2 TESALONICENSES 1 - Mam of Todos Santos -- Guatemala Unicode

Jun kꞌolbebl tuꞌn apóstol Pablo

1Inayena, Pablo, tuyax Silvano bix Timoteo, nxiꞌ ntzꞌiꞌbena ja uꞌj lu te cyey ocslal tuj tnom te Tesalónica, key t-xjal Kman Dios bix t-xjal Kaaw Jesucristo.

2Tzajxit cykꞌoꞌnxin xtalbil cyey bix tuꞌn cytena tuj ttz̈yal.

Oj tul meltzꞌaj Cristo cwel cycastiwa aj il tuꞌn Dios

3Key ocslal, il tiꞌj bix tumel tuꞌn t-xiꞌ kkꞌoꞌna chjonte te Dios jaca kꞌij cyiꞌja, cuma tz̈ꞌiyne tz̈ꞌiy cyocslabla tiꞌ Cristo tuyax tkꞌakꞌbil tcꞌuꞌj teeyle juun cyxola.

4Ejooꞌya tzalu nim nko tzalaja cyiꞌja tuꞌn cyocslabla tiꞌ Cristo bix tuꞌnj tkꞌakꞌbil cycꞌuꞌja, bix nxiꞌ kkbaꞌna cye t-xjal Dios at cypasensyey bix min cyaj cykꞌoꞌna cyocslabla, amale niyꞌxet qꞌuixcꞌaj bix pena cyuꞌna nuk tuꞌn cyocslabla.

5Pjeltzen t-xkeꞌlen Dios te cykilca xjal tuj tumel, bix tzinen taꞌ cxeꞌl tkbaꞌnxin baꞌn tuꞌn cyocxa tuj tcawbilxin, cuma niyꞌx qꞌuixcꞌaj cyuꞌna nuk tuꞌn tlaj tcawbilxin.

6Cuma tuj tumel cꞌoquel tcyeꞌyenxin cykil xjal, juꞌ tzunj ctzaal tkꞌoꞌnxin cycastiwa kej xjal nchi yajlan cyiꞌja.

7Bix te cyey bix te keya nko yajlaj, ctzaal tkꞌoꞌnxin coꞌpbil oj ttzaj tsmaꞌnxin Kaaw Jesucristo tuj cyaꞌj cyuyax t-ángel tuya nimxsen cyipemal.

8Tzulxin tuj tken kꞌakꞌ tuꞌn t-xiꞌ tkꞌoꞌnxin cycastiwa kej xjal cycyꞌi Dios bix el cyxooꞌn jcolbil e takꞌ Kaaw Jesucristo.

9Cycastiwatzen ctzaal tkꞌoꞌnxin, jaj tuꞌn tel tpaꞌnxin ejeeꞌ tiꞌjxin te junx maj. Chi elel kꞌiꞌn twitzxin, bix mlay chi ten jaaꞌ nkoptzꞌaj jjawnex tipemalxin.

10Nuk ckꞌojel cycastiwa oj tulxin tuꞌn tjaw nimsaꞌnxin cyuꞌn t-xjalxin bix tuꞌn cyjaw kleeꞌ cykilca ocslal tiꞌjxin. Bix cyuyaxa chi kꞌola nimbil texin tuj tzunj kꞌij, cuma ocslankey tej kkꞌumena tyol Dios cyxola.

11Tuꞌntzen tbint tuꞌn tnimsaj tbi Kaaw cyuꞌna, jaca kꞌij nko naꞌna Kman Dios cyiꞌja. Nko naꞌna Dios tuꞌn cyoca jun wik t-xjal Dios tuꞌn ttzalajxin tiꞌj, bix tuꞌn toc cyipena tiꞌj tuꞌn tbint jbaꞌn cyuꞌna, bix tuꞌn tonenxin cyiꞌja tuya tipemalxin tuꞌn ttzket cyocslabla.

12Nko naꞌna Dios cyiꞌja tuꞌntzen tjaw nimset tbi Kaaw Jesucristo, bix tuꞌn cyela baꞌn tuj twitzxin. Tuꞌnj t-xtalbil Kdios bix tuꞌn Kaaw Jesús, cjawel nimsaꞌn cybiy tuj tzunj kꞌij tzul.