HEBREOS 7 - Mam of Todos Santos -- Guatemala Unicode

Cristo bix Melquisedec

1Jax e ten Melquisedec jun jawnex bix te junx maj pala jatxe ootxa. Bix jaxin jun techlal tiꞌ Jesús te pala jaꞌlewe. Jatxe ootxa jxin Melquisedec jaxse jun xinj nintzaj cawel tuj tnom te Salem, bix palaxin twitz Dios. Bix at jun e baj. Tejtzen tul meltzꞌaj Abraham cyuya ke t-akꞌanalxin tej otk xcye Abraham tibaj jun cloj alakꞌ cawel, bix e xiꞌ Melquisedec te clulte Abraham tuj be. Tejtzen cymojbante cyiibxin tuya Abraham, bix e tcyꞌiwla Melquisedec ja Abraham.

2Bix e xiꞌ tkꞌoꞌn Abraham te tcotz Melquisedec jun tlajan paꞌ tiꞌj tikꞌch otk tzꞌel tiiꞌnxin tuj cykꞌab alakꞌ tuj kꞌoj.

Yaltzen te Melquisedec tbi, jatzen japeninaj “jiquenxix.” Bix at juntl tbixin, “cawel te ttxubtxjal.”

3Bix juꞌx e ten Melquisedec jun pala te junx maj mintiiꞌ t-xeeꞌ titzꞌjlenxin bix mintiiꞌ t-xeeꞌ tcyimlenxin, cuma minteyꞌ tumel alcye tmanxin bix alcye ttxuxin, cuma mintiiꞌ tzin tkbaꞌn tyol Dios cyiꞌjxin. Bix mintiiꞌ tzin tkꞌumen tyol Dios tej titzꞌj Melquisedec bix tej tcyimxin. Juꞌ tzunj ja tzunxin jun techlal te Jesús, Tcwal Dios, cuma ja Tcwal Dios kpala te jaꞌlewe te junx maj mintiiꞌ tbajlel.

4Yaltzen cyey, at juun ncuble cybisena ejeeꞌ pala cyxol tiyꞌjil Abraham mas jawnex twitz Jesús, kpala te jaꞌlewe. Pero yaaꞌn juꞌwa. Cycyeꞌyenctzen nimxsen t-xiꞌlen Melquisedec, ja techlal te Jesús. Hasta ja kiyꞌjil Abraham e xiꞌ kꞌonte toybil te Melquisedec, bix n-el kniyꞌ tiꞌj jaj nkꞌinte jun toybil juntl mas jawnex twitzj nxiꞌ kꞌonte.

5Yaltzen cye xjal judío, ke pala cyxol ejeeꞌj tiyꞌjil Leví, ke tchman Abraham. Bix tuꞌnj tley Moisés at cyoclen kej pala tiyꞌjil Leví tuꞌn tel cyiiꞌn tlajan paꞌ cyoybil cye kej niyꞌtl xjal judío. Amale cyiyꞌjilalexit cyiib, ja ley e kꞌumente tuꞌn cykanen.

6Pero jatzen te Melquisedec, amale yaaꞌnt tiyꞌjil Leví, bix e tiikꞌ jun toybil Abraham, tij tchman Leví. Jaj lu nyeecꞌan at tajwalel Melquisedec tuꞌn toc te pala bix tuꞌn tkꞌinte toybil jun xjal tecꞌax tley Moisés.

Bix yaaꞌn nuk e tiikꞌ Melquisedec toybil Abraham, bix tuyax e tcyꞌiwlaxin ja Abraham, amale jat Abraham nimxsen il tiꞌj tuꞌn tcyaj tkꞌoꞌn Dios tyol tuyaxin.

7Ja lu nyeecꞌan mas jawnex Melquisedec twitz Abraham, cuma jax jaj ncyꞌiwlante tibaj juntl mas jawnex twitzj ncyꞌiwlet.

8Bix at juntl tumel tzin tyeecꞌan mas jawnex Melquisedec cywitz kej pala tiyꞌjil Leví. Ke pala tiyꞌjil Leví nchi cyimke, cuma xjalke. Yaltzen te Melquisedec, mintiiꞌ tumel tcyimlen. Ja jun pala te junx maj. Bix jax jun pala mintiiꞌ t-xeeꞌ tbajlel mas jawnex twitz kej pala nchi cyim.

Juꞌtzen ja Melquisedec jun pala mas jawnex, bix jaxsen n-echlan tiꞌ kpala Jesús te jaꞌlewe.

9Yaaꞌn te Leví bix ke tcwal oc te pala mas jawnex twitz Melquisedec. Amale e cyiikꞌet-xin cyoybil xjal, jax jaan ke cyexin e cyakꞌ cyoybil te Melquisedec. Yaaꞌna ejeeꞌxin e xiꞌ kꞌonte, cuma mitknaꞌx cyitzꞌjxin, sino tuꞌn Abraham,

10cuma tej t-xiꞌ tkꞌoꞌn Abraham toybil te Melquisedec, icxa jaxin e yolen cyiꞌj cykilca tchman, cuma jaxin tiyꞌjil cykilca kxeꞌchel.

11Yaltzen cye pala tiyꞌjil Leví cyxol judío, ajbenke te tlocꞌ tley Moisés. ¿Pero ajbenpake te kꞌol cyipemal xjal tuꞌn cyoc xjal tzꞌaklxix? Min. Cyexin cyaakꞌen nuk te kanlte xtalbil cyibaj xjal tuya chojbil cyil. Nuket e bint cyuꞌn tuꞌn cyoc xjal tzꞌaklxix bix tuꞌn cycoꞌpj xjal tuj cyil, mintetletiiꞌ il tiꞌj ttzaj jun wikxitl pala tisen Melquisedec, jatzen Jesús, junxitl pala yaaꞌn t-xeꞌchel Aarón, jnintzaj tneel pala cyxol pala tiyꞌjil Leví.

12Ktzkiꞌn ka o pon baj cyaakꞌen pala te Leví, jax juꞌx il tiꞌj o pon baj tley Moisés. Te ke jaꞌlewe, at jun wikxitl pala.

13-14Ktzkiꞌn tuj tley Moisés, il tiꞌj nuk ejeeylex ke tiyꞌjil Leví oc te pala. Pero te Kman Jesús, yaaꞌn tiyꞌjil Leví, cuma jatz itzꞌja cyxol xjal te Judá, bix at tumel min-al jun xjal tiyꞌjil Judá e jaw kꞌonte chojbil cyil xjal twiꞌ altar tuj tja Dios. Tuj tley Moisés min-al jun xjal tiyꞌjil Judá oc taakꞌen te pala. Juꞌ tzunj tzinen taꞌ o chꞌixpet ley, cuma te Jesús yaaꞌn jun pala tisen Aarón.

15Bix juntl. Mas tzinen taꞌ at jun acꞌaj ley te ke jaꞌlewe, cuma o tzꞌoc jun wikxitl pala tisen Melquisedec. Tuj tyol Dios min nbyan at tulel jun pala tisen Aarón. Te tzin tkbaꞌn at tulel jun pala tisen Melquisedec.

16Bix ja tzunj pala at tulel o tzul. Jatzen Jesús. Min oc Jesús te pala tuꞌn tipemal jun ley nuk cyex xjal te Leví bix at tbajlel cychunkꞌlal, sino ocxin te pala tuꞌn tipemal jun chunkꞌlal te tex, mintiiꞌ tbajlel, tisen te Melquisedec.

17Juꞌx ttena, cuma juꞌ tz̈i Dios. Cycyeꞌyenc juntl maj ti toc tuꞌn Dios te Tcwal tuj tyol Dios: “Jay cꞌoquel te pala te junx maj, tisen Melquisedec,” tz̈i Dios te Tcwal.

18Nukettzen e bint tley Moisés ootxa tuꞌn cycyaj xjal jiquenxix, jaxitle kꞌiꞌn kuꞌn jaꞌlewe.

19Pero min e bint. Juꞌ tzunj il tiꞌj cyjel tiꞌjxe, tuꞌntzen t-xiꞌ kiiꞌn jun mas baꞌnxix, tuꞌntzen kpon tzꞌaklxix twitz Dios. Ja tzunj lu jaj tuꞌn baꞌn kpon twitz Dios tuꞌn jun nicꞌul tiꞌj mas baꞌn cywitz kej pala te ootxa.

20Jatzen nicꞌul tiꞌj mas baꞌn ja Jesús, bix jaxin mas baꞌn cuma najbenxin te piador tiꞌj acꞌaj trat, cuma ocxxin te pala tuꞌn tipemal tjurament Dios.

21Yaltzen cyekej tiyꞌjil Leví, ocke te pala, pero yaaꞌn tuꞌn tipemal tjurament Dios. Bajx tkbaꞌ Dios tuꞌn cyoc te pala te junx maj. Nuk tiꞌjcꞌa Jesús tzin tkbaꞌna tyol Dios jaxxix tuꞌn toc Jesús te pala te junx maj. Tz̈i tyol Dios cyjulu: “E tkꞌume Dios te Tcwal tuya jun jurament yol, bix ya mlay tchꞌixpetl tyolxin. Bix ja yol e tkꞌumexin te Tcwalxin tuya jun jurament cyjulu: ‘Jay cꞌoquel te pala te junx maj, tisen Melquisedec,’ tz̈i Dios te Tcwal,” tz̈i tyol Dios.

22Bix yaaꞌn nuk oꞌcx jun mas baꞌn piador, sino tuyax jaxin o tzꞌoc te piador tiꞌj jun mas baꞌn trat kiꞌj twitz trat te nejl.

23Bix juntl tumel. Ja Jesús jun pala mas baꞌn yaaꞌn nuk tiꞌj e cyjaꞌ tjurament Dios, sino tuyax jaxin pala te junx maj. Nejl nimxsen cybaj pala e ten te nicꞌul tiꞌj cyiꞌ xjal tuya Dios. Pero bix e cyimke, bix e cyaj weꞌ cyaakꞌen, bix il tiꞌj ocxtl cyxel. Yaaꞌn te junx majke.

24Pero te Jesús, mintiiꞌ tbajlelxin. Min tzꞌoc taakꞌen tuj tkꞌab juntl. Min-al juntl baꞌn tcyaj te t-xel.

25Juꞌ tzunj jaxin baꞌn tcoꞌpante ke jaxxix toclen ka ma koꞌx lkꞌe twitz Dios nuk tuꞌn Jesús. Bix ka nko cubsan kwitz te Dios, bix tocxsen Jesús onlte ke twitz Dios. Bix cuma te Jesús mintiiꞌ tbajlel texin, junx maj at-xin yolel kiꞌj twitz Dios.

26Juꞌ tzunj tzinenxix tiꞌj jatzen jun nintzaj kpala jkajbeꞌxix te junx maj. Jiquenxix, mintiiꞌ tilxin, bix puro sakxix, taj junxitl twitzj keꞌj binchal il, bix o jaxxin mas tibajxe twitz cyaꞌj, jaaꞌ taꞌ Dios.

27Te Jesús, yaaꞌn tisen juntl wik nintzaj pala. Ejeeꞌ tzunja il tiꞌj cwel cybyoꞌn alimaj cykil kꞌij, tuꞌntzen t-xiꞌ cyoyen te Dios te chojbil il, tneel tiꞌj cye cyil, bix tecꞌaxtl tiꞌtl cye xjal cyil. Pero te Jesús, e xiꞌ tkꞌoꞌn jun chojbil te junx maj, bix te cykil cyil xjal, jaj tej t-xiꞌ toyen tiibxin te junx maj tiꞌ cyil xjal twitz cruz.

28Bueno, key hermano, nejl, jtley Moisés oc tkꞌoꞌn juun xjal tuꞌn cyoc te pala, pero amale tocxet juun te mas nintzaj pala cyxol, mintiiꞌ cyipen tuꞌn tel cyxooꞌn il, bix cwa cycyim. Pero ya jaꞌlewe, mas yaj tibajxe tley Moisés, at jun wikxitl kpala, yaaꞌn tuꞌn tley Moisés, sino tuꞌn tjurament Dios. Jatzen kpala jtzꞌaklxix bix mintiiꞌ tcyimlel, bix scyꞌoꞌn tuꞌn Dios.