HEBREOS 3 - Mam of Todos Santos -- Guatemala Unicode

Jawnex te Jesús twitz Moisés

1Juꞌ tzunj, key hermano sakxix twitz Dios bix scyꞌoꞌnkey tuꞌn Dios tuꞌn cyajbena te te t-xjal, cybisenx tiꞌj Jesús, Scyꞌoꞌn tuꞌn Dios, cuma tuj kocslabl ja Jesús smaꞌn tuꞌn Dios te onel ke bix cuma jaxin te nintzaj kpala te yolel kiꞌj twitz Dios.

2Cybisenx tiꞌj Jesús ja jun xjal baꞌn tuꞌn toc ke kcꞌuꞌj tiꞌjxin. E tbixin te junx maj cykilj e tkba Dios, tisen te Moisés e tbi cykilca tyol Dios tej takꞌananxin cyxol t-xjal Dios te ootxa.

3At juun cyxola ncub cybisena ka ja Moisés mas nintzaj twitzj Jesús bix juꞌx mas il tiꞌj tley Moisés twitzj tyol Jesús. Pero yaaꞌn juꞌwa. Ja te Jesús mas nintzajxin twitz Moisés, tisen jun binchal jaaꞌ mas nintzaj twitz jaaꞌ.

4Jaca juun jaaꞌ cbinel tuꞌn juun xjal. Pero te Dios jaxin binchalte te cykilca at.

5Jatzen te Moisés e tbi texin te junx maj cykil tyol Dios tuj taakꞌenxin te yolel tiꞌj ti cbinel tuꞌn Dios mas yaj, pero nuk jun akꞌanalxin tuj tja Dios cyibaj t-xjal Dios.

6Yaltzen tej Scyꞌoꞌn tuꞌn Dios, juꞌxa e tbi texin te junx maj cykil tyol Dios, pero yaaꞌn tisen jun akꞌanalxin, sino Tcwal Dios texin, Taaw tibaj cykil t-xjal Dios, bix ktzkiꞌn jun taaw mas nintzaj twitz jun akꞌanal. Yaltzen ke, ejooꞌ t-xjal Dios ka kꞌiꞌnxix kuꞌn tuꞌntzen kcaman alcyej nko ayon tiꞌj.

Ntzaj tkꞌoꞌn Dios ajlabl cye ke ocslal

7Wajtzen txiꞌ nkꞌumena cyey jun tumel tiꞌj tuꞌn tiyꞌx cyuꞌna tuꞌn cyxiꞌ lpey tiꞌ Jesús hasta ojxe tjapan baj cychunkꞌlala. Ka minx cypay, ka cab cycꞌuꞌja cyxiꞌy, juꞌ pjel cyey tisen e baj cye kxeꞌchel. Cynaꞌntztzen ti toc tuꞌn Espíritu Santo tuj tyol Dios. Tz̈i cyjulu: “Tz̈i Dios cye xjal judío: ‘Jaꞌlewe, ka ma cybiy titzen tzin nkbaꞌna,

8miꞌn tzꞌel cyiiqꞌuena, tisen kej cyiyꞌjila el cyiiqꞌuen j-e nkbaꞌya tej cybet tuj jun najbil tzkij txꞌotxꞌ, bix juꞌtzen oc tenke iylelte weya.

9Jatztzen e n-oqueya tuj niyꞌbebl cyuꞌn ke cyxeꞌchela ka tuꞌn ttzaj nkꞌoja cyiꞌj, amale tet cyaꞌwnak jnabkꞌi toclen cycyeꞌyen cykilcaj baꞌn e wakꞌa cye.

10Tuꞌn tzunj cyniyꞌbebl wiꞌja, e tzaj nkꞌoja cyiꞌj, bix e xiꞌ nkbaꞌn cye: Tuj cyanema nuk cyajx cyey nchi bet-xa tzpetpajninkey. Bix cycyꞌixa tuꞌn tbint cyuꞌna tuꞌn cybeta tuj nbeꞌya, ntz̈i cye cyxeꞌchela.

11Juꞌtzen e tzaaꞌ nkꞌoja cyiꞌj, bix jaxxix e nkbaya cyexin mlayx chi oc tuj lugar te ajlabl tuj txꞌotxꞌ te Canaán at tuꞌn t-xiꞌ nkꞌoꞌna cyexin,’ tz̈i Dios cye aj Israel,” tz̈i Espíritu Santo tuj tyol Dios.

12Juꞌ tzunj, key hermano, ka n-el kxooꞌn tyol jxjal jatzen mero Dios iꞌtz, tuꞌn tzunj ja lu n-el kpaꞌn kiib tiꞌ Dios. Kꞌoꞌnc cycꞌuꞌja tiꞌj ti e baj cye ke kxeꞌchel ootxa tej tel cyiin cyiib tiꞌ tyol Kman Dios. Juꞌ tzunj cycꞌojlam cyiiba miꞌn tzꞌel cypaꞌn cyiiba tiꞌ Dios iꞌtz, bix miꞌn baj cycꞌuꞌja tiꞌ tyol, bix miꞌn cyaj cykꞌoꞌna cybey tuya Dios.

13Nuk oꞌcx cynimsam cycꞌuꞌja cyxola jaca kꞌij looj lux tyem at jaꞌlewe, tuꞌn min-al jun cyey cub tzpet tnaabl tuꞌn il.

14Ka kꞌiꞌnxix kuꞌn ojxe kcyim tisenj tej kocslan tuj tneel, attzen mojbabl kiib tuya Jesús, Jscyꞌoꞌn tuꞌn Dios.

15Cynaꞌntztzen ti toc tuꞌn tyol Dios: “Jaꞌlewe, ka ma cybiy titzen ntkbaꞌn Dios, miꞌn cycyiwsay cyanema, tisen e baj cyej xjal el cyxooꞌn tyol Dios,” tz̈i tyol Dios.

16¿Altzen cyej xjal el xooꞌnte tyol Dios, amale otket cybi? Cykilca kej xjal etz tiiꞌn Moisés tuj txꞌotxꞌ te Egipto, ejeeꞌtzen kxeꞌchel.

17¿Bix aluyatzen e kꞌojle Dios cyaꞌwnak jnabkꞌi? Cyuya tzunj aj Israel min e cybi, bix cuma min e cybi, ejeeꞌ tzunja e cyim tuj najbil tzkij txꞌotxꞌ.

18¿Bix aluyatzen e tkbaꞌ Dios jaxxix tyol tuꞌn miꞌn chi ocx tuj jun lugar te ajlabl otk takꞌ Dios te cynajbil? Cyuya tzun kej xjal min e cybi tyol Dios.

19Tzꞌelcꞌatzen kniyꞌ tiꞌj min ocxke tuj txꞌotxꞌ te Canaán tuya Dios tuꞌn min e cyocsla tyol Dios.

Juꞌtzen min ocx ke kxeꞌchel tuj ajlabl, bix juꞌtzen ke, miꞌn ko ocx tuj jun ajlabl tzin tkꞌoꞌn Dios ka nbaj kcꞌuꞌj tiꞌ tyol Dios.