌiꞌn tuꞌnxin, bix e xiꞌ tsmaꞌn taaw txꞌotxꞌ juntl tsanjel. Tej tzunj tpon sanjel, bix oc cypaꞌn manal txꞌotxꞌ twiꞌ sanjel, bix e baj yaset-xin.

5Bix e xiꞌ tsmaꞌnxin juntl tsanjelxin. Yal tzunj ja juntl xina, biꞌxse e byet-xin. Bix e xiꞌ tchkꞌoꞌnxin nimtl tsanjelxin cabtl maj. Attzen e baj pjet, bix attzen biꞌx e cub cybyoꞌnxin.

6Bix e xiꞌ tchkꞌoꞌn texin cykilca ke tsanjelxin. Ya min-altl e cyaj. Nuk jun tcyꞌaalcꞌatlxin at tuyaxin. Bix e xiꞌ t-xiꞌmanxin tiꞌj cyjulu: “Oj t-xiꞌ nchkꞌoꞌn ncwal, kapetzen cybiꞌ manal txꞌotxꞌ ncwal, tz̈i tzunxin. Bix e xiꞌ tchkꞌoꞌnxin tcwalxin.

7Pero tej tpon tcwalxin, bix akꞌ ke manal txꞌotxꞌ yolel: Ja tcwal taaw txꞌotxꞌ ma tzul. Tetzele tkabkꞌa cyjela jtxꞌotxꞌa. Ka miin kbyaꞌcꞌakꞌa, tuꞌntzen ke cyjela,” tz̈i tzunkexin.

8Bix e tzaj cytzyuꞌn manal txꞌotxꞌ jakꞌa, bix e cub byetkꞌa, bix ex xeꞌt t-xumlalkꞌa tiꞌjxe penwen.

9Attzen jun cxeꞌl nkanen cyey. ¿Tiiꞌntzen cyey tuj cywitz? ¿Ti ctseꞌ jxin taaw awal kej xjal manala? Cxeꞌltzen nkbaꞌn cyey, oj t-xiꞌ jxin taaw txꞌotxꞌ, cwel tbyoꞌnxin ke manal txꞌotxꞌ, bix cxeꞌl tkꞌoꞌnxin txꞌotxꞌ te tmaan juntl wik.

10¿Mixpatzen n-eꞌla cyniꞌya tiꞌj tyol Dios nbyan cyjulu: “Jxak qꞌuelel kaꞌyba tuj cywitz binchal jaaꞌ te tkꞌuklel t-xeeꞌ jaaꞌ, ja tzunja cwel meltzꞌaj te nin tkꞌuklel jaaꞌ.

11Jatzen Dios cwel meltzꞌunte xak te tbanel xak. Juꞌ tzunj axse qꞌuelela tuj kwitz,” tz̈i tyol Dios tuj jun bitz?―tz̈i Jesús cye nintzaj xjal.

12Toctzen cybiꞌn ke nintzaj tawil naꞌl Dios, ke txꞌolbal ley, bix ke nintzaj xjal tyol Jesús, cyaj tzunxin e tzyet Jesús tuꞌn tbyet-xin, cuma el cyniyꞌxin tiꞌj ka cyiꞌjxin otk yolena Jesús, cuma otk tzꞌel cyxooꞌnxin ja Jesús. Pero mintzen e cytzuyxin Jesús tuꞌn cytz̈i jxjal lepchec tiꞌj Jesús. Bix e cyaj cycyeꞌyenxin Jesús.

Jun tumel tibaj chojentj(Mt. 22:15-22; Lc. 20:20-26)

13Yajcꞌatltzen bix e xiꞌ cychkꞌoꞌn nintzaj xjal cabxin nimal tuj cyley bixsen cabxin cycyꞌi chi kꞌojl tuya xjal aj Roma, cuma jatzen Roma cawel tibaj Israel. Bix e xiꞌkexin tiꞌ Jesús te kanlecte jun cyiw yol te Jesús tuꞌn tcub tzꞌak Jesús tuj cykꞌabxin tuꞌn kaꞌ tyol Jesús tiꞌ Roma.

14Bix e xiꞌ cykanenxin te Jesús:

—Xnakꞌtzal, ktzkiꞌna jax tey tyol. Min tzꞌaj tkꞌon tey tiib tuya juntl xjal. Min tzꞌoc tcyeꞌyen tey tiiꞌn ke xjal oj n-akꞌa nincꞌul xjal. Jtey nbaj tyeecꞌana ja te ja tisexix taj Dios. Jeyꞌtzen, ¿ti tey toc tuꞌn? ¿Ilxixpa tiꞌj tuꞌn tcub kchoona te te Roma, ma minj?―tz̈i tzunkexin. Nuktzen e cyyoxin laꞌ ti toc tuꞌn Jesús, cuma nim xjal e tajbe tuꞌn tcub tchoon, bix nim xjal min e tcuya tuꞌn tcub tchoon.

15Pero ttzkiꞌn Jesús caꞌba tten cyanem xjal, bix e xiꞌ tkbaꞌnxin cye xjal:

—¿Tikentzen ncwaꞌ cykꞌoꞌna cꞌoꞌbil tuj nbe tuya cyyola? Cykꞌantz jun pwak we. At jun cxeꞌl nyeecꞌan cyey―tz̈i Jesús.

16Bix e xiꞌ cykꞌoꞌnxin jun pwak te Jesús. Bix e xiꞌ tkanen Jesús cyexin:

—¿Ale jwitzbaj bix ale jbiybaj tcub twitzj pwaka?―tz̈i Jesús.

Bix aj cytzakꞌbeꞌnxin:

—Jaj twitz nin cawel cyibaj cawel te Roma―tz̈i tzunkexin.

17Bix aj ttzakꞌbeꞌn Jesús cyexin:

—Kane juꞌwa, cykꞌonxne te cawel alcyej te cawel taj, bix cykꞌonx te Dios alcyej te Dios taj―tz̈i Jesús.

Bix e jaw kleeꞌkexin tuꞌn tyol Jesús. Otktzen cub tzpet cycꞌoꞌbilxin.

Jun kanbil tiꞌj itzꞌjlenel tuj cyamecy(Mt. 22:23-33; Lc. 20:27-40)

18Yajcꞌatltzen bix e pon jun clojxin xjal, saduceo tbi cyclojxin, tiꞌ Jesús. Ejeeꞌtzen xinj e kbante ka oj tcyim jun xjal, biꞌx ccymel junx maj. Mintiiꞌ tuꞌn tjatz itzꞌj. Bix e ponkexin te kꞌolcꞌa cꞌoꞌbil tuj tbe Jesús tuya cyyolxin. Tz̈ikexin cyjulu:

19—Xnakꞌtzal, o cyaj ttzꞌiꞌben Moisés ka jun xinak najlel ma cyim, bix min-al tcwal tuya t-xuꞌl, il tiꞌj tuꞌn tmaje xuuj tuya jun titzꞌen ma jun ttzicy cyimne tuꞌn titzꞌj tal xuuj. Yaltzen tneel tal xuuj n-octltzen te tcwal ktzan tchmil xuuj te cꞌojlal txꞌotxꞌ bix tuꞌn miꞌn txiꞌ tzꞌak tiyꞌjil cyimne.

20Jaxse baꞌnte, attzen jun maj at wuuk xjal cyitzꞌen cyiib. Ja tzunj xin tneel e majexin, pero bix e cyimxin, bix min e cyaj jun tcwalxin.

21Entonces bix e maje viuda tuya tneel titzꞌen ktzan tchmil xuuj. Pero jax bix e cyimtlxin minxn-al tal xuuj itzꞌj. Juꞌxtl e baj tuya tcab cyitzꞌenxin.

22E majekexin cywuukelxin tuya xuuj, bix min-alx jun cyexin itzꞌj tcwal tuya xuuj. Mancꞌbiltzen bix e cyim xuuj.

23Baꞌntzete. Pero ojtzen cyjatz itzꞌj xjal juntl maj, ¿altzenle jun cyexin cꞌoquel te tchmilxuj tiꞌj cywuukelxin e maje tuyaxuj?―tz̈i tzunkexin te Jesús te kꞌilbel tipemalxin.

24Pero bix aj ttzakꞌbeꞌn Jesús:

—Junxse maj tzpetpajninkey, cuma min cytzkiꞌna ti toc tuꞌn tyol Dios, bix min cytzkiꞌna ka tuꞌn tipemal Dios baꞌn tjatza itzꞌjtl t-xumlal jun xjal cyimne.

25Oj cyjatz itzꞌj cyimne juntl maj, jun wikxitlte chunkꞌlal. Xuujle, xinakle, mlay chi majecye juntl maj, tise ke tsanjel Dios tuj cyaꞌj min chi oc maje.

26Cxeꞌltzen nkbaꞌn cyey ka il tiꞌj chi jawetz itzꞌj cyimne juntl maj. ¿Bajxpatzen txaꞌ cycyeꞌyena tyol Dios e cyaj ttzꞌiꞌben Moisés ti toc tuꞌn Dios tej tetz yolenxin tuya Moisés tuj tken kꞌakꞌ tuj chꞌiꞌx? Tz̈i Dios cyjulu: “Inayen wej Tdios Abraham, bix te Isaac, bix te Jacob,” tz̈i Dios te Moisés tuj tken kꞌakꞌ. Juꞌtzen e xaꞌ tkbaꞌn Dios cuma iꞌtzx Abraham, Isaac bix Jacob tuj juntl chunkꞌlal.

27Cycyeꞌnc tzuna Dios, yaaꞌn Tdios cyimne texin, sino Tdios iꞌtz texin. Juꞌ tzunj tzpetpajninx ke cyey―tz̈i Jesús cye xjal saduceo.

Jun tcawbil Dios jawnex(Mt. 22:34-40)

28Toctzen tcyeꞌyen junxin txꞌolbal ley otk tzꞌaj ttzakꞌbeꞌn Jesús tisexix tten, bix e xiꞌ lkꞌexin tiꞌ Jesús te kanlecte cyjulu:

—¿Altzen cyej tneel tcawbil Dios cyxol cykilca mas il tiꞌj?―tz̈i tzunxin te Jesús.

29Bix e xiꞌ tkbaꞌn Jesús:

—Jatzen tneel tcawbil Dios cyxol cykilca ncnet tuj tyol Dios ja lu: “Tz̈i Moisés: ‘Key xjal te Israel, cybimqꞌuey: Jxin Kaaw Dios oꞌcxcꞌa jun xinj Taaw twitz txꞌotxꞌ.

30Juꞌ tzunj cꞌoquelxix takꞌ Cyaawa cyey tuꞌn cykil cyanema, tuꞌnxix cykil cycꞌuꞌja, tuꞌnxix cykil cynaabla, bix tuyaxix cykil cyipemala,’ tz̈i Moisés cye xjal aj Israel,” tz̈i tyol Dios.

31Tcabtzen tcawbil Dios ja lu: “Cꞌoquelxix takꞌ jun xjal cyey tisex n-oc cyakꞌ cyiiba cyey,” tz̈i Moisés cye xjal aj Israel nejl. Mintiiꞌ juntl tcawbil Dios juꞌxix tisej caꞌba lu―tz̈i Jesús te txꞌolbal ley.

32Bix aj ttzakꞌbeꞌn jxin txꞌolbal ley:

—Juꞌxe, Taat Xnakꞌtzal. Jax toc tuꞌna junxte Dios at. Min-al juntl at tiꞌjxexin.

33Jaxte. Aljxe xjal ma tzꞌoc takꞌ Dios te tuya cykil tanem bix tuꞌn cykil tcꞌuꞌj bix tuya tipemal, bix ma tzꞌoc takꞌ jun xjal te tisex n-oc tcꞌojlante tiib, masx baꞌnte twitz Dios twitzj oj nxiꞌ cyoyen xjal cyoybil te Dios―tz̈i jxin txꞌolbal ley te Jesús.

34Toctzen tbiꞌn Jesús ttxolan tyol txꞌolbal ley, bix e xiꞌ tkbaꞌn Jesús texin:

—Yaltzen tey, n-eltzen tniꞌya tiꞌ tcawbil Dios. Yaaꞌntzen nakch taꞌy tuꞌn toctzen tjakꞌ tcawbil Dios―tz̈i Jesús texin.

Cybajtzen yolenxin tuya txꞌolbal ley, min-altl xjal oc nimsante tcꞌuꞌj te kanlec tikꞌch jilel te Jesús.

¿Ale cwalbaj Cristo tuj cywitza?(Mt. 22:41-46; Lc. 20:41-44)

35Bix akꞌxxin xnakꞌtzal xjal juntl maj, bix e xiꞌ tkanenxin cye xjal:

—¿Tikentzen nbyana cyuꞌn txꞌolbal ley ka jxin Scyꞌoꞌn tuꞌn Dios t-xeꞌchel David jaxin? Juꞌxte ttena. Pero jaxtlpe David e kbante ka Taaw David jaxin.

36Cycyeꞌnctzen tyol David tuꞌn tipemal Espíritu Santo. Tz̈i David cyjulu: “Bix e xiꞌ tkbaꞌn Dios te Waawa: ‘Kequey tuj nmankꞌab te tneel xjal. Ayomtzen ojxe cyocx baj tajkꞌoja tjakꞌ tkena wuꞌn,’ tz̈i Dios te Tcwal,” tz̈i David tej tcyaj ttzꞌiꞌben―tz̈i Jesús cye xjal.

37Nyolenx Jesús t-xiꞌ tkbaꞌn:

—Jax David oc kꞌonte Scyꞌoꞌn tuꞌn Dios te Taaw at-xe kꞌij. Katzen juꞌwa, yaaꞌnale nuk t-xeꞌchel David jaxin, sino Taawnele David jaxin jatxe nejl―tz̈i Jesús cye xjal. Tiꞌjxxin nyolenaxin.

Nimxse xjal oc achente tyol Jesús.

Tej tyole Jesús tiꞌj cymodo txꞌolbal ley yaaꞌn baꞌn(Mt. 23:1-36; Lc. 11:37-54; 20:45-47)

38Bix e xnakꞌtzanxxin mas cye xjal:

—Cycꞌojlam cyiiba miꞌn chi oc lpey cyiꞌ txꞌolbal ley, cuma cyachenxin chi iyꞌ bet-xin tuya cuꞌj cyxbalenxin te yecꞌbilte ka nmak xjalkexin, cuma cyajxin chi oc kꞌolbet-xin tuya nim cꞌuꞌjbaj cyiꞌjxin oj nchi iyꞌxin tuj plasen.

39Bix ja xsunkej nintzaj kꞌukbil nxiꞌ cyjyoꞌnxin tuj camon jaaꞌ te xnakꞌtzabl tyol Dios bix tuj jun oꞌna.

40Nchi naꞌnxin Dios tuya nim yol nuk tuꞌn t-xiꞌ cyyeecꞌaxin cyiibxin cye xjal ka baꞌnkexin. Peroxix cyexin cynaabl tzin cyyeecꞌaxin oj nbaj cyalkꞌaꞌnxin ke cyja viuda. Ejeeꞌtzen cye xinja cꞌoquel mas cyiw cycastiwa tuꞌn Dios twitz juntl wik aj il―tz̈i Jesús cye xjal.

Jun cotz cuꞌx tkꞌoꞌn jun viuda(Lc. 21:1-4)

41Yajxetzen chꞌintl, kꞌuklcꞌatzen Jesús nka ttziiꞌ tja Dios, jaaꞌ eteꞌcꞌa jcaxin tcublel pwak n-ocx te tcotz tja Dios. Bixse oc tcꞌuꞌj Jesús tiꞌj tiiꞌn chi kꞌon xjal pwak. Nimxse kꞌina cuꞌx kꞌonte nim pwak.

42Cwa tpon junxuj viuda mebexuj, bix e cuꞌx tkꞌoꞌnxuj caꞌba centavo tuj caxin.

43Bix e tzaj ttxcoꞌn Jesús ke t-xnakꞌatz, bix e xiꞌ tkbaꞌnxin cyexin:

—Cxeꞌlxix nkbaꞌn cyey jxuj mebewa ma cuꞌx tkꞌoꞌnxuj mas nim twitzj cabtl xjal ncuꞌx kꞌonte nim,

44cuma kej xjal kꞌinawa ncuꞌx cykꞌoꞌn ya min tzꞌajbenxixtl cye, pero jte xuja ma cuꞌx tkꞌoꞌnxuj kej mancꞌbil caꞌba centavo kꞌiꞌn tuꞌnxuj tuꞌn titzꞌjxuj tuj tmebeyilxuj―tz̈i Jesús.