LOS HECHOS 2 - Mam of Todos Santos -- Guatemala Unicode

Tej tul Espíritu Santo

1Tcublen bajxitl tzunj cyaꞌwnak tuya lajaj kꞌij at-xsen cye xjal judío cycostumbre tuꞌn t-xiꞌ cykꞌoꞌn cab twitz cyawal te Dios, bixsen tziyꞌ jun cyninkꞌij xjal. Ja tzunj ninkꞌija Pentecostés tbi. Tejtzen tpon tumel ja ninkꞌij te Pentecostés, jatzen junx n-oc cychmon cyiib t-xel Jesús.

2Tejtzen cychmon cyiibxin, chꞌinnchꞌe t-xiꞌ cybiꞌnxin tjaw jun tij kꞌajtlenel tzajninxe tuj cyaꞌj. E kꞌajt-xsen tisen jun tij cykꞌiꞌk njitxꞌitxꞌin. E kꞌajkꞌajaxsen tuj cykil lugar jaaꞌ eteꞌcꞌaxin.

3Bix e cub jlet nim techlal tisen taakꞌ xjal, bix tisen tken kꞌakꞌ, bix e baj cub paxke bix e cub tenke tibaja jaca juun xjal.

4Juꞌtzen tten toc Espíritu Santo tuya jaca juun xjal. Bix oc tkꞌoꞌn cyipemal xjal, bix akꞌke yolel tuj jun wikxitl yol laꞌ alcye oc tkꞌoꞌn Espíritu Santo cye tuꞌn t-xiꞌ cyyolen.

5Tuꞌntzen tiyꞌset jkꞌij te ninkꞌij, nimxsen xjal judío otk pon tuj Jerusalén. Te cykil twitz txꞌotxꞌ otk chi baj tzaaꞌ xjal, bix tecꞌalex yolen juun wik xjal e baj tzaj te nakch.

6Tejtzen toc cybiꞌn jxjal tex tnom bix xsun kej xjal te nakch, cybinte tzunj tij kꞌajtlenel, bix oc cychmon cyiib xjal junx. Tejtzen toc cybiꞌn xjal cyyol t-xel Jesús nchi kban tyol Dios tuj jcye xjal cyyol, bix e baj jaw kleeꞌ ke xjal.

7Min e bint cybisen xjal tiꞌj, bix e xiꞌ tkbaꞌn cab te cabtl:

—¿Tikentzenle nimxsen yol baꞌn cyuꞌn? Pero nuk te tnom Galilea ke xjal.

8¿Pero tikentzenle juꞌwa? Lu ke nchi yolen kuya tuj ke kyol te jaca juunke.

9Bix nim ke kyol. Kxol at xjal te ttxꞌotxꞌ Partia, te ttxꞌotxꞌ Media, ttxꞌotxꞌ Elam, te Mesopotamia, te Judea, te Capadocia, te Ponto, te Asia,

10te Frigia, te Panfilia, te Egipto, cye tnom tuj ttxꞌotxꞌ Africa mas nakch twitz Cirene, bixsen te Roma. Kxol at ke judío cuma jax itzꞌja koꞌ tzalu, bix at ke nuk o tzꞌoc kkꞌon kiib te judío.

11Juꞌnawa, pero miꞌn tzꞌel tuj kcꞌuꞌj tuꞌn cyxiꞌ knaꞌ kej xjal te Creta bix xsun kej xjal te Arabia, ¡Tiẍtate tiꞌj, ja te cxeꞌl kcꞌuꞌj tiꞌj baꞌn tbinchben Dios nkbet ke tuj kyol!―tz̈itzen cykilca xjal.

12Pero e jawxsen kleeꞌ ke xjal minxsentiiꞌ baꞌn t-xiꞌ cybisen tiꞌj bix akꞌke kanlte cyxolelex:

—¿Titzen elpenina ja lu? ¿Titzen nbaj?―tz̈itzen ke xjal.

13Pero attzen cab xjal oc ten xmucchalec cyej xin t-xel Jesús kbal tyol Dios. Tz̈i tzunkexin cyjulu:

—Cuma ma txiꞌ cycꞌaꞌn kꞌeꞌn―tz̈itzen ke xjal.

Tej tpocban Pedro tneel maj

14Tejtzen toc cybiꞌn jcablajajxin t-xel Jesús tyol, bix e jaw weꞌkexin. Cyxolx xsunxin akꞌa Pedro yolel cyiw cye xjal bixsen cyej xjal xmucchal:

—Ke cyey xjal te ntanem judío, bix xsunkey xjal najl tuj Jerusalén, cybimcꞌatzen ti jilel cxeꞌl nkbaꞌn cyey.

15Keya yaaꞌn bola koꞌka tisenj cyey tuj cywitz. Cybisenxa tiꞌj, maa beljaj tajlal hora jaꞌlewe, bix cykil xjal itzkilte min-alte jun n-akꞌ cꞌal kꞌeꞌn te jyaꞌx.

16Yaaꞌn juꞌ tewa. Ja te ja lu e cyaj tkꞌumen Dios jatxe tyem tuꞌn tbint tuꞌn. Baꞌn cyuꞌna o tzaj tkꞌumen Dios tuꞌn tyolel Joel cyjulu:

17“Laꞌ alcye jun kꞌij tzul nchkꞌoꞌn Espíritu Santo tuꞌn tten cyuya tiẍte xjalel tiꞌj, tuꞌntzen cxeꞌl cykꞌumen ke cycyꞌaala bixsen ke cymeela nyola cye xjal. Bix ke xjal cꞌoquel cycyeꞌyen tuj cywitziyꞌ ti jilel waj txiꞌ nyeecꞌan cye, cyele cwal, cyele tij.

18Jaxxix wuꞌn cyuj tzunj kꞌij chi ul, cxeꞌltzen nchkꞌoꞌn Espíritu Santo te cykil kej xjal ma tzꞌoc ebinte we bix chin cybiꞌ aljxele tiꞌj, xuujle, xinakle. Bix cykbaꞌ laꞌ alcyej we cxeꞌl nkbaꞌn cye.

19Bix cyuj tzunj mancꞌbil kꞌij cxeꞌltzen nyeecꞌan ke techlal tuya nim seyꞌpajlenel twitz cyaꞌj, bix kaꞌcꞌaxsen pjel twitz txꞌotxꞌ. Nimxsen tz̈iyꞌ qꞌuelel, nimxsen kꞌakꞌ bix nimxsen sib.

20Kloljxsen cꞌoquela kꞌij bix cyakxsen cꞌoquela xjaw tisen tz̈iyꞌ. Bix yajxitltzen oj tpon kꞌij tuꞌn takꞌ Taaw twitz txꞌotxꞌ te nincꞌul cykil xjal, jatzen kꞌij oj t-xiꞌ tyeecꞌan Dios nintzaj tipemal.

21Pero jaca juun xjal ma txiꞌ kanente najsbil tiꞌ til te Dios ccoꞌpjeltzen tuj il tzul,” tz̈itzen Dios tuꞌn Joel jatxe nejl.

22Cybimcꞌatzen nyol, key te ntanem Israel. Jesús te Nazaret jatzen jun xjalj o tzaj tchkꞌoꞌn Dios twitz txꞌotxꞌ. Bix cywitz tzuna toc tajwalelxin tuꞌn Dios tuya nim techlal tipemalxin, tisenxj o cyila.

23Pero tisenx tcublen tuj twitz Dios jatxe nejl, ja tzunj xin Jesús lu oc kꞌoꞌn tuj cykꞌaba, bix tejtzen tpon tumel, ejeeꞌ tzuna e cub byonte texin cyuꞌnj xjal min tzꞌoc takꞌ Dios cye. Ejeeꞌtzen xjal e jaw kꞌonte texin twitz cruz.

24Pero amale e byetet-xin, o jatz titzꞌjsaꞌn Dios jaxin. O tcoꞌpan Dios jaxin tuj cyamecy, cuma yaaꞌn tumel tuꞌn toc ten cyamecy cꞌojlalte Jesús tisen jun pres.

25Ja tzunj tpocbala e cyaj ttzꞌiꞌben jxin David nejl tuj Salmos. Tz̈i tzunj xin Scyꞌoꞌn tuꞌn Dios cyjulu, tz̈i David: “Ntzkiꞌnwe ka cykil tyem at Dios wuya. Jatzen weya wuyaj at tuya nkꞌaba tuj nmankꞌaba te onl weya. Juꞌ tzunj mintiiꞌwa ttz̈i wiꞌj.

26Juꞌ tzunj axsen ttz̈yal taꞌwe wanem. Cxeꞌltzen nkbaꞌn chꞌin tiꞌj ttz̈yal taꞌ wanem, jaj cuma ntzkiꞌntl oj ncyim, chin jawetz itzꞌjtlwe juntl maj.

27Dios nman, ntzkiꞌnwe mlay cyaj tkꞌoꞌn wey wanem cyxol cyimne, bix jax mlay tcuyey tuꞌn tcub kꞌey nxumlal, cuma inayena sant tcwala.

28Ctzaal tmeltzꞌuꞌn wey nchunkꞌlal juntl maj. Bix chin pomel meltzꞌajwe twitza bixsen chin temela tuj tbanel tuꞌna,” tz̈itzen Tcwal Dios, tz̈i David tcyaj tkbaꞌn at-xe kꞌij.

29Ke cyey te ntanem, min e yolen jxin kxeꞌchel David tiꞌjxxin, cuma cykilte koꞌ itzkilte ka e cyimte David bix e mket-xin, bix jax luꞌx tjayelxin at-x tuj txꞌotxꞌ.

30Yaltzen te David e yolen texin tiꞌj cpjel mas yaj, bix ttzkiꞌntexin ka otk tkbate Dios tuyaxix jun tyol jax, bix ka ja jun t-xeꞌchel David tscyꞌetlel tuꞌn Dios te cawel te junx maj.

31Tiꞌj tzunj t-xeꞌchel David e tkbatzen David alcyej kꞌij tul-lelxin, bix jaxsen xinj e tkba David tuꞌn tjatz itzꞌj tuj txꞌotxꞌ, bix mintiiꞌ tuꞌn tcyaj tanemxin cyxol cyimne, bix tuꞌn miꞌn cuꞌx kꞌey t-xumlalxin.

32Jatzen Scyꞌoꞌn tuꞌn Dios ja Jesús, e jatz titzꞌjsaꞌnxin juntl maj tuꞌn Dios. Cykilxsen koꞌ te tstiwa tiꞌj.

33Yaltzen jaꞌlewe o tzꞌaj kꞌiꞌnxin tuj cyaꞌj, jaaꞌ o tzꞌoca tajwalelxin te cawel junx tuya Dios tibaj cykil twitz txꞌotxꞌ. Bix jax o tzꞌoc tkꞌoꞌnte Kman Dios Espíritu Santo te Jesús tisenx e tkbaxin tuj tneel, bix tuꞌntzen ttzaj tchkꞌoꞌn Jesús Espíritu Santo twitz cykil twitz txꞌotxꞌ. Ja tzunja ma bint tuꞌn Dios jaꞌlewe, bix xsunj ma cyila bix ma cybiy ejeeꞌtzen techlal J-espíritu Santo ma tzaj tkꞌoꞌn te kcotz.

34Baꞌn, tzinenx tiꞌj yaaꞌnte David aj kꞌiꞌn tuj cyaꞌj, sino ja te Jesús. Jax David e kbante cyjulu: “Jax Kman Dios e kbante te Waaw: ‘Keca tuj nmankꞌab tisen tneel xjal,

35ojxe nxcye cyibaj taj kꞌoja,’ tz̈i Dios te Tcwal,” tz̈i ktzan David.

36Juꞌ tzunj cyjel nkꞌoꞌn tuj chicꞌaj cyey, ejeeꞌy te Israel, jxin Jesús nko yolen tiꞌj, jatzente xinj jaxxix Scyꞌoꞌn tuꞌn Dios. Otzen tzꞌoc tkꞌoꞌn Dios jaxin te Kaaw. Bix jax xsun ja xjal lu cyey e cybiya twitz cruz―tz̈itzen Pedro cye xjal judío.

37Tejtzen cybinte xjal jtyol Pedro, bixsen e cynaꞌ xjal tchyonel, cuma el cyniyꞌ xjal tiꞌ cykaꞌyel, bix e xiꞌ cykbaꞌn xjal te Pedro bix tej cabtl t-xel Jesús:

—Key ktanem, ¿titzen ko temela ya tuꞌntzen kcoꞌpja?―tz̈itzen ke judío.

38Pero bix aj ttzakꞌbeꞌn Pedro:

—Cyjel cykꞌoꞌna cyila, bix chi xeꞌla tuj aꞌ tuꞌntzen t-xiꞌ cyyeecꞌana ka ma chi meltzꞌaja, bix ya cykꞌontltzen cyiiba tuyaj xin Scyꞌoꞌn tuꞌn Dios, jaj xin Jesús. Juꞌtzen ctemela tuꞌn tnajset cyila bix cyiikꞌa tzuna t-xtalbil Dios, ja Espíritu Santo.

39Jatzen jun tyol Dios o cyaj te cyey, bix te cycwala, bixsen te cyej xjal chi itzꞌjel laꞌ alcye jun kꞌij, te cykilj xjal ttxcaꞌ Dios―tz̈i Pedro cye xjal.

40Jayle tzunja e tyole Pedro, bix at-x nimtl tyolxin. E tkbaxin tuꞌn il tiꞌj tel cypaꞌn cyiib xjal cyiꞌj xjal judío cycyꞌi tuꞌn cyiikꞌente Jesús.

41At-xsen nim xjal oc ocslante tyol Pedro bix e bautizarj. Tex xsunj kꞌija atle oxe mil xjal e bautizarj.

42Bix oc cysmon cyiib xjal cyuya nimtl ocslal tuꞌn toc cykꞌon cyiib nuk te ebil cyxnakꞌatz t-xel Jesús. E ten ke xjal tuj ttz̈yal tuya cabtl. E waaꞌnke bix e naꞌnke Dios junx, bix e cub cypaꞌn tikꞌch cye.

Ti tten cychunkꞌlal tneel ocslal

43Bix cykilxsen ke xjal te Jerusalén e jaw kleeꞌ cuma nimxsen tajwalel techlal cyaakꞌen t-xel Jesús e bint.

44Bix cykilca kej xjal oc ocslante Jesús oc cychmon cyiib jaca kꞌij junx. Ojtzen n-oc cycyeꞌyen jun xjal tuj tcyajlal, e cub cypaꞌncye xjal tikꞌch cye cyxol.

45E xiꞌ cyqꞌueyen tibaj cytxꞌotxꞌ bix tikꞌchtl cye at. Tuya tzunj twiꞌ e cyiikꞌ, bix ajben cye te onlec cyej ocslal mebe tuya alcye tcyajlal eteꞌ.

46Jacaxsen kꞌij e chmetke xjal te naꞌl Dios tuj nintzaj tja Dios. E waaꞌnke xjal junx cyja bix nchi tzalajxsen xjal bix junx eꞌla cyanem.

47Bix nim e xiꞌ cykꞌoꞌn chjonte te Dios, cuma nimxsen cyanem tiꞌ Dios. Bix nimel ke xjal cywitz ocslal. Jacaxsen kꞌij oc mas nim xjal ocslalte tyol Jesús. Juꞌtzen tten ttz̈ꞌiy cybet ke ocslal tuꞌn Kman Dios.