SAN MARCOS 8 - Mam of Todos Santos -- Guatemala Unicode

Tej t-xiꞌ tkꞌoꞌn Jesús cywa cyaja mil xjal(Mt. 15:32-39)

1Attzen jun kꞌij, bix oc cychmon cyiib nim xjal tiꞌ Jesús juntl maj. Mintzentiiꞌ cywa xjal. Bixse e tzaj ttxcoꞌnxin ke t-xnakꞌatzxin, bix e xiꞌ tkbaꞌn Jesús cyexin:

2—Ma tzꞌoc kꞌaꞌben ncꞌuꞌja cyiꞌj xjala, cuma ma bint oxe kꞌij cyten wuya tzalu, bix mintzentiiꞌtl cywa.

3Ka ma chi aj nsmaꞌn cyja mitkx nchi waaꞌna, tzul tuj cywitz tuꞌn weyaj, cuma at juun cye tzajninxe nakch―tz̈i Jesús cye t-xnakꞌatz.

4Bix aj cytzakꞌbeꞌn t-xnakꞌatz Jesús:

—¿Pero titzen tten oj t-xiꞌ kkꞌoꞌn cywa jxjala tzalu? Min-al xjal najl tzalu―tz̈i tzunkexin.

5Pero bix aj tkanen Jesús:

—¿Jteꞌ pan kꞌiꞌn cyuꞌna?―tz̈i Jesús.

—Wuuk kꞌiꞌn kuꞌna―tz̈i tzunkexin.

6Bixse e xiꞌ tkbaꞌn Jesús tuꞌn cycub ke cykil xjal twitz txꞌotxꞌ. Bixse e tzaj ttzyuꞌnxin jwuuk pan, bix e xiꞌ tkanenxin t-xtalbil Dios cyiꞌj. Bixse e cub tpaꞌnxin, bix e xiꞌ tkꞌoꞌnxin cye t-xnakꞌatzxin tuꞌntzen t-xiꞌ cypaꞌnxin cyxol xjal.

7Bix jax kꞌiꞌn cabjil quis̈ cyuꞌnxin. Jax juꞌxe bix e xiꞌ tkanen Jesús t-xtalbil Dios cyiꞌjjil, bix e xiꞌ tkbaꞌn Jesús tuꞌn t-xiꞌ cypaꞌn t-xnakꞌatzxin.

8Cykilca xjal e waaꞌn tejxe cynoj. Cybajtzen waaꞌn xjal, e cyajxtl wuuk chiꞌltl piẍ pan.

9Cykilca kej xjal e waaꞌn atle cyaja mil. Bixsen e kꞌolben Jesús cye xjal,

10n-ocxtl tzunxin tuj choc cyuya t-xnakꞌatzxin, bixse e xiꞌxin tuj jun tnom Dalmanuta tbi.

E xiꞌ cykane xjal jun yecꞌbil te Jesús(Mt. 16:1-4; Lc. 12:54-56)

11Cypon tzunj xjal nimalxse tuj cyley, ejeeꞌj xjal tej cloj fariseo, bix akꞌkexin rasonel tuya Jesús. Bix e xiꞌ cykanenxin te Jesús tuꞌn t-xiꞌ tyeecꞌan Jesús tipemal cyexin tuꞌntzen tchicꞌajax ka juꞌ otk tzaj Jesús tuya Dios. Eꞌla tuj cywitzxin ka tuꞌn tcub tzꞌak Jesús tuj cyyolxin.

12Biꞌxse e jaw jawsen tcꞌuꞌjxin, cuma eteꞌc fariseo yajlal texin. Bix e xiꞌ tkbaꞌn Jesús:

—¿Tikentzen eteꞌcꞌa xjal kanl te weya tuꞌn t-xiꞌ nyeecꞌana wipemala? Nuktzen ti cyaja tuꞌn ncub tzꞌaka. Tzinenxix cxeꞌl nkbaꞌn cyey mintiiꞌ tuꞌn t-xiꞌ nyeecꞌan wipemal―tz̈i Jesús cye fariseo.

13Bix e cyaj tcyeꞌyen Jesús ejeeꞌxin, bix ocx meltzꞌajxin tuj barc cyuya t-xnakꞌatz, bix iyꞌx meltzꞌajxin juntl jlaj tnijabel aꞌ.

Cyxnakꞌtzbil fariseo yaaꞌn tuj tumel(Mt. 16:5-12)

14Pero otktzen tzꞌel cywaxin tuj cycꞌuꞌj t-xnakꞌatzxin. Nukxix jun pan kꞌiꞌn cyuꞌnxin.

15Toctzen tbiꞌn Jesús nchi yolen t-xnakꞌatzxin tiꞌ pan, bix e xiꞌ tkbaꞌn Jesús:

—Nchi yolena tiꞌ pan, cycꞌojlam cyiiba tuyaj cypan fariseo bix xsunj tpan jxin cawel Herodes―tz̈i Jesús cye t-xnakꞌatz. Pero yaaꞌntzen nyolen texin tiꞌ pan, sino nxiꞌtzen tkbaꞌnxin tuꞌn miꞌn txiꞌ cybiꞌn t-xnakꞌatzxin jcyxnakꞌatz fariseo bix jte Herodes.

16Pero mintzen el cyniyꞌ t-xnakꞌatzxin tiꞌj ti elpeninatzen tyol Jesús. Tuj cywitzxin tuꞌn toc cycꞌuꞌjxin tiꞌ lkꞌoj pan.

17Bix el tniyꞌ Jesús tiꞌj ti otk tzꞌeꞌla tyolxin tuj cywitz t-xnakꞌatzxin, bix e xiꞌ tkbaꞌnxin:

—¿Tikentzen n-eꞌla tuj cywitza ka mintiiꞌ cypana? ¿Mimpatzen tzꞌel cyniꞌya tiꞌj yaaꞌn tiꞌ pan nchin yolenawe? ¿Junxpatzen maj klolj tuj cywitza?

18Juꞌcꞌa ke cyey tise kej xjal at tbakꞌ cywitz, pero minteyꞌ n-akꞌ cywitz tiꞌj, bix at cyẍquin, pero minteyꞌ n-el cyniyꞌ tiꞌj. Yal tzunj pan tzin cyyolena, ¿tikentzen n-oca takꞌ cyey? ¿Mimpatzen tzul tuj cycꞌuꞌja ti in se nejl?

19Tej tcub npaꞌn jjweꞌ pan t-xol jweꞌ mil xinak, ¿jteꞌ chiꞌl piẍ pan e jaw cychmoꞌna tej cybaj waaꞌn xjal?―tz̈i Jesús.

Bix aj cytzakꞌbeꞌnxin:

—Cablajaj chiꞌl, Taat―tz̈i tzunkexin.

20Bix e xiꞌ tkanen Jesús juntl maj:

—Yaj tzunj tej tcub npaꞌn jwuuk pan t-xol jcyaja mil xjal, ¿jteꞌ chiꞌl pan e cyaj?―tz̈i Jesús.

Bix aj cytzakꞌbeꞌnxin:

—Jax wuuktl chiꞌl―tz̈i tzunkexin.

21Entonces bixse aj tkbaꞌn Jesús:

—Jeyney, jayaxittzen mix n-eꞌla cyniꞌya tiꞌj ka cykil baꞌn tbint wuꞌna―tz̈i Jesús.

Jket twitz jun xjal mos̈ tuꞌn Jesús tuj Betsaida

22Cwatzen cyponxin tuj tnom te Betsaida, jlajxe tnijabel aꞌ, bix e pon cyiiꞌn xjal jun xjal mos̈. Bix oc cycubsaꞌn xjal cywitz te Jesús tuꞌn toc tmocoꞌn Jesús jxjal mos̈.

23Bix e tzaj ttzyuꞌn Jesús tkꞌab mos̈, bix ex tiiꞌnxin yaab ttxaꞌnxe tnom. Bix ocx tkꞌoꞌn Jesús taꞌl ttzi tuj twitz mos̈. Tcubtzen tkꞌoꞌn Jesús tkꞌab tibaj mos̈, bix e xiꞌ tkanenxin:

—¿Atpa chꞌin ma tzakꞌ twitza tiꞌj?―tz̈i Jesús.

24Bix akꞌ mos̈ cyeyel tiyꞌ ttxlaj, bix aj ttzakꞌbeꞌn jxin mos̈:

—At chꞌin chicꞌaj. Lu ke xjal nchi oc ncyeꞌyen tise jun tzeeꞌ, bix nchi bet―tz̈i tzunxin.

25Bix oc tmocoꞌn Jesús tbakꞌ twitzxin juntl maj. Bix cyiw e cub tseꞌn mos̈ twitz, biꞌxse ul tnaabl tbakꞌ twitzxin. Ya baꞌntzen akꞌtl twitzxin tiꞌ tikꞌch jilel.

26Bix e xiꞌ tkbaꞌn Jesús texin:

—Baꞌntzen taja tjay. Pero cutxetzen jiquen tjay. Miꞌntzen tziꞌya tuj tnom bix min jaaꞌ tzꞌoca tkbaꞌna―tz̈i Jesús texin.

Tej tkbante Pedro ka ja Jesús jscyꞌoꞌn tuꞌn Dios(Mt. 16:13-20; Lc. 9:18-21)

27Tbajlenxitl tzunj ja lu, bix e xiꞌ Jesús cyuya t-xnakꞌatz cyuj ke niꞌ cocꞌ tnom ttxaꞌn nin tnom te Cesarea Filipo. Tujtzen be e xaꞌ tkanen Jesús cye t-xnakꞌatz:

—¿Alcye ken tuj cywitz xjal?―tz̈i Jesús.

28Bix aj cytzakꞌbeꞌn t-xnakꞌatzxin:

—At xjal nkbante ka jay Juan Bautista. At juntl wik nkbante ka jay Elías, tulel nejl twitzj xin Scyꞌoꞌn tuꞌn Dios. Bix at juntl wik xjal nkbante ka jay jun wikxitl tyolel Dios e ten nejl―tz̈i tzunkexin.

29Bix aj tkanen Jesús:

—Yajtzen cyey, ¿altzen cye ken tuj cywitza?―tz̈i Jesús.

Bix aj ttzakꞌbeꞌn jxin Pedro, t-xnakꞌatz Jesús:

—Ja te ja Scyꞌoꞌn tuꞌn Dios, jaj xin tulel tsmaꞌn Dios te cawel tibaj Israel, jxin e byan tuꞌn Dios jatxe tuj tneel―tz̈i Pedro.

30Pero e xiꞌ tkbaꞌn Jesús cye t-xnakꞌatz tuꞌn min jaaꞌ tzꞌoca cykbaꞌnxin ka jaxin cawel tibaj Israel.

Tej tyole Jesús tiꞌj tcyamecy(Mt. 16:21-28; Lc. 9:22-27)

31Bixse akꞌ Jesús xnakꞌtzalec cyexin ka jxin Smaꞌn tuꞌn Dios tuꞌn tten cyuya xjal qꞌuiyalxse aꞌ tcꞌuꞌjxin, bix qꞌuelel xooꞌnxin cyuꞌn nintzaj xjal tuj tja Dios, cyuꞌn tawil naꞌl Dios, bix cyuꞌn txꞌolbal ley. Bixse e tkbaxin ka cbyetelxin, bix cjawetz itzꞌjxin te toxen kꞌij tbyetlenxitlxin.

32Bix e cyaj tkꞌoꞌnxin kej yol lu tuj tzinen.

Pero min el tyol Jesús baꞌn tuj twitz Pedro. Bix ex ttxcoꞌnxin ja Jesús cyjunalxin, bix akꞌ Pedro ocsalec tcꞌuꞌj Jesús tuꞌn miꞌn tyolexin juꞌwa.

33Tejtzen toc tbiꞌn Jesús tyol Pedro, bix aj tcyeꞌyenxin cykilcatl ke t-xnakꞌatzxin, bix oc yokpajxin tiꞌ Pedro:

—Pedro, tiꞌj tyola juꞌwa, juꞌx tuj cywitz xjala, pero tuj twitz Dios, min. Ja te Satanás, tawil biman, n-oc lmonte tey. Tcyꞌi Satanás chin japan baj tiꞌj ti waj ma chin tzaj twitz txꞌotxꞌ. Tiꞌj tzunj tyola tuꞌn miꞌn chin cyim, attzen tyola tuya tawil biman, yaaꞌn tuya Dios―tz̈i Jesús te Pedro cywitz niyꞌtl t-xnakꞌatzxin.

34Yajcꞌatltzen bix e tzaj ttxcoꞌn Jesús ke t-xnakꞌatz bix juntl wik xjal, bix e xiꞌ tkbaꞌnxin cye:

—Al cyey taj tzꞌoc lpe wiꞌj, cykꞌoncjtzen tikꞌch cyaja, tuyaxe cychunkꞌlala cyimal tuj cycꞌuꞌja. Ka at-xix il tiꞌj tuꞌn cyoca tuj qꞌuixcꞌaj nuk wiꞌjcꞌa, cykꞌonxsen cyiiba. Bix ka ma chi el xooꞌna cyuꞌn xjal nuk wiꞌjcꞌa, cyxooꞌxixsen cyiiba. Bix katzen at-xix il tiꞌj, bixse t-xiꞌ cykꞌon cyiiba te cyamecy, tisej weya twitz cruz chin byetela.

35Al tzunj ma bint tuꞌn juꞌwa, chi lpebaltzen wiꞌj, cykꞌaꞌ tzuna cychunkꞌlala nuk wiꞌjcꞌa bix nuk tiꞌ nyol tuꞌn cyclet xjal tuj il, ka ma bint cyuꞌna juꞌwa, attzen cychunkꞌlala. Pero alj tcyꞌi cyim nuk wiꞌjcꞌa, nuk tchunkꞌlal n-oc takꞌ te, ja tzunj cxeꞌl tzꞌak.

36¿Ti cꞌajbela cykilca twitz txꞌotxꞌ te jun xjal oj t-xcye tiꞌj ka otk txiꞌ t-xooꞌn tchunkꞌlal nuk tuꞌn ttzyet tuꞌn?

37¿Bix ma jteꞌtzen ctchjaꞌ jun xjal twiꞌ tchunkꞌlal ka o txiꞌ t-xooꞌn, nuket jacꞌa tlokꞌ juntl maj? Cuma at mas twiꞌ tanem jun xjal twitz cykilca twitz txꞌotxꞌ.

38Alj ma tzꞌel chꞌixwe wiꞌj bix tiꞌ nyol cywitz xjal nakch eteꞌ wiꞌj bix cywitz aj il, jaxse juꞌx inayena, jxjal Smaꞌn tuꞌn Dios, qꞌueleltzen chꞌixwexe tiꞌj oj tul meltzꞌajxin juntl maj twitz txꞌotxꞌ tuya nimxsen tajwalelxin tuꞌn Tmanxin Dios, bix tzinxse ntxakakanxin, bix cyuyax xjan tsanjel Dios tuj cyaꞌj―tz̈i Jesús cye xjal.