APOCALIPSIS 2 - Mam of Todos Santos -- Guatemala Unicode

Jun tumel cye ke ocslal tuj tnom Efeso

1Bix e tzaj tkbaꞌntl Jesús weya:

—Tzꞌiꞌbencꞌa te tej nejenel cye ocslal tuj Efeso cyjulu: “Inayena, jxjal at wuuk cheꞌw tuj nmankꞌaba, bix nchin beta cyxol wuuk cantil te oro, tzin nkbaꞌna cyjulu:

2‘Ntzkiꞌna cykilcaj baꞌn ma bint cyuꞌna bix jcyaakꞌena tuj taakꞌen Dios ma bint cyuꞌna tuya pasensya. Miꞌn cycꞌama ke xjal kaꞌ, bix tej cyten jun xjal e cykba ka nxela pero yaaꞌn juꞌwa, octzen cyipena tiꞌj tuꞌn tel cyniꞌya tiꞌj ka nuk tenx cyuꞌn.

3At cypasensyey, bix amale mat tzꞌoc nim qꞌuixcꞌaj cyiꞌja tuꞌn tlaj cyocslabla wiꞌja, pero min ma cyaj cykꞌoꞌna cyocslabla.

4Pero at jun cyila tuj nwitza. Ya min n-octl wakꞌa cyey tuya cykil cycꞌuꞌja tisenj nejl.

5Juꞌ tzunj, cynaꞌntza jaaꞌ ma chi cwa tzꞌaka bix chi meltzꞌaja juntl maj wuyena tuya cykil cycꞌuꞌja, tuꞌntzen toc wakꞌa cyey tisen tuj tneel. Ka min ma tzꞌoc wakꞌa cyey tisen nejl, chin ula cyuyey tuꞌn tel wiiꞌna cycantila cyxol wuuk cantil.

6Pero at jun tzin cybinchaꞌna baꞌn. N-el cyiiqꞌuena cybinchben ke nicolaíta. Jax juꞌx weya, kaꞌxsen cybinchben tuj nwitza.

7Cyjkom cyẍquina tuꞌn tel cyniꞌya tiꞌj ti jilel tzin tkbaꞌn Espíritu Santo te cyey, ejeeꞌy ocslal. Alcyekej ma chi xcye tiꞌj taaw il, cxeꞌl nkꞌoꞌna cyoclen tuꞌn t-xiꞌ cywaaꞌn twitzj tzeeꞌ te chunkꞌlal te junx maj at tuya Dios tuj cyaꞌj,’ tz̈i Jesús cyey aj Efeso,” tzꞌiꞌbeqꞌuey.

Jun tumel cye ke ocslal tuj tnom Esmirna

8Yaltzen te tej nejenel cye ocslal tuj Esmirna, tzꞌiꞌbeqꞌuey cyjulu: “Inayena, jxjal tneel bix mancꞌbil, in cyima bix o chin jatz itzꞌja juntl maj, tzin nkbaꞌna cyjulu:

9‘Ntzkiꞌna at nim qꞌuixcꞌaj n-oc cyiꞌja bix mebe xjalkey. Pero kꞌinakey tuj cyaꞌj. Bix ntzkiꞌna at xjal tzin cykbaꞌn ka t-xjal Dioske bix nchi yolen kaꞌ cyiꞌja. Pero yaaꞌn t-xjal Dioske, sino ncheꞌx lpe tiꞌj tajbil taaw il.

10Miꞌn tzaj ttz̈i cyiꞌja tiꞌj qꞌuixcꞌaj tzul cyiꞌja. Qꞌuelel cyniꞌya tiꞌj at juun cyxola at tuꞌn cyocx kꞌoꞌn tuj tzeeꞌ tuꞌn taaw il, cuma taj taaw il tuꞌn tcyaj cycyeꞌyena cyocslabla. Chi yajlal cyiꞌja laaj kꞌij. Ke cycꞌuꞌja cyuj yajbil luwe hasta ojxe cycyima. Bix cxeꞌl nkꞌoꞌna cycotza, jatzenj cychunkꞌlala te junx maj.

11Cyjkom cyẍquina tuꞌn tel cyniꞌya tiꞌj ti jilel tzin tkbaꞌn Espíritu Santo te cyey, ejeeꞌy ocslal. Alcyekej ma chi xcye tiꞌj taaw il, mlay cheꞌx tuj kꞌakꞌ te junx maj, jatzen tcab cyamecyj,’ tz̈i Jesús cyey aj Esmirna,” tzꞌiꞌbeqꞌuey.

Jun tumel cye ke ocslal tuj tnom Pérgamo

12Yaltzen te tej nejenel cye ocslal tuj Pérgamo, tzꞌiꞌbeqꞌuey cyjulu: “Inayena, jxjal tetz jun machet caꞌba ttziiꞌ binne tten tuj ntziya, tzin nkbaꞌna cyjulu:

13‘Ntzkiꞌna jbaꞌn ma bint cyuꞌna, bix ntzkiꞌna najlkey tuj jun tnom at tjakꞌ tcawbil taaw il. Amale ncawent Satanás tuj cytanema, pero tzinx chi ocslana wiꞌja. Min ma cyaj cycyeꞌyena cyocslabla wiꞌja, amale e cubet byet jxin Antipas tuꞌn tlaj ocslalxin wiꞌja. Iyꞌx qꞌuixcꞌaj tuꞌnxin tejxe tcyimxin tuj cykꞌab xjal nchi oc lpe tiꞌj taaw il.

14Pero at cyila tuj nwitza, cuma at juun cyxola ncheꞌx lpe tiꞌj t-xnakꞌtzbil jxin Balaam, jxin tyolel Dios jẍtakꞌxin e t-xnakꞌtza tej rey Balac ti tten tuꞌn cycub tzꞌak aj Israel tuj il. E xiꞌ tkbaꞌnxin cyexin tuꞌn t-xiꞌ cywaaꞌnxin jwaabj oꞌyen cywitz sant bix tuꞌn cybinchantexin pajlel.

15Jax juꞌx cyey, at juun cyxola ncheꞌx lpe tiꞌj cyxnakꞌtzbil aj nicolaíta, jatzenj xnakꞌtzbil junx tuyaj t-xnakꞌtzbil Balaam. Kaꞌ ja xnakꞌtzbil lu tuj nwitza.

16Juꞌ tzunj, miꞌntl cheꞌx lpey tiꞌj cyxnakꞌtzbilxin. Ka ma cheꞌx lpetla tiꞌj, tzul jkꞌij oj wula cyxola tuꞌn nkꞌojla cyiꞌjxin tuyaj machet tetz tuj ntziya.

17Cyjkom cyẍquina tuꞌn tel cyniꞌya tiꞌj ti jilel tzin tkbaꞌn Espíritu Santo te cyey, ejeeꞌy ocslal. Alcyeke ma chi xcye tiꞌj taaw il, cxeꞌltzen nkꞌoꞌna jwaabj te tuj cyaꞌj cye. Bix cxeꞌl nkꞌoꞌna jun xak sakxix tzin tyeecꞌan ka nxjalake. Twitztzen juun xak tzꞌiꞌbetl jun acꞌaj biybaj, bix nuk oꞌcx jxjal cjkꞌilte xaka qꞌuelel tniyꞌ tiꞌj jbiybaj tzꞌiꞌbet twitz xak,’ tz̈i Jesús cyey aj Pérgamo,” tzꞌiꞌbeqꞌuey.

Jun tumel cye ke ocslal tuj tnom Tiatira

18Yaltzen te tej nejenel cye ocslal tuj Tiatira, tzꞌiꞌbeqꞌuey cyjulu: “Inayena, jxjal Tcwal Dios, jxin tzin tyeecꞌan tbakꞌ twitz nchi koptzꞌaj tisen tken kꞌakꞌ bix nchi koptzꞌaj ke tkenxin tisenj xcbil bronce oj n-ocx tuj kꞌakꞌ, ntz̈i tzuna julu:

19‘Ntzkiꞌna jbaꞌn ma bint cyuꞌna. Bix ntzkiꞌna at cycꞌuꞌja wiꞌja, bix ka n-oc ke cycꞌuꞌja wiꞌja. Bix ntzkiꞌna cyaakꞌena tuj taakꞌen Dios, bix at cypasensyey oj n-oc qꞌuixcꞌaj cyiꞌja. Bix ntzkiꞌna mas baꞌn cybinchbena jaꞌlewe twitzj nejl.

20Pero at jun cyila tuj nwitza. At jun ẍtakꞌ xnakꞌtzbil cyxola tzin tkbaꞌn ka baꞌn tuꞌn t-xiꞌ cywaaꞌna jwaabj oꞌyen cywitz sant bix baꞌn tuꞌn cybinchantiya pajlel. Pero yaaꞌn kaꞌ ja xnakꞌtzbil lu tuj cywitza, bix at juun cyxola ncheꞌx lpe tiꞌj. Ncheꞌx tuj il tuꞌn, tisenj tej cyxiꞌ tuj il kej xjal nejl e cybincha tajbil jxuuj Jezabel.

21E xiꞌ nkꞌoꞌna amleꞌn cye tuꞌn tajtz tiꞌ cyanem, pero cycyꞌi tuꞌn tcyaj cykꞌoꞌn cyil.

22Jeyꞌ, kej xjal ncheꞌx lpe tiꞌj xnakꞌtzbil tiꞌj pajlel, ka min ma cyaj cycyeꞌyen cyil, chi xeꞌl nkꞌoꞌna tuj nim yajbil.

23Bix cwel nbyoꞌna cykilca kej xjal ncheꞌx lpe tiꞌj ja kaꞌ xnakꞌtzbil lu. Bix qꞌuelel cyniyꞌ cykilca ocslal tiꞌj ka inayena jxjal n-oc ncyeꞌyena ti niyꞌ tuj cycꞌuꞌj xjal bix tiiꞌn taꞌ cynaabl. Bix cxeꞌl nkꞌoꞌna te juun cyey cycotzey tiꞌ cybinchbena, laꞌ alcye ma bint cyuꞌna.

24Ja kaꞌ xnakꞌtzbil lu jun jawnex t-xnakꞌtzbil Dios tuj cywitz sbul xjal pero nuk t-xnakꞌtzbil taaw il. Pero cxeꞌl nkbaꞌna te cyej min cheꞌx lpe tiꞌj ja kaꞌ xnakꞌtzbil lu, miꞌn cwel nkꞌoꞌna juntl al xnakꞌtzbil cyibaja.

25Pero jcyocslabla nxiꞌ cyiiꞌna, miꞌn cyaj cycyeꞌyena, tuꞌntzen at-x cyocslabla oj wul meltzꞌaja.

26Alcyekej ma chi xcye tiꞌj taaw il, bix al ma binchante wajbila hasta ojxe tcyim, cxeꞌl nkꞌoꞌna cye tuꞌn cycawen wuyena tibaj cykilca tnom,

27tisenxj weya ma tzaj kꞌoꞌn woclena tuꞌn Nmana Dios. Chi cawel cyibaj tuya nim cyipemal, tisenj jun cylel ncawen cyibaj carnel, bix chi cwel xitj kej aj il tjakꞌ cycawbil, tisenj oj tcub buchj jun wiqꞌuil yaaꞌn baꞌn tuꞌn junxin binchal lak.

28Bix cxeꞌl nkꞌoꞌna jcheꞌw te klax oj ntzaj t-xeeꞌ cyaꞌj cye.

29Cyjkom cyẍquina tuꞌn tel cyniꞌya tiꞌj ti jilel tzin tkbaꞌn Espíritu Santo te cyey, ejeeꞌy ocslal,’ tz̈i Jesús cyey aj Tiatira,” tzꞌiꞌbecꞌa―tz̈i Jesús weya.