2 CORINTIOS 9 - Mam of Todos Santos -- Guatemala Unicode

1Pero kape mintiiꞌ il tiꞌj tuꞌn t-xiꞌ ntzꞌiꞌbena cyey ti tten tuꞌn t-xiꞌ cyonena ke ocslal mebe,

2cuma ntzkiꞌna tuya cykil cycꞌuꞌja cyaja tuꞌn cyonena. Nxiꞌ nkbaꞌna cye ocslal tzalu tuj Macedonia ma bint jun jnabkꞌi ke cyey ejeeꞌy ocslal tuj tcwentel te Acaya akꞌkey tuꞌn t-xiꞌ cyonena ke ocslal mebe tuj Jerusalén, bix tej toc cybiꞌn ke ocslal tzalu ti e cub cynicꞌuꞌna, jax juꞌx tzalu nim ocslal e cyajbe tuꞌn cyonen.

3Pero amale ot txiꞌ nkꞌumena tzalu ka cyaja chi onena, cxeꞌltzen nchkꞌoꞌna Tito cyuyey tuya tzunj caꞌbatl ocslal, tuꞌntzen t-xiꞌ cyonen tuꞌn tbint cyuꞌna, tuꞌntzen tel nyola jax cywitz xjal tzalu cyiꞌja. E xiꞌ nkbaꞌna cye ocslal tzalu: “Ntzkꞌiꞌntla cbinel cye ocslal aj Corinto cyuꞌn tuꞌn ttzket cyonbil,” ntz̈iya. Juꞌ tzunj ejeeꞌ tzunj oxe ocslal lu chi pon te nimsalte cycꞌuꞌja tuꞌn tchmet cyonbila, tuꞌntzen tel nyola jax cyiꞌja,

4tuꞌntzen mintiiꞌ chꞌixbajil cyxola. Laꞌ alcye jun kꞌij chin pomela cyxola, bix kape tuya cab ocslal te tzalu tuj Macedonia cxeꞌl wuyena. Ojtzen kpona, bix klaꞌ tzuna ka cycyꞌiy chi onena, nimtzele nchꞌixewa tiꞌj, bix cyuyaxa attzele cychꞌixewa tiꞌj, cuma cchicꞌajaxel amale baꞌnt nyola cyiꞌja nejl, pero min ma tzꞌetl jax.

5Juꞌ tzunj ma txiꞌ nkanena j-oxe ocslal tuꞌn cypon nejl cyxola nwitza. Ejeeꞌtzen chi pon te nimsal cycꞌuꞌja tuꞌn tcub cykꞌoꞌna jcyonbila nim o cykꞌumey, tuꞌntzen otk cub baj cyuꞌna oj npona. Waja tuꞌn tcub cykꞌoꞌna tuya cykil cycꞌuꞌja, yaaꞌn tuya ẍpiẍen.

6Key hermano, cxeꞌl nkꞌoꞌna tumel cyey tiꞌj ti tten tuꞌn tcub cykꞌoꞌna. Jxjal yaaꞌn nim tawal, jax yaaꞌn nim tjaꞌtxꞌen cjawel. Jxjal nim tawal, jax nim tjaꞌtxꞌen cjawel.

7Teeylex juun xjal cwel tbisen jteꞌ tkꞌaꞌ te cyonbil, bix oj tkꞌonte, yaaꞌn tuya bisbajil tiꞌj bix yaaꞌn lojoꞌn tiꞌj tuꞌn tcub tkꞌoꞌn, sino tuyaxix cykil tcꞌuꞌj, cuma ntzalajtzen Dios tiꞌj jun xjal oj t-xiꞌ tkꞌoꞌn tuya cykil tcꞌuꞌj.

8At tipemal Kman Dios tuꞌn tkꞌonte cykilcaj il tiꞌj te cyey tuꞌntzen cyitzꞌja, bix tuyax tuꞌn cyonena cyiꞌke cyuyey mebe.

9Tz̈i tuj tyol Dios cyjulu: “Jxjal n-onen tuya nim cye mebe, juꞌx cxeꞌl tuya tonbil,” tz̈i tyol Dios.

10Dios ntzaj kꞌonte iyaj tej xjal awaal tuꞌntzen tawan, bix mas yaj ntzaj tkꞌoꞌnxin jkjatxꞌen tuꞌntzen at twa. Juꞌtzen tten oj cyonena cye mebe. Tisen ntzaj tkꞌoꞌn Dios iyaj tej xjal awaal tuꞌn tawan, juꞌxse ntzaj tkꞌoꞌn Dios cyey tuꞌn cyonena cye mebe. Katzen nchi kꞌona onbil cye mebe, tisentzen chi awana. Bix tisexsen ntzaj tkꞌoꞌn Dios jkjatxꞌen, juꞌxsen ntzajtzen tkꞌoꞌnxin cyey tuꞌn cyonena mastl.

11Ka nchi oney cye mebe, ctzaal tkꞌoꞌn Dios mastl cyey, tuꞌntzen t-xiꞌ cyonena tuya mastl kej xjal pena nchi itzꞌja. Bix oj t-xiꞌ nkꞌoꞌna cyonbila cyej ocslal tuj Jerusalén pena nchi itzꞌja, jax cxeꞌl cykꞌoꞌn chjonte te Dios tiꞌj.

12Oj t-xiꞌ cyonena ke mebe ocslal, nxiꞌ cyonena yaaꞌn nuk tuꞌn cyitzꞌj, sino jax juꞌx cxeꞌl cykꞌoꞌn chjonte te Dios.

13Bix cxeꞌl cykꞌoꞌn chjonte te Dios, yaaꞌn oꞌcx tuꞌnj ẍi onena cyiꞌj bix cyiꞌj cabtl mebe, sino tuyaxsen tzin cyyeecꞌana kꞌiꞌn tyol Cristo cyuꞌna, yaaꞌntzen nuk tzin cykbaꞌna.

14Bix cxeꞌl cykꞌoꞌn chjonte te Dios cyiꞌja, bix cꞌoquel cyakꞌa cye, cuma tuꞌnj t-xtalbil Dios cyey o txiꞌ cykꞌoꞌna cye tuya cykil cycꞌuꞌja.

15Chjonte te Dios jun nimxsen t-xtalbil cyibaja.