COLOSENSES 2 - Mam of Todos Santos -- Guatemala Unicode

1Jaxte nim n-oc wipena cyiꞌja. Waja tzꞌel cyniꞌya tiꞌj nim nchin naꞌna Dios cyiꞌja, bix cyiꞌj ocslal tuj tnom te Laodicea, bix cyiꞌj niyꞌtl ocslal min cytzkiꞌn nwitza.

2Nbint wuꞌna juꞌwa tuꞌn cycywixa tuꞌnj cymojbabl cyiiba oj n-oc cyakꞌ cyuyey cyey. Bix nchin naꞌna Dios tuꞌn telxix cyniꞌya tiꞌj jjawnex tumel ma cub tnincꞌuꞌn Kman Dios. Eꞌwen taꞌ j-e cub tnincꞌuꞌn Dios nejl, pero chicꞌaj jaꞌlewe, jaj tuꞌn cycleta tuꞌn Cristo.

3Jcynaabla taj tzaj tkꞌoꞌn Dios tisen jun kꞌinemal. Pero nuk tuꞌn Cristo ccyiikꞌela ja kꞌinemal lu.

4Ma txiꞌ nkbaꞌna jlu cyey tuꞌn miꞌn chi cub tzpeta tuꞌnj cyeca xnakꞌtzbil, pero ẍtakꞌ.

5Tumelte tuꞌn t-xiꞌ nkꞌoꞌna ja yol lu cyey, cuma amale mintn-al kena cyxola, pero nim nchin labta cyiꞌja. Pero jax nchin tzalaja cyiꞌja, cuma ma nbiꞌya junx taꞌ cynaabla bix min ma yucch cyocslabla tiꞌ Cristo.

6Cuma o tzꞌoc ke cycꞌuꞌja tiꞌ Cristo Jesús, bix ma tzꞌel cyniꞌya tiꞌj jaxin Cawel cyibaja, juꞌ tzunj cxeꞌl cyiiꞌna cychunkꞌlala tuya cynimbila tiꞌjxin.

7Cyiwxit taꞌ cyocslabla tiꞌjxin, tisen jun tzeeꞌ min yucch ka wiꞌlxix tlocꞌ tuj txꞌotxꞌ. Chi tz̈ꞌiyxita tuj tyol Dios tuꞌnj cymojbabl cyiiba tuyaxin. Cꞌoquel cyipena tiꞌj tuꞌn cyweꞌxixa tuj jxnakꞌtzbil jaxxix kꞌoꞌn cyey. Bix nimxix cykꞌonxa chjonte te Dios.

Jun acꞌaj kchunkꞌlal o tzaj tkꞌoꞌn Cristo

8Key ocslal, cycꞌojlanx cyiiba tuꞌn miꞌn chi cub sbuꞌna, cuma at xjal cyaj tuꞌn cyoc lpey tiꞌj cyex cyxnakꞌtzbil. Pero mintiiꞌ tajbel bix ẍtakꞌ cyxnakꞌtzbilxin. Jt-xeeꞌ cyxnakꞌtzbilxin nuk cyyol xjal te ootxa bix cynaabl nuk tiꞌj tikꞌch te twitz txꞌotxꞌ. Min tzaj cyxnakꞌtzbilxin tiꞌ Cristo.

9Chi oquel lpey nuk tiꞌjxin, cuma jaxin Dios. Tujx t-xumlalxin at cykilca tipemal bix tnaabl Dios.

10Bix cuma at cymojbabl cyiiba tuya Cristo, tetzen junx maj ma kꞌoj cychunkꞌlala tuꞌn Dios. Mintiiꞌ juntl. Yaaꞌntzen tumel tuꞌn cyocxa tjakꞌ cycawbil juntl cawel, cuma ja Cristo Cawel cyibaj cykilca cawel.

11Bix mintiiꞌ il tiꞌj tuꞌn tel keset ttzꞌumel twiꞌ cytzꞌalbila. Nejl, cyxol aj Israel il tiꞌj tuꞌn tel keset ttzꞌumel twiꞌ cytzꞌalbil. Pero jaꞌlewe, ttanem Dioskey tuꞌnj tel tiiꞌn Cristo jcynaabla kaꞌ tej cyocslana tiꞌjxin.

12Tuꞌnj cymojbabl cyiiba tuyaxin, tisencꞌa e cuꞌx maketkey tuyaxin tej tcyimxin. E cyim jcynaabla aj il tuyaxin. Jax tej tjatz itzꞌjxin juntl maj tuj cyamecy, jax tuꞌnj cymojbabl cyiiba tuyaxin, tisencꞌa e jatz itzꞌjkey tuyaxin. Ma kꞌoj jun acꞌaj cychunkꞌlala tuꞌnj cyocslana tiꞌ Dios, ja Dios e tyeecꞌa tipemal tej tjatz titzꞌjsaꞌn ja Cristo tuj cyamecy.

13Nejl, tisen cyimnekey tuj twitz Dios, cuma e cybinchay il bix cuma yaaꞌn t-xjal Dioskey. Pero jaꞌlewe, ma takꞌ Dios cychunkꞌlala tuꞌnj cymojbabl cyiiba tuya Cristo, bix ma cub tnajsaꞌnxin cykilca cyila.

14Nejl, e tkba ley il tiꞌj tuꞌn kcyim te junx maj, tuꞌn tchjet kcꞌasben te Dios tuꞌn tlaj kil. Pero jaꞌlewe, ma tkba Dios mintiiꞌtl kcꞌasben, cuma el tiiꞌnxin kcꞌasben bix aj tkꞌoꞌnxin tibaj Cristo, tuꞌntzen tchjet tuꞌn Cristo twitz cruz.

15Bix tej tjatz titzꞌjsaꞌnxin ja Cristo juntl maj tuj cyamecy, el tiiꞌnxin tipemal taaw il bix cyipemal cykil biman. E tzaj cychꞌixew cywitz cykilca at tuj cyaꞌj bix entera twitz txꞌotxꞌ tej t-xcyexin cyibaj tuꞌnj tjatzlen itzꞌj Cristo.

16Juꞌ tzunj, miꞌn txiꞌ cykꞌoꞌna amleꞌn cyej xjal cyaj tuꞌn cynimana jley te ootxa tzin tkbaꞌn alcyej baꞌn tuꞌn t-xiꞌ cywaaꞌna, bix alcyej baꞌn tuꞌn t-xiꞌ cycꞌaꞌna, bix alcyekej ninkꞌij il tiꞌj tuꞌn cyiyꞌsantey, bix alcyej kꞌij xjan tuj xjaw il tiꞌj tuꞌn cynimana, bix tuꞌn cynimana jkꞌij te ajlabl.

17Tisen n-ocx nejl tipemal jun xjal tuj jaaꞌ twitz, kej ley te ootxa lu ajben nuk tisen jun xlequemal tej at tulel. Pero ma pon baj twiꞌ cꞌajbela nuk te techel, cuma ma tzul jttxuylal, ja Cristo.

18Miꞌn tzꞌoc cybiꞌna kej xjal tzin cykbaꞌn min pon cyyola tuya Dios. Mas baꞌn tneel juꞌ cxeꞌl cye ángel, tz̈ike, tuꞌn cyyeecꞌana ka maanskey. Tzin cykbaꞌnxin o tzaj tkꞌoꞌn Dios jun yecꞌbil tuj cywitziyꞌxin, bix juꞌ tzunj at cyoclenxin tuj cywitzxin tuꞌn cycawenxin cyibaja. Pero mintiiꞌ cyoclenxin, cuma jncheꞌx lpexin tiꞌj, nuk ja cynaablxin kaꞌ nkbante.

19Tisen o chi el txꞌomet-xin tiꞌ t-xnakꞌtzbil Cristo. Qꞌuelel cyniꞌya tiꞌj ma tz̈ꞌiy jun xumlalbaj bix ttzyun tiib cyuꞌn tyakayil nuk oꞌcx ka min ma tzꞌel txꞌomet tiꞌ twiꞌ. Jax juꞌx ejooꞌ. Tisen kwiꞌ ja Cristo, bix ejooꞌ ocslal tisen tocslabl Cristo. Ko tz̈ꞌiyal tuj kocslabl tisen taj Dios bix ko temel junx nuk oꞌcx ka min ma ko el txꞌomet tiꞌj t-xnakꞌtzbil Cristo.

20Ma cyim cynaabla kaꞌ tuya Cristo, bix mintiiꞌ il tiꞌj tuꞌn cyxiꞌ lpey tiꞌj cynaabl xjal te twitz txꞌotxꞌ tuꞌn cyela baꞌn twitz Dios. Juꞌ tzunj, ¿tikentzen nxiꞌ cyiiꞌna cychunkꞌlala tisencꞌa tjakꞌx ley te twitz txꞌotxꞌkey?

21Oj t-xiꞌ cykbaꞌn xjal: “Miꞌn txiꞌ cywaaꞌna jlu. Miꞌn txiꞌ cyniyꞌbeꞌna jlu. Miꞌn tzꞌoc cymcoꞌna jlu. Xjan kej lu,” tz̈ike ¿tiken nchi cuyana cyuya?

22Min tzꞌajben kej waabj bix kej cꞌaabj lu tuꞌn tcnet cychunkꞌlala te junx maj, cuma oj cyajben kej lu cye xjal, n-el baj cyipen. Nuk cyxnakꞌtzbil xjal kej ley tiꞌj alcyej tuꞌn t-xiꞌ cywaaꞌna bix alcyej tuꞌn t-xiꞌ cycꞌaꞌna.

23Tuj cywitza, cyeca kej ley lu. Nchi yolen tiꞌj alcyej costumbre tuꞌn tbint cyuꞌna tuꞌn cyela baꞌn twitz Dios, bix nchi kꞌon tumel tiꞌj ti tuꞌn tbint cyuꞌna tuꞌn cyyeecꞌan cyiiba cywitz xjal ka maanskey, bix nchi xnakꞌtzan il tiꞌj tuꞌn toc cykꞌoꞌna castiwa cye cyxumlala. Pero amale baꞌnt tcyeꞌyenc cyxnakꞌtzbil, pero mintiiꞌ cꞌajbel tuꞌn cytzakpeta tiꞌj tajbil cynaabla kaꞌ.