2 CORINTIOS 3 - Mam of Todos Santos -- Guatemala Unicode

E tkba Pablo tpocbal acꞌaj ttrat Dios tuꞌn cyclet xjal

1Key hermano, ma txiꞌ nkbaꞌna inayena jun t-akꞌanal Dios jaxxix, pero miꞌn cub cybisena tiꞌj ka te nimbil wiiba. Mintiiꞌ il tiꞌj tuꞌn tcub ttzꞌiꞌben jun xjal uꞌj te okxenbal weya cyuyey ka jiquen kena. At juun il tiꞌj kꞌiꞌn jun cyuꞌj tuꞌn t-xiꞌ cyyeecꞌan ka akꞌanalke tuj taakꞌen Dios, pero weya yaaꞌn il tiꞌj kꞌiꞌn wuꞌja.

2Ntzkiꞌna tuꞌnj e bint wuꞌna cyxola, o chi oca t-xjal Cristo. Juꞌ tzunj ejeeꞌ tzuna jun yecꞌbil cywitz cykil xjal ka jaxxix t-akꞌanal Dios kena.

3Tzinen taꞌ ejeeꞌy t-xjal Cristo. Yal weya, nchin ajbena cyey tuj taakꞌen Cristo, tisen najben jun xjal tzꞌiꞌbel tuj taakꞌen tpatrón oj tcub tbinchaꞌn uꞌj cye cabtl xjal. Yal te uꞌj, tzꞌiꞌben tuya tint qꞌuelel baj tikꞌbil. Bix juꞌxse ootxa e cyaj tzꞌiꞌbet ley twitz xak yaaꞌn iꞌtz. Pero te cyey jaꞌlewe, o takꞌ Dios Espíritu Santo iꞌtz te junx maj, tuꞌntzen tel cyniꞌya tiꞌj tuj cyanema ti taj Dios.

4Juꞌ tzunj, ntzkiꞌna nxiꞌ nkꞌumena tyol Dios jiquenxix, bix nbint wuꞌna tuꞌnj n-oc ke ncꞌuꞌja tiꞌ Dios tuꞌn Cristo.

5Yaaꞌn tuꞌn wexa wipemala nchin akꞌanana baꞌn, sino tuꞌn tipemal Dios.

6Dios o tzaj tkꞌoꞌn weya wipemal tuꞌn t-xiꞌ nkꞌumena tpocbalj acꞌaj ttrat Dios tuꞌn cyclet xjal tuj cyil. Jkꞌanak ttrat Dios cyiꞌ xjal nuk tzꞌiꞌben taꞌ, bix e tkba alj min e tbi tley Dios biꞌx e cub byet. Pero j-acꞌaj trat yaaꞌn juꞌwa, cuma tzin tkbaꞌn ctkꞌaꞌ Espíritu Santo te xjal tuꞌn tbint jti taj Dios tuya cykil tcꞌuꞌj, bix tkꞌaꞌ tchunkꞌlal te junx maj.

7Ja tzunj ley kꞌanak, twitz xak e cyjaꞌ tzꞌiꞌbet. E tkba jley nejl kej xjal min e cynima cykil ley, il tiꞌj tuꞌn cycub byet. Jawnexsen jun ley e cyaj tkꞌoꞌn Dios. Juꞌ tzunj tej t-xiꞌ tkꞌoꞌn Moisés cye xjal, tzinxsen nkoptzꞌaj twitz Moisés bix min e bint toc cycyeꞌyen xjal twitzxin, amale cubnentl e cub bajtl nkoptzꞌaj twitzxin.

8Katzen nintzaj jley te ootxa, ¿mimpatzen tzꞌel kniyꞌ tiꞌj acꞌaj ttrat Dios cyiꞌ xjal kꞌoꞌn tuꞌn Espíritu Santo mas jawnex twitzj ley te ootxa?

9Katzen jawnex jtrat te ootxa, amale e tyeecꞌat min el baꞌn ke xjal twitz Dios, mas jawnex j-acꞌaj trat te jaꞌlewe, cuma nbint tuꞌn tuꞌn cycyaj xjal jiquen twitz Dios.

10J-ootxa trat yaaꞌn jawnex twitzj te jaꞌlewe. Acꞌaj trat masxsen jawnex.

11J-acꞌaj trat mas jawnex twitzj trat te ootxa, cuma katzen jawnex j-o baj tilel, mas jawnex jmiꞌn baj tilel.

12Juꞌ tzunj, key hermano, oj nxiꞌ nkꞌumena tpocbal j-acꞌaj trat, cyequey cꞌoquela nkbaꞌna tixix tten, cuma ntzkiꞌna cꞌajbel ke te junx maj.

13Min txiꞌ nkꞌumena jun trat pjel tilel tisenj e tkꞌumen Moisés. Tej t-xiꞌ tkꞌoꞌn Moisés tley Dios cye aj Israel, bix oc tkꞌoꞌnxin potzbil twitzxin, tuꞌntzen miꞌn cyil xjal cubne tcub baj jnkoptzꞌaj twitzxin.

14Pero ke aj Israel te ootxa min el cyniyꞌ tiꞌj at tuꞌn tbaj tilel jtrat te ootxa, tisen e cub baj tkoptzꞌaj twitz Moisés. Jax juꞌx ke aj Israel te jaꞌlewe, oj nxiꞌ cycyeꞌyen xjal kꞌanak ttrat Dios te cye, min tzꞌel cyniyꞌ tiꞌj min tzꞌajbentl. Min tzꞌel cyniyꞌ tiꞌj ja tbaj tilelj tej tul Cristo.

15Jaꞌlewe oj n-oc cybiꞌn jttrat Dios te ootxa tzꞌiꞌben tuꞌn Moisés, mlayx tzꞌel cyniyꞌ tiꞌj ti japenina. Tisentzen tcub jun potzbil tibaj cynaabl.

16Pero ojtzen tocslan jun xjal tiꞌ Kaaw, qꞌueleltzen potzbil tibaj tnaabl, tuꞌntzen tel tniyꞌ tiꞌj.

17Jatzen xinj Kaaw nkꞌonte tuꞌn kaj tzꞌoc kbiꞌn ti taj Dios. Ejeeꞌ tzunkeje ncheꞌx kꞌinte ja lu, tzakpiꞌntltzenke tjakꞌ trat te ootxa.

18Bix otktzen tzꞌel potzbil tibaj knaabl, tuꞌntzen tel kniyꞌ tiꞌj. At koclen tuꞌn koc twitz Kaaw. Pero min kil twitzxin. Jkocslabl tiꞌjxin jaꞌlewe tisen n-ocx kcyeꞌyen tuj jun respej. Pero amale mint kil twitzxin, tuꞌnj kocslabl tiꞌjxin, tz̈ꞌiynen tz̈ꞌiy knaabl tuꞌn toc tisenj tbanel tnaablxin, cuma ja tzunxin nkꞌonte acꞌaj knaabl.