TITO 1 - Mam of Todos Santos -- Guatemala Unicode

Jun kꞌolbebl tuꞌn Pablo te Tito

1Inayena, Pablo, nxiꞌ ntzꞌiꞌbena ja uꞌj lu te tey, Tito. Jun t-akꞌanal Dios kena, bix tuj taakꞌenxin, nchin ajbena te jun t-xel Jesucristo. Jweya waakꞌen, jaj tuꞌn cyocslan xjal tiꞌ Cristo bix tuꞌn tel kniyꞌ tiꞌj kocslabl, ejooꞌ t-xjal Dios, bix ti tten tuꞌn t-xiꞌ kiiꞌn knaabl tisen taj Dios.

2Ejooꞌ xjal ma txiꞌ kiiꞌn ja kocslabl lu, baꞌntzen tuꞌn kayon tiꞌj jun kchunkꞌlal mintiiꞌ tbajlel, cuma cpomel baj Dios tyol tiꞌ. Mixbe ẍtakꞌenxin. Tej mitknaꞌx tbint twitz txꞌotxꞌ, e tkba Dios tuꞌn t-xiꞌ tkꞌoꞌnxin cychunkꞌlal cye t-xjalxin te junx maj.

3Bix tej tpon tumel, e tzaj tyeecꞌanxin j-e baj tnincꞌuꞌnxin tuj tneel. Bix cyxol ke tyolelxin nejl te ja tyolxin lu, ma takꞌxin weya tuꞌn t-xiꞌ npocbaꞌna. Ja te Dios, Clol ke, ma tkba weya tuꞌn t-xiꞌ nkꞌumena.

4Tey, Tito, tisen ncwaltey, bix jun ncwala jaxxix, cuma junx kocslabl bix baꞌntzen txiꞌ lpey tiꞌj j-e xiꞌ nxnakꞌtzaꞌna tey. Tzajxit cyxtalbil Kman Dios tuyax Kaaw Jesucristo tibaja, bix tzajxit kꞌaꞌben cycꞌuꞌjxin tiꞌja, bix tzajxit cykꞌoꞌnxin tuꞌn ttena tuj ttz̈yal.

Jun taakꞌen Tito tuj txꞌotxꞌ te Creta

5E cyaj nkꞌoꞌna jay tuj txꞌotxꞌ te Creta, cuma e wajbeꞌya tuꞌn tonena cyiꞌj ocslal tuꞌn t-xiꞌ cyiiꞌn cychunkꞌlal tuj tumel, cuma at-x chꞌintl tuꞌn tbint cyuꞌna, bix tuꞌn tetz tscyꞌoꞌna juun cawel tuj jaca juun tnom tuꞌn tcyaj cynincꞌuꞌn cyxol ocslal, tisen e nkbaya tey nejl.

6Alcyekej xjal ma tzꞌetz tscyꞌoꞌna tuꞌn cyoc te cawel cyuj tja Dios, il tiꞌj tuꞌn t-xiꞌ cyiiꞌn cychunkꞌlal tujxix tumel, tuꞌntzen min-al kaꞌ tyol cyiꞌjxin. Chi cwelxix tenxin tuj tbanel tuya cyxuꞌlxin. Bix chi xeꞌl lpe cycwalxin tiꞌ Dios, yaaꞌn tiꞌj nuk tikꞌch taj cyxumlalkꞌa. Bix miꞌn chi kꞌojkꞌa tiꞌ cymankꞌa, tuꞌntzen miꞌn yolj cyuꞌn xjal cyiꞌjkꞌa.

7Kej cawel cyxol ocslal, cuma chi oquelxin te t-akꞌanal Dios, juꞌ tzunj il tiꞌj cxeꞌl cyiiꞌnxin cychunkꞌlalxin jiquenxix, tuꞌntzen mintiiꞌ kaꞌ yol cyuꞌn xjal cyiꞌjxin. Yaaꞌnt lo kej xin iyꞌnen tibaj cynaabl. Miꞌn jaw cykꞌojxin tuj ajkelbil. Mitetpe tuꞌn cyocxin bola. Miꞌn tzꞌoc cypjuꞌnxin ke xjal. Yaaꞌnt lo kej xin nuk cyaj tuꞌn cycaman pwak.

8Scyꞌonwe kej ocslal nchi kꞌon posada bix waabj oj cypon xjal cyja, bix tuya cykil cycꞌuꞌjxin cbinel jbaꞌn cyuꞌnxin. Cwelxix cytzyun cyiibxin twitzj kaꞌ. Chi temelxin jiquenxix twitz Dios bix cywitz xjal. Cxeꞌl cyiiꞌnxin cynaablxin tisen taj Dios. Miꞌn cyjoyxin tuꞌn cybinchanxin tkaꞌyel.

9Il tiꞌj tuꞌn cytenxin cyiw tuj jjaxxix xnakꞌtzbil e kꞌoj cyexin, tuꞌntzen t-xiꞌ cyxnakꞌtzaꞌnxin alcyej jaxxix cye niyꞌtl ocslal, bix tuꞌn tcub cyiꞌj kej tzpetsal cyuꞌnxin oj nchi kꞌojl cyiꞌjxin.

10Hermano, ilxsen tiꞌj tuꞌn tcub tkꞌoꞌna cyxol ocslal ejeeꞌj at cynaabl, cuma at nim xjal cyxola cycyꞌi chi ocx tjakꞌ cawbil cyuj tja Dios. At xjal mintiiꞌ tajbel cyxnakꞌtzbil bix sbul xjalke. Cyxol kej nchi sbun juꞌwa, mas ncnet kej xjal judío cyxol.

11Il tiꞌj tuꞌn tmaket cytzi kej tzpetsal lu, cuma tuꞌnj cyxnakꞌtzbilxin yaaꞌn tumel, nxiꞌ cyocslabl xjal tuj il cyuꞌnxin. At maj entera ocslal tuj jun jaaꞌ nchi tzpet tuj cyocslabl cyuꞌnxin. Bix nchi kꞌonxin cyxnakꞌtzbilxin takꞌ nuk tuꞌn cycamanxin pwak cyiꞌj ocslal. Jun chꞌixbajil jlu.

12Hermano, at nim il tiꞌj tuꞌn cycawen ke cawel cyiw tuj cyocslabl cyibaj ocslal tuj Creta. At jun maj e xiꞌ tkbaꞌn jun nintzaj aj Creta at tnaabl cyjulu: “Ejooꞌ aj Creta jun wik xjal nuk nko ẍtakꞌen. Tisen xoꞌj koꞌ. Cyꞌaj xjal koꞌ, bix nko kꞌon kiib nuk tuꞌn tnoj kcꞌuꞌj,” tz̈ixin, bix tex Cretaxin.

13Jax tuꞌnxin. Juꞌ tzunj, cꞌoquel ilen chꞌina cyiꞌ ocslal, tuꞌntzen cytenxin cyiw tuj cyocslablxin tiꞌj Cristo.

14Xnakꞌtzanxa baꞌn, tuꞌn miꞌntl txiꞌ cybiꞌnxin cyxnakꞌtzbil judío yaaꞌn jaxxix, bix tuꞌn miꞌntl cynimanxin cyley kej xjal n-el cypaꞌn cyiib tiꞌj jaxxix yol.

15Cyxol xjal at jun yol tzin tkbaꞌn cyjulu: “Kej xjal sakxix tuj cyanem, sak taꞌ cykilca tuj cywitzxin,” tz̈i yol. Pero kej xjal yaaꞌn sak tuj cyanem, ejeeꞌj min chi ocslan tiꞌ Cristo tuꞌn cyclet, cykilca n-oc cykꞌoꞌn te yaaꞌn baꞌnj tuꞌn tbint bix tuꞌn t-xiꞌ cywaaꞌn. Mlay tzꞌel cyniyꞌ tiꞌj alcyej baꞌn, cuma tzꞌilx cynaablxin bix cyanemxin.

16Tzin cykbaꞌnxin ka cytzkiꞌnxin Dios, pero tuꞌnj kaꞌ nbint cyuꞌnxin, tzinen taꞌ nuk ten cyuꞌnxin. Kaꞌkexin twitz Dios. Min chi nimanxin Dios. Mlay chi ajbenxin te Dios tuꞌn tbint jun akꞌuntl baꞌn cyuꞌnxin.