SAN MATEO 25 - Mam of Todos Santos -- Guatemala Unicode

Ti tten tuꞌn binne cyten xjal oj tul tcawbil Dios

1Bix e xiꞌ tkbaꞌntl Jesús cye t-xnakꞌatz:

—Yaaꞌn cykilca xjal binne cyten oj tul tcawbil Dios. Oj wul meltzꞌaja tuj cyaꞌj, jpjel tisenj e baj tuj jun mejoblenel. Mitknaꞌx tul chmilbaj tuj mejoblenel. At laajtxin xuuj. E xiꞌ cyiiꞌntxin cycantiltxin bix exketxin te clulte texin tuj be, tisenx tten.

2Cyxoltzen laaj txin xuuj, jweꞌtxin at cynaabltxin tiꞌj, pero jweꞌtltxin mintiiꞌ cynaabltxin tiꞌj,

3cuma min e xiꞌ cyiiꞌntxin aseyt tuꞌn tajben tuj cycantiltxin.

4Jatzen kej txin at cynaabl, e xiꞌ cyiiꞌntxin chꞌintl aseyt tuj tcublel tuyax cycantiltxin.

5Pero e yajt te chmilbaj tuꞌn tul, bix ul cywatltxin, bix iyꞌ wutanketxin.

6Pero te chil akꞌbil, e jaw s̈iꞌn jun xjal: “¡Jeyꞌ, lu chmilbaj tzula! ¡Qui cyetza te clulte texin!” tz̈i xjal.

7Bix e jaw weꞌ ke laaj txin, bix oc cytxkoꞌntxin cycantiltxin.

8Bix e xiꞌ cykbaꞌn kej jweꞌ txin mintiiꞌ cynaabltxin tiꞌj cyej jweꞌtltxin: “Cykꞌontz chꞌin kaseyta, cuma chꞌix cycub yubtzꞌaj kcantila,” tz̈iketxin.

9Pero aj cytzakꞌbeꞌn jtxin at cynaabltxin: “Min. Mas baꞌn tuꞌn cyxiꞌy cyuya ke qꞌueyel te lokꞌol cyaseyta, tuꞌntzen miꞌn baj naj keya,” tz̈iketxin.

10Bix exketxin lokꞌol. Pero joocꞌtzen ncheꞌxtxin lokꞌol aseyt, ul chmilbaj. Jatzen kej txin binne cyten e bet tuya chmilbaj, bix ocxketxin tuyaxin tuj mejoblenel. Biꞌx lmet ttzi jaaꞌ.

11Te yajxetzen, ul kej jweꞌtltxin, bix e xiꞌ cykbaꞌntxin: “¡Taat, taat! ¡Jkom jaaꞌ kwitza!” tz̈iketxin.

12Pero aj ttzakꞌbeꞌn chmilbaj: “Jaxxix cxeꞌl nkbaꞌna cyey, min ntzkiꞌna cywitza,” tz̈ixin.

13Juꞌ tzunj, cycꞌojlam cyiiba tuꞌn binne cytena oj wula, cuma mintiiꞌ tumel cyuyey jtoj chin ula bix niyꞌ hora―tz̈i Jesús.

Jun techel tiꞌj pwak xiꞌ tkꞌoꞌn xjal cye t-akꞌanal

14Bix e xiꞌ tkbaꞌntl Jesús:

—Jpjel tuj tcawbil Dios tzul tuj cyaꞌj tisenj e baj tej tex junxin xjal tuj jun tnom nakch. Nejl, e tzaj ttxcoꞌnxin ke t-akꞌanalxin, tuꞌntzen t-xiꞌ tkꞌoꞌnxin pwak cyexin, tuꞌn cyakꞌananxin tiꞌj.

15Te jun t-akꞌanalxin e xiꞌ tkꞌoꞌnxin jweꞌ talento. Te juntl t-akꞌanalxin e xiꞌ tkꞌoꞌnxin caꞌba talento, bix te juntl, jun talento. Te teeylex juun e xiꞌ tkꞌoꞌnxin pwak, laꞌ tiꞌ baꞌn tbint cyuꞌn tiꞌj. Bix e tzyet be tuꞌnxin.

16Jt-akꞌanalxin e tiikꞌ jweꞌ talento, texj kꞌij akꞌ lokꞌol bix qꞌueyel tuya tpwak, bix e caman jweꞌtl talento.

17Jax juꞌx jt-akꞌanalxin e tiikꞌ caꞌba talento, texj kꞌij akꞌ tuꞌn takꞌanan tiꞌ tpwak, bix e caman caꞌbatl talento.

18Pero jt-akꞌanalxin e tiikꞌ jun talento, e xiꞌtzen bix e cuꞌx tlucuꞌnxin txꞌotxꞌ, bix e cuꞌx tewenxin jpwak tpatrón tuj txꞌotxꞌ.

19Tbajlenxitltzen nim kꞌij, ul meltzꞌaj cypatrón akꞌanal, bix e xiꞌ tkanenxin jteꞌ pwak otk tcaman jaca juun t-akꞌanalxin.

20Bix e pon jt-akꞌanalxin otk tiikꞌ jweꞌ talento twitzxin, nxiꞌ tiiꞌn jweꞌtl talento otk tcaman. Bix e xiꞌ tkbaꞌn: “Taat, jweꞌ talento e tzaj tkꞌoꞌna weya. Lu jweꞌtl talento ma ncamana,” tz̈i.

21E xiꞌ tkbaꞌn tpatrón te: “Baꞌn ma bint tuꞌna, jay akꞌanal baꞌn. Baꞌn toc ke ncꞌuꞌja tiꞌja. Ma tzꞌakꞌanana baꞌn tiꞌj chꞌin e xiꞌ nkꞌoꞌna tey. Juꞌ tzunj, cxeꞌl nkꞌoꞌna nim tey tuꞌn tcawena tibaj. Tzalaja wuyena,” tz̈ixin.

22Jax juꞌx jt-akꞌanalxin otk tiikꞌ caꞌba talento e pon twitz tpatrón, bix e xiꞌ tkbaꞌn texin: “Taat, caꞌba talento e tzaj tkꞌoꞌna weya. Cyeꞌyenc. Lu caꞌbatl talento ma ncamana,” tz̈i.

23E xiꞌ tkbaꞌn tpatrón te: “Baꞌn ma bint tuꞌna, jay akꞌanal baꞌn. Baꞌn toc ke ncꞌuꞌja tiꞌja. Ma tzꞌakꞌanana baꞌn tiꞌj chꞌin e xiꞌ nkꞌoꞌna tey. Juꞌ tzunj, cxeꞌl nkꞌoꞌna nim tey tuꞌn tcawena tibaj. Tzalaja wuyena,” tz̈ixin.

24Jax juꞌx jt-akꞌanalxin otk tiikꞌ jun talento, e pon twitz tpatrón, bix e xiꞌ tkbaꞌn texin: “Taat, ntzkiꞌna jay jun xjal cyiw tnaabla. Nuk taja tuꞌn ttz̈ꞌiy tpwaka. Ntz̈ꞌiy tpwaka nuk tuꞌn cyakꞌmal juntl xjal, bix njtxꞌona nuk tuj tawal juntl.

25At ttz̈i wiꞌja. Juꞌ tzunj, in xiꞌya ewlte tpwaka tuj txꞌotxꞌ. Cyeꞌnca. Lu tpwaka lu,” tz̈i akꞌanal.

26Aj ttzakꞌbeꞌn tpatrón te: “Jay akꞌanal yaaꞌn baꞌn bix cyꞌaj, ka tuj twitza inayena jun xjal il tiꞌj tuꞌn ttz̈ꞌiy npwaka, bix tuꞌn ncamana tuꞌn cyakꞌmal juntl wik xjal,

27¿tikentzen min e xiꞌ tkꞌoꞌna npwaka tuj banco, tuꞌntzen ttz̈ꞌiy tuj tkꞌab juntl xjal? Nuket e bint tuꞌna juꞌwa, otetle tz̈ꞌiy tuya tal tej ẍin ul meltzꞌaja,” tz̈i patrón.

28Bix e xiꞌ tkbaꞌnxin cyej xjal eteꞌcꞌa twitzxin: “Cyimel jpwak tej xjal lu, bix cykꞌonx tej xjal e caman jweꞌ talento tibaj.

29Jxjal e caman tiꞌj e kꞌoj te, mastl ckꞌojel te, pero ja tzunj xjal mintiiꞌ e tcaman, tiꞌj e kꞌoj te, qꞌuelel kꞌiꞌntl te.

30Bix ja akꞌanal lu min tzꞌajben, qꞌuelex xooꞌn tuj klolj te junx maj, jatztzen chi jawela ookꞌ xjal, bix jatztzen chi jawela kitxꞌitxꞌin t-xeeꞌ twitz cye,” tz̈i patrón―tz̈i Jesús cye t-xnakꞌatz.

Cykilca xjal chi oquel chmet tuj xkel twitz Jesús oj tul meltzꞌaj twitz txꞌotxꞌ

31Bix e xiꞌ tkbaꞌntl Jesús cye t-xnakꞌatz:

—Ojtzen wul meltzꞌaja, inayena, jxjal Smaꞌn tuꞌn Dios tuꞌn ntena cyuya xjal, chin ula te cawel, bix cyuyax cykilca nsanjela tuj cyaꞌj, bix chin cwel keya tuj nkꞌukbila jawnex tuꞌn ncawena tibaj cykilca.

32Bix chi oquel chmet nwitza cykilca xjal te cykilca tnom twitz txꞌotxꞌ. Bix qꞌuelex npaꞌna juun cyxol ke niyꞌtl, tisen jun cylel nchi el tpaꞌn ke carnel cyxol ke chiva.

33Cwel nkꞌoꞌna ke carnel tuj nmankꞌaba, bix ke chiva cwel nkꞌoꞌna tuj nneẍa.

34Bix cxeꞌl nkbaꞌna, inayena Cawel, cyej xjal eteꞌ tuj nmankꞌaba: “Cytzaja, ejeeꞌy ma cyiikꞌa t-xtalbil Nmana, bix cyocxa tuj cawbil o bint te cyey jatxe tej tbint twitz txꞌotxꞌ.

35Ntzaj ntxcoꞌna tuꞌn cyocxa, cuma tej ttzaj takꞌ weyaj wiꞌja, e tzaj cykꞌoꞌna nwaya, bix tej ttzaj takꞌ aꞌ wiꞌja, e tzaj cykꞌoꞌna aꞌ weya. Jun wikxitl xjal kena, pero e tzaj cykꞌoꞌna nposadiya.

36Tej mintiiꞌ nxbalena, e tzaj cykꞌoꞌna nxbalena. Tej nyebta, ulkey cyeyꞌl weya. Tej tocx cyxooꞌn xjal inayena tuj tzeeꞌ, ulkey wuyena,” tz̈i nbela.

37Bix ctzaal cykbaꞌn kej xjal jiquen weya: “Taat, ¿jtoo kila at takꞌ weyaj tiꞌja bix e xiꞌ kkꞌoꞌna tway? ¿Bix jtoo kila at takꞌ aꞌ tiꞌja bix e xiꞌ kkꞌoꞌna tcꞌay?

38¿Bix jtootzen tzul aaja tisen jun wikxitl xjala bix e xiꞌ kkꞌoꞌna tposadiya? ¿Bix jtootzen kila mintiiꞌ t-xbalena bix e xiꞌ kkꞌoꞌna t-xbalena?

39¿Bix jtootzen kila ka yaaba bix ka tuj tzeeꞌ bix ul koꞌya cyeyꞌlte tey?” tz̈i cybel.

40Bix cxeꞌl ntzakꞌbeꞌna, inayena Cawel, cye: “Jaxxix cxeꞌl nkbaꞌna cyey, tej cybinchantiya cykilcaj lu cyej ocslal yaaꞌn jawnex, tisencꞌa weya e cybinchay jlu,” tz̈i nbela.

41Jax juꞌx cxeꞌl nkbaꞌna cyej xjal tuj nneẍa: “Cypaꞌmel cyiiba wiꞌja, key xjal cwel castiwa cyibaja. Chi xeꞌla tuj kꞌakꞌ te junx maj o bint te taaw il bix cye tbiman.

42Il tiꞌj tuꞌn cyxiꞌy tuj kꞌakꞌ, cuma tej ttzaj takꞌ weyaj wiꞌja, min e tzaj cykꞌoꞌna nwaya, bix tej ttzaj takꞌ aꞌ wiꞌja, min e tzaj cykꞌoꞌna aꞌ weya.

43Jun wikxitl xjal kena, pero min e tzaj cykꞌoꞌna nposadiya. Tej mintiiꞌ nxbalena, min e tzaj cykꞌoꞌna nxbalena. Tej nyebta, min ulkey cyeyꞌlte weya. Tej tocx cyxooꞌn xjal inayena tuj tzeeꞌ, min ulkey wuyena,” tz̈i nbela.

44Bix ctzaal cykbaꞌn kej xjal lu weya: “Taat, ¿jtootzen kila at takꞌ weyaj tiꞌja, bix jtootzen kila at takꞌ aꞌ tiꞌja, bix jtootzen tzula tisen jun wikxitl xjal, bix jtootzen kila mintiiꞌ t-xbalena, bix jtootzen kbiꞌya ka yaaba bix ka tuj tzeeꞌ, bix min e xiꞌ kkꞌoꞌna onbil tey?” tz̈i cybel.

45Bix cxeꞌl ntzakꞌbeꞌna cye: “Jaxxix cxeꞌl nkbaꞌna cyey, tej min e cybinchay cykilcaj lu cyej ocslal yaaꞌn jawnex, tisencꞌa min e cybinchay jlu te weya,” tz̈i nbela.

46Bix kej xjal aj il lu chi xeꞌl tuj kꞌakꞌ te junx maj. Jatzen kej xjal jiquen, ckꞌojel cye cychunkꞌlal te junx maj―tz̈i Jesús cye t-xnakꞌatz.