LOS HECHOS 18 - Mam of Todos Santos -- Guatemala Unicode

Tej tpon Pablo tuj tnom Corinto

1Tbajlenxitl tzunj juꞌwa, bix e cub tchꞌixbeꞌn Pablo tbeyel taakꞌen, bix etzxin tuj tnom te Atenas, bix e xiꞌxin tuj tnom te Corinto.

2Jatztzen oca noj Pablo tiꞌ junxin judío Aquila tbi. Jxin Aquila jatzen otk tzꞌitzꞌjaxin maan tuj ttxꞌotxꞌ Ponto. Pero maatkxsen tpomlenxin tuya t-xuꞌlxin Priscila te najal tuj txꞌotxꞌ te Italia. Pero attzen jun kꞌij ja tzunj xin Claudio, cawel tibaj cykil twitz txꞌotxꞌ, otktzen tkbaxin tuꞌn cyetz baj cykilj xjal judío tuj tnom te Roma tuj Italia. Juꞌtzen tten tpomlen Aquila najal tuj Corinto. Jatztzen e cnetakexin tuꞌn Pablo, bix e xiꞌxin kꞌolbel.

3Bixsen e posadayin Pablo tjaxin. Te Aquila taakꞌen, binchal ke neeꞌ cocꞌ jaaꞌxin. Jaj najben cye soldado oj ncheꞌx tuj kꞌoj. Bix jax juꞌxte Pablo, baꞌn texin tzꞌakꞌanana juꞌwa, bix akꞌkexin akꞌanal junx.

4Ke sábadotzen bix el Pablo tuj taakꞌen tuꞌn tocxxin cyuj camon jaaꞌ, bix nuk e yolenxin cyuya xjal judío bix ke xjal griego, tuꞌn tcub cycꞌuꞌj tuꞌn cyocslan tiꞌ Jesús.

5Cwa cyetz Silas tuya Timoteo tuj Macedonia, bix e ponkexin tuj Corinto. Tejtzen cyponxin, bix e cyaj tkꞌoꞌn Pablo taakꞌen junx maj, tuꞌn toc tenxin junx maj bix tuya cykil tanemxin te kbalte cye xjal judío ka ja Jesús Scyꞌoꞌn tuꞌn Dios, jaxsen xinj tzin cyyoꞌn xjal judío.

6Pero min e cybi judío ja yol lu, bix akꞌ ke xjal judío xool cyiw yol bix kꞌoj yol tiꞌ Pablo. Entonces bix e cyaj ttz̈toꞌn Pablo kuk cyiꞌ tiꞌj te yecꞌbilte ka otk cyaj tcyeꞌyen Pablo ejeeꞌxin tuj cyilxin. Bix e xiꞌ tkbaꞌnxin cye:

—Ma txiꞌ nkꞌoꞌn jun tumel tuꞌn cyiikꞌentey chunkꞌlal te junx maj. Katzen ma cheꞌxa tuj kꞌakꞌ, junxsen maj cyey cyculpey, yaaꞌntzen wetlwe. Ke cyey ejeeꞌy judío, mayꞌxsen tzꞌel cyxooꞌna tyol Dios junx maj. Matzen chixwe cyiꞌj xjal yaaꞌn judío te oylxte cye―tz̈itzen Pablo cye judío.

7Tej t-xiꞌ tkbaꞌn Pablo yol juꞌwa, bix etz Pablo tuj camon jaaꞌ, bix e xiꞌxin tja junxin xjal Tito Justo tbi, nka najlacxin ttxlaj camon jaaꞌ. Ja tzunj xin Justo nuk nabinx texin tyol Dios.

8Mastzen yaj ja tzunj xin Crispo, cawel tuj camon jaaꞌ, bix cykil ke te tjaxin, bix ocslanke. Bix nim xjal te Corinto, tejtzen toc cybiꞌn jtyol Pablo, bix ocslan ke xjal, bix e bautizarjke.

9Attzen jun kꞌij te koniyan bix ul Kman Jesús tuj twitziyꞌ Pablo, bix e tkbaxin:

—Miꞌn tzaj ttz̈i tiꞌja. Baꞌnte oj tyolen tey we wiꞌj. Miꞌn weꞌy tyolena,

10cuma lu kenwe ntiin tuyey. Cxeꞌl nkbaꞌn tey min-al cꞌoquel ipan tiꞌja, bix min-al cꞌoquel kꞌojl tiꞌja tuj ja tnom lu. Nimxsen xjal cꞌoquel lpe wiꞌj tzalu―tz̈i Jesús te Pablo tuj twitziyꞌ.

11Entonces bix e cyaj Pablo tuj Corinto te jun jnabkꞌi tuya niyꞌjan. Tujtzen cykil ja tyema e xnakꞌtzan Pablo tyol Dios cye xjal.

12Pero tejtzen tjax jxin Galión te cawel tuj ttxꞌotxꞌ Grecia, juntl tbi ttxꞌotxꞌ Acaya, bix oc cychmon cyiib cykil ke judío te kꞌojlel tiꞌ Pablo, bix e xiꞌ kꞌiꞌnkexin cywitz cawel.

13Bix e xiꞌ cykbaꞌnxin te cawel:

—Taat, tej xjal lu niyꞌ te ja te yajlalcꞌa ke xjal tuꞌn cynaꞌn Dios, pero jtley jun wikxitl tten bix junx maj kaꞌ twitzj ley te Roma―tz̈itzen ke xjal judío.

14Bix e jket ttzi Pablo te coꞌpl tiib. Pero tujx naj takꞌ Galión, jxin cawel, yolel cyuya judío. Tz̈i tzunxin cyjulu:

—Key taat judío, nuket ma tzꞌoctz cykꞌoꞌna jun techel ka at tkaꞌyel ma cub tbinchen Pablo, tuyatzen cykil ncꞌuꞌj cheꞌx ncyeꞌyena tiꞌj.

15Pero yaaꞌn juꞌ ttena. Nuk tiꞌ cyley judío te ja. Yaaꞌn cyeycye Roma cyley. Nuk yol te ja cyey cyxola. Mintiiꞌte til binne tten. Cynincꞌuꞌnx cyiiba. Mlay tzꞌocx nkꞌonwe wiib tuj cyleya―tz̈itzen Galión.

16Tejtzen tkbante xinj juꞌwa, bix etz tlojoꞌn cawel ejeeꞌxin tiꞌjxe stisbil.

17Bix e cytzuy xjal judío jxin Sóstenes, jxin acꞌaj cawel tibaj camon jaaꞌ, bix e baj cypjuꞌn xjal jaxin twitz stisbil. Pero amale otket tzꞌoc tcyeꞌyen Galión tikꞌch jilel, min e xiꞌ tkꞌoꞌnxin tcꞌuꞌjxin tiꞌj.

18Nimxtl kꞌij e ten Pablo tuj Corinto. Pero cwa tkꞌolbenxin cye ocslal, bix etzxin. Yaltzen cye Aquila tuya Priscila, bix e xiꞌ cyjunen cyiibxin tuya Pablo, bix e ponkexin tuj jun nka tnom te Cencrea. Jatztzen eꞌla mtzet ttzmal twiꞌ Pablo te techlal ka otk tcuyante Pablo jun tyol otk tkba twitz Dios nejl. Tbajlenxitl tzunj juꞌwa, bix ocxkexin tuj jun barc tuꞌn tcub cyxajbenxin aꞌ, tuꞌn cyponxin tuj ttxꞌotxꞌ Siria, jaaꞌ taꞌ jtnom te Antioquía.

19Tujtzen cybexin e ponakexin tuj tnom Efeso, jaaꞌxsen e cyjaꞌ te Priscila tuya Aquila te junx maj. Jaan Pablo e ten tuj Efeso cab kꞌij. Bix ocxxin tuj camon jaaꞌ te rasonel cyuya judío.

20Bix oc ten ke judío cubsal cywitz texin tuꞌn tcyaj Pablo cyuyaxin. Pero min e tcuya Pablo.

21Bixsen e kꞌolbenxin cyexin, bix e xiꞌ tkbaꞌnxin ke mancꞌbil tyolxin:

—Weya il tiꞌj tuꞌn npona Jerusalén te iyꞌsal tej ninkꞌij tzul. Pero ka ma tcuya Dios, chin ul meltzꞌajwe kꞌolbel cyey juntl maj―tz̈i Pablo cye judío. Bix etzxin tuj Efeso tuj jun barc.

Tej t-xiꞌ tzyet toxen maj taakꞌen Pablo te kbalte tyol Dios

22Cwax tpon barc tuj tnom te Cesarea, bix e xiꞌ Pablo tuj Jerusalén. Jatztzen e kꞌolbena Pablo cye ocslal tuj tja Dios, bix ajcꞌatz meltzꞌajxin tuj Antioquía juntl maj, jaaꞌj e tzaaꞌ tzyet tbexin jatxe nejl.

23Tel-lenxitltzen cab tkꞌijxin jatzewe, bix etz Pablo juntl maj tuj tbe. Bix aj meltzꞌajxin tuj cykil kej tnom tuj ttxꞌotxꞌ Galacia bix Frigia, jaaꞌj otk tziyaxin xnakꞌtzal nejl. Jakꞌch iꞌyaxin n-ocxa tnimsaꞌnxin cycꞌuꞌj ocslal.

Tej tkbaꞌn Apolos tyol Dios tuj tnom Efeso

24Joocꞌtzen at-xte Pablo tuj Galacia bix Frigia, bix e ponxin tuj tnom Efeso junxin judío Apolos tbi. Jxin Apolos te Alejandríaxin te ttxꞌotxꞌ Egipto. Jatzen jun xjalj ttzkiꞌn ti tten tuꞌn tcub cycꞌuꞌj xjal, bix junx maj ttzkiꞌnxin tyol Dios tuj uꞌj.

25Bix jax ttzkiꞌnxin tikꞌch otk tkba Juan Bautista tibaj Kman Jesús. Tuyaxsen cykil tcꞌuꞌj Apolos e xnakꞌtzan cyiꞌ xjal tuj Efeso tiꞌj alcyej n-el tniyꞌxin tiꞌ Jesús. Otk tzꞌel texin tniyꞌ tiꞌj ka oj tbautizarj jun xjal, nxiꞌtzen tyeecꞌan ka otk cyaj tcyeꞌyen til. Pero min el tniyꞌ Apolos tiꞌj otk tzul aj Jesús.

26Juꞌtzen tten xnakꞌtzan Apolos. Kꞌukbaj cꞌuꞌl xsunxin takꞌxin yolel tuj camon jaaꞌ. Pero tejtzen toc tbiꞌn Priscila bix Aquila ke tyol Apolos, bix el cyniyꞌxin tiꞌj ka at-x chꞌintl min tzꞌel tniyꞌxin tiꞌ Jesús. Entonces bix ex cyiiꞌnxin Apolos tjunal, bixsen e baj cykbaꞌnxin mas tuj chicꞌaj jax yol. Tz̈i tzunkexin cyjulu:

—Apolos, lu tey nkban cye xjal: “Ya lu Scyꞌoꞌn tuꞌn Dios tzula. Cybincham cyiiba, bix chi meltzꞌaja te kꞌil texin,” tz̈i tzuna, tisenx e tkba Juan Bautista. Pero qꞌuelel tey tniyꞌ tiꞌj tej xin Scyꞌoꞌn tuꞌn Dios o tzul aj texin―tz̈i tzunkexin.

27Bix e tcuya Apolos kej yola. Yajcꞌatltzen bix e tajbexin tiyꞌxin tuj mar tuꞌn tponxin tuj ttxꞌotxꞌ Acaya te kbalte tbanel acꞌaj yol. Ke ocslal te Efeso el cye xjal baꞌn tuj cywitz, bix oc cyonen xjal jaxin, bix e cub cytzꞌiꞌbenxin jun uꞌj cye ocslal te Acaya tuꞌn cyiikꞌente xjal jaxin. Cwa tpon Apolos tuj tnom te Corinto tuj Acaya. Jatztzen oca tonenxin kej xjal otk cyiikꞌ coꞌpbil tuꞌn t-xtalbil Dios.

28Bix tuya nim tipemalxin tuꞌn tcub cyiꞌ xjal, bix e cub tyeecꞌanxin ti toc cyuꞌn tyol Dios, ka ja Jesús Scyꞌoꞌn tuꞌn Dios, jxin ayoꞌn te coꞌpl xjal, bix ayoꞌn cyuꞌn judío. Cywitztzen cykil xjal bix e cub tkꞌoꞌnxin tuj chicꞌaj ti tten cyxnakꞌatz yaaꞌn jiquen xjal judío tiꞌj Jesús. Bix jax min el cyiiꞌn cyexin cyiib tiꞌj.