SAN MATEO 27 - Mam of Todos Santos -- Guatemala Unicode

Tej tpon kꞌiꞌn Jesús twitz Pilato(Mr. 15:1; Lc. 23:1-2; Jn. 18:28-32)

1Tejtzen tcub spiꞌyen te klax, oc cychmon cyiib cykilca nejenel cye pala cyuyax nintzaj xjal, te nincꞌul ti tten tuꞌn tcyim Jesús cyuꞌn.

2Bix e cub cyẍpoꞌn, bix e xiꞌ cyiiꞌn twitzj xin gobernador, Pilato tbi.

Tej tcyim Judas

3Yaltzen te Judas, jxjal e xiꞌ qꞌueyente ja Jesús tuj cykꞌab byol xjal, tej tlonte otk cub cynincꞌuꞌn nintzaj xjal tuꞌn tcub cybyoꞌn ja Jesús, e tzaj tbisxin. Bix aj tkꞌoꞌnxin jwinak laaj pwak te plata cye nintzaj pala bix cye nintzaj xjal.

4E xiꞌ tkbaꞌnxin cyexin:

—Ma chin binchana jun jawnex il, cuma ma txiꞌ nkꞌoꞌna tuj cykꞌaba jun xjal mintiiꞌ til―tz̈i Judas.

Pero aj cytzakꞌbeꞌnxin texin:

—Mintiiꞌke kaj tiꞌj. Tiꞌj tey toca―tz̈ikexin.

5Juꞌ tzunj e cub t-xooꞌn Judas pwak te plata tuj tja Dios, bix etzxin, bix e jawtyoꞌben tiibxin tiꞌ tkꞌab jun tzeeꞌ, bix e tzaj t-xooꞌn tiibxin twitz txꞌotxꞌ tuꞌn tcyimxin.

6Jatzen cye nejenel cye pala, e jaw cyiiꞌnxin pwak te plata, bix e xiꞌ cykbaꞌnxin:

—Yaaꞌn kꞌoꞌn tuꞌn ley tuꞌn tcuꞌx kkꞌoꞌn tuj tcublel oybil tuꞌn tajben tuj tja Dios, cuma ja pwak lu ma tzꞌajben te chojbil twiꞌ tcyimlen jun xjal―tz̈ikexin.

7Bix akꞌkexin yolel cyxolxxin tiꞌ pwak, bix el cylokꞌoꞌnxin jun txꞌotxꞌ tiꞌ pwak Xcab Txꞌotxꞌ tbi, tuꞌntzen tajben tuꞌn cycuꞌx maket kej xjal yaaꞌn aj Jerusalén tuj.

8Juꞌ tzunj, hasta jaꞌlewe o tzꞌoc cykꞌoꞌn xjal tbi ja txꞌotxꞌ lu te Jcamposant Tlokꞌaj Tuꞌn Pwak Twiꞌ Tz̈iyꞌ.

9Tej tel cylokꞌoꞌnxin ja txꞌotxꞌ lu, el jaxxix j-e tkba jtyolel Dios Jeremías jatxe ootxa. Tz̈i cyjulu: “Cxeꞌltzen cyiiꞌn winaklaaj pwak te plata, jatzen twiꞌ jun ajnintz xjal tuj cywitz aj Israel,

10bix cxeꞌl cykꞌoꞌn ja pwak lu tuꞌn cylokꞌonte jtxꞌotxꞌ Xcab Txꞌotxꞌ tbi. Juꞌtzen e tzaj tkbaꞌn Dios weya,” tz̈i Jeremías.

Tej toc Jesús tuj xkel tuꞌn Pilato(Mr. 15:2-5; Lc. 23:3-5; Jn. 18:33-38)

11Yaltzen te Jesús, tej waꞌlecxxin twitz gobernador, e xiꞌ tkanen gobernador texin:

—¿Japa tey rey cye xjal judío?

Bix aj ttzakꞌbeꞌnxin:

—Jay ma scyꞌonte ja yol rey cye judío, yaaꞌn inayena―tz̈ixin.

12Bixsen nimxsen oc cyumlaꞌn nejenel cye pala cyuyax nintzaj xjal jaxin twitz Pilato, pero mintiiꞌ akꞌxin.

13Bix e xiꞌ tkanen Pilato texin:

—¿Mimpa tzin tbiꞌna tikꞌch cyyol xjal tiꞌja?

14Pero mi nuketpe jun yol aj ttzakꞌbeꞌn Jesús, biꞌxsen e jaw kleeꞌ gobernador.

Tej tbint tiꞌj tuꞌn tbyet Jesús(Mr. 15:6-20; Lc. 23:13-25; Jn. 18:38—19:16)

15Attzen jun costumbre. Jaca jnabkꞌi tuj tzunj ninkꞌija te Pascua, tzꞌetz ttzakpiꞌn gobernador jun xjal aj Israel tuj tzeeꞌ, laꞌ alj cyaj xjal aj Israel tuꞌn tetz.

16Te tzunja jnabkꞌi lu, tocxse tuj tzeeꞌ junxin kaꞌxsen xjal, Barrabás tbi.

17Juꞌ tzunj, tej tbaj cychmon cyiib nim xjal, e xiꞌ tkanen Pilato cye:

—¿Alcyej xjal cyaja tuꞌn tex ntzakpiꞌna cyey? ¿Cyajpey tuꞌn tex ntzakpiꞌna jxin Barrabás, bix ka ja Jesús, jxjal Scyꞌoꞌn tuꞌn Dios tbi?―tz̈i gobernador.

18Juꞌtzen toc tuꞌnxin cye xjal cuma at tumel tuyaxin ka nuk tuꞌn tchiꞌlel cycꞌuꞌj ke nintzaj xjal otk pon cyiiꞌnxin ja Jesús twitzxin.

19Cubtzen ke Pilato tuj kꞌukbil tuꞌn tcawen, e tzaj smaꞌn jun xjal tuꞌn t-xuꞌlxin kbal texin: “Miꞌn tzꞌoc tkꞌon tiiba tiꞌj ja xjal lu jiquenxix, cuma sulxin tuj nwitziꞌya te koniyan, bix nim siyꞌ tuj ncꞌuꞌja tuꞌn tlajxin,” tz̈i t-xuꞌlxin.

20Pero kej nejenel cye pala bix kej nintzaj xjal, e cub cyiꞌj xjal cyuꞌn tuꞌn t-xiꞌ cykanen tuꞌn tetz Barrabás tuj tzeeꞌ, bix tuꞌn t-xiꞌ cykbaꞌn tuꞌn tbyet Jesús.

21Pero e xiꞌ tkanen gobernador juntl maj cye xjal:

—¿Alcyej xjal cyaja tuꞌn tetz ntzakpiꞌna cyey?

Bix aj cytzakꞌbeꞌn xjal:

—Ja te Barrabás tuꞌn tetz ttzakpiꞌna―tz̈ikexin.

22E xiꞌ tkbaꞌn Pilato cyexin:

—Jeyꞌ, ¿tine cyaja tzꞌoc nbinchaꞌna tiꞌj Jesús, ja xjal Scyꞌoꞌn Tuꞌn Dios tbi?―tz̈ixin.

E cykba cykilca xjal:

—¡Kꞌonwexin twitz cruz tuꞌn tcyimxin!―tz̈ikexin.

23Bix e xiꞌ tkbaꞌn Pilato:

—¿Tiken? ¿Tine jilel kaꞌ ma cub tbinchexin?―tz̈ixin.

Pero bix aj cytzakꞌbeꞌn xjal juntl maj mas cyiw:

—¡E tjaw twitz cruz!―tz̈ikexin.

24Tejtzen tlonte Pilato mintiiꞌ tuꞌn tcub cyiꞌj xjal tuꞌnxin, bix nuk e jaw cys̈itz̈ꞌbil xjal, e jatz tiiꞌnxin chꞌin aꞌ, bix el ttxjoꞌnxin tkꞌabxin cywitz xjal te techel mintiiꞌ tilxin tiꞌj, bix e xiꞌ tkbaꞌnxin cyexin:

—Mintiiꞌ wila ka ma cyim jaj xjal jiquen lu. Te cyeya cyila ka ma cyim―tz̈ixin.

25Bix aj cytzakꞌbeꞌn cykilca xjal:

—¡Ejooꞌya at kila ka ma cyim, bix jax juꞌx at cyil kcwala!―tz̈i ke xjal.

26Bix etz ttzakpiꞌn Pilato ja Barrabás cye xjal. Pero e xiꞌ tchkꞌoꞌnxin ke tsoldadoxin te kꞌolx tzꞌuꞌn tocsen chꞌut twiꞌ tiꞌj Jesús, bix tuꞌn tjaw cykꞌoꞌnxin twitz cruz.

27Bix e xiꞌ cyiiꞌn tsoldado gobernador tuj cuartel, bix e xiꞌ cychkꞌoꞌnxin cykilca soldado tuꞌn toc cychmon cyiib tiꞌ Jesús.

28Bix el cyiiꞌnxin t-xbalen Jesús, bix oc cykꞌoꞌnxin jun t-xbalen cyak tisen t-xbalen jun rey, te tzeblte Jesús.

29Bix e cub cybinchaꞌnxin jun tcorona nuk chꞌiꞌxcꞌa, bix e cub cylomoꞌnxin tuj twiꞌxin. Bix oc cykꞌoꞌnxin jun ptzꞌunt tuj tmankꞌabxin te techel bara nuk te cytzeblxin, bix e cubxe majekexin twitzxin nuk te cyxmucchablxin. Bix e xiꞌ cykbaꞌnxin:

—¡Axse Cycawel xjal judío!―tz̈ikexin.

30Bix ocx cytzubanxin tuj twitzxin, bix etz cyiiꞌnxin ptzꞌunt tuj tkꞌabxin tuꞌn tcuꞌx cyjubenxin tuj twiꞌxin.

31Tbajlen cyxmucchaꞌnxitl tzunxin Jesús, bix el cyiiꞌnxin jt-xbalenxin otk tzꞌoc cykꞌoꞌnxin, bixsen oc cykꞌoꞌnxin jtexin t-xbalen tocx. Bix e xiꞌ cyiiꞌnxin jaxin tuꞌn tjawxin twitz cruz ttxaꞌnxe tnom Jerusalén.

Tej tjaw kꞌoꞌn Jesús twitz cruz bix e cyim(Mr. 15:21-41; Lc. 23:26-49; Jn. 19:17-30)

32Tejtzen cyetzxin tuj tnom, oc noj junxin xjal Simón tbi, aj Cirene, cywitzxin. Bix e cub cymakoꞌnxin, bix e jaw cykꞌoꞌnxin cruz tiꞌ tkul jxin xjala.

33Tejtzen cyponxin tuj jun lugar Gólgota tbi, jatzen elpeninaj Tbakel Wiꞌybaj,

34e xiꞌ cykꞌoꞌnxin tcꞌaꞌxin vino smoꞌn tuya jun wik remeda cꞌaxsen. Pero tej tniyꞌbentexin, tcyꞌixin tuꞌn t-xiꞌ tcꞌaꞌnxin.

35Bixse e jaw pjet Jesús tuya clavos twitz cruz cyuꞌn soldado. Bix e cub cypaꞌn soldado t-xbalen Jesús cyxolxxin. E cub cykꞌoꞌnxin suerte tiꞌj tuꞌn al ccamal tiꞌj.

36Bix e cub kekexin te cꞌojlalecte.

37Bix e jaw cykꞌoꞌnxin cab letra tibaj twiꞌxin tzin tkbaꞌn tilxin. Tz̈i cyjulu: “Ja xjal lu Jesús, cawel cye xjal judío,” tz̈i letra.

38Te xsunj kꞌij tjaw caꞌbaxin alakꞌ junx tuya Jesús. Jun cyexin e jaw twitz jun cruz tuj tmankꞌab Jesús, bix juntlxin e jaw twitz cruz tuj tneẍ Jesús.

39Yal tzunkej xjal excꞌa ttxlaj cruz jaaꞌ tjawa Jesús, n-ocxetzen cytzeꞌn xjal jaxin, bix nxiꞌxe cyyucan xjal cywiꞌ,

40bix njawxetzen yolen:

—Jatzen teja tcublel xitente nin tja Dios bix tuꞌn tjaw tbinchaꞌna tuj oxe kꞌij, coꞌpacatz tiiba. Katzen Tcwal Diosa, tcuꞌtztzen twitz cruz―tz̈ikexin.

41Juꞌtzen tten cyoc ten nejenel cye cawel bix ke txꞌolbal ley bix ke nintzaj xjal xmucchalec te Jesús. E xiꞌ cykbaꞌnxin:

42—E tcoꞌpaxin nim xjal, pero yaltzen texin, mlay bint tcoꞌpa tiibxin. Ka Cycawel aj Israelxin, e tcuꞌtz tzunxin twitz cruz jaꞌlewe, tuꞌntzen kocslan tiꞌjxin.

43Oc ke tcꞌuꞌjxin tiꞌ Dios. Bix e tkbaxin ka Tcwal Diosxin. Juꞌ tzunj, il tiꞌj ccletelxin tuꞌn Dios jaꞌlewe. Pero laꞌ ka taj Dios―tz̈i ke nintzaj xjal.

44Hasta jaan kej xin alakꞌ otk chi jaw pjet twitz cruz, e xooꞌn yol te Jesús.

45Tejtzen tpon chil kꞌij, bix e cub jpet jun nintzaj klolj entera twitz txꞌotxꞌ, bix e ten klolj oxe hora.

46Tej tpon tajlal oxe te kale, bix e jaw s̈-in Jesús cyiw tuj tyol:

—Elí Elí, ¿lama sabactani?―tz̈ixin, jatzenj elpenina jyola “¡Ndios! ¡Ndios! ¿Tiken ma chin cyjaꞌ tcyeꞌyena?”

47Attzen cab xjal oc ebinte tyol Jesús, pero min el cyniyꞌ xjal tiꞌj. Bix e jaw yolenkexin:

—Cybinx. Luxin ntxcon jtyolel Dios Elías―tz̈ikexin.

48Toctzen tbiꞌn junxin xjal cyxolxin, bix e xiꞌ ajkelenxin kꞌilbetz jun esponja, bix e cuꞌx tmuꞌnxin chꞌin brat vino tuj, txꞌom chꞌin, bix oc tẍpoꞌnxin twiꞌ jun ptzꞌunt, bix e jax toyenxin te Jesús.

49Pero e xiꞌ cykbaꞌn niyꞌtlkexin cyxol:

—Kokcyeꞌyectzen laꞌtzen ka tzul Elías kꞌilcatz texin―tz̈i tzunkexin.

50Cwa tel jun cyiw twiꞌ Jesús, bix aj baj t-xewxin.

51Tujxse naj tej tel tanem Jesús, jnintzaj xbalen tjaw tuj nintzaj tja Dios te maksbil twitzj mas jawnex xjan cwart jaaꞌ uꞌla Dios, biꞌx e cub rotj tmij. Bix tuyax jun xcyaklajnab, biꞌx e baj cub cꞌabch ke xak.

52Biꞌx e jket cyjayel anem.

53Mas yaj, tej tjatz itzꞌj Jesús juntl maj tuj cyamecy, nim cyxumlal ocslal otk chi cyim e jatz itzꞌj tuj cyamecy, bix etzke tuj camposant bix ulke tuj xjan tnom te Jerusalén tuꞌn t-xiꞌ cyyeecꞌan cyiib cywitz nim xjal.

54Yal tzunj xin capitán cye soldado e jaw kꞌonte Jesús twitz cruz, cyuyaj xin cꞌojlalte Jesús, tej toc cycyeꞌyenxin xcyaklajnab bix cykilcaj otk baj, e tzaj ttz̈i cyiꞌjxin, bix e xiꞌ cykbaꞌnxin:

—Jaxnete tej xin xinak lu Tcwal Dios texin―tz̈ikexin.

55Bix jax at nim xuuj ncyeꞌyentz nakch. Otk chi oc lpe ke xuuj lu tiꞌ Jesús tej ttzaj tuj Galilea, kej otk chi ajben te onel tuyaxin tuj be.

56Cyxol tzunxuj tocxe jxuj María Magdalena, tuyax juntlxuj María, ttxu Jacobo tuya José, bix xsunj xuj cytxu tcwal jxin Zebedeo.

Tej tocx kꞌoꞌn Jesús tuj mukbil(Mr. 15:42-47; Lc. 23:50-56; Jn. 19:38-42)

57Tejtzen chꞌitk tex kꞌij, ul junxin kꞌina, José tbi, aj tnom te Arimatea. Otk tzꞌoc lpexin tiꞌ t-xnakꞌtzbil Jesús.

58Jatzen José e xiꞌ tuya Pilato te kanlte t-xumlal Jesús. E tcuya Pilato, bix e tkba tuꞌn t-xiꞌ kꞌoꞌn t-xumlal Jesús texin.

59Bix e cuꞌtz tiiꞌn José t-xumlal Jesús, bix oc tbalkꞌiꞌnxin jun xbalen sak tiꞌj.

60Bix ocx tkꞌoꞌnxin tuj jun acꞌaj tjayel anem twitz xak, tex texin tjayelxin otk tzꞌoc tbinchaꞌnxin. Bix oc tlomoꞌnxin ttziiꞌ tuya jun tij xak, bix etzxin.

61Yaltzen te María Magdalena tuya juntl María, kꞌuklkexuj twitz tjayel anem.

Kej cꞌojlal tiꞌj tjayel anem

62Tetzen juntl kꞌij, jkꞌij te ajlabl, e baj cychmon cyiib kej nejenel cye pala cyuyax aj fariseo twitz Pilato.

63E xiꞌ cykbaꞌnxin texin:

—Taat, n-ul tuj kcꞌuꞌja j-e tkba ja ẍtakꞌ xjal lu tej mitknaꞌx tcyim. E tkbaxin: “Te toxen kꞌij chin jawel itzꞌja juntl maj tuj cyamecy,” tz̈ixin.

64Juꞌ tzunj, kbanx cye soldado tuꞌn tcyiwset tlemel tjayelxin cyuj ja oxe kꞌij lu, tuꞌntzen miꞌn chi ul t-xnakꞌatzxin te koniyan tuꞌn tetz cyalkꞌaꞌnxin t-xumlalxin, bix cxeꞌl cykbaꞌn cye xjal ka ma jatz itzꞌjxin juntl maj tuj cyamecy. Ka juꞌ pjel, mas chi pjel sbuꞌn ke xjal twitzj nejl―tz̈ikexin.

65E xiꞌ tkbaꞌn Pilato cyexin:

—Lu jun cloj soldado te cyey. Cyucxa cyey, bix cycyiwsam tjayelxin tisenj tzin cyseꞌna―tz̈i Pilato.

66Exkexin, bix e baj cycyiwsaꞌnxin tjayel Jesús. Oc cykꞌoꞌnxin jun techel tiꞌj tij xak ttziiꞌ, tuꞌntzen tchicꞌajax ka otk tzꞌaj lkꞌe xak, bix e cyaj cykꞌoꞌnxin ke soldado te cꞌojlal.