ROMANOS 15 - Mam of Todos Santos -- Guatemala Unicode

1Juꞌ tzunj, key hermano, jatzen ke n-el kniyꞌ tiꞌj alcyej il tiꞌj twitz Dios, il tiꞌj qꞌuiyax kej ocslal min tzꞌel cyniyꞌ tiꞌj kuꞌn. Yaaꞌn tumel tuꞌn tcub kbinchaꞌn tikꞌch kaj cywitz.

2Cxeꞌlxix kbisen tiꞌj alcyej cꞌonel cye tuꞌn cytz̈ꞌiy tuj cyocslabl,

3cuma il tiꞌj tuꞌn tbint kuꞌn tisenj e bint tuꞌn Cristo. Amale Dioset-xin, pero min e bint tuꞌnxin tiꞌj tikꞌch e tajbexin, sino iyꞌx qꞌuixcꞌaj tuꞌnxin te jun baꞌn cye cabtl. Tz̈i Cristo tuj tyol Dios cyjulu: “Nuk tuꞌnj nchin ajbena tey, kej xjal nchi kꞌojl tiꞌja nchi yasen wiꞌja,” tz̈i Cristo te Tman.

4Nxiꞌ nkbaꞌna cyey j-e cub tzꞌiꞌbet jatxe ootxa, cuma cꞌajbel tyol Dios ke. Tzin tyeecꞌan ke yaaꞌn nuk kajx niyꞌx qꞌuixcꞌaj cykilca kuꞌn, bix tzin tnimsaꞌn kcꞌuꞌj tuꞌn kayon tiꞌj o cyaj tkbaꞌn Dios ke.

5Jatzen Dios n-onen kiꞌj tuꞌn tiyꞌx cykilca kuꞌn. Bix ja te Dios nnimsan kcꞌuꞌj tuꞌnj tyol. Tzajxittzen tkꞌoꞌn Dios tuꞌn cybeta junx, tisen taj Cristo Jesús.

6Chi tena tuya junx cyanema, tuꞌntzen tuya junx elnina cyyola cjawel cynimsaꞌna tbi Dios, jaxj Tman Kaaw Jesucristo.

Jax juꞌx kej xjal yaaꞌn judío at tuꞌn cyclet jaj ka ma tzꞌel cyniyꞌ tiꞌj colbil

7Juꞌ tzunj, tuꞌn tjaw nimset tbi Dios, cyiikꞌamtzen cyiiba, tisenj e tiikꞌ Cristo ejooꞌ.

8Ajbenxin te cykilca. E bint taakꞌen Dios tuꞌnxin cyxol judío, tuꞌntzen tjapa cykilcaj otk cyaj tkbaꞌn Dios te Abraham bix te Isaac bix te Jacob.

9Bix jax juꞌx ajbenxin cyej xjal yaaꞌn judío. Akꞌananxin tuꞌntzen tjaw cynimsaꞌn tbi Dios tuꞌnj e tzaj lastim cye tuꞌn Dios tuꞌnj e bint tuꞌnxin. Tzin tkbaꞌn tyol Dios cyjulu: “Juꞌ tzunj cjawel nnimsaꞌna tbiy cyxol kej xjal yaaꞌn Israel. Chin bitzela tuꞌntzen tjaw nimset tbiy,” tz̈i jun xjal tuj tyol Dios tuꞌn t-xiꞌ tyeecꞌan cjawel nimset tbi Dios cyxolj xjal yaaꞌn judío.

10Bix tzin tkbaꞌntl tyol Dios cyjulu: “Ja tzunkey yaaꞌn aj Israel chi tzalaja junx cyuyaj t-xjal Dios,” tz̈i tyol Dios.

11Bix tzin tkbaꞌntl cyjulu: “Cynimsanwe tbi Kaaw, ejeeꞌy yaaꞌn aj Israel. Jawxit cynimsaꞌn cykilca ke tnom tbi,” tz̈i tyol Dios.

12Bix jax juꞌx tzin tkbaꞌn Isaías, ja tyolel Dios, cyjulu: “Tzul jun tiyꞌjil Isaí. Cꞌoquel te cawel cyibaj kej xjal yaaꞌn aj Israel, bix cꞌoquel ke cycꞌuꞌj tiꞌj,” tz̈i Isaías tuꞌn t-xiꞌ tyeecꞌanxin at Cristo tuꞌn tajben te cykil xjal.

13Jatzen tzin tkꞌoꞌn Dios cyey tuꞌn toc ke cycꞌuꞌja tiꞌ Cristo. Bix tuꞌnj cyocslabla tiꞌ Cristo, tzajxit tkꞌoꞌn Dios cyey tuꞌnj tipemal Espíritu Santo tuꞌn at cytzalajebla bix tuꞌn cytena tuj ttz̈yal, tuꞌntzen tuya cykil cycꞌuꞌja chi ayola tiꞌj cykilcaj o baj tnincꞌuꞌn Dios cyiꞌja.

14Key hermano, min baj ncꞌuꞌja cyiꞌja. Ntzkiꞌna nojnen cyanema tuya cykilj baꞌn, bix ntzkiꞌna n-el cyniꞌya tiꞌj ti tten tuꞌn cyxiꞌ lpey tiꞌ Dios, bix ntzkiꞌna baꞌn cyuꞌna tuꞌn nbaj cyonen cyiiba tuꞌn tel cyniꞌya tiꞌj tyol Dios.

15Pero amale n-elet cyniꞌya tiꞌ tyol Dios, pero mintiiꞌ ttz̈i wiꞌja tuꞌn tcub ntzꞌiꞌbena jun cyiw yol cyey tiꞌj tyol Dios, tuꞌntzen tcꞌasj cynaabla. Ma cub ntzꞌiꞌbena te cyey aj Roma, cuma ja waakꞌenja o tzaj tkꞌoꞌn Dios weya.

16O tzaj tkꞌoꞌnxin weya tuꞌn woca te t-akꞌanal Jesucristo te cyej xjal yaaꞌn judío. Ja waakꞌenja tuꞌn t-xiꞌ nkꞌumena jbaꞌn tpocbal tyol Dios cyej yaaꞌn judío, tuꞌntzen cytxjet tuꞌn Espíritu Santo tuꞌn cyel baꞌn twitz Dios, tisen jun oybil baꞌn tuj twitz Dios.

17Juꞌ tzunj at woclena tuꞌn t-xiꞌ ntxꞌolbaꞌna cyey tiꞌj tyol Dios. O tzaj tkꞌoꞌn Dios waakꞌena, bix nbint wuꞌna tuꞌn Cristo Jesús.

18Yaaꞌnxsele tumel tuꞌn t-xiꞌ nkbaꞌna cyey wuꞌntza weya nimxsen taakꞌen Dios o bint wuꞌna. Juꞌ tzunj nxiꞌ nkbaꞌna nuk tuꞌn Cristo nbint taakꞌen Dios wuꞌna. Tuꞌnj waakꞌena kꞌoꞌn weya, nim xjal yaaꞌn judío o cyniman tyol Dios. O cyniman tuꞌnj o txiꞌ nkꞌumena bix tuꞌnj o bint wuꞌna cyxol.

19Tuꞌn tipemal Espíritu Santo, nimxsen bix jawnexsen techlal e bint wuꞌna jaaꞌxja in poniya te kbalte tyol Dios, tuꞌntzen tyeecꞌj jnbint wuꞌna jtaakꞌen Dios. Juꞌylatzen tten tbajlen bint jbaꞌn tpocbal Cristo tuj cykil lugar wuꞌna. Tneel wakꞌa kbalte tuj Jerusalén, bix in pon baja kbalte hasta maa tuj Iliria.

20Bix tej t-xiꞌ nkbaꞌna tyol Dios, ocxsen wipena tuꞌn miꞌn txiꞌ nkꞌumena tpocbal colbil ke tuꞌn Cristo jaaꞌj otk chi pona juntl t-akꞌanal Dios te kbalte, cuma ncyꞌiya tuꞌn wakꞌanana jaaꞌ otk tzyeta taakꞌen Dios cyuꞌn juntl.

21Oꞌcx e wajbeꞌya tuꞌn tel jaxxix ja yol lu tuj tyol Dios. Tzin tkbaꞌn cyjulu: “Kej xjal bajx pona tpocbal Clol cye cyxol, cpomeltzen tuꞌn cybinte. Kej lugar bajx cybiꞌ xjal tiꞌj ti tten tuꞌn cyclet, qꞌueleltzen cyniyꞌ tiꞌj,” tz̈i tyol Dios.

Ncub tbisen Pablo tiꞌj tuꞌn t-xiꞌ tuj Roma

22Tiꞌj tzunj waakꞌena lu mix e bina tuꞌn npona cyxola maa tuj Roma, amale nimet maj e wajbeꞌya tuꞌn npona cyxola.

23Pero jaꞌlewe, mintiiꞌtl tnom tzalu tuꞌn tocx waakꞌena tuj. At-xxe kꞌij tzin wajbeꞌna tuꞌn npona maa cyxola.

24Juꞌ tzunj, npjaꞌ nnincꞌuꞌna tuꞌn nweꞌya cyxola oj nxiꞌya España. Chin temel tzuna cab kꞌij cyuyey. Bix nim chin tzalajela oj toc ncyeꞌna ejeeꞌy. Bix ojtzen wiyꞌ aja cyuyey, nuket jacꞌa chi onena wiꞌja tuj nbeꞌya.

25Pero tneelxix il tiꞌj tuꞌn nxiꞌya tuj Jerusalén, tuꞌn t-xiꞌ wiiꞌna jun onbil te cye ke ocslal judío o chmet te cye.

26Ke ocslal cyuj departamento te Macedonia bix Acaya e cyajbe tuꞌn t-xiꞌ cysmaꞌn jun onbil te cyej ocslal mebe tuj Jerusalén.

27Amale yaaꞌnt judíoke, pero nchi tzalaj tuꞌn t-xiꞌ cysmaꞌn jun onbil te cyej ocslal judío, cuma tisen jun cycꞌasben tuj cywitz tuꞌn cykꞌonte. At cycꞌasben, cuma kej ocslal judío, ejeeꞌ e xiꞌ kꞌonte tyol Dios te cyej lu, tuꞌntzen cyclet. Juꞌ tzunj tumelte tzin tyeecꞌan cyanem kej ocslal yaaꞌn judío te cyej ocslal judío tuꞌnj t-xiꞌ cysmaꞌn j-onbil cye.

28Juꞌtzen tten wuꞌna. Oj wiꞌya kꞌol tej pwak te cyej ocslal tuj Jerusalén, chin xeꞌl tzuna España bixsen chin iꞌyela cyeyꞌlte cyey tuj nbeꞌya.

29Bix ntzkiꞌna oj npona cyxola, junx ko tzalajel tuꞌnj t-xtalbil Cristo kibaj.

30Key hermano, cxeꞌl ncubsaꞌna nwitza cyey tuꞌn cynaꞌna Dios wiꞌja. Chi oney wiꞌja tiꞌj ja lu, cuma ocslal koꞌ tiꞌ Kaaw Jesucristo, bix cuma kꞌoꞌn cyey tuꞌn Espíritu Santo tuꞌn toc wakꞌa cyey.

31Cykanenxa onbil te Dios wiꞌja tuꞌn ncleta cywitzj xjal tuj departamento te Judea min tzꞌoc cybiꞌn tyol Dios, bix oj t-xiꞌ nkꞌoꞌna j-onbil cyej ocslal tuj Jerusalén, cykanenx te Dios tuꞌn tel baꞌn tuj cywitz, amale kꞌoꞌnt cyuꞌnj ocslal yaaꞌn judío.

32Bix cykanenx te Dios tuꞌn npona cyxola, bix tuꞌn at nim ktzalajebl oj npona, tuꞌntzen knimsante kcꞌuꞌj.

33Tenxit Dios tuya cykilcakey. Nuk ja texin nkꞌonte tuꞌn kten tuj ttz̈yal. Juꞌxit tzuna.