1 CORINTIOS 3 - Mam of Todos Santos -- Guatemala Unicode

Junx nko akꞌanan cykilca koꞌ tuj taakꞌen Dios

1Pero cyey, hermano, tej npona cyxola te kbalte tyol Dios cyey tuj tneel, bix maatk acꞌaj ocslalkey. Mitknaꞌx cytzketa tuj cyocslabla. Cynaabla nuk tisex cynaabl xjal te twitz txꞌotxꞌ. Juꞌ ke cyey tisen jun neeꞌ mix n-eꞌla tniyꞌ tiꞌj. Juꞌ tzunj mlay chin yolena cyuyey tisen tuya jun xjal ma xjaltl.

2Tej npona tuj tneel, min el cyniꞌya tiꞌj. Juꞌ tzunj e xiꞌ nkꞌoꞌna xnakꞌtzbil cyey yaaꞌn nim t-xiꞌlen, tisen jun xuuj nuk tchꞌuꞌ tal nxiꞌ tkꞌoꞌn cuma minaꞌn takꞌ waaꞌl. Nuket e xiꞌ nkꞌoꞌna xnakꞌtzbil cyiw cyey nejl, tisentzele nxiꞌ nkꞌoꞌna waabj te jun ẍlak. Bix juꞌx jaꞌlewe minaꞌx tel cyniꞌya tiꞌj tuꞌn cyiikꞌentey xnakꞌtzbil mas tzꞌaklxix,

3cuma nxiꞌ cynimanxa nuk oꞌcx tajbil cyxumlala. Cyxola at kꞌoj, at icꞌbil, at chiꞌlen, bix pabl cyiiba. Juꞌ tzunj yaaꞌn cyiwkey tuj cyocslabla.

4Cybisenx tiꞌj ti nbaj cyey oj nxiꞌ cykbaꞌna, “Keya te Pablo koꞌya,” bix cabtl nxiꞌ cykbaꞌna, “Te Apolos koꞌya.” Tej kꞌoj lu tzin tkbaꞌn yaaꞌn cyiw eteꞌy tuj tyol Dios.

5Cxeꞌl nkanena cyey, ¿inayenpa tzuna jun xjal jawnex? ¿Bix japatzen Apolos juntl xjal jawnex? ¿Altzen koꞌya tuꞌntzen at kꞌoj nbaj kiꞌja cyuꞌna? Oꞌcx tuꞌn kajben keya te Kaaw tuꞌn kkꞌumena tyol Dios cyey, tuꞌntzen cyocslana. Teeylex juun keya oꞌcx e bint kuꞌna cyxola jkaakꞌena e tkba Dios.

6Ejeeꞌy tisen jun awal. Tej npona cyxola te kbalte tyol Dios, tisen e cyaj wawaꞌna iyaj. Tejtzen tpon Apolos te kꞌolte mas xnakꞌtzbil cyey, tisen e xiꞌ aꞌ tibaj iyaj, tuꞌn ttz̈ꞌiy awal. Pero ja te Dios nojsal awal tuj cyanema.

7Juꞌ tzunj jxjal awaal yaaꞌnxix nim t-xiꞌlen, bix xsunj kꞌol aꞌ tibaj awal, jax yaaꞌn nim t-xiꞌlen. Ja te nim t-xiꞌlenj ja te Dios, cuma jaxin tzpetsalcye awal.

8Ja tzunj jxjal awaal bix xsunj kꞌol aꞌ, junx japenina cyaakꞌen. Dios cchjolcye, teeylex juun tuya taakꞌen laꞌ tiiꞌn taakꞌen, ka baꞌn bix ka min.

9Juꞌ tzunj nko akꞌanana Apolos bix inayena kuya kiiba tuj tawal Dios. Yaltzen cyey, tisen tawal Dioskey.

Cxeꞌl nkꞌumena tuya juntl tumel. Cyey tisen jun jaaꞌkey njaw tbinchaꞌn Dios.

10Weya tisen jun nintzaj binchal jaaꞌ kena. Ntzkiꞌna ti tten tuꞌn tcuꞌx tkꞌukꞌlel jaaꞌ. Dios o tzaj kꞌonte waakꞌena tuꞌn tcub cyiꞌja wuꞌna tuꞌn cyocslana tiꞌ colbil ke. Ja tzunj waakꞌena lu tisentzen ncuꞌx tkꞌukꞌlel t-xeeꞌ jaaꞌ wuꞌna. Bix juntl t-akꞌanal Dios at taakꞌen te xnakꞌtzal cyey tiꞌ tyol Dios. Jlu tisen nxiꞌ tkꞌoꞌn lookꞌ twiꞌ tkꞌukꞌlel jaaꞌ. Bix jaca juun binchal jaaꞌ njaw tkꞌoꞌn lookꞌ twiꞌ tkꞌukꞌlel jaaꞌ cꞌoquel tcꞌuꞌj tiꞌj tuꞌn tcyaj taakꞌen baꞌn.

11Ja tzunj tkꞌukꞌlel o cyaj wuꞌna cyxola, jatzen Jesucristo. Mintiiꞌ juntl tkꞌukꞌlel cyocslabla at.

12Tibaj tzunja tkꞌukꞌlel cyocslabla, jun t-akꞌanal Dios ya baꞌntltzen tuꞌn t-xiꞌ tkꞌoꞌn t-xnakꞌtzbil, tisen njaw tbinchaꞌn jun jaaꞌ tibaj tkꞌukꞌlel jaaꞌ. Katzen nxnakꞌtzan baꞌn, juꞌtzen taakꞌen tisen oro bix plata bix tisen xak cyecaxsen bix cyiw te junx maj. Pero ka min xnakꞌtzan baꞌn, juꞌtzen taakꞌen tisen tzeeꞌ bix tz̈ꞌim bix ptzꞌunt.

13Tzul jun kꞌij te niyꞌbelte tipemal taakꞌen jaca juun xjal, ka jaxxix taakꞌen, bix ka min. Tuj tzunj kꞌij tzul tuꞌn Dios cwel tzꞌak alcyej xnakꞌtzbil yaaꞌn jaxxix, tisen jun jaaꞌ nuk ptzꞌunt t-xeeꞌ jun rato cwel tzꞌeyꞌ oj toc kꞌakꞌ tiꞌj.

14Ka ma xnakꞌtzan baꞌn cye xjal, bix jtaakꞌen min txiꞌ tuj il oj toc tcyeꞌyen Dios, tcotzentzen jun tcotz tiꞌj tuꞌn Dios.

15Pero ka min xnakꞌtzan baꞌn cye xjal, mintiiꞌ tcotz tkꞌaꞌ Dios, amale ccletelet tuj kꞌakꞌ. Cꞌoquele tisen jun xjal n-etz ok tuj tken kꞌakꞌ pero mintiiꞌ qꞌueletz tiiꞌn tuj tken kꞌakꞌ.

16Yaltzen cyey, hermano, ¿mimpatzen tzꞌel cyniꞌya tiꞌj ejeeꞌy tisen jun tja Dios? Tisen najben cyjay te cynajbila, juꞌtzen nchi ajbena te tnajbil Espíritu Santo.

17Katzen at jun xjal ma cub xitente jtja Dios tuya t-xnakꞌtzbil yaaꞌn tumel, jax cwel t-xiten Dios ja xjal, cuma sakxix tnajbil Dios, bix tnajbil Dios tzunkey.

18Cycꞌojlanx cyiiba tuꞌn miꞌn chi jaw tz̈ꞌiya. Kej xjal te twitz txꞌotxꞌ baꞌn n-el tuj cywitz oj taj jun xjal tzꞌoc te tneel. Pero tuj twitz Dios, yaaꞌn baꞌn. Ka cyaja chi oca te mas baꞌn cyuꞌna tuj twitz Dios, ya iltzen tiꞌj otk chi oca tisen mintiiꞌ baꞌn cyuꞌna tuj cywitz xjal te twitz txꞌotxꞌ.

19Kej mas baꞌn cyuꞌn tuj cye cywitz, tzcaj n-eꞌla tuj twitz Dios. Juꞌ toc tuj tyol Dios cyjulu: “Dios cwel xitente kej xjal jawnex baꞌn cyuꞌn tuj cywitz. Ejeeꞌx chi xeꞌl tzꞌak tuj jnbaj bint cyuꞌn tisen tuj jun cꞌoꞌbil,” tz̈i tyol Dios.

20Bix tz̈i juntl tyol Dios cyjulu: “Ttzkiꞌn Dios mintiiꞌ cꞌabela jawnex cynaabl kej xjal te twitz txꞌotxꞌ,” tz̈i tyol Dios.

21Juꞌ tzunj miꞌn tzꞌoc cykꞌon cyiiba mas baꞌn cyuꞌna oj cyxiꞌ lpey tiꞌj jun xnakꞌtzal mas baꞌn tuꞌn tuj cywitza. Miꞌn txiꞌ cykꞌumena nuk te Pedro key bix ka te Apolos key, cuma cykilcakexin cꞌajbel te cyey.

22Yaaꞌn nuk Apolos cꞌajbel te cyey, bix yaaꞌn nuk inayena cꞌajbel te cyey, sino kcaꞌbela ko ajbela te cyey, bix tuyax Pedro cꞌajbel te cyey, bix cykil tikꞌch at twitz txꞌotxꞌ cꞌajbel te cyey, bix hasta chunkꞌlal bix cyamecy cꞌajbel te cyey, bix ja tyem te jaꞌlewe, bix cykil tyem te yaj, cykilca cꞌajbel te cyey.

23Yaaꞌn cykilcaj lu tuꞌn tajben te cawlte cyey, sino cykilca te ajbel te cyey, pero mas il tiꞌj ejeeꞌy tuꞌn cyajbena te Cristo, bix ja Cristo te ajbel te Dios.