1 CORINTIOS 6 - Mam of Todos Santos -- Guatemala Unicode

Yaaꞌn baꞌn cyxiꞌ ocslal kanel tiꞌ juntl ocslal cywitz aj cawel te twitz txꞌotxꞌ

1Key hermano, at juntl il o nbi cyiꞌja. O nbiꞌya oj at chꞌin cykꞌoja cyxola ejeeꞌy ocslal, biꞌx nchi pon baja cywitz cawel yaaꞌn ocslal tuꞌn tbaj cycyeꞌyen al tzinen tyol bix al min. ¿Tikentzen min nbint cyuꞌna cyxolxa tuꞌn tbaj twiꞌ cykꞌoja?

2¿Mimpatzentiiꞌ tumel cyuyey ke ocslal chi binchal stis bix chi cawel cyibaj xjal te twitz txꞌotxꞌ laꞌ alcye jun kꞌij? ¡Bix lux ke cyey mix nbina cyuꞌna tuꞌn tbint jun chꞌin stis cyxola! Tzinx nchi jyona kej xjal yaaꞌn ocslal te nicꞌulte cyey, ejeeꞌy ocslal.

Yaaꞌn tumel ja lu.

3¿Mimpatzentiiꞌ tumel cyuyey hasta ke ángel ko cawel cyibaj? Katzen juꞌwa, ¿mlaypale bint tuꞌn tcub knincꞌuꞌn ti jilel chꞌin yaaꞌn nim t-xiꞌlen nbaj kxol?

4Oj at jun kꞌoj cyxola, ¿tuꞌn tiken nchi jyona stis cywitzj xjal yaaꞌn ocslal? Masetnele baꞌn tuꞌn toc cykꞌoꞌna jun ocslal mas ajnintz tnaabl te nicꞌul cyey tiꞌ jun cykꞌoja.

5Ja tzunj lu nxiꞌ nkꞌumena cyey nuk tuꞌn ttzaj cychꞌixewa. ¿Mimpatzen-al jun tocx cyxola at chꞌin tnaabl te nicꞌul te cyey tiꞌ cykꞌoja?

6Nchi kꞌojla cyxolalexa, bix yaaꞌn oꞌcx, sino biꞌx npon baj cykꞌoja cywitz xjal yaaꞌn ocslal.

7¡Nimxsen jun chꞌixbajil oj ncheꞌxa jyolte ley tiꞌ juntl ocslal! Mas baꞌn tuꞌn tiyꞌx jun yasbil cyuꞌna tuꞌn jun kaꞌ n-oc tbinche juntl ocslal cyiꞌja bix mas baꞌn tuꞌn tiyꞌx cyuꞌna oj n-alkꞌan juntl ocslal cyiꞌja, twitzj tuꞌn cyxiꞌy jyolte ley tiꞌ cyuyey cywitz xjal yaaꞌn ocslal.

8Pero yaaꞌnj baꞌn tzin cyjyoꞌna, sino nchi jyona kꞌoj tiꞌ juntl. Bix yaaꞌn oꞌcx, pero hasta nchi alkꞌana. Bix yaaꞌn nuk nchi alkꞌana, sino hasta tiꞌ juntl ocslal nchi alkꞌana.

9¿Mimpatzen tzꞌel cyniꞌya tiꞌj kej nchi binchan kaꞌ miꞌn chi oc tuj tcawbil Dios? Miꞌn chi tzpeta tiꞌj lu. Jax tej yol lu. Kej xjal at cypaj, bix kej niyꞌ cyiiꞌ t-xuꞌl cyuya, bix kej nchi niman twitz cysant, bix kej xinak ncub cykꞌon cyiib te xuuj tuꞌn toc ipan juntl xinak cyiꞌj, bix kej xuuj nchi jaw meltzꞌaj cyuya juntl xuuj,

10bix kej nchi alkꞌan, bix kej n-oc chiꞌl cycꞌuꞌj tiꞌ tikꞌch te juntl, bix kej bola, bix kej nchi yasen cyiꞌ cabtl, bix kej ncub cytzyuꞌn xjal tuꞌn tel cypwak, cykilca tzunkej lu mintiiꞌ cyoquelex tuj tcawbil Dios.

11Nejl juꞌ tzunkey tisen kej lu. Pero yaltzen jaꞌlewe ya txjoꞌnkey tuj cyila tuꞌn Dios. Dios o scyꞌonte cyey tuꞌntzen cyoca te t-xjal. Bix jiquentltzen eteꞌy twitz Dios nuk tuꞌnj o bint tuꞌn Kaaw Jesucristo cyiꞌja. Bix tuꞌn Espíritu Santo ocslanakey. Juꞌ tzunj miꞌn cheꞌxa cywitz ke xjal yaaꞌn ocslal te jyol stis tiꞌ jun cyuyey ocslal.

Cꞌajbel kxumlal te Dios

12Ya juntl yol. At juun cyey nkꞌumente cykilca baꞌn tuꞌn tbint. Pero we cxeꞌl nkꞌumen cyey, amale cykilcat baꞌn, pero yaaꞌn cykil najben. Ka at jun kajbil kaꞌ mlay weꞌ, jatzen kaawja.

13Jatzen cyey, tzin cykbaꞌna oj taj kxumlal chꞌimacꞌa xuuj, juꞌ tisenj oj kaj waabj twitz Dios. Oj ntkanen kcꞌuꞌj waabj, baꞌn tuꞌn t-xiꞌ kwaaꞌn. Bix juꞌx oj tkanen kxumlal chꞌimacꞌa xuuj, baꞌn tuꞌn t-xiꞌ kbinchaꞌn, bix tzul jun kꞌij tuꞌn Dios tuꞌn tbaj tilel waaꞌn bix pajbaj, tz̈ikey juꞌwa. Junelne n-eꞌla waabj tuya pajbaj tuj cywitza. Pero yaaꞌn tumel cyrasona. Min e jaw tbinchaꞌn Kaaw kxumlal te pajbaj. E jaw tbinchaꞌn texin kxumlal te texin, bix tuꞌn tiikꞌente t-xtalbilxin.

14Tisen o jatz tiiꞌn Dios Kaaw tuj mukbil, jaxse juꞌx cjawetz tiiꞌn Dios ejooꞌ tuj kcyamecy tuꞌn tipemalxin.

15Key hermano, ¿mimpatzen tzꞌel cyniꞌya tiꞌ kxumlal at tuꞌn tniman te Kaaw? Katzen tuꞌn tniman kxumlal te Cristo, yaaꞌntzen tumel tuꞌn tel kꞌiꞌn tuj tkꞌab Cristo tuꞌntzen toc kꞌoꞌn tuj tkꞌab jun puta xuuj.

16¿Mimpa tzꞌel cyniꞌya tiꞌj oj toc ipan jun xjal tiꞌ xuuj aj paj, junx cyxumlal otk tzꞌeꞌla? Tz̈itzen tyol Dios: “Oj toc ipan jun xinak tiꞌ jun xuuj, twitz Dios junx cyxumlal otk tzꞌeꞌla,” tz̈i tyol Dios.

17Pero at juntl kmojbabl kiib mas jawnex twitzj kmojbabl kiib tuya kxuꞌl. Oj t-xiꞌ kkꞌon kiib te Kaaw, junx kanem otk tzꞌeꞌla tuyaxin.

18Juꞌ tzunj, cykꞌoncja cyachbila cyuya xuuj. Jatzen cyey tzin cykbaꞌna min txiꞌ tnaabl jun xjal tuj il oj nbint il tuꞌn. Pero we nxiꞌ nkbaꞌna cyey yaaꞌn juꞌwa. Ka at jun n-oc ipan cyiꞌ chꞌimacꞌa xuuj, biꞌx nxiꞌ tnaabl tuj il.

19¿Mimpa tzꞌel cyniꞌya tiꞌj ke kxumlal tnajbil Espíritu Santo? O tzaj tkꞌoꞌnte Dios Tspirit te najal kuya. Juꞌ tzunj ejooꞌ tisen jun jaaꞌ, pero yaaꞌn te ke, sino te Dios tja.

20Lokꞌajtzen o ko tema tuya nim twiꞌ, cuma tuꞌn tcyimlen Tcwal Dios e tlokꞌ ejooꞌ. Juꞌ tzunj il tiꞌj cꞌoquel cycꞌuꞌja tiꞌ cyxumlala tuꞌn tajben te tja Dios. Miꞌn tzꞌoc cytzꞌilsaꞌna cyuya juntl xuuj.