1Tejtzen tbaj tkbaꞌn Jesús cykilca yol lu, e xiꞌ tkbaꞌnxin cye t-xnakꞌatzxin:
2—Cytzkiꞌna cabj tzul jninkꞌij te Pascua bix ma pon tumel tuꞌn nkꞌoja tuj cykꞌab xjal tuꞌn nbyeta twitz cruz, inayena, jxjal Smaꞌn tuꞌn Dios tuꞌn ntena cyuya xjal―tz̈ixin.
3Bix e baj cychmon cyiib ke nejenel cye pala cyuyax nejenel cye xjal twitz peꞌn tja Caifás, jpala mas jawnex cyxol pala.
4Bix e yolenkexin cyxolxxin ti tten tuꞌn ttzyet Jesús tuj ewjel, tuꞌntzen tbyet-xin.
5Pero e xiꞌ cykbaꞌnxin cyxolxxin:
—Yajtzen yaaꞌn cyuj kꞌij te Pascua, tuꞌntzen miꞌn jaw cykꞌoj xjal kiꞌj―tz̈ikexin.
Tej tjax koꞌn cꞌocꞌsbil tuj twiꞌ Jesús(Mr. 14:3-9; Jn. 12:1-8)6Yaltzen te Jesús, e ponxin tuj tnom te Betania, tuj tja jxin Simón otk tzaj kꞌey tchuꞌl tuꞌn lepra.
7Nchi waaꞌnxin ttxaꞌn mes tuj tja Simón tej tpon junxuj xuuj tuya jun niꞌ cyeca lmet nojne tuya cꞌocꞌsbil cyiꞌ xjal bix wiꞌylxsen. Bix e jax tkoꞌnxuj cꞌocꞌsbil cyiꞌ xjal tuj twiꞌ Jesús.
8Yaltzen cye t-xnakꞌatzxin, tej toc cycyeꞌyenxin ti otk tse xuuj, e jaw yolenkexin:
—¿Tikentzen ma pjaꞌ tyaaꞌn jxuuja jcꞌocꞌsbila?
9Yaaꞌn tumel. Baꞌntetpele xiꞌ qꞌueyet, matle jaw nim pwak tiꞌj, bixetle s-ajben te onl cye mebe―tz̈ikexin.
10Pero el tniyꞌ Jesús tiꞌj ti iyꞌ tuj cycꞌuꞌjxin, bix e xiꞌ tkbaꞌnxin cyexin:
—¿Tikentzen eteꞌquey yaꞌl texuj? Jtexuj ma tzꞌoc tbinchaꞌn wiꞌja, baꞌn teja.
11Ka cyaja txiꞌ cyyeecꞌana cyanema cye mebe, attzen mebe cyxola cykil kꞌij. Pero weya, nuk chꞌintl chin temela cyxola.
12Ma tzꞌoc tkoꞌnxuj cꞌocꞌsbil wiꞌja teja mitknaꞌx ncyima, tuꞌntzen tbaj bint nxumlala tuꞌn nmaketa.
13Jaxxix cxeꞌl nkbaꞌna cyey, jaaꞌxja cpomela baj tumel jbaꞌn tpocbal coꞌpbil cye xjal, cbyal tpocbal ti ma tbinche jxuj xuuja wiꞌja. Juꞌtzen cnaꞌjalewe―tz̈ixin.
Tej t-xiꞌ toye Judas tiib tuꞌn t-xiꞌ tkꞌoꞌn ja Jesús(Mr. 14:10-11; Lc. 22:3-6)14Tbajlen yolenxitl tzunxin, bix el Judas Iscariote, jun t-xnakꞌatz Jesús t-xol cablaajxin. Bix e xiꞌ Judas te yolel cyuya nejenel cye pala.
15Bix e xiꞌ tkbaꞌn Judas cye:
—¿Jteꞌ pwak ctzaal cykꞌoꞌna weya ka ma txiꞌ nkꞌoꞌna Jesús tuj cykꞌaba?―tz̈i.
Bixsen e bint cyyolxin tuꞌn toc cykꞌoꞌnxin winak laaj pwak te plata te.
16Bix akꞌ Judas jyolte ti tten tuꞌn t-xiꞌ tkꞌoꞌn ja Jesús tuj cykꞌab nejenel cye xjal.
Tej twaaꞌn Jesús cyuya t-xnakꞌatzxin tuj xjan kꞌij(Mr. 14:12-25; Lc. 22:7-23; Jn. 13:21-30; 1 Co. 11:23-26)17Tetzen tneel kꞌij te ninkꞌij te Pascua, jninkꞌij tej cywaaꞌn xjal pan mintiiꞌ levadura tuj, e pon lkꞌe t-xnakꞌatz Jesús tiꞌjxin, bix e xiꞌ cykanenxin texin:
—¿Jaaꞌ tumel taja tuꞌn tbaj kbinchaꞌna jwaabj te xjan kꞌij?―tz̈ikexin.
18Bix aj ttzakꞌbeꞌnxin:
—Cyucxa tuj tnom te Jerusalén, bix oj toc noj junxin xjal cywitza, cykbanx te: “Taat, tz̈i Xnakꞌtzal tey cyjulu: ‘Chꞌix tpon tumel tuꞌn ncyima. Qꞌuiyꞌsetel Pascua wuꞌna cyuya nxnakꞌatza tuj tjay,’ tz̈i Jesús,” tz̈i cybela tej xin lu―tz̈ixin.
19Bix e cybincha t-xnakꞌatzxin tisen e tkbaxin, bix akꞌkexin binchal cywaxin te Pascua.
20Tetzen n-akꞌ cwelcꞌa klolj, e cub ke Jesús tiꞌj mes cyuyax kej cablaaj t-xnakꞌatzxin.
21Maantktzen nchi waaꞌnxin, e xiꞌ tkbaꞌn Jesús:
—Jaxxix cxeꞌl nkbaꞌna cyey, at jun cyxola cxeꞌl tqꞌueyen inayena tuj cykꞌab kej xjal cyaj tuꞌn ncuba―tz̈ixin.
22Toctzen cybiꞌnxin tyol Jesús, e tzajtzen nim cybisxin. Bix juun n-ela cyexin akꞌ kanlecte te Jesús:
—¿Inayenpatzen weya, Taat?―tz̈i tzunkexin.
23Bix aj ttzakꞌbeꞌnxin:
—Alcye tzunj cyey cwelex muꞌnte tpan junx wuyena tuj lak, ja tzunja cxeꞌl kꞌonte weya tuj cykꞌab byol xjal.
24Jxin xjal Smaꞌn tuꞌn Dios tuꞌn tten cyuya xjal, amale tzint tkbaꞌn tyol Dios tuꞌn tbyet-xin, pero ayxsen tixsen tnaꞌx jcxeꞌl kꞌonte weya. Masetlpele baꞌn minxit itzꞌj xjala―tz̈ixin.
25Bix e xiꞌ tkbaꞌn Judas, jxjal otk nincꞌun tuꞌn t-xiꞌ tqꞌueyen Jesús:
—Xnakꞌtzal, ¿japatzen kena?
Bix aj ttzakꞌbeꞌn Jesús:
—Pjel tisenj ma tkbay.
26Maantktzen nchi waaꞌnxin, tej tjaw ttzyuꞌn Jesús jun pan, bix e xiꞌ tkanenxin xtalbil te Dios tiꞌ pan. Bix akꞌxin piẍlcate, bix e xiꞌ tkꞌoꞌnxin cye t-xnakꞌatzxin, bix e xiꞌ tkbaꞌnxin:
—Cytzyunxa bix cywaaꞌnx, cuma ja tzunja pana techlal nxumlala cwel yuchj bix cbyetel―tz̈i Jesús.
27Bix e jaw tiiꞌnxin jun vaso nojne tuya vino, bix e xiꞌ tkꞌoꞌnxin chjonte te Dios tiꞌj, bix e xiꞌ tkꞌoꞌnxin cye t-xnakꞌatzxin, bix e xiꞌ tkbaꞌnxin:
—Cycꞌanx cykilcakey ja vino lu,
28cuma techel ntz̈qꞌuela qꞌuelel cꞌala. Cxeꞌl oyet ntz̈qꞌuela tuꞌntzen tnajset cyil nim xjal. Tuꞌnj ntz̈qꞌuela qꞌuelel cꞌala, ctemeltzen jun acꞌaj ttrat Dios cyuya xjal.
29Cxeꞌl nkbaꞌna cyey, mi nuket juntl maj cxeꞌl ncꞌaꞌna vino tiꞌj lux kena iniꞌtza texe jkꞌij oj woca te cawel tuj tcawbil Nmana, maxetzen cxeꞌl ncꞌaꞌntla, bix cyuyax xsuna―tz̈i Jesús.
Tej t-xiꞌ tkbaꞌn Jesús te Pedro, jay cwel eꞌwente we oxe maj(Mr. 14:26-31; Lc. 22:31-34; Jn. 13:36-38)30Cybajlen waaꞌn tzunkexin, bix akꞌkexin bitzel. Cybajlentzen bitzenxin, bix e xiꞌkexin tcꞌuꞌj witz te Olivos.
31Bix e xiꞌ tkbaꞌnxin cyexin:
—Cykilca key cyjel cycyeꞌyena inayena te koniyan jaꞌlewe, cuma tz̈i Dios jun maj tuj tyol cyjulu: “Cwel nbyoꞌna cylel, bix chi elel tz̈itj ke carnel,” tz̈i Dios jatxe ootxa.
32Pero ojtzen njatz itzꞌja tuj cyamecy, chin xeꞌl neja cywitza tuj departamento te Galilea―tz̈ixin.
33Pero e xiꞌ ttzakꞌbeꞌn Pedro:
—Amale cykilcatlet cyjel cycyeꞌyen jay tuꞌnj ttz̈i cyiꞌj, pero weya, mlayx cyaj ncyeꞌyena jay―tz̈i Pedro.
34E xiꞌ tkbaꞌn Jesús:
—Jaxxix cxeꞌl nkbaꞌna tey, te ja koniyan jaꞌlewe, te mitknaꞌx kskix, oj tookꞌ cooꞌ, tuꞌn ttz̈i tiꞌja otktzen txiꞌ tkbaꞌna oxe maj min ttzkiꞌna nwitza―tz̈ixin te Pedro.
35E xiꞌ tkbaꞌn Pedro texin:
—Miꞌn txiꞌ nkbaꞌna min ntzkiꞌna twitza. Ka at il tiꞌj, chin cymela tuꞌn woc lpeya tiꞌja. Mlay cyaj ncyeꞌyena jay―tz̈i Pedro. Jax juꞌx e xiꞌ cykbaꞌn cykilcatl t-xnakꞌatz Jesús.
Tej tnaꞌn Jesús Dios tuj Getsemaní(Mr. 14:32-42; Lc. 22:39-46)36Yajcꞌatltzen chꞌintl tex koniyan, bix e cuꞌxkexin tuj jun lugar Getsemaní tbi. Bix e xiꞌ tkbaꞌnxin cye t-xnakꞌatzxin:
—Chi kequetzen cyey tzalu, matzen chixwe ma chixa yolel tuya Dios―tz̈ixin.
37Bix e xiꞌ tiiꞌnxin Pedro cyuyax caꞌba tcwal Zebedeo, bix e tzaj nim tbisxin bix akꞌ cwel talelxin.
38Bix e xiꞌ tkbaꞌnxin cyexin:
—Mayꞌxsen tzꞌoc jun bis tiꞌ wanema. Mlayxsen npawe. Chi tencꞌatzen cyey tzalu. Cyimeltzen chꞌin cywatla―tz̈ixin,
39bix el lkꞌexin chꞌintl cyiꞌjxin.
Bix e cub mutzkꞌajxin twitz Dios, bix e xiꞌ tcubsaꞌnxin twitzxin te Dios. E xiꞌ tkanenxin:
—Nmana, ka baꞌn tuj twitza, chin tcoꞌpa tzuna tiꞌj tuꞌn tiyꞌx jniyꞌ jlu wuꞌna. Pero yaaꞌn tej weya waj bint cbinel, sino ja tej alcye tey taj bint, jatzen wej waja―tz̈ixin.
40Tbajtzen yolenxin tuya Dios, bix e pon meltzꞌajxin cyiꞌ Pedro. Nchi wutanxin tej tponxin cyiꞌjxin. Bix e xiꞌ tkbaꞌnxin cye Pedro:
—¿Nchi wutanpa tzuna? ¿Mitetpa jun hora ma cypay watl?
41Cyimelxix chꞌin cywatla, bix chi naꞌn Dios, tuꞌn miꞌn chi cub tzꞌaka tuj jun il. Taj cyey cyanem tuꞌn tbint jbaꞌn, pero mintiiꞌ tipen cyxumlala tuꞌn tbinchet alcye taj cyanema―tz̈ixin cye Pedro.
42Bix elxin juntl maj te yolel tuya Dios. Bix juntl maj e xiꞌ tcubsaꞌnxin twitzxin te Dios:
—Taat Nmana, ka yaaꞌn baꞌn tuj twitza tuꞌn miꞌn tziyꞌx jqꞌuixcꞌaj lu wuꞌna, bint-xit jtajbila―tz̈ixin.
43Tejtzen tpon meltzꞌajxin, nchi wutan t-xnakꞌatzxin juntl maj cyoxelxin, cuma ntzajxe mtzꞌe cywitzxin tuꞌn nim watl.
44Bix elxin cyiꞌ t-xnakꞌatzxin juntl maj te yolel tuya Dios toxen maj. Ejeeꞌ xsunj tyolxin te tneel maj bix tcab maj, ejeeꞌ xsunja e xiꞌ tkbaꞌnxin te Dios te toxen maj.
45Tbajlen yolen tzunxin te toxen maj tuya Dios, e pon meltzꞌajxin cyuya t-xnakꞌatzxin, bix e xiꞌ tkbaꞌnxin cyexin:
—¡Jeyꞌ! ¿Nchi wutanxpa tzuna? ¿Tzinxpatzen chi ajlana? Matzen pon tumel tuꞌn nxiꞌ kꞌoꞌna tuj cykꞌab aj il.
46Chi weꞌwa. Lu jxin ma txiꞌ kꞌonte weya tzula. Koꞌke clul texin―tz̈ixin.
Tej ttzyet Jesús(Mr. 14:43-50; Lc. 22:47-53; Jn. 18:2-11)47Tzinx yolen Jesús tej tpon Judas, jun t-xnakꞌatzxin t-xolj tcablaajxin, tuya nim xjal binne cyten tuya espada bix tuya tzeeꞌ. Chkꞌoꞌn tzunkexin cyuꞌn nejenel cye pala bix cyuꞌn nintzaj xjal.
48Otktzen txiꞌ tkbaꞌn Judas jun techel cye tzuyel ti tten oj ttzyet Jesús. Juꞌtzen toc tuꞌn Judas cyjulu: “Al tzunj ma tzꞌel ntzꞌuꞌban twitz, ja tzunja. Cytzyumetztzen,” tz̈i Judas.
49Juꞌ tzunj e xiꞌ lkꞌe Judas tiꞌ Jesús, bix e xiꞌ tkbaꞌn texin:
—Jeyꞌ Xnakꞌtzal―tz̈i tzunxin, bix el ttzꞌuꞌbanxin twitzxin.
50Bix e xiꞌ tkbaꞌn Jesús te Judas:
—Jay wuyena, binchanx jtsanlala―tz̈ixin.
Bix e xiꞌ cykꞌabxin te tzyultzte Jesús.
51Pero cyxol cyej eteꞌ tuya Jesús, at jun e jatz tiiꞌn tspada bix e xiꞌ tjubac tspada tiꞌ twiꞌ jun t-akꞌanal jpala mas jawnex, bix el ttxꞌoman jun tẍquin.
52Bix e xiꞌ tkbaꞌn Jesús te:
—Kꞌoncꞌax tspadiy tuj tjayel. Kej xjal nchi kꞌon cyiib tuꞌn cykꞌojl cyiꞌ juntl, chi cymeltzen tuj kꞌoj.
53¿Mimpa tzꞌel tniꞌya tiꞌj ka jacꞌa txiꞌ nkanena te Nmana tuꞌn ttzaj tsmaꞌn mas te setenta mil tsanjel tuj cyaꞌj tuꞌn cycoꞌpan weya?
54Pero nuket ma txiꞌ nkanena tuꞌn miꞌn chin cyima, ¿titzen tten tuꞌn tel jax jtyol Dios e tkba il tiꞌj tuꞌn ntzyeta?―tz̈ixin.
55Bix e xiꞌ tkbaꞌn Jesús cyej nim xjal otk chi ul tzyulte:
—¿Alakꞌpa kena, tuꞌntzen at il tiꞌj tuꞌn cyula tuya cyspadiy bix cytzeeꞌy te tzyul weya? Cykilca kej kꞌij lu ma chin tena cyxola te xnakꞌtzal cyey tuj nin tja Dios, pero mintlpe in cytzuya.
56Pero cykil tzunja nbaja tetzen tuꞌn tjapan baj twiꞌj tyol Dios o cyaj tzꞌiꞌbet cyuꞌn tyolel Dios―tz̈i Jesús.
Bix cykilca ke t-xnakꞌatzxin e cyaj cycyeꞌyen jaxin, bix e baj pjel okkexin.
Tej tpon kꞌiꞌn Jesús cywitz aj cawel(Mr. 14:53-65; Lc. 22:54-55, 63-71; Jn. 18:12-14, 19-24)57Bix e xiꞌ cytzyuꞌn xjal ja Jesús, bix e xiꞌ cyiiꞌnxin jaxin twitz tneel pala Caifás, jatztzen otk txiꞌ cychmon cyiib ke txꞌolbal ley cyuyax nejenel cye xjal.
58Nakchtzen e xaꞌ lpete Pedro tiꞌ Jesús, tejxe tpon Jesús tja tneel pala. Ocxtzen Pedro twitz peꞌn, bix e cub kexin cyuya ke cꞌojlal nin tja Dios, tuꞌntzen tlontexin ti pjel.
59Tunwentzen nchi jyona jxin nejenel cye pala cyuyax cawel cyxol xjal judío cab tstiwa ẍtakꞌ tiꞌ jun til Jesús tuꞌn tbyet-xin cyuꞌnxin.
60Pero min e cnet jun tilxin cyuꞌnxin, amale nimet xjal e pon cywitz cawel te ẍtakꞌel.
Pero mancꞌbiltzen, e pon caꞌba xjal cywitzxin,
61bix e xiꞌ cykbaꞌn:
—E tkba ja xjal lu cyjulu: “Jacꞌa bint tuꞌn tcub xitj tja Dios wuꞌna, bix tuꞌn tjaw nbinchaꞌna juntl maj tuj oxe kꞌij,” tz̈i xjal lu―tz̈i ke caꞌba tstiwa.
62Juꞌ tzunj, e jaw weꞌ tneel pala, bix e xiꞌ tkanen te Jesús:
—¿Mimpatiiꞌ ctzaal ttzakꞌbeꞌna cyiꞌj yola? ¿Ti toc cyuꞌna tiꞌj cyyol jxjal lu?―tz̈ixin.
63Pero min akꞌ Jesús. Bix e xiꞌ tkbaꞌn tneel pala te:
—Cxeꞌl ncubsaꞌna nwitza twitz Dios iꞌtz, kbantz keya ka jay jxjal Scyꞌoꞌn tuꞌn Dios te cawel, ka jay Tcwal Dios―tz̈ixin.
64E xiꞌ tkbaꞌn Jesús texin:
—Jax ma tkbay. Jax juꞌx, cxeꞌl nkbaꞌna cyey, cylaꞌ tzuna inayena kꞌuklec tuj tmankꞌab Dios nim tipemal, bix cylaꞌ tzuna oj ntzaj twitz txꞌotxꞌ tuj muj twitz cyaꞌj―tz̈i Jesús.
65Toc tbiꞌn tneel pala kej yol lu, bix el ttzakenxin tiꞌjxin tuꞌn tkꞌojxin, bix e xiꞌ tkbaꞌnxin:
—Njuben yol tiꞌ Dios ka junxxin tuya Dios. ¿Titzen kaj te mas tstiwa? ¡Jeyꞌ, ejeeꞌ xsuna ma chi oc ebinte lu tzunxin njuben yol tiꞌ Diosa!
66¿Ti toc cyuꞌna?―tz̈ixin.
Bix aj cytzakꞌbeꞌnxin:
—At til. Il tiꞌj tuꞌn tbyet―tz̈ikexin.
67Bix akꞌkexin tzublecte tiꞌ twitz Jesús, bix oc cypjuꞌnxin, bix at juuntl oc cytzꞌajenxin.
68Bix e xiꞌ cykbaꞌnxin:
—Jay Scyꞌoꞌn tuꞌn Dios, kbantz keya, ¿alj xjal kxola s-oc pjunte tey?―tz̈ikexin.
Tej tel tiiꞌn tiib Pedro tiꞌj Jesús(Mr. 14:66-72; Lc. 22:55-62; Jn. 18:15-18, 25-27)69Yaltzen te Pedro, tcub xsunxin peꞌn. Bix e pon juntxin xuuj tkꞌopaj tneel pala, bix e xiꞌ tkbaꞌntxin te Pedro:
—Jax juꞌx jaan tey tuya Jesús te Galilea―tz̈itxin.
70Pero tcyꞌi Pedro jtyoltxin juꞌwa, bix e xiꞌ tkbaꞌnxin cywitz cykilca xjal:
—Mintlpe n-el nniꞌya tiꞌj aliꞌj nyoleney―tz̈i Pedro.
71Tej tetz Pedro ttzi penwen tuꞌn ttzyet be tuꞌnxin, at juntl tkꞌopaj tneel pala e til jaxin, bix e xiꞌ tkbaꞌntxin cyej xjal eteꞌ peꞌn:
—Ja xjal lu e ten tuya Jesús aj Nazaret―tz̈itxin.
72Juntl maj elx tiiꞌn tiibxin. E xiꞌ tkbaꞌnxin:
—Tzkinn Dios min ntzkiꞌnwe twitz xjal lu―tz̈ixin.
73Yajcꞌatltzen chꞌintl bix oc cyumlaꞌn jxjal eteꞌcꞌa peꞌn ja Pedro:
—Jaxxix jaanxix tey cyxol kej xjal lepchec tiꞌ Jesús, cuma tiꞌj tyola n-el kniꞌya tiꞌja junxitl xjal tey―tz̈ikexin.
74Bix akꞌ Pedro kꞌilbel tiib:
—Tzkinn Dios yaaꞌn jaan kenwe tuya. Min ntzkiꞌnwe twitzj xjal lu―tz̈i Pedro.
Tzinx yolen Pedro tej tookꞌ cooꞌ,
75bix ul tuj tcꞌuꞌjxin ti otk tkba Jesús: “Te mitknaꞌx tookꞌ cooꞌ, otktzen txiꞌ tkbaꞌna oxe maj min ttzkiꞌna nwitza,” otk tkba Jesús te Pedro.
Bix ex Pedro bix e jaw okꞌ xsunxin nim.
Who We AreWhat We EelieveWhat We Do
2025 by iamachristian.org,Inc All rights reserved.
