SAN MARCOS 11 - Mam of Todos Santos -- Guatemala Unicode

Tej tocx Jesús tuj tnom Jerusalén(Mt. 21:1-11; Lc. 19:28-40; Jn. 12:12-19)

1Otktzen pon cana Jesús nka Jerusalén, cyuj tnom te Betfagé bix Betania, junx tuya jun witz Olivos tbi. Bix e xiꞌ tsmaꞌn Jesús caꞌba t-xnakꞌatz tuj jun cyej tnoma.

2Bix e xiꞌ tkbaꞌnxin:

—Cyucxatzen. Ojtzen cyocxa tuj jtnom, n-oc kcyeꞌyena. Cꞌoquel cycyeꞌyena junjil bur yoꞌlecjil, bix min-al jun xjal o jax ke tibajjil. Cypjumeljil bix cyiiꞌntz tzunjil.

3Katzen al ma tzꞌoc kanente cyey tiken n-el cypjuꞌn jila, cykꞌumenxse ka cꞌajbeljil te cyaawa, bix tzul tmeltzꞌuꞌn naj texin jajil―tz̈i Jesús.

4Entonces bix e xiꞌkexin, bix e cnet jjil bur cyuꞌnxin, ẍpoꞌnjil tuj be twitz tlemel jun jaaꞌ. Bix el cypjuꞌnxin jajil.

5Bix attzen cab xjal tcub tuj be, bix e xiꞌ cykanenxin cye t-xnakꞌatz Jesús:

—¿Titzen nbaj cyey? ¿Tikentzen n-eꞌla cypjuꞌna jil bura?―tz̈i tzunkexin.

6Bix aj cytzakꞌbeꞌnxin tisecaj otk tkba Jesús. Bix e cycuyan xjal tuꞌn t-xiꞌ cyiiꞌnxin bur.

7Bix e xiꞌ cyiiꞌnxin bur te Jesús, bix e jax cykꞌoꞌnxin cyxbalenxin tibajjil, bix e jax ke Jesús tibajjil.

8Bix e tzyet tbe Jesús, bix nimxse xjal oc lpe tiꞌj Jesús. Bix e cub cykꞌoꞌn xjal cyxbalen tuj tbe Jesús, bix atl xjal e cub kꞌonte tkꞌab xaꞌj tuj tbexin. Jatzen techelj oj tocx jun nin cawel tuj tnom.

9Bix cykilcaxse xjal nejl twitzxin bix lepch tzinxse nchi s̈-in:

—¡Ma tzul kaaw! ¡E tten tzunxin kuya nim kꞌij! ¡Cyꞌiwlaꞌnxit-xin, cuma ma tzulxin tuya tajwalelxin tuꞌn Dios!

10¡Cyꞌiwlaꞌnxit-xin, cuma ma tzul t-xeꞌchel David te cawel! ¡Axse tbanel!―tz̈i ke xjal.

11Juꞌtzen tten tocxlen Jesús tuj nin tnom te Jerusalén, jaj jun tnom mas nintzaj cyxol xjal judío. Tejtzen tocx Jesús tuj Jerusalén, bix e xiꞌxin tuj nin tja Dios te cyeyꞌlecxte tuj. Bix ajtz meltzꞌajxin tuya cycablajaj t-xnakꞌatzxin tuj tnom te Betania, cuma chꞌitk tex kꞌij.

Tej ttzkij tken higo tuꞌn tyol Jesús jaj mintiiꞌ twitz(Mt. 21:18-19)

12Tetzen juntl kꞌij bix ex Jesús cyuya t-xnakꞌatz tuj Betania. Tujtzen be bix oc takꞌ weyaj te Jesús.

13Nakchtzen e xaꞌ tcyeꞌyenxin jun wiꞌ loꞌpj higuera tbi. At nim t-xaak, tzin tyeecꞌan ka at twitz. Bix e xiꞌkexin te kꞌilbel twitz. Pero tejtzen cyponxin, mintiiꞌ twitz e cnet cyuꞌnxin.

14Juꞌ tzunj e xaꞌ tkbaꞌn Jesús te tken higuera:

—Junxse maj min-altl xjal cxeꞌl loꞌnte twitza, cuma mintiiꞌ twitza qꞌuelel―tz̈i Jesús te tzeeꞌ. Bix e cybi t-xnakꞌatz Jesús tyolxin te tzeeꞌ.

Tej tetz tlojoꞌn Jesús ke qꞌueyel tuj tja Dios(Mt. 21:12-17; Lc. 19:45-48; Jn. 2:13-22)

15Bix e ponkexin tuj tnom te Jerusalén. Tejtzen cyponxin, bix ocx Jesús tuj nin tja Dios. Bix akꞌxin lojolbetz cyej xjal nchi qꞌueyen bix nchi lokꞌon tuj tja Dios, cuma oc tcyeꞌyenxin tja Dios tisen jun plasen. Bix e jaw tpacꞌtzꞌenxin kej mes cyej xjal chꞌixbel pwak te Roma te pwak te Israel tuꞌn tocx cychojentj xjal te tja Dios, bix e jaw tpacꞌtzꞌenxin kej cykꞌaꞌj xjal nchi qꞌueyen cucuꞌ te juntl wik tuꞌn t-xiꞌ cyoyenxin te Dios.

16Bix min e tcuyaxin tuꞌn cyex xjal tuj tja Dios tuya tikꞌch kꞌiꞌn cyuꞌn, cuma nim xjal ex tuj tja Dios cuma nkatzen chꞌintl be.

17Bix akꞌxin kbalte cye xjal tiken e tbinchexin juꞌwa:

—Tz̈i tuj tyol Dios cyjulu: “Weya nja te nabl wewa cyuꞌn xjal tuj cykil twitz txꞌotxꞌ,” tz̈i Dios. Pero yaltzen cyey, matzen cub meltzꞌaj tja Dios cyuꞌna tisen jun tja alakꞌ―tz̈i Jesús cye xjal.

18Tejtzen toc cybiꞌn ke nintzaj tawil naꞌl Dios bix ke txꞌolbal ley ti e baj te Jesús, bix akꞌkexin nincꞌul tiꞌj ti ctemela tuꞌn tbyet Jesús, cuma at nim ttz̈i Jesús cyiꞌjxin, cuma ya tuꞌn cyoc baj xjal tuya Jesús.

19Pero bix etz Jesús te kale tuj Jerusalén, tisex e tsexin te jun kꞌij.

E tzkij tken higo(Mt. 21:20-22)

20Tetzen juntl kꞌij, bix excakexin taꞌj tken higuera oc cycyeꞌyenxin te jun kꞌij. Yal toc cycyeꞌyenxin, otk tzkij.

21Bix ul tuj tcꞌuꞌj Pedro ti otk tzꞌoc tkbaꞌn Jesús te higuera te jun kꞌij, bix e jaw yolen Pedro:

—Xnakꞌtzal, ¡cyeꞌnja higuera e cyaj tsbuꞌna ewe! ¡Ma tzkij!―tz̈i Pedro te Jesús.

22Bix aj ttzakꞌbeꞌn Jesús:

—Mintiiꞌ teja. Alj kꞌuklec tcꞌuꞌj tiꞌ Dios, jacꞌa bint tikꞌch tuꞌn. Juꞌ tzunj cꞌoquelxix ke cycꞌuꞌja tiꞌ Dios.

23Tzinexixse cxeꞌl nkbaꞌn cyey, al kꞌuklec tcꞌuꞌj tiꞌ Dios, ctkꞌaꞌte Dios ti jilel cxeꞌl cykanena texin. Tisej oj t-xiꞌ cykbaꞌna tej witz lu tuꞌn tjaw kꞌukpaj tuꞌn t-xiꞌ tuj mar, ctcuyate witz ka kꞌuklec cycꞌuꞌja tiꞌ Dios, bix ka min baj cycꞌuꞌja.

24Juꞌ tzunj cxeꞌl nkbaꞌn cyey, baꞌn tbinte Dios tikꞌch tuꞌn ka ilxix tiꞌj. Nuk cxeꞌl cykanen chꞌina tuya cykil cycꞌuꞌja, bix ccyiikꞌey te Dios.

25Nko yolentzen tiꞌ naꞌj Dios, attzen juntl tumel. Ojtzen cyakꞌa naꞌl Dios, ka at til jun xjal twitza, cynajsanqꞌuey ka cyaja najset cyila tuꞌn Dios at tuj cyaꞌj.

26Pero ka min xcub cynajsaꞌna til juntl xjal, jax mlay najset cyila tuꞌn Dios―tz̈i Jesús cye t-xnakꞌatz.

Jun toclen Jesús at tuꞌn Dios(Mt. 21:23-27; Lc. 20:1-8)

27Tbajlenxitltzen yolenxin, bix aj meltzꞌajkexin tuj tnom te Jerusalén, bix e xiꞌ Jesús tuj tja Dios juntl maj. Toctzen cycyeꞌyen ke nintzaj xjal bix ke txꞌolbal ley bix ke nintzaj tawil naꞌl Dios ja Jesús, bix e xiꞌ lkꞌekexin te kanlecte te Jesús:

28—¿Titzen jilel tajwalela tiꞌj nuk tikꞌch ncub tbinchena? ¿Altzen ma tzꞌoc kꞌonte tajwalela tuꞌn tex tlojoꞌnkey xjal tuj tja Dios ewe?―tz̈i tzunkexin te Jesús.

29Bix aj ttzakꞌbeꞌn Jesús:

—Juꞌx we jax cxeꞌl nkanen cyey. Ka ma tzaj cykbaꞌna we alcyej nkanbil cyey, jaxse jacꞌa t-xiꞌ nkbaꞌnwe cyey tuya alcye wajwalel ncwaꞌ nbinche.

30Jatzen nkanbil ja lu: Tej tbautizaran tiiꞌn Juan Bautista cye xjal, ¿jaaꞌ e tzaaꞌ tajwalelxin, tuꞌnpa Dios, ma tuꞌnpa xjalj?―tz̈i Jesús cye nintzaj xjal tuj tja Dios.

31Bix akꞌkexin yolel cyxolelexxin:

—Katzen ma txiꞌ kkbaꞌn ka ja Dios e tzaj kꞌonte tajwalel Juan, bixse cꞌaaltz tkbaꞌnxin ke tuꞌn tiken min oc kbiꞌn tyol Juan.

32Bix jax mlay txiꞌ kkbaꞌn ka xjal oc kꞌonte tajwalelxin―tz̈i tzunkexin, cuma cycyꞌixa oc cycyakwusaꞌnxin ke xjal, cuma cykil xjal etzkilte ka ja Dios e kꞌonte tajwalel Juan.

33Juꞌ tzunj aj cytzakꞌbeꞌnxin:

—Min ktzkiꞌnke―tz̈i tzunkexin te Jesús.

Bix aj ttzakꞌbeꞌn Jesús cyexin:

—Jaxne juꞌx we mlay txiꞌ nkbaꞌn tuya alcye wajwalel ncub nbinche―tz̈i Jesús.