SAN MATEO 28 - Mam of Todos Santos -- Guatemala Unicode

Tej tjatz itzꞌj Jesús(Mr. 16:1-8; Lc. 24:1-12; Jn. 20:1-10)

1Tbajlenxitzen jkꞌij te ajlabl, tej chꞌitk kskix tuj tneel kꞌij te smant, ja tzunj xuj María Magdalena, tuya juntlxuj María, ul cyeꞌyelte tjayel Jesús.

2Tisen tiiꞌ tej ttzaj jun nintzaj xcyaklajnab, bix e cuꞌtz jun tsanjel Dios tuj cyaꞌj, bix el tiiꞌn jxak ttziiꞌ tjayel anem, bix e cub ke ángel tibaj xak.

3Tzinxsen ntxakakan, tisen jun tken kꞌancyok, bix sakxix t-xbalen tisen skbaken.

4Jatzen ke soldado, e tzaj luꞌlenkexin tuꞌn ttz̈i ángel cyiꞌjxin, bix ya min e yucchkexin, tisen ke cyimne.

5Bix e xiꞌ tkbaꞌn tsanjel Dios cye xuuj:

—Miꞌn chi jaw seyꞌpaj cyey. Ntzkiꞌna nchi jyon cyey t-xumlal Jesús, jxin e jaw twitz cruz.

6Pero ya min-altl texin tzalu, cuma ma jaw itzꞌjxin juntl maj, tisen e tkbaxin. Cycyeꞌyenctz. Min-alxin jaaꞌj ocxexin.

7Cyucxa naja cykbaꞌxsen cye t-xnakꞌatzxin ma jatz itzꞌjxin juntl maj tuj cyamecy, bix cxeꞌl nej texin cywitz tuj Galilea, jatztzen cꞌoquel cycyeꞌyen jaxin. Lu ma txiꞌ nkbaꞌna cyey―tz̈i ángel.

8Entonces bix etz ajkelen kej xuj xuuj. E tzaj ttz̈i cyiꞌjxuj, pero jax juꞌx e tzalajkexuj. E xiꞌkexuj tuj ajkelbil kbalte tyol ángel cye t-xnakꞌatz Jesús.

9Pero jeyꞌ, oc nojtl Jesús cywitzxuj, bix e xiꞌ tkꞌoꞌnxin jun kꞌolbebl cyexuj. Bix e pon lkꞌekexuj tiꞌjxin, bix e cub majekexuj twitzxin tuꞌn cysukenxuj t-xeeꞌ tkenxin.

10Bix e xiꞌ tkbaꞌnxin cyexuj:

—Miꞌn tzaj ttz̈i cyiꞌja. Cyucxa cykbaꞌx xsuna cye nxnakꞌatza tuꞌn cyxiꞌ tuj Galilea, jatztzen cꞌoquel cycyeꞌyen inayena―tz̈i tzunxin.

Tej tul tumel cyuꞌn cꞌojlal ti otk baj

11Maatktzen xiꞌne cyxiꞌ kej xuuj lu, at juun cyxol soldado cꞌojlal tjayel Jesús e xiꞌ tuj Jerusalén, bix e xiꞌ cykꞌumen cye nejenel cye pala ti otk baj.

12Tejtzen cybinte pala cyyol soldado, e baj cychmon cyiib cyuya nintzaj xjal tuꞌn cyyolen tiꞌj cyxolx. E xiꞌ cykꞌoꞌn nim cypwak ke soldado,

13bix e xiꞌ cykbaꞌn cye:

—Cykbanx cye xjal: “Ul ke t-xnakꞌatz Jesús te koniyan bix etz cyalkꞌaꞌn t-xumlalxin tej nko wutana,” tz̈i cybela.

14Bix ka ma tbi gobernador etz kꞌiꞌn Jesús joocꞌtzen nchi wutana, cbinel tiꞌj kuꞌna tuyaxin tuꞌntzen miꞌn chi byeta―tz̈i nejenel cye judío cye soldado te Roma.

15E xiꞌ cyiiꞌntzen soldado pwak, bix e cybincha tisenx e tzaj cykbaꞌn cye. Ja ẍtakꞌ yol lu el tz̈itj cyxol judío, bix hasta jaꞌlewe at xjal tzin cybiꞌn.

Mancꞌbil tyol Jesús cye t-xnakꞌatz(Mr. 16:14-18; Lc. 24:36-49; Jn. 20:19-23)

16Yaltzen cye junlaaj t-xnakꞌatz Jesús, e ponkexin tuj Galilea, twiꞌ witz jaaꞌ otk tkba Jesús.

17Bix tej cylontexin Jesús, e jaw cynimsaꞌnxin jaxin. Pero at cab cyxolxin e baj cycꞌuꞌjxin ka yaaꞌn jaxin.

18Bix e xiꞌ tkbaꞌn Jesús cye t-xnakꞌatz:

—Ma tzaj kꞌoꞌn weya wipemala tuꞌn ncawena tibaj cykilca tuj cyaꞌj bix twitz txꞌotxꞌ.

19Juꞌ tzunj, cyucxa tuj cykilca tnom twitz txꞌotxꞌ te kbalte cye xjal tuꞌn cyoc nxnakꞌatza. Bix cybautizara cye te techel cywitz xjal ma txiꞌ cykꞌon cyiib te Dios Mambaj bix te Dios Cwalbaj bix te Espíritu Santo.

20Cyxnakꞌtzanx cye tuꞌn tbint cyuꞌn cykilcaj ma txiꞌ nkbaꞌna cyey. Bix chin temela cyuyey cykilca kꞌij, hasta ojxe tul mancꞌbil kꞌij―tz̈i Jesús cye t-xnakꞌatz.