1 PEDRO 5 - Mam of Todos Santos -- Guatemala Unicode

Tej t-xiꞌ tkꞌoꞌn Pedro cynaabl kej nejenel cyxol ocslal

1Key nejenel cyxola, jax juꞌx weya jun nejenel cyxol ocslal kena cyuyey. Oc ncyeꞌyena tej tiyꞌx qꞌuixcꞌaj tuꞌn Cristo. Bix jaan kena cyuyena cwiikꞌela jun jawnex nchunkꞌlala oj tyeecꞌan tiib Cristo. Juꞌ tzunj, nxiꞌ nkꞌoꞌna consejo cyey.

2Tisen jun cylel ncꞌojlaꞌn ke tcarnel tuꞌn, cycꞌojlanxa ke ocslal ma cyaj tkꞌoꞌn Dios tuj cycwenta. Miꞌn chi cawena cyibaj cuma ja cyaakꞌena, sino tuꞌnxix cykil cyanema, bix yaaꞌn nuk tuꞌn cycamana twiꞌ cycꞌuꞌja, sino tuya cykil cycꞌuꞌja.

3Bix miꞌn tzꞌoc cykꞌon cyiiba nuk tuꞌn cyoca te cawel cyibaj kej ocslal eteꞌ tuj cycwenta. Mas baꞌn tuꞌn cyoca te jun yecꞌbil baꞌn, tuꞌn cyoc lpe ocslal cyiꞌja.

4Ojtzen tul meltzꞌaj Nejenel cye cylel, ccyiikꞌela jun cycotza jawnex mintiiꞌ tbajlel.

5Yaltzen key xinak cwalx, cxeꞌl cyyeecꞌana cynimbila cye nejenel tuj tja Dios. Bix cykilca key, chi oca maans cyxolxa, cuma at tkꞌoj Dios cyiꞌ kej xjal nuk nbaj cyniman cyiib, pero kej xjal n-oc cykꞌon cyiib te chꞌin, tzin tkꞌoꞌn Dios t-xtalbil cye.

6Juꞌ tzunj, cꞌoquel cykꞌon cyiiba te chꞌin twitz jawnex Dios te nim tipemal, tuꞌntzen ttzaj tkꞌoꞌn cyey tuꞌn cyoca te nim oj tpon tumel.

7Bix cykilca najkelen cycꞌuꞌja tiꞌj, cykꞌonxa tuj tcwent Dios, cuma tzin cꞌojlan Dios cyiꞌja.

8Cytzyun cyiiba twitz il, bix cycꞌojlanx cyiiba, cuma nkꞌojl taaw il cyiꞌja, bix tisen n-oc lpe jun león tiꞌj jun masat tuꞌn t-xiꞌ tchyoꞌn, jax juꞌxa n-oc tipen taaw il tiꞌj ti tten tuꞌn cytzyeta tuꞌn tuj tkꞌab.

9Pero chi weꞌxixa twitz, bix chi tena cyiw tuj cyocslabla, cuma cytzkiꞌna cykilcatl ocslal twitz txꞌotxꞌ niyꞌx qꞌuixcꞌaj cyuꞌn tisen niyꞌx cyuꞌna.

10Cybajlenxittzen yaaꞌna cab kꞌij, ctzꞌaksaltzen Dios cyey, bix cjawel twaꞌbaxin ejeeꞌy, bix kꞌolte cyipemala, bix cyiwsalte cyey, jax Dios ntzaj kꞌonte cykil xtalbil, bix ma ttxoc ejooꞌ tuꞌn kten tuya te junx maj tuj jawnex tcawbil tuꞌn Jesucristo.

11¡Jawxit nimset tbi Dios, bix tuꞌn tcawen tibaj cykilca te junx maj! Juꞌxit tzuna.

Mancꞌbil yol cye ocslal

12Cxeꞌl tiiꞌn jxin Silvano ja uꞌj lu cyey, cuma n-oc kexix ncꞌuꞌja tiꞌjxin. Tuꞌnj ja caꞌba oxe yol lu ma txiꞌ ntzꞌiꞌbena cyey, cutz̈it cywix cyocslabla tuꞌn, bix tuꞌn miꞌn cyaj cycyeꞌyena jaxxix yol tiꞌj t-xtalbil Dios.

13Kej ocslal tzalu tuj Babilonia, junx eteꞌ cyuyey tuj cyocslabla, bix nxiꞌ cykꞌoꞌn jun cykꞌolbebl te cyey. Jax juꞌx ncwala Marcos, nxiꞌ tkꞌoꞌn tkꞌolbebl te cyey.

14Jax juꞌx cyey cyxola, cykꞌolben cyiiba tuya tkꞌakꞌbil cycꞌuꞌja cyel cyiiba. Chi tenxita tuj ttz̈yal, ejeeꞌy at cyocslabla tiꞌ Cristo.