1 TESALONICENSES 4 - Mam of Todos Santos -- Guatemala Unicode

Ti tten tuꞌn t-xiꞌ cyiiꞌn ocslal cychunkꞌlal tujxix tumel

1Yal jaꞌlewe, key ocslal, tuꞌnj koclena ma kꞌoj keya tuꞌn Kaaw Jesús, cxeꞌl kkbaꞌna cyey ti tten tuꞌn t-xiꞌ cyiiꞌna cychunkꞌlala tujxix tumel. Cxeꞌl kcubsaꞌna kwitza cyey, cykꞌoꞌncxix cyipena tiꞌj tuꞌn xiꞌne txiꞌ cyiiꞌna cynaabla tisenj e xiꞌ kxnakꞌtzaꞌna cyey, bix tuꞌn cyela baꞌn twitz Dios.

2Cytzkiꞌna ti tten tuꞌn cyela baꞌn twitz Dios, cuma e xiꞌ kkꞌoꞌna jxnakꞌtzbil cyey tiꞌj lu, ejeeꞌj xnakꞌtzbil e tzaj tkbaꞌn Kaaw Jesús.

3Cytzkiꞌna taj Dios tuꞌn t-xiꞌ cyiiꞌna jun cynaabla sakxix. Cykꞌoncja cyachbila tuꞌn cyoc ipana cyiꞌj xuuj yaaꞌn cyxuꞌla bix cyiꞌj xinak yaaꞌn cychmila.

4Taj Dios tuꞌn cytzyunte cyiiba tiꞌj cyxumlala, tuꞌntzen tten cynaabla sakxix bix tuꞌntzen cyniman xjal cynaabla.

5Miꞌn cheꞌx lpey tiꞌj nuk tikꞌch jyaaꞌn baꞌn taj cyxumlala, tisen nbint cyuꞌn kej xjal min cytzkiꞌn Dios.

6Tcyꞌixin tuꞌn cybinchana jun kaꞌ tiꞌ juntl ocslal tuꞌnj tuꞌn cyoc ipana tiꞌ t-xuꞌl. Ctzaal tkꞌoꞌn Kaaw castiwa tibaj cykilca kej xjal nchi oc ipan cyiꞌj t-xuꞌl juntl, tisen e xiꞌ kkbaꞌna cyey nejl tuya jun cyiw yol.

7Min e ttxoc Dios ejooꞌ tuꞌn kbinchante jyaaꞌn baꞌn, sino tuꞌn koc t-xjalxin sakxix.

8Juꞌ tzunj, alcyej xjal tcyꞌi tuꞌn tniman ja yol lu, yaaꞌn nuk n-el t-xooꞌn jun yol nkbaj kuꞌna, sino n-el t-xooꞌn Dios, ja Dios e tzaj smante Espíritu Santo ke tuꞌn koc sakxix.

9Yaltzen tkꞌakꞌbil cycꞌuꞌja cyxolxa, key ocslal, mintiiꞌ il tiꞌj tuꞌn t-xiꞌ ktzꞌiꞌbena cyey tiꞌj lu, cuma jax Dios ma xnakꞌtzante cyey tuꞌn toc cyakꞌa cyuyey cyey.

10Tzinen taꞌ ma chi yeecꞌana tkꞌakꞌbil cycꞌuꞌja tiꞌj cykilca ocslal tuj entera departamento te Macedonia. Pero cxeꞌl kkanena cyey tuꞌn tz̈ꞌiyne tz̈ꞌiy tkꞌakꞌbil cycꞌuꞌja cyiꞌjxin.

11Bix cykꞌoꞌnc cyipena tiꞌj tuꞌn cytena tuj ttz̈yal cyuya xjal, bix nuk oꞌcx tuꞌn cyakꞌanana tiꞌj cyey cyaakꞌen, bix tuꞌn miꞌn cyiikꞌa cyꞌaja, sino tuꞌn cyakꞌanana tuꞌn cyitzꞌja, tisen e xiꞌ kkbaꞌna cyey nejl.

12Chi akꞌanana, tuꞌntzen miꞌn chi oca te jun chꞌixbajil cywitzj xjal yaaꞌn ocslal, bix tuꞌn cytena mintiiꞌ palt cyey.

Tej tkbante Pablo ti tten oj tul meltzꞌaj Kaaw Jesús

13Key ocslal, jaꞌlewe cxeꞌl nkbaꞌna cyey ti pjel cyej ocslal ma chi cyim, tuꞌn tel cyniꞌya tiꞌj, tuꞌntzen miꞌn baj cycꞌuꞌja tiꞌj ti pjel cyiꞌjxin, tisen nbaj cycꞌuꞌj kej xjal yaaꞌn ocslal oj nchi cyim xjal. Miꞌn chi bisena.

14Cꞌoquel cycwenta tiꞌj e cyim Jesús pero ma jatz titzꞌjsaꞌn Dios jaxin tuj cyamecy. Katzen jaxxix ja lu, iltzen tiꞌj ctzaal tiiꞌn Dios cykilca kej cyimne ocslal junx tuya Jesús oj tul meltzꞌaj Jesús.

15Cxeꞌl nkbaꞌna cyey jun tumel ma tzaj tkbaꞌn Kaaw weya. Oj tul meltzꞌajxin, kej ocslal iꞌtzx twitz txꞌotxꞌ oj tulxin, mlay koꞌx tuyaxin nejl cywitzj ocslal o chi cyim.

16Jax Kaaw cweletz tuj cyaꞌj, bix tuya jun jawnex tkꞌajkꞌajel cwel kꞌajt, cxeꞌl tkbaꞌn tuꞌn cyjatz itzꞌj kej xjal ocslan tiꞌ Cristo juntl maj tuj cyamecy tuya acꞌaj cyxumlal. Bix cjawel ts̈iꞌn jtsanjel Dios mas jawnex tuj cyaꞌj, bix ckꞌajtel t-xux Dios, bix chi jawetz itzꞌj kej ocslal cyimne, nejl cywitz kej ocslal iꞌtz.

17Lepchxetzen koꞌ, ejooꞌj iꞌtzx koꞌ twitz txꞌotxꞌ, ko jawel kꞌiꞌn tuj muj, tuꞌn kchmet junx cyuyaj niyꞌtl ocslal, tuꞌntzen kclunte kiib tuyaj Kaaw tzul. Bix ko temel tuya Kaaw te junx maj.

18Juꞌ tzunj, cycyiwsam cycꞌuꞌja cyxolxa tuꞌn ja yol lu.