APOCALIPSIS 3 - Mam of Todos Santos -- Guatemala Unicode

Jun tumel cye ke ocslal tuj tnom Sardis

1Bix e tzaj tkbaꞌntl Jesús weya:

—Tzꞌiꞌbeqꞌuey te tej nejenel cye ocslal tuj Sardis cyjulu: “Inayena, at wuuk espíritu te Dios wuyena, bix wuuk cheꞌw at wuyena, tzin nkbaꞌna cyjulu: ‘Ntzkiꞌna jma bint cyuꞌna. Tuj cywitz xjal, at cychunkꞌlala tuya Dios. Pero ntzkiꞌna tisencꞌa cyimnekey.

2Cycꞌasem cyiiba, bix cycyiwsam cychunkꞌlala at tuya Dios, cuma at tuꞌn tnaj. Ma wila cybinchbena, bix yaaꞌn tzꞌaklxix twitz Dios.

3Juꞌ tzunj, cꞌoquel cycꞌuꞌja tiꞌj jxnakꞌtzbil e cybiy bix e cyocslay tuj tneel, bix miꞌn cyaj cykꞌoꞌna. Tajtz tiꞌ cyanema. Ka min ma tzꞌel cyelsaꞌna cywatla, tzul jkꞌij oj tcub nkꞌoꞌna castiwa cyibaja, bix min chi ayona tiꞌj, tisen min chi ayon xjal tiꞌ jun alakꞌ oj tocx tuj cyja te koniyan.

4Pero at juun xjal cyxola tuj Sardis min ma tzꞌilex tuꞌn kaꞌ. Ejeeꞌ tzunkej lu chi betel wuyena toc cyxbalen sak cyiꞌj, cuma at cyoclen tiꞌj ja xtalbil lu.

5Alcyekej ma chi xcye tiꞌj taaw il, ejeeꞌ tzunja ckꞌojel cye tuꞌn toc cyxbalen sak. Bix mlay tzꞌel wiiꞌna cybi tuj uꞌj jaaꞌ tzꞌiꞌbena cykilca cybi xjal at cychunkꞌlal te junx maj. Bix cxeꞌl nkꞌumena twitz Nmana Dios bix cywitz tsanjel tuj cyaꞌj ka nxjalke.

6Cyjkom cyẍquina tuꞌn tel cyniꞌya tiꞌj ti jilel tzin tkbaꞌn Espíritu Santo te cyey, ejeeꞌy ocslal,’ tz̈i Jesús cyey aj Sardis,” tzꞌiꞌbeqꞌuey.

Jun tumel cye ke ocslal tuj tnom Filadelfia

7Yaltzen te tej nejenel cye ocslal tuj Filadelfia, tzꞌiꞌbeqꞌuey cyjulu: “Inayena, jxjal xjan, jxjal jaxxix, jxjal kbalte alcyekej xjal chi oquel tuj tnom te David, jxjal jkol tlemel jaaꞌ bix min-al jun xjal jacꞌa bint tuꞌn tlemet tuꞌn, bix jxjal lmol tlemel jaaꞌ bix min-al jun xjal jacꞌa bint tuꞌn tjket tuꞌn, tzin nkbaꞌna cyjulu:

8‘Ntzkiꞌna jbaꞌn ma bint cyuꞌna. Lu ma jket wuꞌna jun ttzi jaaꞌ cywitza, bix min-al jun xjal jacꞌa bint tuꞌn tlemet tuꞌn, cuma amale yaaꞌnt nim cyipemala, pero ma chi binchana nyola, bix min ma cub cyewena cyocslabla wiꞌja cywitz xjal.

9Cꞌoquel cycꞌuꞌja tiꞌj lu. Kej xjal tzin cykbaꞌn ka cytanem Dios pero nchi ẍtakꞌen cuma nuk oꞌcx ncheꞌx lpe tiꞌj tajbil taaw il, laꞌ alcye jun kꞌij chi tzaal wiiꞌna cywitza tuꞌn cycub maje cywitza, tuꞌntzen tel cyniyꞌ tiꞌj ka oc cyakꞌa weya.

10Cuma ma tziyꞌx qꞌuixcꞌaj cyuꞌna tuꞌn tlaj cyocslabla wiꞌja, juꞌ tzunj cxeꞌl ncꞌojlaꞌna ejeeꞌy oj tul jjawnex pena tibaj cykilca xjal twitz txꞌotxꞌ tuꞌn tchicꞌajax tiiꞌn tnaabl teeyle juun xjal.

11Tujx najtl oj wul meltzꞌaja. Jcyocslabla nxiꞌ cyiiꞌna, miꞌn cyaj cycyeꞌyena, tuꞌntzen miꞌn tel kꞌiꞌn cycotza oj wula.

12Alcyekej ma chi xcye tiꞌj taaw il, cxeꞌl nkꞌoꞌna cye tuꞌn cycyaj ten te junx maj tuya Nmana Dios, tisenj jun tken jaaꞌ mlay tzꞌetz. Bix cꞌoquel ntzꞌiꞌbena tbi Nmana Dios tibaj cywitz, tuyax tbi jtnom te Dios cweletz tuꞌn Dios tuj cyaꞌj, jaj acꞌaj Jerusalén, tuꞌntzen tchicꞌajax ka t-xjal Dioske bix ka ttanem Dioske. Jax juꞌx cꞌoquel ntzꞌiꞌbena j-acꞌaj nbiꞌya tibaj cywitz.

13Cyjkom cyẍquina tuꞌn tel cyniꞌya tiꞌj ti jilel tzin tkbaꞌn Espíritu Santo te cyey, ejeeꞌy ocslal,’ tz̈i Jesús cyey aj Filadelfia,” tzꞌiꞌbeqꞌuey.

Jun tumel cye ke ocslal tuj tnom Laodicea

14Yaltzen te tej nejenel cye ocslal tuj Laodicea, tzꞌiꞌbeqꞌuey cyjulu: “Inayena, jxjal jaxxix, jxjal njapan tiꞌ tyol, jun tstiwa jiquenxix, bix jxjal e takꞌ Dios te tuꞌn tcub tbinchan twitz txꞌotxꞌ bix twitz cyaꞌj, tzin nkbaꞌna cyjulu:

15‘Ntzkiꞌna jma bint cyuꞌna. Yaaꞌn chewꞌ eteꞌy bix yaaꞌn cyakxix eteꞌy. Baꞌnxitpele chewꞌ eteꞌy bix ka cyak eteꞌy.

16Cuma yaaꞌn chewꞌ eteꞌy bix yaaꞌn cyak eteꞌy, sino nuk oꞌcx skꞌula eteꞌy, juꞌ tzunj qꞌueletz ntzuꞌbena ejeeꞌy tuj ntziya.

17Tzin cykbaꞌna ka kꞌinakey bix at nim cykꞌinemala, bix mintiiꞌtl chꞌin palt cyey, tz̈ikey. Min tzꞌel cyniꞌya tiꞌj ka tuj bis eteꞌy bix mintiiꞌ baꞌn at te cyey. Mebekey, bix mos̈key, bix mintiiꞌ cyxbalena.

18Juꞌ tzunj, nuk nkbaꞌna cyey cylokꞌonxa oro weya, jun wik oro ma cyaj sak tuꞌn kꞌakꞌ, tuꞌntzen cyoca kꞌina. Bix cylokꞌonxa sak xbalen weya tuꞌn toc cyiꞌja, tuꞌntzen mintiiꞌ cychꞌixewa. Bix cylokꞌonxa remeda tiꞌ tbakꞌ cywitza weya, tuꞌntzen cycyeꞌyena.

19Kej xjal n-oc cyakꞌ weya, chi oquel ncawena bix ctzaal tkꞌoꞌn jun cycastiwa, tuꞌntzen cyxiꞌ tuj tumel. Juꞌ tzunj, cꞌoquelxix takꞌ Dios cyey tuya cykil cycꞌuꞌja, bix cyjel cykꞌoꞌna cyila.

20Lu kena ntiina ttziiꞌ cyanema bix n-oc ntcoꞌna tlemel cyanema. Ka at jun xjal ma tzꞌabinte nyola bix ka ma tzꞌocx tjkoꞌn tlemel jaaꞌ nwitza, chin oquexa tuya, bix chin waaꞌla tuya. Bix jax cwaaꞌl wuyena.

21Alcyekej ma chi xcyey tiꞌj taaw il, cxeꞌl nkꞌoꞌna cye tuꞌn cycub ke wuyena jaaꞌ chin cawela tuj nkꞌukbila, tisenj weya in xcyeya bix e tzaj tkꞌoꞌn Nmana Dios weya tuꞌn ncub keya tuyaxin jaaꞌ ncawenxin tuj tkꞌukbilxin.

22Cyjkom cyẍquina tuꞌn tel cyniꞌya tiꞌj ti jilel tzin tkbaꞌn Espíritu Santo te cyey, ejeeꞌy ocslal,’ tz̈i Jesús cyey aj Laodicea,” tzꞌiꞌbeqꞌuey―tz̈i Jesús weya.