ROMANOS 3 - Mam of Todos Santos -- Guatemala Unicode

1Kape at juun cyey ctzaal cykanena weya cyjulu: “Katzen juꞌ ttena, ¿titzen tajbel tuꞌn oc te judío? ¿Ti oc tbinchen tej tel keset cychuꞌl judío te techel t-xjal Dioske?” tz̈i cybela juꞌwa.

2Cxeꞌl ntzꞌakꞌbeꞌna cyyola, nim ajbeꞌna. E tzaj tkꞌoꞌn Dios cye judío jawnex cyoclen te tzꞌiblte bix te cꞌuꞌlte tyol Dios.

3Pero kape cykbaꞌy weya cyjulu: “Pero at nim judío el cyxooꞌn tyol Dios. Juꞌ tzunj mlay tniman Dios tyol e cyaj tkꞌoꞌn cye tuꞌn toc te Cydios,” tz̈i cybela juꞌwa. Pero cxeꞌl nkanena cyey cyjulu: Amale mint e cyniman ke judío, ¿cwelpa tchꞌixbeꞌn Dios jtyol e cyaj tkꞌoꞌn?

4¿Cbinelpa tuꞌn Dios juꞌwa? ¿Atpa maj min tniman Dios tyol? ¡Yaaꞌn juꞌwa! Mas baꞌn tuꞌn t-xiꞌ kkbaꞌn cykil xjal ẍtakꞌ xjal twitzj tuꞌn t-xiꞌ kkbaꞌn ka ja Dios yaaꞌn jiquen tyol. Tz̈i jun xjal tuj tyol Dios cyjulu: “Kman Dios, jiquen taꞌ cykilca tey tyol. Mintiiꞌ ẍtakꞌbil tuj tyola. Ka ma tzꞌoc cymlon xjal tyola tuꞌn tcnet jun palt te tyola, pero mintiiꞌ palt cnetel cyuꞌn,” tz̈i jun xjal, tz̈i tyol Dios te yecꞌbil jiquente Dios.

5Kej judío tocx cyxola, kapetzen cykbaꞌy weya cyjulu: “Yaaꞌn tumel ka ma tzaj tkꞌoꞌn Dios kcastiwa tuꞌnj il nbint kuꞌn, cuma tz̈i cynkobela ajben te Dios oj nbint il kuꞌn, cuma ka mintiiꞌ il nbint kuꞌn, mlay chicꞌajax ja Dios jiquen,” tz̈i cybela. Pero ja tumel lu nuk cynaabl xjal te twitz txꞌotxꞌ.

6Yaaꞌn jaxxix. Ka tzin cykbaꞌna yaaꞌn tumel tuꞌn ttzaj tkꞌoꞌn Dios tcastiwa jun aj il, jax juꞌx tzin cykbaꞌna mlay tzꞌajben Dios tuꞌn toc tcyeꞌyenxin jaca juun xjal twitz txꞌotxꞌ ka baꞌn e bint tuꞌn bix ka kaꞌ. Pero yaaꞌn juꞌwa.

7Ka mintiiꞌ toclenxin tuꞌn ttzaj tkꞌoꞌnxin tcastiwa jun aj il, baꞌntzen txiꞌ tkbaꞌn jun xjal ẍtakꞌ cyjulu: “Oj nẍtakꞌena, cꞌajbeltzen tuꞌn tchicꞌajax min nẍtakꞌen Dios. Juꞌ tzunj yaaꞌn tumel tuꞌn ttzaj tkꞌoꞌn Dios ncastiwiya, cuma tuꞌnj ẍtakꞌ nyola cjawel nimset tbixin,” tz̈i xjal juꞌwa.

8Kane juꞌwa, cxeꞌlne kkbaꞌn cyjulu: “Il tiꞌj ko binchal il, tuꞌntzen tchicꞌajax ja te Dios baꞌn,” tz̈i kbel. At juun tzin cykbaꞌn juꞌwa, pero ẍtakꞌ cyyol. Ctzaal tkꞌoꞌn Dios cycastiwa te cyej xjal tzin cykbaꞌn juꞌwa, bix jiquen taꞌ cwel cycastiwa tuꞌn Dios.

Min-al jun xjal tzꞌaklxix, cykil koꞌ at kil

9Entonces, ¿cxeꞌlpa kkbaꞌn kej xjal wiyꞌjila, ke judío, mas baꞌnke tuj twitz Dios cywitzj kej xjal yaaꞌn judío? ¡Min! Yaaꞌn juꞌwa, cuma ma txiꞌ nkbaꞌna cyey cykilca xjal, judíole, yaaꞌnle judío, pero tocx tjakꞌ tcawbil il.

10Tz̈i tyol Dios julu: “Mi nuk jun xjal jiquen twitz Dios.

11Min-al n-el tniyꞌ tiꞌj ti ttenxin. Min-al n-oc tcꞌuꞌj tiꞌjxin tuꞌn tnimjxin.

12O cyaj cykꞌoꞌn tbexin cykil xjal. Mintiiꞌtl cyajbel texin. Mi nuk jun xjal nbinchan baꞌn.

13Jtzin cykbaꞌn tuya cytzi kaꞌxsen, tisen t-xewel cyimne tuj camposant. Cyaakꞌ oꞌcx tajbel te sbul xjal. Oj cyyolen, cytzalajebl cabtl nxiꞌ tuj il, tisen n-oc ttxꞌaꞌn lbaj tiꞌ jun xjal biꞌx cyjel tveneno tuj tchuꞌl tuꞌn t-xiꞌ tuj il.

14Nim juubj yol n-etz tuj cytzi, bix cꞌa yol.

15Nuk tiꞌ chꞌin julu ncub cybyoꞌn xjal.

16Jaaꞌxja nchi pona, biꞌx nxiꞌ cykilca tuj il cyuꞌn, bix niyꞌx qꞌuixcꞌaj cyuꞌn xjal cyuꞌn.

17Min cytzkiꞌn ti tten tuꞌn cyten tuj ttz̈yal.

18Min tzul tuj cycꞌuꞌj tuꞌn at ttz̈i Dios cyiꞌj,” tz̈i cyley judío te yecꞌbil aj il cykil xjal.

19Juꞌtzen tzin tkbaꞌn cyley judío cykilca xjal aj il, bix n-el kniyꞌ tiꞌj cyuyax judío, cuma ejeeꞌn e tenke tjakꞌ tcawbil cyley. Juꞌ tzunj min-al jun cye baꞌn tkbante yaaꞌn aj il. Cykilca xjal twitz txꞌotxꞌ, judíole, yaaꞌnle judío, il tiꞌj chi pomel te kbalte twitz Dios at cyil.

20Juꞌ tzunj, tzinen taꞌ min-al jun xjal twitz txꞌotxꞌ cxeꞌl jiquen twitz Dios tuꞌnj e niman jleye tzaj tkꞌoꞌn Dios cye judío, cuma najben jley nuk oꞌcx tuꞌn tyeecꞌante cykilca koꞌ aj il.

Ma ko oc te tzꞌaklxix nuk tuꞌn kocslabl tiꞌ Jesucristo

21Pero jaꞌlewe o txiꞌ tyeecꞌan Dios cye xjal at juntl tumel tuꞌn cyoc jiquen twitzxin. Yaaꞌn tuꞌnj ley e tzaj tkꞌoꞌn Dios cye aj Israel tuꞌnj Moisés, sino tuꞌnj juntl. Jaj jun be e byan tuꞌn Moisés, bix juꞌx e byan cyuꞌn cabtl tyolel Dios jatxe ootxa.

22Ja tzunj lu. Ja te Dios kꞌolte tuꞌn koc jiquen twitzxin, bix ntzaj tkꞌoꞌnxin ja xtalbil lu te cyej xjal n-oc ke cycꞌuꞌj tiꞌ Jesucristo.

23Cykilca koꞌ xjal o ko binchan il. Mi nuket jun xjal o txiꞌ tiiꞌn tchunkꞌlal jiquen tisen tbanel tnaabl Dios.

24Nuk tuꞌnj t-xtalbil Dios tzin tkbaꞌn Dios ejeeꞌj n-oc ke cycꞌuꞌj tiꞌ Cristo, jiquen eteꞌ twitzxin. Bix o cyaj tkꞌoꞌnxin ja xtalbil lu nuk oꞌcx tuꞌnj e xiꞌ tchjoꞌn Cristo Jesús chojbil kil tuꞌntzen ktzakpet tiꞌj kil.

25E tzaj tkꞌoꞌn Dios jaxin twitz txꞌotxꞌ tuꞌntzen tel tz̈itj ttz̈qꞌuelxin te chojbil il, tuꞌntzen tweꞌ tkꞌoj Dios kiꞌj, tuꞌntzen koc jiquen twitz Dios tuꞌnj kocslabl tiꞌ Cristo. Min e tzpet Dios tej tcub tnajsaꞌnxin cyil kej xjal ootxa, te mitknaꞌx tul Cristo. Tumel tuꞌn Dios tej tbint tuꞌnxin juꞌwa, cuma ttzkiꞌnxin tuꞌn ttzaj tkꞌoꞌnxin tcastiwa Cristo te chojbil cykil il.

26Tej ttzaj tkꞌoꞌn Dios Cristo te chojbil cyil xjal, e tyeecꞌatzen te ke jaꞌlewe nbinchanxin cykilca tuj tumel te junx maj. Amale atet il tiꞌj tuꞌn tkꞌontexin castiwa tuꞌn tlaj il, cchicꞌajaxeltzen jun aj il tisencꞌa mintiiꞌ til twitz Dios ka ma tzꞌoc ke tcꞌuꞌj tiꞌ Jesús.

27Juꞌ tzunj, ¿tumelpa tuꞌn tjaw kniman kiib? Min, cuma jiquen koꞌ twitz Dios yaaꞌn tuꞌnj nkoꞌx lpe tiꞌj jun ley, sino jiquen koꞌ tuꞌnj toc ke kcꞌuꞌj tiꞌ Cristo.

28Jaxxix tumelj kꞌoꞌn te jun xjal tuꞌn toc jiquen twitz Dios nuk oꞌcx tuꞌnj tocslabl tiꞌ Cristo, yaaꞌn tuꞌnj nniman jun ley.

29At juun cyey ejeeꞌy judío tzin cykbaꞌna nuk cye judío Dios, yaaꞌn cyej xjal yaaꞌn judío. Pero cxeꞌl nkanena cyey, ¿atpa juntl Dios te cyej xjal yaaꞌn judío? ¡Min! Juꞌ tzunj, il tiꞌj qꞌuelel cyniꞌya tiꞌj Jdios te cyej xjal judío jax Dios te cyej xjal yaaꞌn judío,

30cuma jaxte nuk oꞌcx jun Dios at. Ka junx Dios at, judíole, yaaꞌnle judío, pero iltzen tiꞌj chi oquel cykil xjal te t-xjal Dios tiꞌjx jun be, jaj tuꞌnj n-oc ke cycꞌuꞌj tiꞌ Cristo.

31Kapetzen cxeꞌl cykbaꞌna cyjulu: “Ka jiquen koꞌ twitz Dios nuk tuꞌnj kocslabl tiꞌ Cristo, mintiiꞌtltzen tajbel jley e tzaj tkꞌoꞌn Dios,” tz̈i cybela. ¡Pero yaaꞌn juꞌwa! Jtzin nkbaꞌna ja ley nkbante tuꞌn koc tzꞌaklxix twitz Dios, pero nuk tuꞌnj n-oc ke kcꞌuꞌj tiꞌ Cristo o nimj ley kuꞌn.