SAN JUAN 21 - Mam of Todos Santos -- Guatemala Unicode

Tej tjaw jlet Jesús cywitzj wuuk t-xnakꞌatzxin

1Tul-len jlet Jesús cyxol t-xnakꞌatzxin, bix e cub tyeecꞌan tiibxin juntl maj cywitz juun t-xnakꞌatzxin ttziiꞌ tnijabel aꞌ Tiberias. Juꞌtzen tten e cub tyeecꞌanxin tiibxin.

2Oc cychmon cyiib Simón Pedro tuyax Tomás ja yoẍ, tuyax Natanael, aj Caná tuj departamento te Galilea, cyuyax tcwal jxin Zebedeo, bix cyuyax caꞌbatl t-xnakꞌatz Jesús.

3E xiꞌ tkbaꞌn Simón Pedro cyexin:

—Weya, ma chixa tzyul quis̈―tz̈ixin.

—Jax juꞌx keya, ma koꞌxa tuyey―tz̈ikexin.

Exkexin, bix ocxkexin tuj jun choc, bix e baj akꞌbil cyuꞌnxin tuj tnijabel aꞌ, pero mi nuket jun quis̈ e tzyet cyuꞌnxin.

4Tej kskix, lu Jesús waꞌlcꞌa ttziiꞌ aꞌ. Pero min el cyniyꞌ t-xnakꞌatzxin tiꞌj ka jaxin.

5Juꞌ tzunj, e xiꞌ tkbaꞌnxin cyexin:

—Jeyꞌ, key kꞌa, ¿atpa quis̈ xtzyet cyuꞌna?―tz̈ixin.

—Mintiiꞌ, taat.

6Juꞌ tzunj, e xiꞌ tkbaꞌnxin cyexin:

—Cyxooꞌnxsa cyxiyꞌpay tuj aꞌ tuj mankꞌab te choc, bix ctzyetel quis̈ cyuꞌna―tz̈ixin.

E cycuyaxin, bix tej cyakꞌxin tuꞌn tjatz cyiiꞌnxin cyxiyꞌpaxin tuj choc, ya min e bint cyuꞌnxin tuꞌnj nimxsen tajlal quis̈.

7Ja tzunj xin t-xnakꞌatz Jesús oc takꞌ te, tej tlontexin tipemal tyol jxjal ttziiꞌ aꞌ, e xiꞌ tkbaꞌnxin te Pedro:

—¡Jaja Cawel kxol!―tz̈ixin.

Tej tel tniyꞌ Pedro tiꞌj ka ja Cawel cyxol, oc tẍpoꞌnxin t-xbalenxin tiꞌjxin, cuma otk tzꞌel tiiꞌnxin tuꞌn takꞌananxin, bix e cuꞌxxin tuj aꞌ.

8E cub t-xooꞌn tiibxin tuj aꞌ cuma yaaꞌn nakch taꞌ choc ttziiꞌ txꞌotxꞌ, sino nuk jun syent vara taꞌ. Yal kej niyꞌtl t-xnakꞌatzxin, e tzajkexin tuj choc, kitentzen cyxiyꞌpaxin nojne cyuya quis̈.

9Tej cyiꞌyelxin twitz txꞌotxꞌ, e cyilxin otk cub pekꞌch jun kꞌakꞌ tuya txal kꞌaꞌl, bix ntxeet quis̈ tibaj, tuyax waabj.

10E xiꞌ tkbaꞌn Jesús cyexin:

—Cyiiꞌntza caꞌba oxe quis̈ xtzyet cyuꞌna jatxe mayꞌ―tz̈ixin.

11Ocxtzen Simón Pedro tuj aꞌ, bix e tzaj tkitenxin xiyꞌpa, tuꞌntzen tiꞌyel ttziiꞌ aꞌ. Nojne xiyꞌpa cyuya nmak quis̈. At jun syent tuya cyaꞌwnak tuya oxlaaj quis̈. Pero amale nimet, pero min e cub rotj xiyꞌpa.

12Bix e xiꞌ tkbaꞌn Jesús cyexin:

—Chi tzaja, bix chi waaꞌna―tz̈ixin.

E cycuyaxin, bix min-al e xiꞌ tkanen texin alcyexin, cuma el cyniyꞌxin tiꞌj ka ja Cawel cyexin.

13E xiꞌ ttzyuꞌn Jesús jwaabj, bix e xiꞌ tkꞌoꞌnxin cyexin, bix jax e xiꞌ tkꞌoꞌnxin quis̈ cyexin.

14Tej t-xiꞌ tkꞌoꞌn Jesús waabj cye t-xnakꞌatz, toxentzen maj e cub tyeecꞌan tiibxin cywitzxin tjatzlen itzꞌjxin tuj cyamecy juntl maj.

Cꞌojlanx kej ncarnela, tz̈i Jesús te Pedro

15Tejtzen cybaj waaꞌnxin, e xiꞌ tkbaꞌn Jesús te Simón Pedro:

—Simón, tcwal Jonás, ¿n-ocpa wakꞌa tey mas twitzj taakꞌena te tzyul quis̈?―tz̈ixin.

—Tzin, taat. Tzkiꞌn tuꞌna n-oc takꞌa weya―tz̈i Pedro.

E xiꞌ tkbaꞌnxin te Pedro:

—Ka juꞌ tten, cꞌojlanx kej xjal lepchec wiꞌja, tisenj jun cylel ncꞌojlan ke tal carnel―tz̈ixin.

16Juntl maj e xiꞌ tkanenxin te Pedro:

—Simón, tcwal Jonás, ¿n-ocpa wakꞌa tey?―tz̈ixin.

Aj ttzakꞌbeꞌn Pedro:

—Tzin, taat. Tzkiꞌn tuꞌna n-oc takꞌa weya―tz̈i Pedro.

—Cꞌojlanx kej xjal lepchec wiꞌja―tz̈i Jesús.

17Bix te toxen maj e xiꞌ tkanenxin te Pedro:

—Simón, tcwal Jonás, ¿n-ocpa wakꞌa tey?―tz̈ixin.

Cuma otk tzaj tkanenxin toxen maj: “¿N-ocpa wakꞌa tey?” juꞌ tzunj e tzaj tbis Pedro, bix e xiꞌ tkbaꞌn te Jesús:

—Taat, tzkiꞌn tuꞌna cykilca. Tzkiꞌn tuꞌna n-oc takꞌa weya―tz̈i Pedro.

Bix e xiꞌ tkbaꞌn Jesús te Pedro:

—Cꞌojlanx kej xjal lepchec wiꞌja.

18Jaxxix cxeꞌl nkbaꞌna tey, tej cwalx tey, e tbincha tey tajbila. N-oc tẍpoꞌna t-xbalena tcyꞌitza, tuꞌntzen t-xiꞌy nuk jaaꞌxja taja. Pero oj ttiina, juntl xjal cꞌoquel ẍponte tey, bix cxeꞌl tiiꞌn jay jaaꞌ tcyꞌiy tuꞌn t-xiꞌy. Bix cxeꞌl tnukpiꞌna tkꞌaba―tz̈ixin.

19E xiꞌ tkbaꞌnxin jlu tuꞌn tyeecꞌanxin ti tten tuꞌn tcyim Pedro, bix at tjawlel tnimsaꞌn Pedro tbi Dios tuꞌn tcyamecy.

Tej tkbantexin jlu, e xiꞌ tkbaꞌntlxin te Pedro:

—Ttzaja wuyena―tz̈ixin.

Jun t-xnakꞌatz Jesús nim oc takꞌ texin

20E tcuya Pedro, bix tej nchi etz lkꞌekexin cyiꞌ niyꞌtl t-xnakꞌatzxin, ajtz tcyeꞌyen Pedro tiꞌj, bix e til lepchec cyiꞌjxin jt-xnakꞌatzxin oc takꞌ te Jesús, jatzenj t-xnakꞌatzxin otk cub ttxlaj Jesús tej cywaaꞌnxin mancꞌbil maj tuyaxin, bix otk txiꞌ tkanen texin: “Taat, ¿alcyej kxola cxeꞌl tqꞌueyen jay tuj cykꞌab byol xjal?”

21Bix tej tlonte Pedro ja t-xnakꞌatzxin lu toc lpe cyiꞌjxin, e xiꞌ tkbaꞌnxin te Jesús:

—Taat, yaj tzunj t-xnakꞌatza lu, ¿ti pjel texin oj ttiinxin?―tz̈i Pedro.

22E xiꞌ tkbaꞌn Jesús texin:

—Ka waja tuꞌn tcyajxin iꞌtz hasta ojxe wul meltzꞌaja, mintiiꞌ tey taj te. Tey, il tiꞌj tuꞌn t-xiꞌ lpey wiꞌja―tz̈ixin te Pedro.

23Cuma otk txiꞌ tkbaꞌnxin ja yol lu, juꞌ tzunj tuj cywitz ocslal mas yaj, yaaꞌn tuꞌn tcyim ja t-xnakꞌatzxin lu. Pero yaaꞌn juꞌwa, cuma min e xiꞌ tkbaꞌn Jesús te Pedro tuꞌn miꞌn tcyim ja juntl t-xnakꞌatzxin. Nuk oꞌcx e xiꞌ tkbaꞌnxin: “Ka waja tuꞌn tcyajxin iꞌtz hasta ojxe wul meltzꞌaja, mintiiꞌ tey taj te.”

24Inayena jt-xnakꞌatzxin e wila cykilcaj e baj, bix e cub ntzꞌiꞌbena ti e baj. Bix ntzkiꞌna jaxxix yol cykilcaj ma cub ntzꞌiꞌbena.

25At nimtl e bint tuꞌn Jesús min ma cub ntzꞌiꞌbena. Nuket ma cub ntzꞌiꞌbena cykilcaj tbinchbenxin, tuj nwitza mlayle bint tuꞌn tcnet lugar twitz txꞌotxꞌ tuꞌn cyten libro tuꞌn tcub tzꞌiꞌbet cykilca.

Oꞌcx nyolja.