COLOSENSES 1 - Mam of Todos Santos -- Guatemala Unicode

Jun kꞌolbebl tuꞌn apóstol Pablo

1Inayena Pablo. Dios o scyꞌonte weya tuꞌn wajbena te jun t-xel Jesucristo. At hermano Timoteo wuyena.

2Nxiꞌ ntzꞌiꞌbena ja uꞌj lu te cyey ocslal tuj tnom te Colosas, ejeeꞌy hermano cyiw eteꞌy tuj cymojbabl cyiiba tuya Cristo, jxjal e tscyꞌo Dios tuꞌn tcawen. At-xit t-xtalbil Kman Dios cyibaja, bix tzajxit tkꞌoꞌnxin cyey tuꞌn cytena tuj ttz̈yal.

Tej tnaꞌn Pablo Dios cyiꞌj ocslal

3Jaca maj oj nchin naꞌna Dios, Tman Kaaw Jesucristo, nxiꞌ nkꞌoꞌna chjonte texin cyiꞌja.

4Nchin kꞌona chjonte texin, cuma ma nbiꞌya ma tzꞌoc ke cycꞌuꞌja tiꞌ Cristo Jesús, bix cuma n-oc cyakꞌ cykil ocslal cyey.

5Bix chjonte te Dios at jun baꞌn te cyey kayon cyiꞌja tuj cyaꞌj. Tpocbalj tbanel e cub cybiꞌna tej tpon jaxxix yol tiꞌj colbil cyey cyxola.

6Bix tisen ma pon pocbablte colbil cyey cyxola, jax ma pon tuj nimtl tnom. Bix tisen jawne njaw tz̈ꞌiy jun awal, jaxse juꞌx ntz̈ꞌiy tyol Dios tuj cykilca twitz txꞌotxꞌ. Bix jaxse juꞌx cyxola, jatxe tej cybintiya jjaxxix yol tiꞌj colbil cyey, bix el cyniꞌya tiꞌj ka jaxxix, otzen cub cychꞌixpuꞌna cynaabla.

7Ja tzunj baꞌn xnakꞌtzbil lu tiꞌj colbil cyey, jaj xin Epafras e pon kꞌinte cyey. Jaxin jun wuyena tuj taakꞌen Cristo. N-oc takꞌxin weya, bix nakꞌananxin cyiw tuj taakꞌen Dios. Ma tzꞌajbenxin te jun nxela baꞌn tuj akꞌuntl cyxola.

8Bix ma tzaj tkbaꞌnxin weya nim n-oc cyakꞌ niyꞌtl ocslal cyey, cuma at Espíritu Santo cyuyey.

9Yal weya, jatxe tej nbintiya e cyocslay Cristo, min ma cyaj nkꞌoꞌna tuꞌn nnaꞌna Dios cyiꞌja. Nchin kanena texin tuꞌn tel cyniꞌya tiꞌj tajbilxin tuꞌnj cyilbila kꞌoꞌn tuꞌn Espíritu Santo bix tuꞌnj ti tten tuꞌn tel cyniꞌya tiꞌj alcyej jaxxix bix alcyej ẍtakꞌ,

10tuꞌntzen t-xiꞌ cyiiꞌna cychunkꞌlala baꞌnxix twitz Kaaw, tuꞌn ttzalajxin cyiꞌja tuj cykilca nbint cyuꞌna. Nchin kanena texin tuꞌn cybinchana baꞌn cye cabtl, bix tuꞌn tel mas cyniꞌya tiꞌjxin.

11Nimxsen tipemalxin, bix nchin kanena texin tuꞌn cycywixa tuꞌn jawnex tipemalxin, tuꞌntzen cyweꞌxixa tuya pasyensya bix tzalajebl oj n-oc qꞌuixcꞌaj cyiꞌja.

12Bix nchin kanena te Kman Dios tuꞌn cykꞌontiya chjonte texin tuj cyanema. Tuꞌnxin ma ko chꞌixpet, tuꞌntzen at koclen tuꞌn kiikꞌente kkab ctzaal tkꞌoꞌnxin te ke, ejooꞌ ocslal.

13Ma ko etz tiiꞌnxin tjakꞌ tcawbil taaw il, bix ma cub tkꞌoꞌnxin ejooꞌ tuj tcawbil Tcwalxin, jxin Cristo n-oc takꞌ texin.

14Nuk tuꞌn tcyimlen Tcwalxin ma chjet kil bix ma cub najset.

Ma bint kten tuya Dios tuꞌn tcyimlen Cristo twitz cruz

15Key hermano, ja tzunj xin Tcwal Dios lu tzin techlaꞌn te ke tiiꞌn Dios, cuma min chicꞌaj Dios. Mas jawnex Tcwal Dios cyxol cykilca xjal bix at-xin tibaj cykilca.

16Mas jawnexxin, cuma tuꞌnxin e bint cykilca at. E tbinchaxin cykilca at twitz cyaꞌj bix cykilca at twitz txꞌotxꞌ. E tbinchaxin cykilca chicꞌaj bix cykilca yaaꞌn chicꞌaj. Kej nejenel aj te tuj cyaꞌj bix alcyejtl-le nchi cawen, e tbincha Tcwal Dios cykilca. Jaxin binchalte cykilca at, bix cykilca at te tajbel texin.

17E tenxin tuj tneel tej mitknaꞌx tbint twitz cyaꞌj bix twitz txꞌotxꞌ, bix tuꞌn tipemalxin at cykilca tuj tumel. Kꞌiꞌn tuꞌnxin cykilca at.

18Bix tisen ncawen kwiꞌ tibaj kxumlal, juꞌtzen nejenelxin kibaj cykilca koꞌ ocslal. Bix jaxin tneel xjal tuꞌn tjatz itzꞌj juntl maj tuj cyamecy te junx maj, tuꞌntzen tocxin te Cawel tibaj cykilca, hasta tibaj cyamecy.

19Tzin techlaꞌnxin tiiꞌn Dios, cuma e tajbe Kman Dios tuꞌn tkꞌoj texin cykilca tipemal bix tnaabl Dios.

20Bix e tajbe Dios tuꞌn tten cykilca at twitz cyaꞌj tuyaj cykilca at twitz txꞌotxꞌ tuj ttz̈yal tuya Dios nuk tuꞌn Cristo. Bix tuꞌn tcyamecyxin twitz cruz e bint tuꞌn Dios tuꞌn tbint kten tuya Dios.

21Yaltzen cyey, nejl cycyꞌiy Dios. Oc cykꞌoja tiꞌjxin tuj cyanema, bix nuk kaꞌ e cybinchay.

22Pero amale aj iletkey nejl, pero jaꞌlewe ma bint tuꞌn Dios tuꞌn tbint cytena tuyaxin. Tuꞌn tcyamecy Tcwalxin tej toc te xjal, chi pomela sakxix bix mintiiꞌ cyila bix mintiiꞌ cypalta twitzxin.

23Pero chi pomela nuk ka wiꞌlxix cyocslabla tiꞌ Cristo bix ka min cyaj cycyeꞌyena tuꞌn cyayona tiꞌj tbanel ctzaal tkꞌoꞌn Dios cyey. Ja yol lu tiꞌj colbil cyey ma tzꞌoc cybiꞌna, jaxj yol nkꞌumj tuj cykilca twitz txꞌotxꞌ. Tuꞌn t-xiꞌ npocbaꞌna ja yol lu e tscyꞌo Dios inayena.

Jun taakꞌen Pablo tuꞌn tajben cyxol ocslal

24Nchin tzalaja tzalu tuj tzeeꞌ, cuma ma takꞌ Dios weya tuꞌn tiyꞌx qꞌuixcꞌaj wuꞌna tuj taakꞌen Cristo. Jqꞌuixcꞌaj niyꞌx wuꞌna najben tuꞌn cytz̈ꞌiya tuj cyocslabla, bix n-el nniꞌya tiꞌj jniyꞌx wuꞌna tuj nxumlala cꞌajbel cye t-xjal Cristo.

25Jweya waakꞌen tuꞌn wajbena cye t-xjal Cristo, te cyey ocslal yaaꞌn judío, cuma e jaw tscyꞌoꞌn Dios inayena tuꞌn wajbena cyej xjal yaaꞌn judío. Tajxin tuꞌn tabij tyolxin cyuꞌn cykil xjal.

26Jatxe tuj tneel, eꞌwen taꞌ ja tyolxin lu cywitz xjal. Pero jaꞌlewe, ma yecꞌaj te cyej xjal o chi oc te t-xjalxin.

27E tajbexin tuꞌn tyeecꞌanxin cye t-xjalxin jawnexsen jun xtalbil o baj tnincꞌuꞌnxin, tuꞌn ttzaj tkꞌoꞌnxin cyexin, judíole, yaaꞌnle judío. Bix ja jawnex tyolxin lu eꞌwen taꞌ nejl, pero chicꞌaj jaꞌlewe, jaj tuꞌn tocx Cristo tuj kanem, tuꞌntzen kpon junx tuyaxin tuya Dios.

28Juꞌ tzunj, nuk tiꞌj Cristo nchin yolena oj nxiꞌ nkꞌumena cye xjal. Nxiꞌ ncubsaꞌna nwitza cye cykil xjal tuꞌn cyocslan tiꞌjxin, bix tuj tumel nxiꞌ nkꞌoꞌna xnakꞌtzbil tiꞌjxin cye cykil xjal, tuꞌntzen cypon tzꞌaklxix twitz Dios tuꞌnj cymojbabl cyiib tuya Cristo.

29Tuꞌn cypon tzꞌakl, nchin akꞌanana cyiw. Nim n-oc wipena tiꞌj, bix ma tzaj tkꞌoꞌn Cristo tipemal weya tuꞌn tbint wuꞌna.