2 CORINTIOS 13 - Mam of Todos Santos -- Guatemala Unicode

1Ojtzen npona cyxola, te toxen maj te cyeyꞌlte cyey. Tzin tkbaꞌn tyol Dios: “Oj ncub tkꞌoꞌn cawel jun xjal tuj castiwa, il tiꞌj at caꞌba oxe tstiwa tiꞌ til xjal,” tz̈i tyol Dios. Juꞌxsen weya. Kej oxe maj nkena cyxola chi ajbel tisen oxe tstiwa cyiꞌja.

2Tejtzen nx-aja cyxola tcab maj, e xiꞌ nkbaꞌna cyey, “Ojtzen wula juntl maj cyxola, jatzen chi ex nkꞌoꞌnja cykilcakej min cyaj cykꞌoꞌn cyil,” ntz̈iya. Amatzele mintn-al kena cyxola, cxeꞌl nkbaꞌna cyey juntl maj oj npona cyxola juntl maj, iltzen tiꞌj cxeꞌl nkꞌoꞌna cycastiwey te cykilcakej nchi binchan kaꞌ.

3O tzaj cykbaꞌna il tiꞌj tuꞌn t-xiꞌ nyeecꞌana cyey o tzaj tkꞌoꞌn Cristo wipemala tuꞌn wajbena te tyolelxin. Baꞌn tbint wuꞌna, bix qꞌuelel cyniꞌya tiꞌj Cristo yaaꞌn tuꞌn mintiiꞌ tipemalxin tuꞌn t-xiꞌ tkꞌoꞌnxin castiwa cyey wuꞌna, sino at nim tipemal.

4Jaxte tej tcyim Cristo twitz cruz, min chicꞌaj tipemalxin tuꞌn tcamanxin cyibaj kej nchi kꞌojl tiꞌjxin. Pero iꞌtzxin jaꞌlewe, bix nimxsen tzin tyeecꞌanxin tipemal Dios. Juꞌx xsunj weya. Jwipemala e tzaj tkꞌoꞌn Cristo weya yaaꞌn nim e chicꞌajax nejl, pero tisen te Cristo e tyeecꞌan tipemal Dios mas yaj, juꞌxse weya. Yajtzen cxeꞌl nyeecꞌana tipemal Dios cyey wuꞌna tuꞌn ncamana cyibaj kej nchi kꞌojl wiꞌja.

5Cykꞌoꞌnc cycꞌuꞌja tiꞌj ti niyꞌ tuj cyanema, tuꞌntzen tel cyniꞌya tiꞌj ka o tzꞌoc ke cycꞌuꞌja tiꞌ Cristo. Ejeeꞌx cyey qꞌuelel cyniꞌya tiꞌj at Jesucristo tuj cyanema. Ntzkiꞌna cykbaꞌy ocslalkey.

6Tzꞌelxit cyniꞌya tiꞌj ocslalkey, cuma ka ocslalkey, qꞌuelel cyniꞌya tiꞌj jun jaxxix t-xel Cristo ken weya, cuma tuꞌnj tkbaj tyol Dios wuꞌna ockey te ocslal.

7Pero mas waja tuꞌn t-xiꞌ cyiiꞌna cynaabla tuj tumel twitzj tuꞌn t-xiꞌ nyeecꞌana wipemala te kꞌolte cycastiwey tuꞌnj kaꞌ nbint cyuꞌna. Mas baꞌn ka jiquenxix eteꞌy twitzj tuꞌn tchicꞌajax at tipemal Dios wuyena.

8Yaaꞌn baꞌn tuꞌn t-xiꞌ nyeecꞌana wipemala te cawlte cyey ka tzin cynimana jaxxix tyol Dios. Ka baꞌn tzin cybinchaꞌna, jax cxeꞌl nkꞌoꞌna baꞌn nyola te cyey.

9Nchin tzalaja ka mintiiꞌ kaꞌ nbint cyuꞌna, tuꞌntzen mintiiꞌ il tiꞌj tuꞌn t-xiꞌ nyeecꞌana wipemala te cawlte cyey. Oj nchin naꞌna Dios cyiꞌja, yaaꞌn nxiꞌ nkanena tuꞌn t-xiꞌ nyeecꞌana wipemala cyey, sino nxiꞌ nkanena tuꞌn cycywixa tuj cyocslabla.

10Juꞌ tzunj nxiꞌ nsmaꞌna wuꞌja cyey joocꞌtzen minaꞌx npona cyxola. Waja tuꞌn tcyaj cykꞌoꞌna cyila, tuꞌntzen oj npona cyxola, mintiiꞌ il tiꞌj tuꞌn t-xiꞌ nyeecꞌana cyey tipemal Dios. Waja tuꞌn tajben tipemal Dios weya, yaaꞌn te kꞌolte cyey tuj il, sino te cyiwsablte cyey tuj cyocslabla.

Jun kꞌolbebl tuꞌn Pablo cye ocslal tuj tnom Corinto

11Key hermano, oꞌcxsen nyol jlu. Aleyrexitkey. Cykꞌoꞌnc cyipena tuꞌn cytzketa. Bix cycyiwsanx ke cyuyey. Tzꞌelxittzen cywiꞌy junx. Tujxittzen ttz̈yal chi temana. Ka nbint cyuꞌna juꞌwa, Diostzen at cyuyey. N-octzen cyakꞌa te bix ja tzunxin cwel kꞌonte cyey tuꞌn cytena tuj ttz̈yal.

12Cykꞌolbem ke cyuyey tuya jun ttz̈yalxix tiꞌ cyanema.

13Kej ocslal at wuyena tzalu nxiꞌ cykꞌoꞌn jun kꞌolbebl cyey.

14Tenxittzen t-xtalbil Kaaw Jesucristo cyxola, bix juchxit cycꞌuꞌja tiꞌ Kman Dios, bix junxit chi eꞌley tuya Espíritu Santo. Oꞌcx nyolja.