GÁLATAS 2 - Mam of Todos Santos -- Guatemala Unicode

1Tbajlenxitltzen cyajlaaj jnabkꞌi nxiꞌlena Jerusalén tneel maj, in xiꞌya juntl maj tuj Jerusalén. E xiꞌ Bernabé wuyena, bix jax e xiꞌ wiiꞌna Tito.

2Pero in xiꞌya nuk oꞌcx tuꞌn jun tumel otk tzaj tkꞌoꞌn Dios weya. Min in xiꞌya tuꞌn cyajbil xjal. Bix in yolena cyuya nejenel cye ocslal, tuꞌn t-xiꞌ ntxꞌolbaꞌna alcyej xnakꞌtzbil nxiꞌ nkꞌumena cyej xjal yaaꞌn judío, tuꞌntzen miꞌn chi kꞌojl tiꞌj waakꞌena nbint wuꞌna bix otk bint wuꞌna, tuꞌn miꞌn txiꞌ waakꞌena tuj il.

3Bix e cycuyaxin wuyena mintiiꞌ il tiꞌj tuꞌn tel keset ttzꞌumel ttzꞌalbil jun xjal tuꞌn tclet, tisen tzin cykbaꞌn kej xjal judío. Cꞌoquel cycꞌuꞌja tiꞌj ti e bint tiꞌ Tito, jxjal e xiꞌ wiiꞌna. Mi nuket jaxin min e cykbaxin tuꞌn tel keset-xin, amale yaaꞌnt judíoxin.

4In yolena cyuya nejenel cye ocslal nuk oꞌcx tuꞌn miꞌn tzꞌoc cycꞌuꞌj tiꞌj cyyol kej xjal tzin cykbaꞌn ocslalke pero ẍtakꞌke. Tuya ẍtakꞌ cyyol, ocx ke ẍtakꞌ ocslal kxola, ejooꞌya ocslal tuj Jerusalén. Nuk oꞌcx oc cycwent-xin tiꞌj ka nko nimana cycostumbre judío bix ka min. Cycyꞌixin tuꞌn ktzakpet tiꞌ kil nuk tuꞌnj kmojbabl kiib tuya Cristo Jesús. Nuk oꞌcx cyajxin tuꞌn kten tjakꞌ tley Moisés, tisen jun xjal ẍpoꞌn.

5Pero mi nuket jun minuto in keya tuyaj cyajbilxin, cuma ilxsen tiꞌj tuꞌn tcyaj jaxxix jxnakꞌtzbil tiꞌj colbil ke cyxola.

6Yaltzen kej nejenel cye ocslal tuj Jerusalén, tzꞌaklxix el nxnakꞌtzbila tuj cywitzxin. Tzin cykbaꞌn tzpetsal ka mas tzꞌaklxix cyxnakꞌtzbil t-xel Jesús twitzj weya nxnakꞌtzbil, cuma e ten ke t-xel Jesús tuyaxin nejl. Pero yaaꞌn il tiꞌj tuj nwitza ka mas jawnex niyꞌtl ke t-xel Jesús tuj cywitz tzpetsal cyxola, cuma tuj twitz Dios min-al jun xjal mas jawnex twitz juntl.

7Pero cyej t-xel Jesús tuj Jerusalén, min e kꞌojlke wiꞌja, sino e cycuyaxin jweya nxnakꞌtzbil. El cyniyꞌxin tiꞌj otk tzaj tkꞌoꞌn Dios jjaxxix xnakꞌtzbil tiꞌj colbil ke weya tuꞌn t-xiꞌ nkꞌumena cyej xjal yaaꞌn judío, jax tisenj otk tzaj tkꞌoꞌnxin te Pedro tuꞌn t-xiꞌ tkꞌumen cyej xjal judío.

8El cyniyꞌxin tiꞌj tisen oc tkꞌoꞌn Dios tipemal Pedro tuꞌn tajben te t-xel Jesús cyxol xjal judío, jax oc tkꞌoꞌn Dios wipemala tuꞌn wajbena te t-xel Jesús cyxol xjal yaaꞌn judío.

9Ja tzunkej ocslal crinsipal tuj cywitz cykil ocslal, ja Jacobo, Pedro, bix Juan, el cyniyꞌxin tiꞌj otk tzaj tkꞌoꞌn Dios t-xtalbil weya tuꞌn wakꞌanana tuj taakꞌenxin. Juꞌ tzunj, e tzaj cykꞌoꞌnxin cykꞌabxin weya bix te Bernabé te yecꞌbil baꞌn tuj cywitzxin tuꞌn t-xiꞌ nkꞌumena tyol Dios tuya Bernabé cyxol xjal yaaꞌn judío, joocꞌtzen ejeeꞌxxin tuꞌn t-xiꞌ cykꞌumen cyxol judío.

10Nuk oꞌcx oc cyocsaꞌnxin ncꞌuꞌja tuꞌn miꞌn cyaj ncyeꞌyena tuꞌn t-xiꞌ wonena kej judío mebe, bix tuꞌn ja lu e ncuyana tuya cykil ncꞌuꞌja.

Tej toc tile Pablo ja Pedro tuj tnom Antioquía

11Mas yaj, e yecꞌj juntl maj e tzaj nxnakꞌtzbila tuꞌn Dios, yaaꞌn cyuꞌn t-xel Jesús. Tej tpon Pedro tuj tnom te Antioquía, il tiꞌj oc wilen xina tibajcꞌa twitzxin oca nkbaꞌna, cuma min e tnimaxin jaxxix jxnakꞌtzbil.

12Tuj tneel, baꞌn e bint tuꞌnxin, cuma e waaꞌnxin cyuyaj cykil ocslal, amale atet juun yaaꞌn judío. Pero tej cypon cab judío tuj tnom smaꞌn tuꞌn Jacobo, akꞌ elel tpaꞌn tiibxin cyiꞌ ocslal yaaꞌn judío, cuma at cytz̈i judío tiꞌjxin, cuma tzin cykbaꞌn judío nchucj jun xjal twitz Dios ka ma waaꞌn cyuyaj xjal yaaꞌn judío.

13Bix cuma yaaꞌn junx j-e bint tuꞌnxin tuyaj e xiꞌ tkꞌumenxin, bix el cypaꞌn cyiib niyꞌtl ocslal judío tuj Antioquía cyiꞌj ocslal yaaꞌn judío, amale elet cyniyꞌxin tiꞌj baꞌn tuꞌn cywaaꞌnxin junx cyuya cykil ocslal. Hasta Bernabé e cub tiꞌj cyuꞌn judío tuꞌn miꞌn waaꞌnxin cyuyaj ocslal yaaꞌn judío.

14Pero tej t-xiꞌ ncyeꞌyena yaaꞌn junx cybinchbenxin tuyaj jaxxix xnakꞌtzbil tiꞌj colbil ke, e xiꞌ nkbaꞌna te Pedro twitz cykil ocslal: “Jun judío tey, pero o tzakpeta tiꞌj cyley judío, bix nwaaꞌna tisenx tten cyuꞌn xjal yaaꞌn judío. Juꞌ tzunj, ¿tikentzen tzin tyeecꞌana il tiꞌj tuꞌn cyniman xjal yaaꞌn judío cyley judío tuꞌn cyel baꞌn twitz Dios?

15Amale judíot koꞌ cuma judío ke kiyꞌjil, bix yaaꞌn jun wikxitl xjal koꞌ min e kiikꞌ ley te Moisés,

16pero el kniyꞌ tiꞌj jun xjal jiquen twitz Dios nuk oꞌcx tuꞌnj tocslabl tiꞌ Jesucristo, yaaꞌn tuꞌn tbinchan alcyej tzin tkbaꞌn tley Moisés. Juꞌ tzunj, amale judíot koꞌ, pero o ko ocslan tiꞌ Cristo Jesús, tuꞌntzen jiquen koꞌ twitz Dios tuꞌn kocslabl tiꞌ Cristo. Min o ko clet tuꞌnj knimbil tiꞌ tley Moisés, cuma min-al jun xjal n-el jiquen twitz Dios tuꞌnj tnimbil tiꞌ tley Moisés.

17Pero ka jax cyuꞌn judío oc koꞌ te aj il tisen kej xjal yaaꞌn judío tej kocke jiquen twitz Dios nuk oꞌcx tuꞌn Cristo, bix yaaꞌntl tuꞌnj jknimbil tiꞌ tley Moisés, tuꞌn tzunj Cristo o ko oc aj il. Cxeꞌl nkanena tey, ¿tumelpa tuꞌn t-xiꞌ kkbaꞌn tuꞌn Cristo nko oc te aj il? ¡Min!

18Katzen ma tzꞌoc ke kcꞌuꞌj tiꞌj knimbil tiꞌ ley tuꞌn koc jiquen twitz Dios, tzin kyeecꞌan min tzꞌoc kbiꞌn ley,

19cuma e tkba ley kiꞌj mlay ko oc jiquen twitz Dios tuꞌnj knimbil tiꞌ ley. Juꞌ tzunj, ya mintl n-oc wipena tiꞌj tuꞌn woca jiquen twitz Dios tuꞌn ley, tuꞌntzen woca jiquen nuk oꞌcx tuꞌnxin, tuꞌn wajbena nuk oꞌcx texin.

20Te junx maj ma tzꞌoc ke ncꞌuꞌja nuk oꞌcx tiꞌ Cristo e jaw kꞌoꞌn twitz cruz te nxela. Ya miꞌntl txiꞌ njyoꞌna nchunkꞌlala tuꞌnj weya nbinchben, sino at nchunkꞌlala tuꞌn Cristo najl tuj wanema. Jchunkꞌlal nxiꞌ wiiꞌna jaꞌlewe, ma tzaj kꞌoꞌn weya tuꞌnj wocslabla tiꞌj Tcwal Dios, jaj xjal oc wakꞌa te, bix e cyimxin te nxela.

21Miꞌn cyaj ncyeꞌyena t-xtalbil Dios weya. Nuket nko oc jiquen twitz Dios tuꞌnj kbinchben tjakꞌ ley, nukettzenle ganax e cyim Cristo,” ntz̈iya te Pedro.