SANTIAGO 1 - Mam of Todos Santos -- Guatemala Unicode

Jun kꞌolbebl tuꞌn Santiago

1Inayena Santiago. Jun t-akꞌanal Dios kena, bix jun t-akꞌanal Kaaw Jesucristo. Nxiꞌ nkꞌoꞌna jun nkꞌolbebla te cyey judío ma chi el tz̈itja tuj cykilca twitz txꞌotxꞌ.

Ntzaj tkꞌoꞌn Dios knaabl

2Key ocslal, ka ma tzaj pena bix qꞌuixcꞌaj bix jun kaꞌ cyiꞌja, miꞌn chi bisena, sino chi tzalaja,

3cuma cytzkiꞌna ka ma tziyꞌx kej qꞌuixcꞌaj lu cyuꞌna, nchi ajbentzen tuꞌn tcywix cyocslabla tiꞌ Cristo, bix ctemel mas cypasensyey.

4Iltzen tiꞌj tuꞌn tten cypasensyey, tuꞌntzen tzꞌakl cynaabla, tuꞌn mintiiꞌ palt cyey tuj cyocslabla.

5Katzen at jun xjal cyxola ka at-x taj tnaabl tiꞌ, kanenx te Dios, bix ctzaal tkꞌoꞌn Dios tnaablxin, cuma taj Dios tuꞌn ttzaj tkꞌoꞌn nim baꞌn cye xjal. Min tzꞌoc ilen Dios kiꞌj oj nko kanen texin.

6Pero oj t-xiꞌ kkanen, ilxsen tiꞌj cꞌoquel ke kcꞌuꞌj tiꞌjxin, bix miꞌn baj kcꞌuꞌj, cuma ka ma baj tcꞌuꞌj jun xjal tiꞌ Dios oj nxiꞌ tkanen, juꞌtzen tisen mar nyucch jaca maj tuꞌn cykꞌiꞌk.

7Ka ma txiꞌ cykanena te Dios pero min tzꞌoc ke cycꞌuꞌja tiꞌjxin, mlay tzaj tkꞌoꞌnxin cyey,

8cuma tuya caꞌba twiꞌ cycꞌuꞌja nxiꞌ cykanena, bix yaaꞌn cyiw cycꞌuꞌja tuj cyocslabla.

9Yal kej ocslal mebe, tuꞌn cytzalaj, cuma ma kꞌoj jawnex cyoclen tuꞌn tiyꞌx qꞌuixcꞌaj cyuꞌn tisen iyꞌx tuꞌn Cristo.

10Jax kej ocslal kꞌine, tuꞌn cytzalaj, pero yaaꞌn tiꞌj cykꞌinemal, sino tiꞌj ma tzaj tkꞌoꞌn Dios tuꞌn cyoc te chꞌin, cuma n-el cyniyꞌ tiꞌj cykilca kꞌine chi pjel, tisen txmaquel cꞌul.

11Oj n-ul kꞌij, nkꞌon nim cyak, biꞌx ntzkij cꞌul, bix n-el tzꞌak txmaquel, bix naj tilbil. Jaxsen juꞌx jxjal kꞌine. N-oc tkꞌon tiib tiꞌ tikꞌch at twitz txꞌotxꞌ, pero cymel, tisen txmaquel cꞌul.

Cyꞌiwlaꞌn taꞌ jxjal miꞌn cyaj tkꞌoꞌn tocslabl tiꞌ Cristo oj n-oc qꞌuixcꞌaj tiꞌj

12Cyꞌiwlaꞌn taꞌ jxjal min cyaj tkꞌoꞌn tocslabl tiꞌ Cristo oj n-oc qꞌuixcꞌaj tiꞌj, cuma ka ma tziyꞌx qꞌuixcꞌaj tuꞌn, ckꞌojeltzen tcotz, jaj tchunkꞌlal te junx maj o tkba Dios te cyej xjal n-oc takꞌ cye.

13Katzen at jun xjal n-oc niyꞌbebl tiꞌj tuꞌn tbint jun kaꞌ tuꞌn, miꞌn txiꞌ tkbaꞌn ka ja Dios ma tzꞌoc cyakwusante tuꞌn tbint jyaaꞌn baꞌn tuꞌn, cuma tcyꞌi te Dios tuꞌn tbinchante jun kaꞌ, bix bajx tzaaꞌ tkꞌoꞌnxin jun yol te jun xjal tuꞌn tbint jun kaꞌ tuꞌn.

14Tiꞌjx tnaabl xjal n-el itzꞌj niyꞌbebl te, cuma npon tcꞌuꞌj xjal tiꞌj tajbil tnaabl aj il, bix nsbuj tuꞌn.

15Bix oj n-oc tbiꞌnxin, bix nxiꞌ tzꞌakxin tuj il, bix ntz̈ꞌiy tilxin. Ctkꞌaꞌtzen tcyamecyxin te junx maj tuꞌn tilxin.

16Key ocslal n-oc cyakꞌa weya, miꞌn chi tzpeta tiꞌ Dios,

17cuma nuk jaj cotz baꞌn bix nuk jaj tbanelxix tzin tkꞌoꞌn Kman Dios tuj cyaꞌj ke. Jkꞌij bix xjaw bix ke cheꞌw e tbinchaxin, nchi bet jaca hora, bix nchꞌixpet xlequen tzin cykꞌoꞌn. Pero te Dios, min tchꞌixpu tnaabl.

18Juꞌ e tajbexin tuꞌn ttzaj tkꞌoꞌnxin ke tuꞌn koc te tcwalxin tuꞌnj jaxxix tyolxin, tuꞌntzen koc te tneel ocslal cyxol xjal, tisen tneel twitz awal.

Il tiꞌj tuꞌn tbint tyol Dios kuꞌn yaaꞌn nuk oꞌcx tuꞌn toc kbiꞌn

19Key ocslal n-oc cyakꞌa weya, cybiꞌnc ja yol lu. Mas baꞌn tuꞌn t-xiꞌ cybiꞌna tyol Dios twitzj tuꞌn t-xiꞌ cykbaꞌna nuk cyexa cyyola. Bix miꞌn chi jaw kꞌojl naja,

20cuma mlay chi ajbena te Dios tuya cykꞌoja.

21Juꞌ tzunj, cykꞌoꞌncj cykilcaj yaaꞌn baꞌn bix jkaꞌ, bix tuya jun cynaabla maans, chi lpexa tiꞌj tyol Dios ma cuꞌx awet tuj cyanema, bix at tipemal tuꞌn cycleta tuꞌn.

22Il tiꞌj tuꞌn tbint tyolxin cyuꞌna, cuma ka nuk ma tzꞌoc cybiꞌna tyolxin pero min cybiy, ncubtzen cysbun cyiiba juꞌwa.

23Alcyej xjal nuk nxiꞌ tbiꞌn tyol Dios pero min bint tuꞌn, juꞌtzen tisen jun xjal n-ocx tcyeꞌyen twitz tuj jun respej.

24Oj tbaj tcyeꞌyen twitz, nxiꞌtzen, bix n-el tuj tcꞌuꞌj tiiꞌn tcyeꞌnc.

25Pero alcyej xjal n-oc tkꞌon tiib jaca kꞌij tuꞌn tel tniyꞌ tiꞌj ti toc tuꞌn tley Dios, bix min n-el tuj tcꞌuꞌj ti toc tuꞌn ley, sino n-oc tipen tiꞌj tuꞌn tbint tuꞌn, cweltzen xtalbil tibaj, cuma tbanelxix tley Dios, bix nko tzakpet tiꞌ il tuꞌn.

26Ka at jun xjal cyxola najben te Dios tuj twitz, pero min ttzuy tiib tiꞌ tyol, nuk nsbun tiib, bix mintiiꞌ tajbel tocslabl.

27Chi elela baꞌn tuj twitz Kman Dios ka ma chi onena cyiꞌj neeꞌ mebe bix cyiꞌj xuuj viuda oj n-oc pena cyiꞌj, bix ka ma cytzuy cyiiba twitz il tzalu twitz txꞌotxꞌ.