ROMANOS 12 - Mam of Todos Santos -- Guatemala Unicode

Il tiꞌj tuꞌn kajben te Dios tuya jun kanema sakxix

1Key hermano, o ko oc ttanem Dios tuꞌnj tkꞌakꞌbil tcꞌuꞌjxin kiꞌj. Juꞌ tzunj, nchin cubsana nwitza cyey tuꞌn t-xiꞌ cykꞌoꞌna cyxumlala te Dios tuꞌn tajben texin tisen jun oybil iꞌtz. Chi ajbena te Dios tuya jun cyanema sakxix bix tuya jun cychunkꞌlala baꞌn twitzxin. Ka ma bint cyuꞌna juꞌwa, juꞌtzen cjawel cynimsaꞌna Dios tuya cykil cycꞌuꞌja.

2Miꞌn cheꞌx lpey tiꞌ tnaabl te twitz txꞌotxꞌ, sino juꞌ chi xeꞌl lpey tiꞌ jun cynaabla acꞌaj, tuꞌntzen cychꞌixpeta, tuꞌntzen tel cyniꞌya tiꞌj tajbil Dios, baꞌn bix tzꞌaklxix.

3Cuma o takꞌ Dios woclena tuꞌn t-xiꞌ nkꞌumena tyolxin, juꞌ tzunj cxeꞌl nkꞌoꞌna te jaca juun cyey jun xnakꞌtzbil. Miꞌn cub cybisena ka mas nchi ajbena cywitz ke cyuyey, sino cꞌaaltz tiꞌ cynaabla, cuma o tzaj tkꞌoꞌn Dios cyaakꞌena te cykilcakey tuꞌn cyajbena cye ocslal, yaaꞌn tuꞌn cyoca te mas jawnex.

4Cxeꞌl nkbaꞌna jun tumel cyey te yecꞌbil amale nimet kbaj, pero junx koꞌ. At nim iken tuꞌn kxumlal, bix cykilcaj iken tuꞌn kxumlal at taakꞌen. Pero junx xumlalbaj elnina.

5Juꞌ japenina ejooꞌ ocslal. Nim kbaj, bix jaca juun ke at taakꞌen, pero tuꞌnj kmojbabl kiib tuya Cristo, junx elnina koꞌ.

6Entonces, o tzaj kꞌoꞌn te jaca juun ke tuya jun akꞌuntl baꞌn tbint tuꞌn. Juꞌ tzunj, cybincham jaca juun cyey laꞌ alcyej cyaakꞌena o takꞌ Dios cyey. Ka jaj tkbaj tyol Dios o tzaj kꞌoꞌn tey, kbanx, pero cꞌoquel tipey tiꞌj oj t-xiꞌ tkbaꞌna, junx qꞌuelela tyola tuya t-xnakꞌtzbil Cristo.

7Ka jaj tuꞌn tajbena cye xjal o tzaj kꞌoꞌn tey, tzꞌajbenxa cye. Ka jaj tuꞌn t-xnakꞌtzana cye xjal o tzaj kꞌoꞌn tey, xnakꞌtzanxke.

8Ka jaj tuꞌn t-xiꞌ tnimsaꞌna cycꞌuꞌj xjal o tzaj kꞌoꞌn tey, cxeꞌl tnimsaꞌna cycꞌuꞌj. Ka jaj tuꞌn tkꞌona onbil cye xjal at il eteꞌ o tzaj kꞌoꞌn tey, onexke tuya cykil tcꞌuꞌja. Ka jaj tuꞌn tbaj tnincꞌuꞌna ke xjal o kꞌoj tey, bincham, bix seyꞌ tzꞌoquey te nincꞌulcye. Bix ka jaj tuꞌn toc kꞌakꞌen tcꞌuꞌja cyiꞌ mebe o kꞌoj tey, kꞌakꞌec tcꞌuꞌja pero tuya tzalajebl.

9Kꞌakꞌenc cycꞌuꞌja tiꞌ cyuyey tuya cykil cycꞌuꞌja, yaaꞌn nuk ten cyuꞌna. Cyxomel jkaꞌ nbint cyuꞌn, pero jaj baꞌn cꞌoquel takꞌ cyey.

10Cyonenx cyiiba cyxola tuya tkꞌakꞌbil cycꞌuꞌja, cuma ocslalkey. Cybiꞌy juntl ocslal cyuyey.

11Chi ajbena te Kaaw tuya cykil cycꞌuꞌja. Seyꞌx chi oqueley tuj taakꞌenxin, yaaꞌn alkey.

12Chi ayona tuya tzalajebl tiꞌj o cyaj tkbaꞌn Dios ke. Qꞌuiyax qꞌuixcꞌaj cyuꞌna. Tuj cykil tyem cynaꞌnxa Dios.

13Cxeꞌl cyonena kej ocslal at il cyiꞌj. Ka taj jun xjal posadayin bix ka taj chꞌin twa, cxeꞌl cykꞌoꞌna.

14Ka at jun xjal n-oc yasente cyey, cykanenx te Dios tuꞌn tkꞌonte jun baꞌn te te. Miꞌn txiꞌ cykanena tcastiwa te Dios.

15Ka at jun ntzalaj, chi tzalaja tuya. Ka at jun nbisen, chi okꞌa tuya.

16Cykꞌonx jun baꞌn te cyuyey, tisenx nchi jyon cyey jun baꞌn te cyey. Miꞌn jaw cynima cyiiba, sino ctemel cynaabla tuya cykilca xjal ajnintz cynaabl. Miꞌn cub cybisena mas baꞌn cyuꞌna.

17Ka ma tzꞌoc bint jun kaꞌ cyiꞌja, miꞌn xeꞌlen cyuꞌna. Ja cyeja cbinel cyuꞌn jaj jun baꞌn tuj cywitz cykil xjal.

18Cꞌoquel cyipena tiꞌj tuꞌn cytena tuj ttz̈yal tuya cykil xjal. Miꞌn chi cyakwusana jun kꞌoj.

19Key hermano n-oc cyakꞌa weya, miꞌn xeꞌlen jun kaꞌ cyuꞌna ka ma tzꞌoc bint jun kaꞌ cyiꞌja cyuꞌn xjal. Cykꞌonx te Dios tuꞌntzen ja Dios ckꞌolte cycastiwa. Tzin tkbaꞌn Dios tuj tyol cyjulu: “Nuk inayena at woclena tuꞌn nkꞌonte castiwa te t-xel jkaꞌ nbint cyuꞌn xjal. Inayen weya taaw tuꞌn nkꞌonteya t-xel,” tz̈i Dios.

20Juꞌ tzunj, ka nkꞌojl jun xjal cyiꞌja, bix ka ncyim tuꞌn weyaj, cykꞌonx twa. Bix ka ncyim tuꞌn aꞌ, cykꞌonx tcꞌaꞌ. Ka nbint cyuꞌna juꞌwa te te, tzultzen tchꞌixew tuj tcꞌuꞌj.

21Katzen junx ma chi ela kaꞌx t-xel cyuꞌna, jaxsen kaꞌ otk caman cyibaja. Mas baꞌn tuꞌn tbint jun baꞌn cyuꞌna tej xjal tzin tbinchan jun kaꞌ cyiꞌja.