1 TIMOTEO 1 - Mam of Todos Santos -- Guatemala Unicode

Jun kꞌolbebl tuꞌn apóstol Pablo te Timoteo

1Inayena, Pablo, ma cub ntzꞌiꞌbena ja uꞌj lu te tey, Timoteo, cuma inayena smaꞌn tuꞌn Jesús te tyolel tuꞌn tajwalel Dios, Coꞌpl ke, bix tuꞌn tajwalel Kaaw Jesús, Scyꞌoꞌn tuꞌn Dios, jaj xin kꞌuklec kcꞌuꞌj tiꞌj.

2Timoteo, jay tisen jun ncwal, cuma kꞌuklecxix tcꞌuꞌja tiꞌ Jesús. Wajtzen tuꞌn ttzaj t-xtalbil Dios tibaja, bix nuket tzaj kꞌaꞌben tcꞌuꞌjxin tiꞌja, bix tente tuj ttz̈yal tuꞌn Kman Dios bix tuꞌn Kaaw Jesús.

Tej tkbante Pablo tuꞌn miꞌn t-xiꞌ cybiꞌn ocslal cyyol xnakꞌtzal nicꞌbil yol

3At-xe kꞌij tej nxiꞌya tuj txꞌotxꞌ te Macedonia. Tzulcꞌatzen tuj tcꞌuꞌja oc ncubsaꞌn nwitz tey tuꞌn tcyaja tuj tnom te Efeso. Ncubtzen ntzꞌiꞌben ja uꞌj lu tey tuꞌn toc tilel tuꞌna tuꞌnx tcyaja te cawel cyibaj xjal tuj tja Dios tuj Efeso, cuma cyxol xjal tuj tja Dios at xjal nxnakꞌtzan nicꞌbil yol. Wajtzen jay cawen cyibaj xjal tuꞌn tbaj twiꞌ jnicꞌbil yola.

4Cawenxsen kej xjala tuꞌn miꞌn tzꞌoc cyxnakꞌtzaꞌn cypocbal ootxa xjal o baj cyniqꞌuen, cuma nuk nicꞌbil yol, nuk kꞌoj tzin tjyoꞌn, bix min pon baj twiꞌ, bix nuk amleꞌn nxiꞌ tiiꞌn. Jaxitle at amleꞌn cyiꞌ xjal te tja Dios te xnakꞌtzalec jaxxix tyol Dios, bix tuꞌn toc ke cycꞌuꞌj xjal tiꞌjxin.

5Nxiꞌtzen nkbaꞌn tey juꞌwa jaj tuꞌn toc takꞌ jun xjal cye ocslal tuꞌn cykil cyanem, bix tuꞌntzen toc takꞌ cye, il tiꞌj ctzaal tkbaꞌn cyanem, il tiꞌj ctzaal itzꞌj tiꞌ jun cynaabl baꞌn, bix jaxxix cyuꞌn ka kꞌuklec cycꞌuꞌj tiꞌ Dios.

6Pero kej xjal nchi xnakꞌtzan tiꞌj jnicꞌbil yola, lastimxse, cuma kej yol nbaj cyxnakꞌtzaꞌn cye xjal, yaaꞌn juꞌ n-ocatle, sino nuk ncub meltzꞌajtl cyyol te mintiiꞌ baꞌn tajbeꞌna.

7Nuk ja n-oc takꞌ cyej tuꞌn cyoc te nmak xnakꞌtzal tley Moisés, bix nke cycꞌuꞌj tuꞌn cyyol, pero min tzꞌel cyniyꞌ tiꞌj ti nxiꞌ cyyolen.

8Ktzkiꞌnte ka baꞌnte tley Moisés, pero ka ma tzꞌajben tuj tajbel-lel tisex o tzaj tkꞌoꞌn Dios.

9Tcublen bintte tley Moisés yaaꞌn te cye cyej xjal nuk jaj baꞌn ncub cybinchen. E cub bintte ley te tzuybel cyej xjal aj il. Ejeeꞌtzen aj ilj yuwin, bix xool cynaabl, te cyej sbuꞌn, bix xsunkej xjal min cybi Dios bix min cybi ti jilel jxjan, cyej xjal ncub byonte cyman bix cytxu, cykilca kej byol,

10te cyej xjal at cypaj, bix te cyej xinak nchi jaw meltzꞌaj tuya juntl xinak bix te cyej xuuj nchi jaw meltzꞌaj tuya juntl xuuj, te cyej tzyul xjal te qꞌueybil te juntl wik, te cyej ẍtakꞌ, bix xsunkej ẍtakꞌ tstiwa n-oc cyniqꞌuen ka jax cyuꞌn twitz Dios, bix xsunkej xjal ncub cybinchen tikꞌchtl jilel tkaꞌyel tuj tley Dios.

11Oj nxiꞌ nkbaꞌna jbaꞌn tpocbal Jesús, jxin oc kꞌonte wajwalela te kbalte cye xjal, bixse n-el cyniyꞌ xjal tiꞌ cyil.

Tej t-xiꞌ tkꞌoꞌn Pablo chjonte te Kaaw Jesús

12Nxiꞌ nkꞌoꞌna chjonte te Kaaw Jesús, cuma o tzaj tkꞌoꞌn wipemala tuꞌn npanteya tuj waakꞌena, bix cuma ma ke tcꞌuꞌjxin wiꞌja, bix ma chin kꞌoja te wajbelela.

13Cykil ma bint tuꞌnxin wiꞌja, bix jaj o tzꞌoc nkꞌoꞌna qꞌuixcꞌaj te Jesús tuya nyola, bix e njoy ke ocslal lepch tiꞌ Jesús te biybil bix te pjetel. Pero te Kaaw Jesús e tenx texin tanem we wiꞌj, cuma weya mintknaꞌx woca te ocslal, bix min el nniꞌya tiꞌj ti jilel e cub nbinchena, cuma eꞌla tuj nwitza baꞌn ncub nbinchena twitz Dios, bix min el nniꞌya tiꞌj ka ja Jesús Dios.

14Amale otket tzꞌoc nbinchena tiꞌjxin, pero nimx t-xtalbilxin e tzaj wibaja. Juꞌ tzunj n-oca wocslaꞌn Jesús, bix n-ocx takꞌxin we.

15At jun tyol jilj cykil xjal baꞌn toc ebinte. Nbyan cyjulu: “Ul Jesús twitz txꞌotxꞌ te coꞌpl cyej aj il,” tz̈i tyol jilj. Cyxoltzen aj il, inayena mas aj il.

16Bix amale inayentwe mas aj il cywitz aj il, pero te Jesús e tzaj tyeecꞌa texin tanemxin wiꞌj, tuꞌn toc tyeecꞌaxin ka min jaaꞌ baꞌn toca baj tcꞌuꞌjxin. Bix tuꞌntzen nim tcꞌuꞌjxin wiꞌja, matzen cub tkꞌoꞌnxin jun techlal cywitzj xjal at tuꞌn cyocslan te Jesús alcye kꞌij bix ccyiikꞌeltzen cychunkꞌlal te junx maj.

17Juꞌ tzunj knimacꞌatzen Dios, cuma jaxin Cawel, mintiiꞌ titzꞌjlenxin bix miꞌn cyimxin, bix mlay baj twiꞌ tuꞌnxin, bix mi nuketpe chicꞌajax Dios, bix nuk jacꞌaxin junx maj iyꞌna tilbil tiꞌj. Nukettzen jacꞌaxin s̈-ij bix naꞌj te junx maj.

18Jaꞌlewe, Timoteo, wey ncwala, ja tzuna o tzꞌoc kꞌoꞌn tiꞌj te xnakꞌtzal tyol Dios cyuꞌn tij tajwilel tja Dios. Yaltzen jaꞌlewe inayentzen chin oquel kꞌonte taakꞌena. Kꞌimtzen tuya cykil tcꞌuꞌja. Kꞌoꞌnc nim tipena te bajsalcꞌa twiꞌj nicꞌbil xnakꞌtzaꞌn. Kꞌoꞌnc tipena tiꞌj taakꞌena lu cyiw, tisen oj nkꞌojl jun soldado tuj kꞌoj.

19Cꞌojlam tiiba tiꞌj tajbela, bix tiꞌj ncub tbinchena. Baꞌnx tcꞌuꞌja tiꞌ Dios, bix tcꞌojlaꞌxa tnaabla. At cabtl xjal min txiꞌ cycꞌuꞌj tiꞌ cynaabl. Juꞌ tzunj o txaꞌ tzꞌak cyanem tiꞌ Dios.

20Juꞌtzen e baj cye Himeneo bixse Alejandro. Ejeeꞌ tzunja weya o chin naꞌn Dios cyiꞌj tuꞌn tcuyante Dios tuꞌn cyoc tuj cawbil tuꞌn taaw il, Satanás, tuꞌn tul tuj cycꞌuꞌj tuꞌn miꞌn baj cyyasen Kman Dios.