1Amale yaaꞌnt tumel te nimsaljaw nbiꞌya, pero cjawel wiin wiiba chꞌintl mas, tuꞌn t-xiꞌ nyeecꞌana jun jaxxix t-akꞌanal Cristo kena. Juꞌ tzunj, cxeꞌl nkbaꞌna cyey tiꞌj e tzaj tyeecꞌan Dios weya bix j-e tzaj tkbaꞌn Dios weya.
2Ntzkiꞌna jun ocslal tiꞌ Cristo. Aj tiiꞌn Dios jaxin tuj toxen cyaꞌj jun rato maa jaaꞌ taꞌ Dios. Ma bint cyajlaaj jnabkꞌi tbajlen jlu. Mintiiꞌ tumel wuyena ka tuyax t-xumlalxin e jax tiiꞌn Dios tuj cyaꞌj bix ka e cyaj t-xumlalxin twitz txꞌotxꞌ. Nuk ja Dios itzkilte.
3Pero jax wuꞌna, kale tuyax t-xumlalxin, bix kale yaaꞌn tuyax,
4pero e jax tiiꞌn Dios jaxin tuj cyaꞌj. Jatztzen oca tbiꞌnxin jyol jawnexsen nunca tzꞌel cyniyꞌ xjal te twitz txꞌotxꞌ tiꞌj, bix min e kꞌoj texin tuꞌn tcub tenxin txꞌolbalte ti otk tzꞌoc tbiꞌnxin tuj cyaꞌj.
5Tiꞌj tzunj nintzaj xtalbil lu e tzaj tkꞌoꞌn Dios tej ocslal lu, nchin tzalaja tiꞌj. Pero te weya, yaaꞌn te nnimbil wiiba, sino nuk jaj tiꞌj qꞌuixcꞌaj o tziyꞌx wuꞌna cxeꞌl ntxꞌolbaꞌna, tuꞌntzen tel cyniꞌya tiꞌj yaaꞌn jawnex kena.
6Nuket waja tuꞌn t-xiꞌ nkꞌumena inayen tzuna in x-aja tuj cyaꞌj, jacꞌa baj nkꞌumena, cuma jaxte in x-aja. Pero miꞌn txiꞌ nkbaꞌna mas ti tten, cuma ncyꞌiya tuꞌn toc cynimana inayena nuk tuꞌnj nx-ajlena tuj cyaꞌj jun maj. Waja tzꞌoc cynimana inayena nuk tuꞌnj baꞌn nnaabla nxiꞌ nyeecꞌana cyxola bix tuꞌnj nyola o tzꞌoc cybiꞌna.
7Tuꞌnj tikꞌch e tzaj tyeecꞌan Dios weya tuj cyaꞌj, kape njaw nnimsan wiiba tiꞌj. Juꞌ tzunj jun nimxsen pena oc weya, tisen jun chꞌiꞌx n-oc ẍuyꞌj tuj nchuꞌla, tuꞌntzen taajtz tiꞌ nnaabla. Jpena niyꞌx wuꞌna tisen jun tsanjel taaw il toc yajlal te weya.
8Oxe maj e xiꞌ ncubsaꞌna nwitza te Kaaw tuꞌn tel tiiꞌnxin jpena toc wiꞌja.
9Pero min e tcuyaxin, sino e tzaj tkbaꞌnxin weya: “Cxeꞌl nkꞌoꞌna wipemala tey te onl tey. Ka yaaꞌn jawnexa, mas cchicꞌajaxel weya wipemal oj woniya tiꞌja,” tz̈i Kaaw weya. Juꞌ tzunj mas nchin tzalaja tiꞌj yaaꞌn jawnex kena, twitzj nbaj nniman wiiba tiꞌj oc ncyeꞌyena tuj cyaꞌj, cuma ka yaaꞌn jawnex kena, mas nchicꞌajax tipemal Cristo weya oj tbint taakꞌen Dios wuꞌna.
10Juꞌ tzunj baꞌn tuj nwitza yaaꞌn jawnex xjal kena. Nchin tzalaja oj nchi jaw cyakbitl xjal wiꞌja tuꞌnj nchin akꞌanana tuj taakꞌen Cristo. Bix nchin tzalaja oj at pena wiꞌja, bix oj nchi jaw ilen xjal wiꞌja, bix oj nim kaꞌ toc wiꞌja, cuma oj tchicꞌajax yaaꞌn jawnex kena, qꞌueleltzen cyniyꞌ xjal tiꞌj nuk tuꞌnj tipemalxin nbint taakꞌenxin wuꞌna.
11Key hermano, junxsen nchꞌixewa xjaw nnimsan wiiba, pero nuket e yolenkey baꞌn wiꞌja cywitz kej ẍtakꞌ xnakꞌtzal, mintetletiiꞌ il tiꞌj tuꞌn tjaw nnimsan wiiba. Amale jawnexit t-akꞌanal Cristo ejeeꞌ tuj cywitz, pero yaaꞌn mas ajnintz kena cywitz, amale yaaꞌnt jawnex kena.
12Tej ntena cyxola, tuꞌnj jawnex akꞌuntl e bint wuꞌna, bix tuꞌnj jawnex techlal e bint wuꞌna, e xiꞌ nyeecꞌana cyey jun jaxxix t-xel Jesús kena, bix e bint tuya nim iyꞌx wuꞌna.
13O txiꞌ nyeecꞌana tuj cykilca tnom t-xel Cristo kena. Oꞌcx min e bint wuꞌna cyxola min e nkaniya twiꞌ ncꞌuꞌja cyey. Juꞌ tzunj, ¿tzimpa cykbaꞌna yaaꞌn il cyiꞌja wuꞌna cywitzj ocslal cyuj juntl tnom? Katzen tuj cywitza yaaꞌn il cyiꞌja wuꞌna, cynajsam chꞌin wiꞌja min e nkaniya twiꞌ ncꞌuꞌja cyey.
Tej t-xiꞌ tile Pablo ke ocslal tuj tnom Corinto14Key hermano, caꞌba maj o chin pona cyxola, bix waja tuꞌn npona te toxen maj. Bix oj npona, miꞌn chin kanewa pwak cyey. Yaaꞌn cypwaka tzin njyoꞌna. Nuk jun baꞌn te cyey waja. Yaaꞌn tumel oj cycꞌojlan neeꞌ tiꞌ cyman, sino ejeeꞌ cyman neeꞌ chi cꞌojlalcye neeꞌ. Tujtzen tyol Dios inayena tisen cymana.
15Juꞌ tzunj nimxsen nchin akꞌanana nuk tuꞌn jun baꞌn te cyey. Nimxsen n-oc cyakꞌa weya. Yajtzen cyey, ¿tikentzen nuk chꞌin wakꞌa n-oc cyey?
16Amale mint e xiꞌ nkanena pwak cyey, pero at juun cyxola tzin cykbaꞌn tuꞌn xtzꞌimj yol o tzꞌel wiiꞌna cypwaka, cuma n-el nniꞌya tiꞌj ti tten tuꞌn tcub yaaꞌna ke xjal, tz̈ike.
17Pero cxeꞌl nkanena cyey, ¿ti tten tej cycub yaaꞌnkey tuꞌn tel wiiꞌna cypwaka? Kej e xiꞌ nsmaꞌna cyuyey nejl, ¿tzimpa cub cybisena e cykanen cyonbila otk chmet te cye mebe tuꞌn ttzaj te weya?
18Tej t-xiꞌ nsmaꞌna Tito tuya juntl tuyaxin cyxola nejl te cyiwsalte cycꞌuꞌja tuꞌn tchmet cypwaka te cye mebe, ¿elpa tiiꞌn Tito cypwaka tuꞌn ttzaj tkꞌoꞌn weya? ¡Min! Ejeeꞌxa itzkilte e xiꞌ texin tuya jun tnaablxin baꞌnxix cyxola, tisenxj weya, bix junelne taꞌ kyola cyuyaxin.
19Key hermano n-oc cyakꞌa weya, oj t-xiꞌ cycyeꞌyena wuꞌja, kape tuj cywitza nchin clon wiiba cywitza tuꞌntzen wela baꞌn tuj cywitza. Pero yaaꞌn juꞌwa. Ttzkiꞌn Dios inayena, jun ocslal tiꞌ Cristo, ma chin yolena yaaꞌn tuꞌn wela baꞌn tuj cywitza, sino tuꞌntzen cycywixa tuj cyocslabla.
20Ma txiꞌ nkbaꞌna cykilcaj lu cyey, cuma najkel ncꞌuꞌja cyiꞌja. Kape oj npona cyxola, mintzen otk cyaj cykꞌoꞌna cyila, bix juꞌ tzunj iltzen tiꞌj chi oquel wilena, amale cyajata tuꞌn nyolena cyuyey tujxix ttz̈yal. Oj npona, kape at kꞌoj cyxola. Kape min tzꞌoc cycꞌuꞌja tiꞌ cykꞌoja, bix kape nchiꞌlec cycꞌuꞌja tiꞌ juntl, bix kape nbaj cypaꞌn cyiiba, bix kape at ẍtakꞌ cyxola, bix kape nchi yolena kaꞌ tiꞌ juntl, bix kape nchi jaw tz̈ꞌiya, bix kape yaaꞌn tuj tumel eteꞌy.
21Najkel ncꞌuꞌja, cuma kape oj npona cyxola juntl maj, at nchꞌixewa twitz Dios tuꞌnj kaꞌ nbint cyuꞌna. Kape at tuꞌn wookꞌa cyiꞌj ocslal minaꞌn tcyaj cykꞌoꞌn pajbaj bix yaaꞌn baꞌn bix il.
Who We AreWhat We EelieveWhat We Do
2025 by iamachristian.org,Inc All rights reserved.