2 TESALONICENSES 2 - Mam of Todos Santos -- Guatemala Unicode

Jun jawnex xjal binchal il

1Key ocslal, cxeꞌl kcubsaꞌna kwitza cyey tuꞌn miꞌn baj cycꞌuꞌja tiꞌj tuꞌn tul meltzꞌaj Kaaw Jesucristo twitz txꞌotxꞌ bix tiꞌj jkꞌij tuꞌn kchmet tuyaxin.

2Miꞌn chi labta bix miꞌn chi jaw seyꞌpaja tiꞌj cyyol kej xjal tzin cykbaꞌn ma pon jkꞌij tuꞌn tul Kaaw te xkelte te cykil xjal. Tzin cykbaꞌn ma cyiikꞌ ja tyol Dios lu tuꞌn jun kuꞌja bix ka tuꞌn Espíritu Santo, pero yaaꞌn juꞌwa.

3Miꞌn chi jaw tzꞌaka tuj ja tzpetpajlenel lu. Ktzkiꞌn minaꞌx tul jkꞌij tuꞌn tul meltzꞌaj Cristo, cuma mlay tzul meltzꞌajxin nejl twitzj oj cykꞌojl chꞌixcꞌa yaaꞌn cykil xjal tiꞌj tley Dios. Bix jax il tiꞌj ctyeecꞌa tiib jxjal cawel qꞌuelel t-xooꞌn tley Dios te junx maj, jaj xjal cwel t-xita cykilca.

4Ja xjal lu qꞌuelel tiiꞌn cykil sant, bix cꞌoquel te cyxel sant, tuꞌntzen cycub maje cykil xjal twitzxin. Cꞌoquelxin tuꞌn tcawenxin tibaj cykilca, hasta tuꞌn tocxxin tuj jjawnex templo te Dios tuꞌn toc tkꞌon tiibxin tisencꞌa Diosxin.

5¿Mimpa naꞌn cyuꞌna e xiꞌ nkbaꞌna ja xnakꞌtzbil lu cyey tej ntena cyxola?

6Cytzkiꞌna alj ncub twaꞌban jaxin jaꞌlewe, tuꞌn miꞌn chicꞌajaxxin nuk oꞌcx oj tpon tumel.

7Minaꞌx tkꞌonte Dios tuꞌn tyecꞌjxin, pero c-yecꞌjelxin, bix ya ma tzyet tuꞌn taaw il tuꞌn takꞌanan tuj ewjel tuꞌn cykꞌojl cykil xjal tiꞌ Cristo. Pero at jun nmakonte te taaw il jaꞌlewe. Mlay takꞌ tipemal te ja xjal at tuꞌn tkꞌojl tiꞌ Cristo tuꞌn tcawen, bix ja xjal lu mlay tzꞌoc te cawel jaꞌlewe.

8Pero oj tel kꞌiꞌn jmakolte, c-yecꞌjeltzen jcawel ckꞌojl tiꞌ tley Dios. Bix cwel tbyoꞌn Kaaw nuk tuꞌnj t-xew n-etz tuj ttzi. Cxitjel tuꞌn tipemalxin oj tulxin.

9Jatzen cawelja ckꞌojlel tiꞌ tley Dios, junx tnaablxin bix tbinchbenxin tuya taaw il. Cxeꞌl tyeecꞌanxin nimxsen tipemalxin bix jawnex techlal tuꞌn cykleeꞌ xjal tiꞌjxin, pero tuꞌn cysbuj xjal tuꞌnxin.

10Tuꞌnj tbinchbenxin yaaꞌn baꞌn cwel tsbuꞌnxin ke xjal. Kej xjal at tuꞌn cyxiꞌ tuj castiwa, chi cwel tuj ẍtakꞌbil cuma min e cyajbe jjaxxix yol, tuꞌntzen cyclet.

11Cuma cycyꞌixin jax yol, juꞌ tzunj chi xeꞌl ttzokpiꞌn Dios tuꞌn cyyajlaj, bix cxeꞌl cyocslaꞌnxin jẍtakꞌbil ctkbaꞌ jcawel binchal il.

12Bix juꞌ tzunj, cwel tkꞌoꞌn Dios cycastiwaxin, cuma el cyxooꞌnxin jaxxix yol, bix nuk e tzalajkexin tiꞌj yaaꞌn baꞌn.

Ma ko jaw scyꞌet tuꞌn Dios tuꞌn kclet

13Perotzen cyey, ejeeꞌy n-oc cyakꞌa te Kaaw, yaaꞌn juꞌkey. Il tiꞌj bix tumel tuꞌn t-xiꞌ kkꞌoꞌna chjonte te Dios cyiꞌja jaca kꞌij, cuma jatxe tuj tneel ma chi jaw scyꞌoꞌna tuꞌn Dios tuꞌn cycleta tuꞌnj ttxjet cyanema tuꞌn Espíritu Santo bix tuꞌnj cyocslabla tiꞌj jaxxix yol.

14E pon kiiꞌna jyol tiꞌj colbil cyey cyuyey cuma e tajbe Dios tuꞌn tkꞌoj cyey jun cyoclena junx tuya Kaaw Jesucristo.

15Juꞌ tzunj, key ocslal, chi weꞌbilxixa tuj cyocslabla, bix cytzyumxa jxnakꞌtzbil e xiꞌ kkꞌumena cyey bix e xiꞌ ktzꞌiꞌbena cyey.

16Tzajxit tkꞌoꞌn Kaaw Jesucristo bix Kman Dios tuꞌn miꞌn chi yuccha tuj cyocslabla. Ma tzꞌoc kakꞌ texin, bix tuꞌn t-xtalbilxin ma tzaj tkꞌoꞌnxin ke, mintiiꞌ tuꞌn ttzaj ttz̈i kiꞌj ti pjel, bix baꞌn kayon tiꞌj jun acꞌaj kchunkꞌlal te junx maj.

17Tcywixxit cycꞌuꞌja tuꞌnxin tuꞌn tbint baꞌn cyuꞌna tiꞌj cykilca nkbaj cyuꞌna bix nbint cyuꞌna.